Read Kpelle Dutɛrɔnome 34 Bible Online

Dutɛrɔnome 34 - Kpelle bible

Dutɛrɔnome 34

¹Nya ƃe Mose è kùla Môa tiŋ-tiŋ su é lí Nebo yeei mâ, Piga yeei tôŋ su Zɛleko voloi kulai pere. Yâwɛɛ è ǹɔii-kpiniŋ su gwaa kélee mâ lɛ̀ mà é kúla Gilia é tóo yá-ŋua-pere Daŋ lɔii ma.

²È Nɛfɛtɛli lɔii lɛ̀ mà, Ifiraŋ da Manasɛ lɔii-kpiniŋ, Zuda lɔii gwaa kélee é tóo vóloi liî-pere Mɛditɛrenia Yuoi ma,

³vɛ̃ɛ-kpâlaŋ lɔii kélee, Zôa taa-lee ma tiŋ-tiŋ é lɛ́ɛ liî é tóo Zɛleko taa-leei ma nyii da nàa tòli a dóu lɔii mai.

⁴Yâwɛɛ è mò Mose mà ǹyɛɛi, “Ǹɔii ká ŋí ŋá ḿvòo la gɛɛ ŋá dɛɛ Eberaɣɛ̃ɛ, Aise da Zeeka-ni pɔ́, ńyɛ̃ɛ dîai, ‘Ŋa pâi ǹɔii ŋí tɛɛ̂i kálônii pɔ́. Ŋa ǹaa lɛ̂i nɔ́ yâ, kɛ́lɛ ífe pâi serîi naa.’ ”

⁵Nya ƃe Mose è sàa Môa lɔii su, yɛ̂ɛ berei Yâwɛɛ è mò la m̀ai.

⁶Yâwɛɛ è Mose lòo Môa ǹyée-ŋai loai Bɛ-poɛ kɔlɛ. Kɛ́lɛ núu da fé ƃɛ́i kɔ́lɔŋ m̀olôŋ káa naa sâa.

⁷Mose è kɛ̀ a kóraŋ ŋuŋ tɔnɔ pôlu buu feerɛ (120). È kɛ̀ a gbonôi kpanaŋɔɔ, ŋ̀ɛ́i kɛ́ kwaa kàa a ǹɛ́lɛɛ é lɛ́ɛ la zu é sáa.

⁸Eezuɛ-ŋai dí malôŋ sèe ƃò Mose mɛni ma a fólo buu saaƃa Môa tiŋ-tiŋ su yɛ̂ɛ berei dínûa-pɔlɔ-ŋai tûa-pere è kɛ̀ lai.

⁹Mose é lɛ́ɛ pâi saâi, è ǹyée lɛ́ Nuŋ ǹóŋ Zasua ma a gɛɛ è bɔ́ɔ ŋá síɣe. Zaá pôlu mai Yâwɛɛ è táre mɔleŋ tɛ̀ɛ Zasua pɔ́. Eezuɛ-ŋai dí ŋ̀óo mɛ̀ni. Dí mɛnii kélee kɛ̀ yɛ̂ɛ berei Yâwɛɛ è mò la Mose mai.

¹⁰Ɣâla ŋɔlóno kɛ́-nuu da fé wɔ́lɔ kɛ́ ní Eezuɛ lɔii su yɛ̂ɛ Mose, nyii da Yâwɛɛ dí lòno díkîe-ni pɔi.

¹¹Yâwɛɛ è Mose tɛ̀ɛ a gɛɛ é ŋɛi-kɛ-maa maa da zu-gbɛlɛ-gbɛlɛ mɛni-ŋai kélee kɛ̀ nyii Yâwɛɛ è mò ma a gɛɛ é díkɛ gâloŋ ŋɛ́i da ŋɔnûai Ize lɔii sui.

¹²Núu da fé tá mɛni kpaya-kpaya maa pɔlɔ-pɔlɔɔ-ŋai ŋí da kɛ́ ní Eezuɛ-ŋai ŋɛ́i-tuɛ nyii-ŋai Mose è gɛ̀i.