Read Kpelle Dutɛrɔnome 13 Bible Online

Dutɛrɔnome 13 - Kpelle bible

Dutɛrɔnome 13

¹“À kɛ̀ ka Ɣâla ŋɔlóno kɛ́-nuu da, kpaa máŋ diai da see-wôo-ŋa su-kulai, dí kɛ́ ŋɛ́i-kɛ-maa da mɛni kpaya-kpaya-ŋa kɛ̀,

²ǹyaŋ mɛni-ŋai a m̀ôi gélee ŋàa see kɛ́ kɛ̀, ǹyɛɛ kâa, ‘Kwaa kú Ɣâla da kpɛ́ni-ŋa kɔ́ri kú kɛ́ dífɛ̀li,’

³káfe káwoli tɔ̀ɔ Ɣâla ŋɔlóno kɛ́-nuui kpîŋ ma kpaa máŋ zee-soo su-kula-nuui. Káɣâlai Yâwɛɛ a kásu-kɔɔni a gɛɛ é gɔ́lɔŋ à kɛ̀ ka ŋ̀wɛli ní a kálii kélee da kámɔ̂leŋ kélee.

⁴Káɣâlai Yâwɛɛ ƃé ka káwoli tɔ́ɔ ma ká ƃaa-kɛ-maa tɛ́ɛ bɔ́. Ka ŋɔtɔ̂ŋ-ŋai mɛi kaa, ká ŋ̀óo mɛni, ka tíi kɛ́ mì, ká kákili kɛ́ mà.

⁵Fɛ̂ɛ ká Ɣâla ŋɔlóno kɛ́-nuui tí kpaa máŋ zee-wôo su-kula-nuui tí páa, kpɛ́ni fêi, dɔɔ̂i Káɣâlai Yâwɛɛ ma nyii káŋuŋ ma ƃò é kákula ǹuɛ-laai su Izei. A gɛ́ ka tɔɔ Káɣâlai ma. Fɛ̂ɛ ká gula kásama.

⁶“À kɛ̀ a kákpɔɔi saaƃɔlɔ nɛni kpaa surɔ̂ŋ, káloŋ surɔ̂ŋ kpaa nɛni, kálii ma nɛni kpaa káwɛli kɛ-maa nuu da à pà kápɔ loo-pêre su ǹyɛɛ kâai, ‘Kwaa lí kú ɣâla da kpɛ́ni fɛli. Ŋ̀âlai ŋí káa a Ɣâla nyii ka kánâŋ-ni káfe gɔ́lɔŋ.’

⁷A nɛ̃ɛ ma dítɔnɔ da é pá é mó kâa a gɛɛ ka dîa-ni ká kákɔlɛ ma-ƃelai kpaa máŋ dia díkaa kwa kôya mai díɣâla-ŋai fɛ́li,

⁸káfe káwoli tɔ̀ɔ ma. Káfe tela m̀alôŋ kàa. Káfe nɛ̀ɛ naa é lí kpɛ́ni.

⁹Ka bàa. Ka kɛ́ a nûa maa-ŋuŋ ka káyee pɛ́lɛ ma ǹûai kpéli-ŋai dí kɛ́ pà.

¹⁰Ka zɔɔ a kɔni é lɛ́ɛ la zu é sáa, kpɛ́ni fêi, a ŋ̀wɛ̂lii é kákula Káɣâlai Yâwɛɛ pôlu nyii kákùla ǹuɛ-laai su Izei.

¹¹Ka gɛ̀ tí, gɛ̀ ní Eezuɛ-ƃelai kélee da mɛ̀ni da pâi yaôi. Ǹyaŋ a kɛ̀ tí, núu da líi fé pâi kpelêi é mɛni kɛ́ɛ tí da kɛ́ ŋɔ́nɔ.

¹²“À kɛ̀ ka mɛ̀ni a gɛɛ m̀ɛnii ŋí da a kɛ̂i daa-ŋai da su nyii Káɣâlai Yâwɛɛ a dɛ̀ɛ kápɔi,

¹³a gɛɛ zɔnyɔ̂ŋ-ƃela da gɛ̂i ǹûai líi kɛ́ pène a gɛɛ dí ɣâla da kpɛ́ni-ŋa fɛli daa-ŋai su,

¹⁴ka ǹaa maa kpɛɛ a kɛ̀ gáa a tɔ̃yâ. À kɛ̀ gáa a tɔ̃yâ a gɛɛ mɛnii kɛ́ɛ tí a kɛ̂i kásama,

¹⁵fɛ̂ɛ diai kélee daai tí sui ká dípaa. Ka díkelee su-kara da dítaa-tulɛ-ŋai.

¹⁶Ka daai kpîŋ su-sãai kélee ŋãa tɛ́ ma bere taɣaŋ-ŋai lá ká díkereŋ a kéreŋ sala-sãa Káɣâlai Yâwɛɛ mɛni ma, ká tela daai kéreŋ naa é lɛ́ɛ a pilêŋ ŋá wɔlɔ-wɔlɔ da wɔlɔ-wɔlɔ.

¹⁷Káfe daai kpîŋ su-sãai da sìɣe kákpîŋ mɛni ma. À kɛ̀ ka wàla da siɣe, Yâwɛɛ ŋɔlii-ŋwânai ŋáa a pâi yenîi é ka malôŋ káa é kásu-mɛni lɛɛ, é ká kɛ́ a ǹɔii-ŋûŋ su kɛ́tɛ yɛ̂ɛ berei è góno tèe la kánâŋ-ni yêei,

¹⁸à kɛ̀ ka ŋɔtɔ̂ŋ-ŋai mɛi kâa, ká ŋ̀óo mɛ́ni, kákɛ mɛni kélee kɛ̀ a ǹɛ́lɛɛ ŋ̀ɛ́i-tuɛ.