Read Kpelle Lûu 9 Bible Online

Lûu 9 - Kpelle bible

Lûu 9

¹È ŋɔpôlu-ƃela puu kao feerɛi tòli díkîe ma. È wála-wâla-laa tɛ̀ɛ dípɔ da ŋ̀óo nyînaŋ nyɔ́mɔɔ kélee mɛi a gɛɛ dí kɔlɔ-fela-ŋa ƃalo.

²È dítɛ̀ɛ a gɛɛ dí Ɣâla ŋɔkâloŋ-laai maa-mɛni ƃo, dí gɔlɔ-fela-ƃela ƃalo.

³Nya ƃe e mò dîa, ǹyɛɛi, “Káfe li a sɛŋ kélee da kásiai ma, kpaa tuaŋ, kolâ, kpólo, sɛŋ-kao; yɛkɛ feerɛ fé kɛ̀ káyêei.

⁴Bɛ́rɛi nyii nɔ ka lɔ̀ mui, ka lɛɛ naa e lɛɛ zu ka li.

⁵Ƃɛi nɔ da wàla díyee see naa kamui, tãi kà kɛ̀ kulâi la daai ti sui, ka kákɔɔ-ŋa-muluŋ kpɛ́mɛŋ. Gáa a dímɛni-lɛɛ maa-sere.”

⁶Nya ƃe dí kùla naa dí li daa-ŋai su. Dí kɛ̀ Duŋ Lɛ́lɛɛi ƃoi, díkɛ núu ƃalo kwaa kélee ma.

⁷Ɛɛlɔ nyii kɛ̀ a kâloŋ kɛ́tɛi, e mɛnii mɛ̂ni Zîsɛ e gɛ̀i. Bɛ́lɛ è pù, kpɛ́ni fêi, ǹûai da-ni dí kɛ̀ m̀ôi a gɛɛ Zɔ̂ŋ a mu siɣe saa yêei.

⁸Gbeli-ŋai dí kɛ̀ m̀ôi a gɛɛ Ilaza a pá; gbeli-ŋai dîyɛɛi, “Ɣâla ŋɔlóno-kɛ-ƃela pɔlɔ-ŋai dɔnɔ a mu siɣe saa yêei.”

⁹Ɛɛlɔ e mò, ǹyɛɛi, “Ŋá Zɔ̂ŋ ŋuŋ têe; kɛ́lɛ, gbɛ̂ɛ ƃe ŋí ŋ́gaa mɛni támaa mɛnîi é pîlaŋ la mai?” Nya ƃe è kɛ̀ ŋ̀wɛ̂lii kpɔ́ é gáa.

¹⁰Tãi Zîsɛ ŋɔsia-ƃelai dí pà la pôlui, dí mɛnii kélee ƃò ma dí gɛ̀i. Nya ƃe e lì a dîa dítee-tee kwaa ma Bɛsaida kɔlɛ ma.

¹¹Tãi ǹûai dí mɛ̀ni lai, dí pìlaŋ bôlu. Nya ƃe e dílɛ̀ɛ naa dí pa bɔ. È lòno dípɔ é pîlaŋ Ɣâla ŋɔkâloŋ-laai ma, gɛ ǹûai nyii-ŋai kɛ̀ kɔ́lɛ̂i ƃalo.

¹²Tãi voloi maa e kɛ̀ lâai lai; ŋɔpôlu-ƃela puu kao feerɛi dí pà bɔ dí m̀ó ma, dîyɛɛi, “Gbɔŋ tɛ́ɛ a gɛɛ dí li gbanâŋ-ŋai lá da gbâlaŋ-ŋai ŋá, dí dílaâi kɔri da dímii-sɛŋ; kpɛ́ni fêi, kúkaa ƃɛ kwaa kpala ma.”

¹³4Kɛ́lɛ, e mò dîa, ǹyɛɛi, “Ka sɛŋ da tɛɛ dípɔ dí mii.” Díyɛɛi, “Sɛŋ da fé kúyêei ƃɛ fɛ̂ɛ kpólo-kpala kpua lɔ́ɔlu da nyɛ̃ɛ feerɛ-fɛ̂ɛ nɔ ku li ku mii-sɛŋ ya ǹûai kélee mɛni ma.”

¹⁴Kpɛ́ni fêi, dí kɛ̀ a kpakolo wála lɔ́ɔlu. Nya ƃe e mò ŋɔpôlu-ƃelai dîa, ǹyɛɛi, “Ka gɛ́ dí see a díkpulu tɛi-tɛi, núu buu lɔ́ɔlu é kɛ́ gbulu tɔnɔ su.”

¹⁵Nya ƃe, dí gɛ̀ ǹûai kélee dí see.

¹⁶Gɛɛ a gbólo lɔ́ɔlui siɣe da nyɛ̃ɛ feerɛi, e ŋ̀ɛi tɛ ŋelei su, e lûwa too dîa, e dísu ɣale, e dɛɛ ŋɔpôlu-ƃelai pɔ a gɛɛ dí dɛɛ ǹûai pɔ.

¹⁷Nya ƃe díkelee dí dílaa mìi, dí pela. Gbua-kpua-ŋai lɛ̂ɛ naai dí ŋá tɛ̀ ma. E kɛ̀ a kpɔ̂lɔ puu kao feerɛ.

¹⁸Nya ƃe e kɛ̀ ti, gɛɛ Ɣâla fɛlîi dɔnɔ kwaa mai, ŋɔpôlu-ƃelai dí kɛ̀ gɔlɛ; e dímarê kɛ́, ǹyɛɛi, “Ǹûai dí kɛ̀, dîyɛɛ, gbɛ̂ɛ ƃa ńyãa?”

¹⁹Dí mò ma, dîyɛɛi, “Batâi-kɛ-nuui Zɔ̂ŋ; kɛ́lɛ, da-ni dí mò, Ilaza; gbeli-ŋai dí mò a gɛɛ ŋwɔlɔ-wɔlɔ-Ɣalai ŋɔlóno-kɛ-ƃelai dɔnɔ a mu siɣe saa yêei.”

²⁰Kɛ́lɛ, e dímarê kɛ̀, ǹyɛɛi, “Ka mò kâa, gbɛɛ ƃa ńyãa?” Pitɛ e zu tòo, ǹyɛɛi, “Ɣâla Ŋɔkôrai.”

²¹Nya ƃe e díwolii kùla, e dília-woo ƃo a gbanaŋɔɔ a gɛɛ dífe mɛnii ŋi ƃò núu da ma,

²²ǹyɛɛi, “Fɛ̂ɛ nɔ núu-kpune Ǹóŋ e mɔ̃lɛ mɛni támaa su, fɛ̂ɛ nɔ ǹúu-pɔlɔ-ŋai da zâla láa soŋ-ƃela kpaya-kpayai da gɔlɔ-pɔ̃yɛ-ƃelai dí dípôlu fe mì, dí bàa, à kɛ̀ ti, ŋele-kuui zaaƃa-ɣelei e m̀u siɣe saa yêei.”

²³È mò díkelee dîa, ǹyɛɛi, “À kɛ̀ núu da a ŋ̀wɛ̂lii e pîlaŋ ḿbôlu, tɔɔ é gíli kúla gbîŋ su, e ŋɔsaa-wurii siɣe a ɣele kélee, e pîlaŋ ḿbôlu.

²⁴Kpɛ́ni fêi, ǹúui a ŋ̀wɛ̂li é ŋɔfúlu-laai ƃáloi, a pâi ǹánîi. Kɛ́lɛ, ǹúui a ŋɔfúlu-laai làŋ ḿaa-mɛni mai, a pâi ƃálôi.

²⁵Le lɛ́lɛɛ ƃe núu a pɔ̂ri zɔlɔ ƃôi à kɛ̀ à ǹɔii kélee kɛ̀ a bɔɔ, kɛ́lɛ, e ŋɔfúlu-laai laŋ e gbɔɔ̂i ŋuŋ-la píli?

²⁶Kpɛ́ni fêi, ǹúui nyii kélee a ŋûmɛ ḿaa-mɛni ma da ŋ́ooi, tãi núu-kpune Ǹóŋ à pà la a ŋɔfólo-laai bɛlɛɛ la Nàŋ-nuui da Ŋ̀âla-taa-kela maa waa-ŋai dífolo-laai mai, a pâi ŋumɛ̂i ǹúui ti ma.

²⁷Kɛ́lɛ, ŋa môi kâa a tɔ̃yâ, ǹúui da-ni díkaa tɔɔ ni ƃɛ nyii-ŋai dífe pâi saâi e lɛɛ zu dí Ɣâla ŋɔkâloŋ-laai kaai.”

²⁸Nya ƃe e kɛ̀ ti, gɛɛ a kpɛɛ mɛni-ŋai ŋi ƃoɔ ma ɣele lɔ́ɔlu mɛi saaƃa pôlu mai, e Pitɛ, Zɔ̂ŋ, da Zĩi dísìɣe e li a dia Ɣâla-fɛli mɛni ma ǹyée tɔɔi ma.

²⁹Gɛɛ Ɣâla fɛlîi, ŋ̀ɛi maa e fàleŋ, ŋɔseɣei kɛ́ kole kpɔ́ pe-pe, gɛ folo.

³⁰Nya ƃe, kpakolo feerɛ dí kɛ̀ lônoi bɔ, nyii-ŋai kɛ̀ a Mose da Ilazai.

³¹Dí pà folo-laa su, dí ŋɔsaai maa-mɛni ƃo ma e kɛ̀ pâi gɛ̂i Zerusâlɛŋ.

³²Nya ƃe, Pitɛ da diai kɛ̀ gɔlɛi, díŋɛi-kɔlɔŋ e kɛ̀ a ŋwiɛɛ a nyii, kɛ́lɛ, dí kɛ̀ a díŋɛi lá ƃoɔ. Dí ŋɔfólo-laai kâa da gbakolo feerɛi kɛ̀ tɔɔ ni gɔlɛi.

³³Nya ƃe e kɛ̀ ti, díkɛɛ lîi, Pitɛ e mò Zîsɛ ma, ǹyɛɛi, “Kaamɔ̂ɔ, ǹɛ́lɛɛ̂i a gɛɛ kúkaa ƃɛ; kwaa ku ƃûu saaƃa tɔ́ɔ, dɔnɔ ímɛni ma, dɔnɔ Mose mɛni ma, dɔnɔ Ilaza mɛni ma.” Ve mɛnii kɔlɔŋ e kɛ̀ m̀ôi.

³⁴Gɛ́ɛ kɛ̀ nyíŋi ƃôi, ɣele-kɔlɔŋ kole è pà é dímɛi pɛ́lɛ. Nya ƃe dí kɛ̀ yaôi, díkɛɛ tɛ̂i ŋ̀ele-kɔ̂lɔŋ kolei sui.

³⁵Wóo da e kùla ŋele-kɔlɔŋ kolei su, ǹyɛɛi, “Ńoŋ ká ŋi nyii ŋá ziɣe zui; ka ŋ̀óo mɛni.”

³⁶Ŋ̀óoi kperaa tɛ̂i, dí Zîsɛ kàa ǹyaa tɔnɔ. Nya ƃe dí lɛ̀ɛ a dímɛi saa. Maa-tãi ti mɛnii kélee dí gàai, dífe m̀o ni núu da ma.

³⁷Nya ƃe e kɛ̀ ti, ŋelei ti pôlu mai, díkɛɛ da yeŋ ǹyéei kwarai, da kpɔŋ kɛ́tɛ dí kòyaŋ.

³⁸Gáa, kpakolo tɔnɔ e kùla gbɔŋ sama, gɛ laɣi, ǹyɛɛi, “Kaamɔ̂ɔ, ŋa íkpera fêi, ńoŋ-surɔŋ káa, kpɛ́ni fêi, ǹyaa nɔ ƃa lóŋ tɔnɔ kpéŋ ńyêei;

³⁹gáa, tãi da nyînaŋ nyɔ́mɔɔ a zòŋ, a naa maa felaa a lâɣi kpɔ́, fɛ̂li-fɛ̂li kɛ́ gula, gɛ́ kɛ̀ kàŋ-kàraŋ, ǹáya file-file kɛ́ tɔ̀ɔ ǹá, e gbimiliŋ kɛ́ tɛ ma, deêi ma kpanaŋɔɔ.

⁴⁰Ŋá ípôlu-ƃelai kpera fè a gɛɛ dí gbɛ bôlu. Kɛ́lɛ, pɔ̂ri fé kɛ́ ni dîɛ.”

⁴¹Zîsɛ e zu tòo, ǹyɛɛi, “Óo ŋ̀éniɛi ŋi su-ƃelai, laa-la fé káyêei, káwôlii kpɔ́lɔɔ̀i, ɣele ɣɛɛlu ƃe fɛ̂ɛ ŋa gɛ kákɔlɛ, ŋ́gɛ ńii kpele nɔ kámɛni ma? Pá ƃɛ a íloŋ-surɔŋ.”

⁴²Gɛɛ kɛ̀ pâi nyînaŋ nyɔ́mɔɔi e dòo ǹɔii ma, fɛli-fɛli kɛ́ gula. Kɛ́lɛ, Zîsɛ e nyînaŋ nyɔ́mɔɔi kpèra, e zurɔ̂ŋ-loi ƃalo, e dɛɛ pôlu ǹâŋ pɔ.

⁴³Nya ƃe díkelee dípɛlɛ e pù Ɣâla ŋɔwala-wala-laai mɛ́ni ma. Díkɛɛ díkili ŋá siâi a mɛnii kélee e gɛ̀i, e mò ŋɔpôlu-ƃelai dîa, ǹyɛɛi,

⁴⁴“Ka ǹɛɛ naa ŋ̀óo-ŋai ŋi è lɔ káwôlii; kpɛ́ni fêi, da pâi núu-kpune Ǹóŋ tɛɛ̂i nûa pɔ.”

⁴⁵Kɛ́lɛ, dífe táre ni ŋ̀óoi ŋi su, e kɛ̀ a noɔɔ dîa a gɛɛ dífe su kaa; nya ƃe dí kɛ̀ yáôi a gɛɛ dí m̀arê kɛ́ e pílaŋ mɛnii ŋi ma.

⁴⁶Nya ƃe dí kɛ̀ sia toôi díkîe-ni loai e pîlaŋ ǹúui ma gáa a ǹúui gɛ́tɛi dísamai.

⁴⁷Zîsɛ e kɛ̀ a ziai kɔlɔŋɔɔ dílii su. Nya ƃe e sia-loŋ sìɣe, e dɔɔ gɔlɛ.

⁴⁸Nya ƃe e mò dîa, ǹyɛɛi, “Ǹúui nyii a ǹyée sèe zia-lôŋ ŋí mu ńaai sui, a ǹyée sée ḿû, ǹyaŋ ǹúui nyii a ǹyée sèe ḿûi, a ǹyée sée ǹúui mu ńdɛ̀ɛi, kpɛ́ni fêi, ǹúui kákelee kásama a doo-mui, ǹyaa ƃa ǹúui gɛ́tɛi.”

⁴⁹Zɔ̂ŋ e zu tòo, ǹyɛɛi, “Kaamɔ̂ɔ, ku núu tɔnɔ kàa gɛ nyînaŋ nyɔ́mɔɔ kpɛ́ ílaâi su. Ku ǹia-woo ƃo a gɛɛ ve gɛ, kpɛ́ni fêi, ve kɛ́ ni a kútà.”

⁵⁰Kɛ́lɛ, Zîsɛ e mò ma, ǹyɛɛi, “Káfe kɔ a gɛɛ ka gbera; kpɛ́ni fêi, ǹúui nyii ve tɔɔ ni kâai, gáa a kátà.”

⁵¹Nya ƃe e kɛ̀ ti, tãi kɛ́ɛ lɛɣɛ̂i a gɛɛ dí dɛ ɣelêi, e gbɛtɛ ǹíi su a gɛɛ e li Zerusâlɛŋ.

⁵²Nya ƃe e kela-ŋa tɛ̀ɛ ŋ̀ɛi tuɛ. Dí lì dí tɛ Sameria-kpanaŋ lá a gɛɛ dí nàa kpɛtɛ m̀ɛni ma.

⁵³Kɛ́lɛ, ǹûai dífe díyee see ni mu. Kpɛ́ni fêi, e gbɛ̀tɛ ǹíi su a gɛɛ e li Zerusâlɛŋ.

⁵⁴Tãi ŋɔpôlu-ƃelai Zĩi da Zɔ̂ŋ dí gàa lai, dí mò ma, dîyɛɛi, “Kúnuu-namui, ya ŋ̀wɛ̂lii ku m̀ó a gɛɛ ŋɔŋ e kula ŋelei su e dísu kara (yɛ̂ɛ berei Ilaza e gɛ̀ lai)?”

⁵⁵Kɛ́lɛ, è tìnaŋ é dília-wôo ƃó, [ǹyɛɛ, “Káfe mɔ̂leŋ-sii kɔ́lɔŋ gáa kákponôi. Kpɛ́ni fêi, núu-kpune Ǹóŋ fé pá ní a gɛɛ é núu ŋɔfúlu-laai su kara, kɛ́lɛ, è pà a gɛɛ é díƃalo.”]

⁵⁶Nya ƃe dí tɛ̀ɛ dí lí gbanâŋ da kpɛ́ni lá.

⁵⁷Nya ƃe è kɛ̀ tí, díkɛɛ berei ma dí kɛ́ lìi, nalôŋ tɔnɔ è mò ma, ǹyɛɛi, “Ƃɛ́i kélee ya lî naai, ŋa pâi pîlanii ípôlu.”

⁵⁸Nya ƃe Zîsɛ è mò ma, ǹyɛɛi, “Kɛlɛ̂ŋ-ŋa kɛ̂i ƃa lôai, ŋ̀ɔni-ŋai ŋ̀elei sui dítaa káa ma, kɛ́lɛ, núu-kpune Ǹóŋ ŋuŋ-lâai fé ma.”

⁵⁹È mò ǹúui da kpɛ́ni ma, ǹyɛɛi, “Pîlaŋ ḿbôlu.” Kɛ́lɛ, è mò, ǹyɛɛi, “Kúnuu-namui, ǹɛɛ naa fúlɔi ŋá lí ŋá ńâŋ saa lóo.”

⁶⁰Kɛ́lɛ, Zîsɛ è mò ma, ǹyɛɛi, “Ǹɛɛ naa zaa-ƃelai dí díkpɔɔ̂i-saai lóo. Kɛ́lɛ, lí, í Ɣâla ŋɔkâloŋ-laai maa mɛ̂ni ƃó.”

⁶¹Ǹúui da kpɛ́ni è mò, ǹyɛɛi, “Kúnuu-namui, ŋa pâi pîlanii ípôlu, kɛ́lɛ, ǹɛɛ naa fúlɔi ŋá lí ḿbɔ naa, ŋa ḿvɛli ŋánûai dîa.”

⁶²Zîsɛ è mò ma, ǹyɛɛi, “Núu da fa pɔ̂ri díi-kɛ-kɔlii sonîi é bôlu-pere káa, pɔ̂ri é kɛ́ mì a gɛɛ é kɛ́ a Ɣâla ŋɔkâloŋ-laai su-nuu da.”