Read Kpelle Dutɛrɔnome 10 Bible Online

Dutɛrɔnome 10 - Kpelle bible

Dutɛrɔnome 10

¹“Yâwɛɛ è mò ḿâ a maa tãi tí ǹyɛɛi, ‘Kɔni-ƃela-ŋa saa yɛ̂ɛ bɔlɔ-ŋai í pá a dia ḿbɔ ǹyéei ma. Gãla kpɛtɛ máŋ dípûi kɛ́ mɛni ma.

²Ŋa pâi ŋ̀óoi pɔ̃yɛi dîa kɛ̀ bɔlɔ-ŋai diai. Gɛ̀ ní ya pâi dípûi gãlai kpîŋ su.’

³“Nya ƃe ŋá gãlai kpɛ̀tɛ a akasia wuru ŋá kɔni-ƃela feerɛ sáa ŋá bɛlɛ ma ŋá lí la a dia ǹyéei ma.

⁴Yâwɛɛ è dɔ̂ŋ puui pɔ̃yɛ gɔni-ƃela-ŋai ŋí dîa yɛ̂ɛ berei è gɛ̀ la a maa-ŋuŋ. È bɔ̃yɛ nɔ́ yɛ̂ɛ berei è kɛ̀ môi la kâa ŋ̀óo kɛ́ kùla ŋ̀ɔŋ su tãi ká kɛ̀ la ǹyéei kwárai é dítɛɛ ḿbɔ.

⁵Nya ƃe ŋá pà la ŋá dípu gãlai su ŋá gbɛ̀tɛi yɛ̂ɛ berei è mò la mâi. Ǹaa ƃé díkaa naa.”

⁶Eezuɛ-ŋai dí sìa é síɣe Zakana-ŋai díya-loa-ŋai dîa dí lí Mosɛra. Ǹaa ƃé Eelɔŋ è sàa naa dí ǹoo. Dí ǹóŋ Ilieza sèe bɔ́ɔ-ŋa a sâla-laa soŋ nuu.

⁷Dí kùla naa dí lí Gugoda dí tɛ́ɛ naa dí lí Zobata. Ɣiliŋ-ya pɛlɛɛ támaa káa ǹɔii ŋí su.

⁸Maa tãi tí ƃé Yâwɛɛ è Liiva-ŋai sìɣe la a gɛɛ dí kɛ́ sìa a gbana-woo-kɛɛ maa gãlai, dí kɛ́ tíi kɛ̀ mì, dí kɛ́ lûwa làa nûa dîa ǹyaa Yâwɛɛ ǹáai su. Ǹyaŋ bere ƃé gáa la sâa.

⁹Mɛnii ŋí ƃé gɛ̀ lɔii kpua da fé la naa Liiva-ŋai mɛni ma Gono-tee lɔɔi su yɛ̂ɛ berei gáa la a díƃarâai. Yâwɛɛ ƃa díkɔ̃liŋ yɛ̂ɛ berei è góno tèe la díyêei.

¹⁰“Ŋá gɛ̀ ǹyéei ma a ɣele kûu buu náaŋ da kpíni kûu buu náaŋ. Ǹyaŋ Yâwɛɛ è ŋ̀óli tɔ̀ɔ ḿâ. Vé kɛ́ ní a ǹíi láa mɛ̂ni a gɛɛ é kásu kara.

¹¹È mò ḿâ ǹyɛɛi, ‘Lí, íkɛ ǹûai túɛ é lɛ́ɛ la zu dí seri ǹɔii su ŋá ŋ́gono tèe la dínâŋ-ni yêei.’

¹²“Óo Eezuɛ-ƃela, m̀ɛnii Yâwɛɛ a ŋ̀wɛ̂lii káyêei ǹyaa ƃa ká yao mà, ká tûa yɛ̂ɛ berei a wɛ̂lii lai, ka ŋ̀wɛli, ka tíi kɛ́ mì a kálii kélee da kámɔlêŋ kélee.

¹³Ka ŋɔtɔ̂ŋ mɛi káa kákpîŋ káfulu-laai mɛni ma.

¹⁴Ǹɔii da ŋ̀elei díkaa a Yâwɛɛ pɔ́ɔ da dísu sãa kélee.

¹⁵È kánâŋ-ni wɛ̀li a ŋánaa. Mɛni ƃé a ká kɛ́ la ǹɔii-ŋûŋ-ŋai kélee mɛi yɛ̂ɛ berei gáa la sâai.

¹⁶Ka kálii maa fáleŋ. Káfe ŋɔ́nɔ kɛ̀ a wolii-kpɔlɔ-ƃela,

¹⁷kpɛ́ni fêi, Káɣâla Yâwɛɛ káa a Ɣâla ŋ̀âla-ŋai kélee mɛi da núu-namela. Ǹyaa ƃa Ŋ̀âla kɛ́tɛi, gɛ́ mɛni kpaya-kpayaa. Va ŋa-kɔlɛ kɛ̀, va tela yee-pɛlɛ ǹá sɛŋ sòŋ.

¹⁸A teenoŋ-ŋa maa kɔ̃ɔ da pɔɔ-nɛyaa. È ŋɔ̃ya wɛli-ni. A mii-sɛŋ tɛ̀ɛ bɔ́ da seɣe.

¹⁹Káa máŋ ka ŋɔ̃ya wɛ́li, kpɛ́ni fêi, ká kɛ̀ a ŋɔ̃ya-ŋa Ize lɔii su.

²⁰Ka ƃaa kɛ́-maa tɛ́ɛ Yâwɛɛ pɔ́, ká tíi kɛ́ mì. Ka maa mɛni siɣe a gbanaŋɔɔ. Ǹyaa nɔ́ ƃé ká káfoo ǹáai su.

²¹Ǹyaa ƃa Káɣâlai. Ka ǹáa maa tɛ́. A mɛni kpaya-kpaya támaa kɛ́ kâa. Káa kpîŋ ká ǹaa kàa.

²²Kánuu-pɔlɔ-ŋai dí kɛ̀ buu lɔ́ɔlu mɛi feerɛ. Kɛ́lɛ Káɣâlai Yâwɛɛ è gɛ̀ kátamaa ká kɛ́ yɛ̂ɛ bɛmɛlɛŋ-kao-ŋai díkaa ŋelei sui.