Read Kpelle Dutɛrɔnome 3 Bible Online

Dutɛrɔnome 3 - Kpelle bible

Dutɛrɔnome 3

¹“Kú tìnaŋ kú lí Basãŋ yá-ŋûa pere. Basãŋ kaloŋ Oŋ da ŋɔnûai dí pà dí kɔ́ pɛ́lɛ kûa Ɛdirei taai su.

²Kɛ́lɛ Yâwɛɛ è mò mâ ǹyɛɛi, ‘Ífe yào. Ŋaâ gâloŋ Oŋ tɛ̀ɛ ípɔ da ŋɔnûai kélee é pɛ́lɛ ŋɔlɔii ma. Zoŋ yɛ̂ɛ berei í gɛ̀ la a Amora-ŋai díkâloŋ Siɔŋ nyii kɛ̀ Ɛsibɔŋ.’

³“Nya ƃe Kúɣâlai Yâwɛɛ è gɛ̀ kú Gâloŋ Oŋ yée mɛi ɣále da ŋɔnûai. Kú díkelee dí pàa.

⁴Kú ŋɔtaa lêe buu lɔ́ɔlu mɛi dai kélee sìɣe. Kú Ago lɔii-kpiniŋ sîɣe nyii Basãŋ kaloŋ Oŋ è kɛ̀ mɛi.

⁵Daa-lee-ŋai ŋí kélee maa è kɛ̀ a góliɛɛ a siɣãŋ-ŋa, wúru kpono da kɔli-ŋa da kpanâŋ pɛlɛ-pɛlɛɛ támaa nyii-ŋai dímaa fé kɛ́ ní a goliɛɛi.

⁶Kú díkelee dísu-kara yɛ̂ɛ berei kú gɛ̀ la a Ɛsibɔŋ kaloŋ Siɔŋ da ŋɔnûai. Núu da kélee fé lɛ̀ɛ ní naa.

⁷Kɛ́lɛ kú daa-tulɛ-ŋai kélee sìɣe da zãai kú gùla-yêei kɛi.

⁸“Nya ƃe kú ǹɔii kûla Amora-ŋai díkâloŋ feerɛi yêei nyii-ŋai kɛ̀ Zɔdiŋ Ya-leei pôlu-pere, é síɣe Ano Ya-leei mâ é tóo Ɛmɔŋ Yeei ma.

⁹Sidɔŋ-ŋai dí Ɛmɔŋ láa sèe a Siriɔŋ, Amora-ŋai dí ǹáa sée a Senɛɛ.

¹⁰Kú nɛ̃ɣɛi ŋá taa-leei-ŋai sîɣe da Gilia lɔii é pɛ́lɛ Basãŋ kpiniŋ su ŋ̀ɔɔ-ŋai dîa é tóo Saleka taai, Ɛdɛri taai da nyii-ŋai kɛ̀ Gâloŋ Oŋ ŋɔkâloŋ lɔii-kpiniŋ su Basãŋ.”

¹¹Gâloŋ Oŋ ƃé kɛ̀ a ŋ̀wála-wâla nuui gbɛɛ-ŋai. Ŋɔgbìŋ è kɛ̀ a gbɛtɛɛ a kɔli. Ŋɔkôya è kɛ̀ a kɔ́ɔ ƃɔ́rɔnîi puu káo saaƃa, ŋɔŋa-kɛtɛ kɛ́ ƃò a kɔ́ɔ ƃɔ́rɔnîi lɔ́ɔlu mɛi da. Gbìŋ ŋí è kɛ̀ Amɔŋ-ŋai dítaai su Laba é lɛ́ɛ la zu dí gɔlɔi ŋí pɔ̃yɛ.

¹²“Tãi kú ǹɔii-kpîniŋ ŋí sìɣe lai, ŋá nàa tɛ̀ɛ Lubiŋ ŋɔsuui da Gâa ŋɔsuui su-ƃelai pɔ́. Ǹɔii ŋí è kùla Aroɛ nyii gáa Ano Ya-leei su Gilia lɔii gbua síɣe da naa taa-lee-ŋai.

¹³Ŋá Gilia lɔii kpiniŋ gbéli sìɣe da Basãŋ ŋɔi nyii gâloŋ Oŋ è kɛ̀ mɛi.” Ŋá dɛ̀ɛ Manasɛ ŋɔsîi su-ƃelai gbulu tɔnɔ pɔ́ é pɛ́lɛ Basãŋ kpiniŋ su ŋɔɔ-ŋai kélee nyii da kâa dòli a ŋ̀wála-wala-ƃelai dílɔii.

¹⁴Zâa, nyii kɛ̀ a Manasɛ ŋɔsuui su nuui dɔ̀nɔi, è Aago lɔii kélee sìɣe Basãŋ kpiniŋ su é tóo Gɛsɔ-ŋai da Maakati-ŋai dílɔii goyaŋ-perei ma. È gbîŋ láa sèe nàa ma nyii da dòli a Zâa ŋɔtaa-ŋai. Ǹyaŋ nàa láa ká tí kɛ̀ é lɛ́ɛ la zu dí gɔlɔi ŋí pɔ̃yɛ.

¹⁵“Ŋá Gilia tɛ̀ɛ Maka ŋɔsuui pɔ́, nyii-ŋai díkaa a Manasɛ ŋɔsuui su ƃelai dai.

¹⁶Ŋá Ano Ya-leei ŋɔtiŋ-tiŋ gbua tɛ̀ɛ Lubiŋ da Gâa dínuu-suu-ŋai pɔ́. É lɛ́ɛ la zu é seri Zabɔ ya-leei nyii gáa a Amɔŋ-ŋai dígoyaŋ perei. Ǹɔii ŋí kɔ́ɔ è pìlaŋ Gilia lɔii ma.

¹⁷Ǹɔii ŋí è sìɣe Zɔdiŋ tiŋ-tiŋ sû vóloi liî-pere. É ŋɔ́nɔ síɣe Galalîi Yai ma yá-ŋua-pere é yéŋ Ǹyúo Saai mâ yá kwára-pere é tóo Piga yeei ma nyii kɛ̀ vóloi kulâi-perei.

¹⁸“Ŋá mò kâa a maa tãi tí ńyɛ̂ɛi, ‘Káɣâlai Yâwɛɛ a ǹɔii tɛ́ɛ kápɔ. Ka ǹɛɛ naa kákɔ-kuluƃa-ŋai dí Zɔdiŋ Ya-leei tíyeŋ a gɛɛ dí tɔ́ɔ Eezuɛ-ƃela kpéli-ŋai tuɛ a gɛɛ dí káyɔɔ-ŋai maa kɔ̃ɔ.

¹⁹Kánɛyâai, kánîa-pɛlɛɛi da kátaa-tulɛ-ŋai dí lɛ́ɛ pôlu daa-ŋai su ƃɛ́i ŋá naa tɛ̀ɛ kápɔi. Ŋá gɔ́lɔŋ a gɛɛ ká taa-tulɛ-ŋai tâmaai.

²⁰Tãi Yâwɛɛ a pâi ŋuŋ ƃô tɛɛ̂i la ká káyɔɔ-ŋai pɔ́ yɛ̂ɛ berei a gɛ́ la a káai, dia máŋ dí sée ǹɔii ma è dɛ̀ɛ dípɔ Zɔdiŋ Ya-leei pôlui, gɛ̀ ní kákelee ka pâi liî pôlu ǹɔii ma nyii ŋá dɛ̀ɛ kâpɔi.’

²¹“Nya ƃe ŋá mò Zasua ma Ńyɛɛi, ‘Yaâ mɛ̀ni-ŋai káa Íɣâlai Yâwɛɛ è gɛ̀ a gâloŋ feerɛi. A pâi mɛ̀ni-ŋai ŋí kɛ̂i a gâloŋ lɔii-kpiniŋ-ŋai nyii-ŋai ya liî zui.

²²Ífe yào dîa. Íɣâlai ƃé pâi kɔ̂i ímɛni ma.’

²³“Ŋa Yâwɛɛ fɛ̀li ńyɛɛ mai,

²⁴‘Óo Yâwɛɛ, yaâ pɛ̀lɛ íwala-wala kɛ́tɛi lɛ̂i íyee mu-nuui ma. Lé Ɣala ƃé ɣeniɛ su a pɔ̂ri diî kɛ̂i ya gɛ̀i?

²⁵Tɔɔ ŋá lí ŋá ǹɔii lɛ́lɛɛi káa Zɔdiŋ Ya-leei pôlu, ǹyée lɔii lɛ́lɛɛ-ŋai da Lɛƃanɔŋ.’

²⁶“Kɛ́lɛ Yâwɛɛ è ǹíi ŋ̀wana mâ ká mɛni ma. Vé kɛ́ ní ŋ̀wɛ̂lii é ŋ̀óli tɔ́ɔ ḿâ. È mò ḿâ ǹyɛɛi, ‘É kɛ́ tí. Ífe ŋɔ́nɔ mɛni da ƃò ḿâ é pîlaŋ m̀ɛnii ŋí ma.

²⁷Tɛ́ Piga yeei ma í íŋɛi pîlaŋ vóloi liî pere, í bîlaŋ yá-ŋua-pere, da séɣai-pere é tóo vóloi kulâi-pere. Ǹɔii maa kpɛ́ɛ a ǹɛ́lɛɛ, kpɛ́ni fêi, ífe pâi Zɔdiŋ Ya-leei tíyenîi.

²⁸Kɛ́lɛ wála-wala-laa tɛɛ Zasua pɔ́ í ǹíi kúla, kpɛ́ni fêi, nya ƃé pâi tɔɔ̂i ǹûai láa-tuɛ é ǹyái tíyeŋ a dia, é gɛ́ dí ǹɔii sɔlɔ ƃó í gàai.’

²⁹“Nya ƃe kú lɛ̀ɛ díŋ-tiŋ su Bɛpuɔ kɔlɛ ma.”