Read Kpelle Dutɛrɔnome 12 Bible Online

Dutɛrɔnome 12 - Kpelle bible

Dutɛrɔnome 12

¹“Dɔ̂ŋ-ŋai ká ŋí fɛ̂ɛ ká mɛi káa tãi ka pâi kɛ̂i la ǹɔii su kánâŋ-ni Díɣâlai Yâwɛɛ a dɛɛ̂i kápɔi.

²Diai ka pâi dílɔii siɣêi, ka díɣâla fɛli kwaa-ŋai ḿâ su-kara ǹyée-ŋai ma, ǹyée-ŋai kwára da ŋ̀úru kpaya-kpayai mu.

³Ka díɣâla fɛli teƃele-ŋai wólo ka díkɔni maa waa-ŋai wólo-wôlo, ká díɣâlai Asira fɛli kwa-ŋai ma wuru-ŋai pɔ́ŋ ká díkereŋ, ká díɣâla pɔkɔɔŋ-ŋai su tee-têe, ká dílaa kélee su-kara.

⁴“Káfe Káɣâlai Yâwɛɛ fɛ̀li yɛ̂ɛ berei da díɣâla-ŋai fɛli lai.

⁵Kɛ́lɛ ka ƃɛ́i kɔ́ri Káɣâlai Yâwɛɛ a pâi nàa lɛ̂i kánûai sámai. Ǹaa ƃé ká kɛ́ li naa ká kɛ́ vɛ̀li.

⁶Ǹaa ƃé ká pá naa a kákereŋ sama sãai, kásâla-sãai, kákɔ̃liŋ buu-ɣelei kásama sãa kpiŋ-kpiŋ-ŋai zama-sãai ká kákono-tee lai, da kátaa-tulɛ lonii m̀aa-ŋuŋ-ŋai.

⁷Ka lii nɛ̃ɛ kula m̀ɛni-ŋai kélee mɛni ma ka gɛ́i. Ká mɛni-ŋai ŋí kɛ́ kpɛ́ni fêi Káɣâlai Yâwɛɛ ƃé lûwa làa kâa.

⁸“Káfe pâi kɛ̂i Ɣâla fɛlîi nɔ́ yɛ̂ɛ berei kwa gɛ̂i la sâai, núu kélee kɛ́ ŋ̀ɔi kɛ̀ nɔ́ a nîa perei.

⁹Kpɛ́ni fêi káfe niî seri ní gono-têe lɔii ma nyii Yâwɛɛ a dɛɛ̂i kápɔi.

¹⁰Kɛ́lɛ ka pâi Zɔdiŋ Ya-leei tîyenii ká lí ka sée naa. Ǹyaŋ Káɣâlai Yâwɛɛ a pâi gɛ̂i kákpɔara-ƃelai dífa ŋɔ́nɔ kɔ́ pɛ̀lɛ kâa. Gɛ̀ ní ka pâi kɛ̂i lii-sêe su.

¹¹Ǹaa ƃé Yâwɛɛ a pâi ǹɛ̂i a kásee kwaa ma. Gɛ̀ ní fɛ̂ɛ ká pá naa a kákereŋ sama sãai kásâla sãai, kákɔ̃liŋ buu-ɣelei, zama sãâ da kpɛ́ni-ŋai da nyii-ŋai kélee ká kákono tèe la Yâwɛɛ mɛni mai.

¹²Ǹaa ƃé káa, kálônii sinaai da nɛyãai, káyee mu-sinaai da nɛyãai, ka pâi lii-nɛ̃ɛ kulâi naa Káɣâlai Yâwɛɛ ŋéi-tuɛ ka Liiva-ŋai. Kɛ́lɛ ka kákili-ŋa sía Liiva-ŋai mɛni ma díkaa ká taa-ŋai sui nyii-ŋai ǹɔii da fé a dípɔɔi.

¹³Ka tãi siɣe. Káfe kéreŋ sala kùla nɔ́ ƃɛ́i kélee ka naa wɛ̂lii.

¹⁴Ƃɛ́i Yâwɛɛ a pâi ǹaa lɛ̂i kásuu-ŋai sámai, ǹaa ƃé ka pâi m̀ɛni-ŋai mɛi kâai naa ŋa môi kâai.

¹⁵“É kúla nyíŋi pôlu, ka pɔ̂ri kátaa-tulɛ-ŋai da paâi yɛ̂ɛ berei ka fɛnɛ-sãa pàa lai kátaa-ŋai da su ka mii ƃɛ́i kélee ka naa wɛ̂lii, ka diai dímaa waâi da diai dímaa fé waa níi yɛ̂ɛ berei Yâwɛɛ a lûwa lâai la kâai.

¹⁶Kɛ́lɛ káfe da ŋãa mîi. Ka díŋãa kúla díkponôi kálɛɛ pâi dímiî.

¹⁷Káfe mii-sãai ŋí da mii kákpîŋ taa-ŋai da su: Kási-sãai m̀á buu ɣelei, ŋwãai da ɔle wúlɔ ninai kɔ̂ɔŋ-sɛŋ kúu buu-ɣelei, kpaa máŋ kátaa-tulɛ lonii maa-ŋuŋ-ŋai, mii-sãa sama-sãai ka kákono tèe lai, zama-sãai ka mɛni kula kálii sui da kásama-sãai gbîŋ-kpîŋ-ŋai.

¹⁸Kɛ́lɛ fɛ̂ɛ ká mìi ƃɛ́i Káɣâlai Yâwɛɛ a pâi naa lɛ̂i. Ka mii ka kálônii sinaai da kálônii nɛyãai, káyee mu-sinaai da nɛyãai é pɛ́lɛ Liiva-ŋai dîa kátaai sui. Ka koi-nɛ̃ɛ kula Káɣâlai Yâwɛɛ ŋɛ́i-tuɛ m̀ɛni-ŋai kélee su ka gɛi.

¹⁹Káfe wɔ́lɔ káyee kùla Liiva-ŋai mu tãi nɔ́ kákaa la ǹɔii ŋí sui.

²⁰“Tãi Káɣâlai Yâwɛɛ a pâi kálɔii su kɛ̂tɛi lai ka pâi m̀arê kɛ̂i kâa mai, ‘Kwa wɛ̂lii a sua támaa.’ Gɛ̀ ní a pâi dɛɛ̂i kápɔ.

²¹À kɛ̀ ƃɛ́ ká Yâwɛɛ fɛli naai ǹaa koyâai kâa, daa-tulɛ-ŋai è dɛ̀ɛ kápɔi ka pɔ̂ri da paâi kátaa-ŋai da su yɛ̂ɛ berei ŋá mò la kâai ká mii yɛ̂ɛ berei ka ŋ̀wɛ̂lii lai.

²²Ka dímii yɛ̂ɛ berei ka fɛnɛ-sɛŋ da kpɛ́ni-ŋa mii lai. Ka diai dímaa waai da diai dímaa fé waa níi, ka pɔ̂ri miî.

²³Kɛ́lɛ káfe díŋãa lɛ̀ɛ zu ká mii. Kpɛ́ni fêi, ŋãa káa a fúlu-laa. Mɛni ma, káfe vúlu-laai mîi a vɛnɛ-sãai.

²⁴Ka daa-tulɛ-ŋai pâa, ka díŋãa kúla díkponôi ká bú ǹɔii ma.

²⁵Káfe da mìi. Ka sìa a dɔ̂ŋ ŋí, Yâwɛɛ líi a pâi lâai káyêei, ǹyaŋ mɛni-ŋai kélee ka pâi kɛ̂i gɛ̂i, ŋãa-see a pâi kɛ̂i a ǹɛ́lɛɛ.

²⁶Kɛ́lɛ zãai nyii maa waai da nyii-ŋai ká kákono tèe lai ka dísiɣe ká lí a dîa ƃɛ́i Yâwɛɛ è naa lɛi.

²⁷Ka lí a géreŋ sama-sãai da ŋãa Káɣalai Yâwɛɛ ŋɔteƃelei ma. Ka zama-sãai gbéli-ŋai ŋãa kpɛ́mɛŋ teƃelei kɔlɛ. Ka pɔ̂ri zua miî.

²⁸Mɛni-ŋai ŋí kélee ŋa m̀ôi kâai, kà sìa a dia, Yâwɛɛ líi a pâi lâai káyêei, ǹyaŋ a pâi lûwa lâai ká kɛ́-mɛni kélee dîa ka kálônii.

²⁹“Káɣâlai Yâwɛɛ a pâi gɛ̂i káyee é tɛ́ɛ ǹɔii-ŋûŋ-ŋai su-ƃelai dîa ka liî dí lɔii siɣêi. Ka díkpɛ ka sée dílɔii su.

³⁰Yâwɛɛ a dísu-karai káŋɛi-tuɛ. À gɛ̀ tí, ka kámɛi káa. Káfe ǹɛɛ naa dí kálii pene díɣâla pɔkɔɔŋ-ŋai pɔ́ naa pere ka kɛ́ mò kâai, ‘Ǹûai ŋí da díɣâla-ŋai fɛli-pere kɛ̀ léŋ? Kwa pâi gɛ̂i yɛ̂ɛ berei da gɛ̀ lai.’

³¹Káfe Káɣâlai Yâwɛɛ fɛ̀li yɛ̂ɛ berei da díɣâla-ŋai fɛli lai. Da mɛni sîi nyɔ́mɔɔ támaa kɛ̀ díɣâla fɛliɛɛi su nyii Yâwɛɛ fé wɛ́li ní a diai. Da dílônii sinaai da nɛyãai kùla a kéreŋ sala díɣâla-ŋai dîa.

³²“Ka mɛni-ŋai mɛni ŋa m̀ôi kâai. Káfe da pù ma, káfe tela da kùla ma.