Read Kpelle Dutɛrɔnome 24 Bible Online

Dutɛrɔnome 24 - Kpelle bible

Dutɛrɔnome 24

¹“A kɛ̀ surɔ̂ŋ da a nɛnî kùla naa kɛ́ɛ tí é ŋumɛ mɛ̂ni da ŋáa káa ma é pîlaŋ ǹɛnii kpîŋ mà, ǹyɛɛ vɛ́ ŋɔ́nɔ ŋ̀wɛ̂lii, é táa-lâa kɔlɔ tɛɛ bɔ́ é gúla ŋɔpɛ́rɛi mu.

²Ǹyaŋ a lì surɔ̂ŋ da kpɛ́ni é gula a nɛnî,

³naa pôlu maa zurɔ̂ŋ tí ǹyaa máŋ ǹyɛɛ vé ŋɔ́nɔ ǹɛnîi kpîŋ wɛ́lii, é taa-laa kɔlɔ tɛɛ bɔ́ é gula ŋɔpɛ́rɛi mu, kpaa máŋ a kɛ̀ maa surɔ̂ŋ a sàa.

⁴Ŋɔsurɔ̂ŋ maa-ŋuŋ fa ŋɔ́nɔ pɔ̂ri gulâi a nɛnî. Ǹɛnî kpîŋ maa fé ŋɔ́nɔ waa ní m̀ɛni ma. M̀ɛnii kpîŋ káa a ƃaa kula-maa mɛ̂ni Yâwɛɛ ŋɛ́i. Káfe sɔnyɔ̂ŋ kɛ̀ ǹɔii ma Káɣâlai Yâwɛɛ a dɛɛ̂i kápɔi.

⁵“Surɔ̂ŋ da a nɛnî kùla a nina káfe dɛ̀ɛ kɔ́ ma, káfe tela tíi kpanaŋ tɛ̀ɛ bɔ́. Fɛ̂ɛ é lɛ́ɛ ŋɔpɛ́rɛi lá é ŋɔnɛnî ninai wɛ́li kúla a kóraŋ tɔnɔ.

⁶“Ka kpa pili núu da ma é sɛ́ɣɛ sée káyêei, kɛ́lɛ zɛɣɛi fé kɛ̀ a zɛŋ nyii a ŋɔkɛɣɛniɛi kɛ̀ lai. Ka gɛ̀ tí, gɛ̀ ní maa-nuui ŋɔpɛ́rɛi mu-ƃelai da pâi saâi a puru.

⁷“Ka núu da soŋ nyii a Eezuɛ nuui da ǹóŋ ŋúma a gɛɛ é gɛ́ a ŋɔluɛ kpaa máŋ é gɔlɛ, ka maa nuui kpîŋ paa. Fɛ̂ɛ ka m̀ɛni nyɔ́mɔɔ kɛ́-ƃelai kúla kásama.

⁸“À kɛ̀ a kpono ma kɔlɔ-fela ka káwoli tɔ́ɔ ǹia-wooi ma zâla láa-soŋ-ƃelai nyii-ŋai díkaa a Liiva-ŋai da dɛ̀ɛ kápɔi. M̀ɛni-ŋai kélee ŋá mò dîa a gɛɛ dí nɛ́ kâai, ká káwoli tɔ́ɔ dîa.

⁹Ká m̀ɛnii kàa Káɣâlai Yâwɛɛ è gɛ̀ a Miriaŋ berei su tãi ká kɛ̀ kulâi la Ize lɔii sui.

¹⁰“Ka kpa pili núu da ma káfe lɔ̀ m̀aa nuui ŋɔpɛ́rɛi mu ka zɛ́ɣɛ sɛŋ nyii è góno tèe la káyêei kúla naa a wála-wala-laa.

¹¹Ka lɛ̀ɛ ŋ̀enei ŋá ǹyaa kpîŋ é lɔ́ ŋɔpɛ́rɛi mu é pá la.

¹²À kɛ̀ m̀aa nuui káa a kôlo-nuu maa-sêɣe kɛ́ ƃò nɔ́ tɔnɔɔ, vé lɛ̀ɛ káyêei é lɛ́ɛ la zu vóloi é tóo.

¹³Ka dɛɛ bɔ́ pôlu ɣele-wûlii é lɛ́ɛ pâi kɛ̂i. Ka gɛ̀ tí a pâi nyîi zu é kásɛɣɛ̂i fêi é lûwa láa kâa, ǹyaŋ a pâi kɛ̂i a tɔ̃yâ-laa mɛni Káɣâlai Yâwɛɛ ŋɛ́i.

¹⁴“Kôlo-nuu da à kɛ̀ tíi kɛ̂i kâa, káfe vìli. A nɛ̃ɛ ma é kɛ́ a Eezuɛ-nuu kpaa máŋ ŋɔ̃ya nyii-ŋai díkaa kátaa-ŋai da sui.

¹⁵Ka núu kélee fela fé díi mɛni ma a gɛ̂i. Ka ŋɔfela-fêi tɛ́ɛ bɔ́ vóloi é lɛ́ɛ pâi liî kpɛ́ni fêi ǹyaa ƃé gíli káa ma. A wàla kɛ́ tí, m̀aa nuui a wɔ̀lɔ Yâwɛɛ ma, Yâwɛɛ a pâi ziɣêi a sɔnyɔ̂ŋ.

¹⁶“Káfe núu da pàa ǹóŋ sɔŋ mɛni ma. Káfe lolôŋ da pàa ŋɔkaa-ƃelai sɔŋ mɛni ma. Tɔɔ núu kélee é sáa gbîŋ sɔŋ su.

¹⁷“Káfe tee-loŋ kpaa máŋ ŋɔ̃ya da ŋɔmɛni ŋa tee a fili-pêre. Káfe pɔɔ nɛnî da ŋɔseɣe sòŋ ǹyêei a sɛ́ɣɛ.

¹⁸Ka gɔ́lɔŋ a gɛɛ ká kɛ̀ a luɛ-ŋa Ize Káɣâlai Yâwɛɛ é káŋuŋ ma ƃó é kákula naa. Mɛni ƃé ŋa m̀ôi la kâa a gɛɛ ká sía a dɔ̂ŋ-ŋai ŋí wóo.

¹⁹“Ka lì kási-sãai m̀á kulâi, ka nìa da ma, káfe lì pôlu mɛni ma. Ka ǹɛɛ naa ŋɔ̃ya-ŋai, dee-loŋ-ŋai da bɔɔ-nɛyãai mɛni ma. Gɛ̀ ní díi kélee ka gɛ̂i Yâwɛɛ a pâi lûwa lâai dîa.

²⁰Káfe ká ɔle wurui m̀á kélee kùla ŋá. Ka da lɛɛ naa ŋɔ̃ya-ŋai, dee-loŋ-ŋai da bɔɔ-nɛyãai mɛni ma.

²¹Káfe kákpɔmɔ-ŋai m̀á kélee kùla ŋ̀á. Ka da-ŋa lɛɛ naa ŋɔ̃ya-ŋai, dee-loŋ-ŋai da bɔɔ-nɛyãai mɛni ma.

²²Ka gɔ́lɔŋ a gɛɛ ká kɛ̀ a luɛ-ŋa Ize lɔii su. Mɛni ƃé ŋa m̀ôi la kâa a gɛɛ ká sía a dɔ̂ŋ-ŋai ŋí wóo.