Read Kpelle Dutɛrɔnome 2 Bible Online

Dutɛrɔnome 2 - Kpelle bible

Dutɛrɔnome 2

¹“Ka tìnaŋ ká lí vɛ̃ɛ-kpâlaŋ su Ǹyúo Kpɔ̂lui mâ pere yɛ̂ɛ berei Yâwɛɛ è mò la ḿâi. Ká tãi támaa sìɣe ǹyée lɔii ma Idɔŋ.

²“Nya ƃe Yâwɛɛ è mò ḿâ

³a gɛɛ kwa nâa gɛ́ ǹyée lɔii ŋí su a tãi su kôya. Ka tínaŋ ka lí yá-ŋua pere.

⁴M̀ó ǹûai dîa yɛ̂ɛi, ‘Ka pâi tɛɛ̂i ká káayɔɔi Isɔɔ ǹônii sinaai dílɔii su pere nyii-ŋai díkaa ǹyée lɔii su Idɔŋ. Da pâi kɛ̂i yâoi kâa. Mɛni ma, ka kámɛi káa.

⁵Káfe kɔ́ pɛ̀lɛ dîa. Kpɛ́ni fêi fé pâi dílɔii da tɛɛ̂i kápɔ. Fé pâi gbua kpîŋ tɛɛ̂i kápɔ, kpɛ́ni fêi, ŋá naa tɛ̀ɛ Isɔɔ pɔ́ a gɛɛ é kɛ́ a gɔ̃liŋ.

⁶Ka pâi mii-sãa da yá yâi díyêei mii mɛni ma da gbele mɛni a sɛŋ-kao.’

⁷“Yâwɛɛ a lûwa láa kâa m̀ɛnii su ka gɛ̂i. È m̀ɛnii kɔ́lɔŋ ká tɛ̀ɛ zu vɛ̃ɛ-kpâlaŋ sui. Góraŋ buu náaŋ ká gɛ̀ naa è kɛ̀ kákɔlɛ. Sɛŋ da gôlo fé tòo ní kâa.

⁸“Nya ƃe kú tɛ̀ɛ kúkaayɔɔ-ŋai dîa nyii-ŋai dí káa a Isɔɔ ŋɔsuui su-ƃelai kɛ̀ ǹyée lɔii su Idɔŋ. Kú Ǹyúo saai ma perei nyii a tɛ̂ɛ Ila da Ɛziyɔŋ Giba lɛ̀ɛ kú pôlu-pere.

⁹Yâwɛɛ è mò mâ ǹyɛɛi, ‘Káfe sɛŋ da kùla Môa-ŋai yêei kpaa máŋ ká kɔ́ dípɔ. Fé pâi dílɔii gbua da tɛɛ̂i kápɔ. Kpɛ́ni fêi, ŋá Âa tɛ̀ɛ La ǹônii pɔ́ a gɛɛ é kɛ́ a díkɔ̃liŋ.’ ”

¹⁰Naa ƃe Imiŋ-ŋai dí kɛ̀ naa. Ǹûai ŋí dí kɛ̀ a nûa wála-wala, yée-laa mu-seɣɛɛ ŋa.

¹¹Yɛ̂ɛ Anakiŋ-ŋai, díkaa yɛ̂ɛ Lefaiŋ-ŋai, kɛ́lɛ Môa-ŋai da dítòli a Imiŋ.

¹²Orata-ŋai dia máŋ dí kɛ̀ naa. Kɛ́lɛ Isɔɔ ǹônii dí díkùla naa a kɔ́ dí sée naa, yɛ̂ɛ berei Eezuɛ-ŋai dí gɛ̀ la a díkpɔara-ƃelai tãi Yâwɛɛ è ǹɔii tɛ̀ɛ la dípɔi.

¹³“M̀ɛni ma, ka kámu siɣe ká lí Zere ya-ɣɛli-loŋ ma. Nya ƃe kú lì naa.

¹⁴É síɣe tãi ma kú kùla la Kedɛ Bania é lɛ́ɛ la zu kú Zere ya-ɣɛli-loŋ tíyeŋ, è kɛ̀ a kóraŋ buu saaƃa káo lɔ́ɔlu mɛi saaƃa. Maa tãi tí yée mu ǹamu kɔ́ kpakolo-ŋai kélee dí sàa berei su yɛ̂ɛ berei Yâwɛɛ è vòo lai.

¹⁵Yâwɛɛ è tɔ̀ɔ dîa é lɛ́ɛ la zu díkelee dísaa.

¹⁶“Tãi gɔ́ kɔ́-ƃelai kélee dí sàa la dí kúla ǹûai sámai,

¹⁷Yâwɛɛ è mò ǹyɛɛi,

¹⁸‘Ka pâi tɛɛ̂i sâa Môa koyaŋ perei ma Âa.

¹⁹Ka sèri Amɔŋ ǹônii dîa, káfe dílii wána mɛni kɛ̀, kpaa máŋ ká kɔ́ pɛ́lɛ dîa. Fé pâi dílɔii da tɛɛ̂i kápɔ, kpɛ́ni fêi, ŋá nàa tɛ̀ɛ La ǹônii pɔ́ a díkɔ̃liŋ.’ ”

²⁰Naa è kɛ̀ a Lefiaŋ-ŋai pɔ́ɔ. Dia ƃé kɛ̀ naa a bɔ̀lɔ, kɛ́lɛ Amɔŋ-ŋai da dítòli a Zaŋsumiŋ-ŋa.

²¹Dí kɛ̀ a díyee-laa mu-seɣɛɛ, dítamaa, yɛ̂ɛ Anakiŋ-ŋa. Kɛ́lɛ Yâwɛɛ è wála-wala tɛ̀ɛ Amɔŋ-ŋai pɔ́ dí díkula ǹɔii ma dísee naa,

²²yɛ̂ɛ berei Yâwɛɛ è wála-wala tɛ̀ɛ la Isɔɔ ǹônii-sinaai pɔ́ dí kɛ́ Orati-ŋai kpɛ̀ Idɔŋ lɔii mai. Ǹyaŋ naa ƃé Isɔɔ ǹônii díkaa naa é lɛ́ɛ la zu dí gɔlɔi ŋí pɔ̃yɛ.

²³Avita-ŋai nyii-ŋai kɛ̀ gbanâŋ-ŋai lá é tóo Geza kpiniŋ sui, Kulîi-ŋai dí kùla Kulîi tiŋ su dí dísu-kara dí sée naa.

²⁴“Ka kákpîŋ kpɛtɛ ká Ano Ya-leei tíyeŋ. Ka gáa ŋa Siɔŋ, Amɔŋ-ŋai díkâloŋ tɛ́ɛ kápɔ nyii gáa Ɛsibɔŋ taa-leei mɛi da ŋɔlɔii. Ka kɔ́ pɛ́lɛ ma ká naa siɣe.

²⁵É síɣe sâa ma é lí tuɛ-pere, ŋa pâi yao kɛ́tɛ pûi ŋ̀éniɛi su-ƃelai kélee kponôi. Da kátuŋ mɛ̀ni da pâi kpɛ̃linii dílii é tóo pôlu ká mɛni ma.

²⁶“Kú kɛ́ɛ Kedemɔ fɛ̃ɛ-kpalaŋ sui, ŋá kéla-ŋa tɛ̀ɛ Ɛsibɔŋ kaloŋ Siɔŋ pɔ́ naa a lii-sêe woo-ŋa ńyɛɛ mai,

²⁷‘Ǹɛɛ naa ŋá tɛ́ɛ ílɔii su pere. Ŋa pâi kɛ̂i nɔ́ berei ma ŋ́gɛ lì.

²⁸Ŋa pâi mii-sɛŋ da kpele-sɛŋ yâi íyêei. Ńɛɛ nɔ́ naa ŋá tɛ́ɛ ílɔii su pere,

²⁹yɛ̂ɛ berei Isɔɔ ǹônii-sinaai nyii-ŋai kɛ̀ Idɔŋ da Môa-ŋai kɛ̀ Âa dí gɛ̀ la ḿîi é lɛ́ɛ la zu ŋá tɛ́ɛ Zɔdiŋ ŋá lí ǹɔii su Yâwɛɛ, Kúɣâlai è dɛ̀ɛ kúpɔi.’

³⁰“Kɛ́lɛ Siɔŋ fé fáa ní. Káɣâlai Yâwɛɛ è Siɔŋ líi su kpànaŋ a gɛɛ é kɔ́ kápɔ a gɛɛ ká ǹyée mɛi ɣále. Ǹyaŋ bere nɔ́ ƃé è kɛ̀ la.

³¹“Yâwɛɛ è mò mâ ǹyɛɛi, ‘Gáa, ŋaâ Siɔŋ tɛɛ ípɔ. Kɔ́ bɔ́ í ǹyée mɛi ɣále í ǹɔii síɣe.’

³²Nya ƃe Siɔŋ da ŋɔnûai dí pà dí kɔ́ pɛ́lɛ kûa Zaɣa taai su.

³³Yâwɛɛ Ɣâla è kùla bôlu kú ǹyée mɛi ɣále da ŋɔnûai.

³⁴Kú daa-lee-ŋai kélee su kàra kú nàa-ƃela kélee páa. Sɛŋ da tɔnɔ kpîŋ fé lɛɛ ní naa.

³⁵Daa-tulɛ-ŋai nɔ́ ƃé kú zìɣe a kúpɔɔ da zãai nyii-ŋai kú gùla-yêei kɛi.

³⁶Taa-lêe da su núu fé kɛ́ ní a ŋ̀wála-wâla é seri kúpɔ. Kú kɔ̀ é kúla Arɔi nyii gáa Ano tiŋ-tiŋ koyaŋ ma da daa-leei nyii-ŋai díkaa diŋ-tiŋ samɛi, kú seri Gilia. Kúɣâlai Yâwɛɛ è gɛ̀ kú naa-ƃelai kélee yée mɛi ɣále.

³⁷Kúfe lɛɣɛ ní Amɔŋ ǹônii-sinaai dílɔii da ma da Zabɔ ya-leei ma lɔii-ŋai kélee é pɛ́lɛ ǹyée taa-lee-ŋai su ŋɔ-ŋai dîa yɛ̂ɛ berei Yâwɛɛ è kúteniŋ tɔ̀ɔ lai.”