Read Kpelle Dutɛrɔnome 21 Bible Online

Dutɛrɔnome 21 - Kpelle bible

Dutɛrɔnome 21

¹“À kɛ̀ kà núu da poma kâa lâani ǹɔɔi su ǹɔii ma nyii Káɣâlai Yâwɛɛ è dɛ̀ɛ kápɔi, nyii káfe baa nûu kɔ́lɔŋ,

²fɛ̂ɛ kánuu pɔlɔ-ŋai da mɛni-sâa ŋá tée-ƃelai dí bomai da daa-ŋai loai kɔɔ̂ŋ dínaŋɔɔ̂i naa mai.

³Da gɛ̀ tí, gɛ̀ ní ǹúu-pɔlɔ-ŋai daai su nyii ǹɛɣɛ̂i a bomai, da niŋa nâɣa tɔnɔ sìɣe nyii káfe tá tíi kɛ́ ní lai,

⁴dí lí la ǹyéei loai ƃɛ́i núu da fé tá kpâlaŋ ŋá tii kɛ́ ní naai ya-ɣɛli loŋ da ma dí gɔŋ ɣále naa.

⁵Zâla láa soŋ-ƃelai nyii-ŋai díkaa a Liiva ǹônii-sinaai da pâi pâi kpɛ́ni fêi, dia ƃa káloai-ƃela ka Káɣâlai Yâwɛɛ-ni dí kɛ́ lûwa fɛli kámɛni ma. Dia ƃé da laa-sâa mɛni-ŋa kélee kpɛtɛ káloai.

⁶Ǹúu-pɔlɔ-ŋai daai su ǹúu pomai a laa-ni gɔlɛi da díyee-ŋa wàa niŋa pomai mɛi,

⁷dí m̀ó dîyɛɛi, ‘Kúfe m̀ɛnii ŋí kɔ́lɔŋ, kúfe tela ǹúui káa ní gɛ̀i.

⁸Yáawɛ, ínûai Eezuɛ-ŋai malôŋ káa. Yá ƃé díŋuŋ ma ƃò ǹuɛ-laai su. Ífe ínûai sɔŋ sîɣe ǹalôŋ ŋí ŋãa pú mɛni su.’ A pâi ǹyée seêi káwoo mu.

⁹Ka mɛni-ŋai ŋí kélee kɛ̀ nyii Yâwɛɛ a ŋ̀wɛ̂lii, vé pâi kásɔŋ siɣêi nalôŋ ŋí ŋãa pú mɛni su.

¹⁰“Káai a zinâai, ka pâi liî kɔ́ pɛlɛ̂i kákpɔara-ƃelai dîa. Yâwɛɛ a pâi gɛ̂i ká da-ŋa soŋ a kɔ-soŋ-ŋa.

¹¹À kɛ̀ gɔ-soŋ-ŋai ŋí sáma nɛnî lɛ́lɛɛ káa naa nyii maa mɛni a ǹúui dɔnɔ da líi sóŋ a pɔ̂ri ziɣêi,

¹²é lí la ŋɔpɛ́rɛi lá é ŋuŋ kálaŋ ma, é ǹyée da gɔ́ ɣalêŋ tée,

¹³é zeɣei kúla mà kɛ̀ gɔŋ mâ díkɛ zòŋ gɔ́i sui. É malôŋ see kɛ́ a ɣáloŋ tɔnɔ ǹee da ǹâŋ dísaa mɛni ma. Ŋ̀áloŋ tɔnɔi a kpɛ̀ɛ é gúla a nɛnî.

¹⁴Ǹaa pôlu ma zɔŋ à wàla ǹíi láa a pɔ̂ri ƃôi mà é lí ƃɛ́i kélee a ŋ̀wɛ̂lii. Vé gɔlɛ kpaa máŋ é zoŋ yɛ̂ɛ luɛ, kpɛ́ni fêi, a lɔ́ la pɛ́rɛ mu.

¹⁵“À kɛ̀ nɛnî feerɛ da kɛ̀ surɔ̂ŋ tɔnɔ yêei, gɛ́ ƃò a ǹɛnîi dɔnɔ wɛ́liɛɛ é tɛ́ɛ m̀arâŋ-nuui mâ, à kɛ̀ ǹɛnî feerɛi ŋí da lóŋ surɔ̂ŋ maa sɔlɔ ƃô, ǹɛnîi nyii vé ŋwɛli-ni ŋɔloloŋ tɛɛ nyii mâ è ŋwɛli-nii ŋɔloŋ mâ,

¹⁶zurɔ̂ŋ kpîŋ à kɛ̀ gɔ̃liŋ ŋá kɔlɛ̂i ǹônii feerɛi ŋí dîa, vé gɛ́tɛ ɣele tɛ̀ɛ ǹɛnîi nyii è ŋwɛli-nii ŋɔloloŋ pɔ́ kpɛ́ni fêi, è ǹee wɛ́li-ni kɛ́lɛ fɛ̂ɛ ǹɛnîi nyii vé ŋwɛli-nii ŋɔloloŋ, kpɛ́ni fɛ̂i nyaa ƃé gáa a ǹóŋ maa-ŋuŋ.

¹⁷Fɛ̂ɛ é gɔ̃liŋ ŋá kɔ́lɛ gîei saaƃa é zeêi veerɛ tɛ́ɛ ǹɛnîi nyii vé ŋwɛli-nii ǹóŋ-surɔ̂ŋ pɔ́ kpɛ́ni fɛ̂i ǹyaa ƃé gáa a ǹóŋ-surɔ̂ŋ maa-ŋuŋ. Bɔ́ɔ ƃa ǹâŋ kɔ̃liŋ.

¹⁸“À kɛ̀ lóŋ-surɔ̂ŋ da káa kásama va ƃaa-kɛ-maa tɛ̀ɛ ǹâŋ da ǹee pɔ́, da gula maa kɛ̂ va ŋ̀óli tɔ̀ɔ dîa,

¹⁹ǹâŋ da ǹee dí zoŋ dí pá la ǹúu-pɔlɔ-ŋai pɔ́ da mɛni-sâa ƃó-ƃelai.

²⁰Da lì la da mò dîa dîyɛɛi, ‘Kúloŋ ŋí wôlii kpɔ̂lɔi. Va kúwoo mɛni a dɔnɔ kpîŋ. Dûa-pere nyɔmɔ̂ɔi, gɛ́ lɔɔ kpêle a ŋánaa.’

²¹À kɛ̀ tí daai tí su kpakolo-ŋai kélee da zɔɔ a kɔni dí báa. Fɛ̂ɛ ka zɔnyɔ̂ŋ-ƃelai kula kásama. Ǹúui gbéli-ŋai da m̀ɛni da pâi yaôi.

²²“À kɛ̀ núu da a lɔii tɔ̂ŋ tòo nyii maa-nɛ̃ɛi dí báa mɛni mai, da bàa dí buma sɛ̂lɛŋ wúru ma,

²³káfe nɛ̀ɛ naa bumai é nyíi ŋ̀úrui ma. Ka ǹoo a ŋ̀ele tɔnɔ tí, kpɛ́ni fêi, ǹúui kélee da zɛ̀lɛŋ gáa Ɣâla ŋɔtɔŋ kpɛ́-maai mu. Káfe ǹɔii maa liƃi Káɣâlai Yâwɛɛ a dɛɛ kápɔi.