Read Kpelle Lûu 8 Bible Online

Lûu 8 - Kpelle bible

Lûu 8

¹Nya ƃe e kɛ̀ ti, nàa pôlu ma Zîsɛ e lì daa kpaya-kpayai da bɛlɛ-pɛlɛɛi kélee su, gɛ Ɣâla-woo ƃo, gɛ Ɣâla ŋɔkâloŋ-laai maa-tuŋ lɛ́lɛɛ-ŋai lɛ. Ŋɔpôlu-ƃela puu kao feerɛi dí kɛ̀ gɔlɛ,

²bɛlɛɛ nɛyâai dîa e nyînaŋ nyɔ́mɔɔ-ŋai kpɛ̀ dípôlui, e díkula díkɔlɔ-fela-ŋai su: Mere Madalini nyii e nyînaŋ nyɔ́mɔɔ lɔ́ɔlu mɛi feerɛi kpɛ̀ bôlui,

³bɛlɛɛ Zoana ma nyii kɛ̀ a Ɛɛlɔ ŋɔpɛ́rɛi mɛi káa-nuu kɛ́tɛi Sûza ŋɔnɛnîi, da Suzana, bɛlɛɛ gbeli-ŋai dîa kɛ̀ kpɔnîi dîa a díyee-sãa.

⁴Tãi kpɔŋ kɛ́tɛ e ŋá tɛ̀ ma, ǹûai kɛ́ɛ da kula daa tɛi-tɛi-ŋai kélee sui, dí pà bɔ, e sáŋ sɔ̀ɔ dîɛ, ǹyɛɛi,

⁵“Sí-sɛŋ sí-nuu tɔnɔ ƃé lì ŋɔsí-sɛŋ sîi. Gɛɛ zîi, da è tòo berei ma, ǹûai dí sía mɛi, ŋɔni-ŋai ŋelei sui dí pa dí gbele.

⁶Da-ni dí tòo kɔni ŋá. Díkɛɛ da pɔmûŋ, dí kpàla, kpɛ́ni fêi, yá fé kɛ́ ní naa.

⁷Da è tòo ɣalêŋ-kpɔlɔ su. Díkelee dí pɔ̀muŋ a gîe, nya ƃe, ŋalêŋ-kpɔlɔi e kpìniŋ la e bàa.

⁸Da è tòo lɔii lɛ́lɛɛ ma, é pɔmûŋ, bɔmûŋ tɛi-tɛi kélee e ƃa a ŋuŋ tɔnɔ.” Gɛɛ a mɛni-ŋai ŋi ƃói, e làɣi ɣelêi, ǹyɛɛ, “Ǹúui wóli káa ma a gɛɛ e mɛni mɛnii, tɔɔ e mɛni.”

⁹Ŋɔpôlu-ƃelai dí m̀arê kɛ̀, dîyɛɛi, “Záŋ ŋi su-kulai ƃa le?”

¹⁰E mò dîa, ǹyɛɛ, “Káa ƃe Ɣâla ŋɔkâloŋ-laai maa-loo mɛni-ŋai kɔlɔŋɔɔ tɛɛ̂i kápɔ, kɛ́lɛ, ǹûai kpeli-ŋai dɛɛ̂i dípɔ a sáŋ a gɛɛ da gàa, dífe ŋá kaa, da m̀ɛni, dífe tàre zu.

¹¹“Záŋ ŋí su-kulai ká ŋí: Zí-sɛŋ-kaoi ƃa Ŋ̀âla-wooi.

¹²Nyii-ŋai berei mai, dia ƃa ǹûai da mɛ̀nii. À kɛ̀ ti, Dɛ̂ƃele a pâ e ŋ̀óoi kula dílii su a gɛɛ dífe pɔ̂ri lâai la, dí ƃalo.

¹³Nyii-ŋai tôo gɔnii ŋái, dia ƃa ǹûai da ŋ̀óoi mɛ̀ni, dí zɔlɔ ƃo a lii-nɛ̃ɛ. Kɛ́lɛ, dísame fé dímu, da lâa la a tãi kpua, kɛ́lɛ, su-kɔɔŋ a pâ dípɔ dí too pôlu.

¹⁴Nyii-ŋai tòo ŋalêŋ-kpɔlɔi sui, dia ƃa ǹûai da m̀ɛni, kɛ́lɛ, tãi da lì, ǹɔii su-mɛni lii-sɛlɛŋ, dɔɔ-laa lii-nɛɛi, da vulu-laa lii-nɛɛi da díkpàaŋ a gɛɛ díƃa fé pɔlɔ.

¹⁵Nyii-ŋai ǹɔii lɛ́lɛɛi mai, dia ƃa ǹûai da m̀ɛni dí ŋ̀óoi lâai kɛ́ a tɔ̃yâ-lii lɛ́lɛɛ dí ƃa a lii-kpele-perei.

¹⁶“Núu da fa pɔ̂ri laŋpo tɔɔ̂i e m̀ɛi pɛlɛ a sɛŋ-folo, kpaa máŋ e zee gbìŋ mu. Kɛ́lɛ, a zèe sɛŋ da mɛi a gɛɛ ǹûai lɔ̂i dí gwaa-ponoɔi káa.

¹⁷“Sɛŋ da fé naa ǹoɔ́ɔ nyii ve pâi kâai, kpaa máŋ loo-mɛni nyii ve pâi kɔ́lɔnîi, kpaa é kúla pono ŋá.

¹⁸“Maa-mɛni ma, ka kámɛi káa berei ka mɛni la; kpɛ́ni fêi, ǹúui sɛŋ da káa ǹyêei, ǹyaa ƃe da a pâi tɛɛ̂i bɔ, ǹúui sɛŋ da fé ǹyêei, ǹyaa máŋ, nyii gíli káa ma a gɛɛ gáa ǹyêei, a pâi kulâi ǹyêei.”

¹⁹Nya ƃe ǹee da ǹêɣe-ni dí pà bɔ. Kɛ́lɛ, dífe pɔ̂ri ni lɛɣɛ̂i la gbɔŋ-too-pere ma.

²⁰Nya ƃe dí mò ma, dîyɛɛi, “Ílee da ílêɣe-ni díkaa tɔɔ ni ŋini ŋá, da ŋ̀wɛ̂lii a gɛɛ dí íkaa.”

²¹Nya ƃe e díwoo su tòo, ǹyɛɛ dîa, “Nee da ńêɣe-ni ƃa diai da Ŋ̀âla-wooi mɛ̀ni dí gɛ́i.”

²²Nya ƃe e kɛ̀ ti, e kɛ̀ a ɣele tɔnɔ, e pili yá ŋá-keleŋ su da ŋɔpôlu-ƃelai. E mò dîa, ǹyɛɛi, “Kwaa lí ǹyái pôlu zîŋ-ƃelai nyíti ma manaa-pere.” Nya ƃe dí kɛ̀ liî.

²³Díkɛɛ ǹyái tiyenii, nyii e zòŋ. Nya ƃe fãa kɛ́tɛ e pɛ̀lɛ tɛ̂ɛi ma ǹyái ŋá. Géleŋ lá e kɛ̀ nâa fɛɛ̂i a yá. Díke-lee dí kɛ̀ saa-wolo lá.

²⁴Nya ƃe dí lì bɔ, dí ŋ̀ɛi lá ƃo, dîyɛɛ ma, “Kaamɔ̂ɔ! Kaamɔ̂ɔ! Kúŋuŋ lá káa pilîi!” Nya ƃe e ŋ̀ɛi lá ƃò e lono vãai pɔ bɛlɛɛ ǹya-ɣiliŋ ma; dí kpèra tumoɔ ma, gwaai kélee ma e kɛ́ tɔ̀ŋ.

²⁵Nya ƃe e mò dîa, ǹyɛɛi, “Kálaa-lai káa mi?” Dí kɛ̀ yaôi. Dípɛlɛ e pù, díkɛ mo díkîe-ni ma, dîyɛɛi, “Gɛ̀ ní, gbɛ̂ɛ ƃe ŋi? Kpɛ́ni fêi, a lôno vãai pɔ da ǹyái dí ŋ̀óo mɛ̀nii.”

²⁶Dí sèri Gɛ̂rɛsa lɔii su nyii gáa Galalii kɔlɛi.

²⁷Gɛɛ nâa a seri zîŋ ŋái, da daai-su-kpakolo tɔnɔ dí koyâŋ, nyînaŋ nyɔ́mɔɔ-ŋa díkɛ ƃo bôlu. E kɛ̀ kpɔ́ a gaŋ a tãi su kôya. Ve tela kɛ́ ní pɛ́rɛ da mu, fɛ̂ɛ molôŋ-saŋ su.

²⁸Gɛɛ a Zîsɛ káai, e làɣi e too gɔ́ɔ mu e m̀ó a ŋ̀óo su kɛ́tɛ, ǹyɛɛi, “Le-mɛni ƃe íyeêi í gɛ́ a ńyãa, Zîsɛ, yái a Ŋ̀âla Gɛ́tɛi Ǹóŋ? Ŋa íkpera fêi, ífe ŋ́ɛi maa nɔ̃̂ɔ.”

²⁹Kpɛ́ni fêi, e gɛ̀ nyînaŋ nyɔ́mɔɔi é kúla nalôŋ pôlu. (Kpɛ́ni fêi, e kɛ̀ ǹyée pɛlɛ̂i ma fie-fie; nya ƃe nalôŋ e kɛ̀ mɛi kaa mu, ŋiriɛɛ a yɔlɔ, doɔɔ kpɔnɔ ŋá, kɛ́lɛ, e ǹyɔlɔi têe. Nyînaŋ nyɔ́mɔɔi e gbɛ̀ e li vɛ̃ɛ-kpâlaŋ su.)

³⁰Zîsɛ e m̀arê kɛ̀, ǹyɛɛi, “Ílaa ƃa gbɛ̂ɛ?” E mò ma, ǹyɛɛi, “Kpɔŋ-too.” Kpɛ́ni fêi, nyînaŋ nyɔ́mɔɔ támaa dí kɛ̀ bôlu.

³¹Nya ƃe dí gberâi fé a gɛɛ ve dítɛɛ ǹóa kɛ́tɛ kpóŋ kôya su.

³²Kwii-ƃoi-kpulu kɛ́tɛ ƃe kɛ̀ naa, díkɛ dílaa mìi ǹyéei ma; nya ƃe nyînaŋ nyɔ́mɔɔ-ŋai dí gbera fê a gɛɛ e dílɛɛ naa dí kɛ́ moi-kpulu kɛ́tɛi pôlu. Zîsɛ e fàa ma.

³³Nya ƃe, nyînaŋ nyɔ́mɔɔ-ŋai dí kùla nalôŋ pôlu, dí li moi-ŋai pôlu. Moi-ŋai dí botoi yêŋ a kirɛ, dí píli boai su, dí lɛɛ ǹyái su.

³⁴Mòi mɛi-kaa-ƃelai kɛ́ɛ da mɛnii ŋi káa kɛ̂i, dí lì a kirɛ, dí m̀o daai su da ǹɔii kélee su.

³⁵Nya ƃe ǹûai dí lì a gɛɛ dí mɛnii káa kɛ̂i. Dí pà Zîsɛ pɔ, dí nalôŋ káa nyii nyînaŋ nyɔ́mɔɔ-ŋai dí kɛ̀ bôlui, gɛ ƃo see ni Zîsɛ kɔ́ɔ mu, maa ɣiriɛ, gíli ŋá ponoɔ nâa. Gɛɛ ti, dí yào.

³⁶Diai mɛnii káa kɛ̀i, dí mò dîa berei nalôŋ, nyînaŋ nyɔ́mɔɔ-ŋai dí kɛ̀ bôlui, e kɛ̀ nâa a maloɔ lai.

³⁷Nya ƃe gbɔŋ kélee kùla Gɛ̂rɛsa lɔii gwaa kélee mai, dí Zîsɛ kpera fé a gɛɛ e siɣe díkɔlɛ e li. Kpɛ́ni fêi, yao kɛ́tɛ e dísòŋ. Nya ƃe Zîsɛ e pìli yá ŋá-keleŋ su, e li pôlu.

³⁸Nalôŋ ǹyînaŋ nyɔ́mɔɔ-ŋai dí kùla bôlui è Zîsɛ kperâi fè a gɛɛ é lɛ́ɛ gɔlɛ. Kɛ́lɛ, è dɛ̀ɛ pôlu, ǹyɛɛ ma,

³⁹“Lí ípɔ naa, í mɛni kɛ́tɛi lɛ́ dîa Ɣâla a gɛ́ yɛ̂i.” Nya ƃe è lì, è duŋ táa-tâa daai su kwaa kélee mɛni kɛ́tɛi Zîsɛ è gɛ̀ mìi.

⁴⁰Nya ƃe è kɛ̀ tí, tãi Zîsɛ è pène la pôlui, gbɔŋ è ǹyée sèe mù a lii-nɛ̃ɛ. Kpɛ́ni fêi, díkelee dí kɛ̀ maa kpɛnîi.

⁴¹Nya ƃe nalôŋ tɔnɔ e pà, ǹáa ƃe kɛ̀ a Zailɔ, nyii kɛ̀ a Ŋ̀âla-fɛli-kerei mɛi-nuui; e tòo Zîsɛ kɔ́ɔ mu, e gbera fé a gɛɛ e pa ŋɔpɛ́rɛi mu,

⁴²kpɛ́ni fêi, lóŋ-nɛni tɔnɔ kpéŋ ƃe kɛ̀ ǹyêei, ŋɔpɔlɔ-pɔlɔ-laa e lɛ̀ɛ a guro e kɛ́ a kóraŋ puu kao feerɛ, nya ƃe e kɛ̀ saâi. Zîsɛ kɛ́ɛ liî naai, kpɔŋ e kɛ̀ a dínaŋɔɔ ma.

⁴³Nɛnî tɔnɔ ƃe kɛ̀ naa, ŋãa-kɔlɔ-fela e kɛ̀ ma kóraŋ puu kao feerɛ yée mu. Zɛŋ-kaoi kɛ̀ ǹyêei e gélee tɛ̀ɛ ŋɔkɔlɔ-fela sále-ƃelai pɔ. Díta tɔnɔ kpîŋ fe pɔ̂ri ni kɛ̀ m̀álôi.

⁴⁴Nɛnîi e pà Zîsɛ pôlu-pere e ŋɔyokpoi soŋ ŋ̀óli lá; a naa maa felaa, ŋ̀ãai kɛ̀ pûi e kpèra.

⁴⁵Nya ƃe Zîsɛ e mò, ǹyɛɛi, “Gbɛ̂ɛ ƃe lɛ̀ɣɛ mâi?” Tãi ǹûai kélee dí dísia mai, Pitɛ da ǹûai kélee kɛ̀ gɔlɛi dí mò ma, dîyɛɛi, “Kaamɔ̂ɔ, gbɔŋ kɛ́tɛi ŋí káa íkɔlɛ, díkɛ tɛɛ a sɔ̂ɔ yâ!”

⁴⁶Kɛ́lɛ, Zîsɛ è mò, ǹyɛɛi, “Núu da e lɛ̀ɣɛ mâ; kpɛ́ni fêi, ŋá gɔ́lɔŋ a gɛɛ wala-wala-laa a kula ŋ́gbonôi.”

⁴⁷Tãi nɛnîi e gàa la a gɛɛ maa-mɛni fa ŋɔ́nɔ pɔ̂ri loôi, e kɛ̀ kpɛ̃linii, e pa e too Zîsɛ kɔ́ɔ mu e mɛnii ƃo ǹûai kélee ŋɛi e pîlaŋ mɛnii ma e lɛ̀ɣɛ la mai, da berei e ƃàlo la a maa felaai.

⁴⁸Nya ƃe e mò ma, ǹyɛɛi, “Ńoŋ-nɛnii, ílaa-lai a íƃalo; lí lii-sêe su.”

⁴⁹Gɛɛ kɛ̀ lônoi, núu da e kùla Ŋ̀âla-fɛli-kerei mɛi-nuui ŋɔpɛ́rɛi mu, ǹyɛɛ ma, “Íloŋ-nɛnii aâ saa; ífe fũa-fũa tɔ̀ɔ Kaamɔ̂ɔ ma ŋɔ́nɔ.”

⁵⁰Kɛ́lɛ, tãi Zîsɛ e nyiŋi mɛni lai, e mò ma ǹyɛɛi, “Ífe yao; láa nɔ la, ǹyaŋ íloŋ-nɛnii a pâi ƃálôi.”

⁵¹Gɛɛ a pá bɛ́rɛi mui, ve faa ni ma núu da e lɔ naa, fɛ̂ɛ Pitɛ, Zĩi, Zɔ̂ŋ, da ǹôloŋ ǹâŋ, bɛlɛɛ ǹee ma.

⁵²Ǹûai kélee dí kɛ̀ gbeɣêi toôi, díkɛ díkeŋe lá tua; kɛ́lɛ, e mò dîa, ǹyɛɛi, “Káfe wɔlɔ; ve saa ni, kɛ́lɛ, a nyiî.”

⁵³Nya ƃe dí ɣɛlɛ-maa kùla zu ŋ̀ɛi. Kpɛ́ni fêi, dí kɛ̀ a gɔ́lɔŋɔɔ a gɛɛ e kɛ̀ a zaa.

⁵⁴È zòŋ a ǹyée, é dòli, ǹyɛɛi, “Nɛnî-lo, ímu siɣe.”

⁵⁵Ŋɔmɔ̂leŋ e pà ŋɔ́nɔ gbonôi, a nàa maa felaa e m̀u siɣe; e mò dîa a gɛɛ dí mii-sɛŋ tɛɛ ǹôloŋ pɔ.

⁵⁶Ǹôloŋ ǹâŋ da ǹee dípɛlɛ e pù; kɛ́lɛ, e dília-woo ƃò a gbanaŋɔɔ a gɛɛ dífe mo núu da ma mɛnii a kɛ́i.