Read Kpelle Dutɛrɔnome 4 Bible Online

Dutɛrɔnome 4 - Kpelle bible

Dutɛrɔnome 4

¹Mose è mò ǹûai dîa ǹyɛɛi, “Ka káwoli tɔ́ɔ dɔŋ-ŋai ŋí dîa ŋa pá ŋ̀á lɛ̂i kâai. Ka dímɛi káa a gɛɛ ká lɛɛ ɣele ma ká seri ǹɔii su Káɣâlai Yâwɛɛ a dɛɛ̂i kápɔi.

²Káfe dɔ̂ŋ-ŋai ŋí da pɛ̀lɛ mà kpaa máŋ ká da kula ma. Ka dímɛi káa a ǹɛ́lɛɛ.

³Káa kpîŋ ka m̀ɛnii kàa Káɣâlai Yâwɛɛ è gɛ̀ a Bêe ɣala-fɛli-ƃelai. È díkelee dísu kàra.

⁴Kɛ́lɛ káai ka láai a Yâwɛɛ m̀ɛnii, ká káa niî ɣele ma.

⁵“Ŋa dɔ̂ŋ-ŋai ŋá lɛ́ kâa da mɛni-saa ƃó pere yɛ̂ɛ berei Yâwɛɛ è mò la mâi. Ka lí ká tíi kɛ́ a dia ƃɛ́i ka pâi kɛ̂i naai.

⁶Ka sia a dɔ̂ŋ-ŋai wóo ka dímɛi káa. Da pâi táre tɛɛ̂i kápɔ ǹûai mɛi káa mɛni ma. Da dɔ̂ŋ-ŋai ŋí mɛ̀ni da pâi môi dîyɛɛi, ‘Tɔ̃yâ ma táre-ƃela díkaa ǹɔii-ŋuŋ kɛ́tɛi ŋí su.’

⁷“Lé lɔii-ŋuŋ ƃé naa ŋɔɣâlai lɛɣɛɛ la a ŋánaa yɛ̂ɛ berei Kúɣâlai Yâwɛɛ lɛɣɛɛ̂i la a kúai? Tãi kélee kwa dòli lai, a kúwoo su tòo.

⁸Lé lɔii ŋuŋ ƃé naa ŋɔtɔ̂ŋ-ŋai sãâi yɛ̂ɛ dɔ̂ŋ-ŋai ŋa sâa dɛɛ̂i kápɔi?

⁹Ka kákpîŋ mɛi káa ká mɛni maa kpɛɛ a ǹɛ́lɛɛ káfa lâa nia la dɔ̂ŋ-ŋai dîa. Ka dɔ̂ŋ-ŋai lɛ́ kálônii dîa da díwɔ̂ lonii.

¹⁰Ka gɔ́lɔŋ a gɛɛ ka wɔ́lɔ tɔ̀ɔ Káɣâlai Yâwɛɛ ŋɛ́i-tuɛ a tãi tɔnɔ da Olɛ yeei ma. Ǹyaŋ è mò mâ ǹyɛɛi, ‘Ŋánûai lɛ́ɣɛ a ńyãa ŋa lóno dípɔ. Da pâi ƃaa-kɛ-maa tɛɛ̂i ḿbɔ dí ŋátɔŋ-ŋai lɛ́ dílônii dîa.’

¹¹“Ká pà ká tɔ́ɔ ǹyéei mu ǹyéei kɛ́ kèreŋ ǹuri kɛ́ tɛ̀ ŋ̀elei su naa kpíniɛɛ.

¹²Yâwɛɛ kɛ́ɛ lônoi kápɔi, ŋ̀óo è kɛ̀ kulâai ŋ̀ɔŋ su. Ŋ̀óo nɔ́ ƃé ká mɛ̀ni kɛ́lɛ káfe gáa ní.

¹³È m̀ɛnii ƃò kâa fɛ̂ɛ ká gɛ́ é lɛ́ɛ pâi ŋɔkono-teei ŋ̀aa-see kɛ̂i káyêei. Ǹyaa ƃa fɛ̂ɛ ká ŋɔtɔ̂ŋ puui mɛi káa nyii è bɔ̃yɛ gɔni-ƃela feerɛi mai.

¹⁴È mò ḿâ a gɛɛ ŋá ŋɔtɔ̂ŋ ŋá lɛ́ kâa nyii fɛ̂ɛ ká sía a ŋ̀óo ǹɔii ma ka liî naai.

¹⁵“Tãi nɔ́ Yâwɛɛ è kɛ̀ lônoi la kápɔ Olɛ yeei ma káfe ǹyaa kpîŋ gáa ni, ká kámɛi káa.

¹⁶Káfe Ɣâla da kpɛ́ni-ŋ kpɛ̀tɛ kákpîŋ mɛni ma a fúlu-sɛŋ kélee da pɔɔkɔ̂ŋ, yɛ̂ɛ nɛnî, surɔ̂ŋ,

¹⁷fɛnɛ-sɛŋ, ŋɔni,

¹⁸tɔara-sɛŋ, kpaa máŋ nyɛ̃ɛ.

¹⁹Káfe vóloi, ŋ̀áloŋ da bɛmɛlɛŋ-ŋai fɛli. Yâwɛɛ è zãai ŋí pù ŋ̀elei su núu-kpune kélee mɛni ma.

²⁰Kɛ́lɛ Yâwɛɛ è ká kùla m̀ɛni-kpɔlui su Ize é pá a káa é kákɛ a gbɔ́ɔi ŋɔnûa. Ǹyaŋ bere ƃé gáa la sâa.

²¹Yâwɛɛ è ǹíi ŋ̀wana mâ kámɛni ma. È vòo a gɛɛ fé pâi Zɔdiŋ Ya-leei tíyenii, a gɛɛ ŋá lí gono-tee lɔii ma a pâi dɛɛ̂i kápɔi.

²²Ǹyaŋ ŋa pâi saâi ǹɔii su ƃɛ́. Fé pâi Zɔdiŋ Ya-leei tíyeni. Kɛ́lɛ ka pâi liî gono-tee lɔii lɛ́lɛɛi su.

²³Ká kámɛi káa káfa lâa nia la gono-tee ma Yâwɛɛ è gɛ̀ káyêei, ka Ɣâla pɔkɔɔŋ-ŋa kpɛtɛ kámɛni ma.

²⁴Kpɛ́ni fêi, Yâwɛɛ káa yɛ̂ɛ ŋɔŋ, dóloɔɔ.

²⁵“Tãi ka pâi kɛ̂i la ǹɔii su a tãi su kôya ká nîa-pɛlɛɛ maa sɔlɔ ƃó, diaŋ dí kɛ́ díwɔ̂ nia-pɛlɛɛ maa sɔlɔ ƃoi, à kɛ̀ kà pɛ̀lɛ wôya mɛni-ŋa kɛ̂i, ká Ɣâla pɔkɔɔŋ-ŋa saa kámɛni ma, ká kɛ́ mɛni nyɔ́mɔɔ da kpɛ́ni-ŋa kɛ̀, nyii vé a Yâwɛɛ líi láa mɛni-ŋai,

²⁶ŋa pâi ǹɔii da ŋ̀elei tôlii dí tɔ́ɔ kâa, ǹyaŋ kásu a pâi karâi ǹɔii ma ka liî naai.

²⁷Yâwɛɛ a pâi kátaa-taâi ǹûai sáma, ǹyaŋ ka pâi kɛ̂i nɔ́ a kákpulu loŋ lɔii-ŋuŋ da kpɛ́ni-ŋa su.

²⁸Ǹyaŋ naa ƃé ka pâi kɛ̂i tíi kɛ̂i naa wúru da kɔni-ŋa dîɛ nyii-ŋai núu-kpune-ŋa dí díkpɛ̀tɛ a Ɣâla pɔkɔɔŋ-ŋai, nyii-ŋai dífa kwaa kâai, dífa mɛni mɛ̂ni, dífa mii-sɛŋ mìi kpaa máŋ dí sɛŋ kúŋ mɛnii.

²⁹Kɛ́lɛ à kɛ̀ kà Káɣâlai Yâwɛɛ kɔ̀ri a kálii kélee da kámɔliŋ, ka pâi gâai.

³⁰Tãi ka pâi kɛ̂i la mɛni-kpulu-ŋai ŋí su lii-too pôlu támaa kɛ́ ƃò kâai, ka pâi tínanii Káɣâlai Yâwɛɛ pɔ́ naa pere ká káwoli tɔ́ɔ mà.

³¹Káɣâlai Yâwɛɛ káa a maloŋ kâa Ɣala. Vé pâi ǹyée kulâi ká mu kpaa máŋ é kásu kara, kpaa máŋ é nia gono-teei ma è gɛ̀ kánâŋ-ni díwɔ̂ naŋ-ni yêei é tela vooi.

³²“Íkili-ŋa sía é pîlaŋ wɔlɔ-wɔlɔi tí su mà, tãi dí fé nîi kɛ̀ ímaa sɔlɔ ƃó ní lai é tóo tãi ma Ɣâla è núu-kpune kpɛ̀tɛ la ŋ̀éniɛi sui. Mɛni kɛ́tɛ kɛ́ɛ ŋí ta a wɔ́lɔ kɛ́ a bɔlɔ? Núu da a tá wɔ́lɔ nyíŋi da mɛni?

³³Ka kákili ŋá sía é pîlaŋ tãi ma Ɣâla è núu-kpune kpɛ̀tɛ lai é tóo sâa mai. Mɛni kɛ́tɛ kɛ́ɛ ŋí da a tá kɛ́ núu-kpune ŋɛ́i-tuɛ kpaa máŋ é kɛ́ nûa dí duŋ mɛni dí lɛ́ɛ ɣele ma yɛ̂ɛ berei è kɛ̀ la a káai?

³⁴Ɣâla da a tá kɔ́ a gɛɛ é lɔii-ŋuŋ da kula lɔii-ŋa sáma a su-kɔɔŋ kɛ́ɛ, ŋɛi-kɛ-maa, kɔ́ a ŋɔwála-wala yeei, kpaa máŋ mɛni mili-mili-ŋa kɛ́ɛ yɛ̂ɛ berei Káɣâlai Yâwɛɛ è gɛ̀ la káŋɛi-tuɛ Ize lɔii sui?

³⁵È mɛni-ŋai ŋí kɛ̀ káŋɛi-tuɛ a gɛɛ ká gɔ́lɔŋ ǹyaa ƃa Káɣâlai Yâwɛɛ. Ɣâla da kpɛ́ni fé naa é kúla bôlu.

³⁶È kɛ̀ ŋ̀elei su gɛ́ lòno kápɔ ká kɛ́ ŋ̀óo mɛ̀ni ŋ̀elei-kɔlɔŋ su. Gɛ́ɛ ǹɔii ma gɛ́ lòno kápɔi, ŋ̀óo è kɛ̀ kulâi ŋɔŋ leŋ su.

³⁷È kákùla Ize lɔii su é pá a káa ǹyaa kpîŋ ŋ̀ɛ́i a ŋɔwála-wala-laai. Kpɛ́ni fêi, è kánâŋ-ni díwɔ̂ naŋ-ni wɛ́li ní.

³⁸È lɔii-ŋuŋ kpaya-kpaya da lɔii-ŋuŋ wála-wala-ŋa kùla namela yêei é naa tɛ̀ɛ kápɔ nyii kákaa naai.

³⁹Ka gɔ́lɔŋ sâa a gɛɛ Yâwɛɛ káa a Ɣâla ŋ̀elei su, ǹɔii ma da ǹɔii mu-pere. Ɣâla da fé naa da ǹyaa dípɔ̂riɛɛ.

⁴⁰Ka ŋɔtɔ̂ŋ-ŋai mɛi káa ŋa dɛɛ̂i kápɔ sâai. Ka gɛ̀ tí, gɛ̀ ní ka kɛ́-mɛni kélee ŋaa-see a pâi kɛ̂i a ǹɛ́lɛɛ da kálônii díwɔ̂-ŋai káfulu-laai su é kôya ǹɔii Yâwɛɛ a dɛɛ̂i kápɔi su.”

⁴¹Nya ƃe Mose è taa-lee saaƃa lɛ̀ Zɔdiŋ Ya-leei vóloi kulâi-pere,

⁴²a gɛɛ núu da a núu pàa nyii vé gíri ní é gɛi a pɔ̂ri pûi é lí maa taai tí dɔnɔ su. A pɔ̂ri liî daa-leei ŋí dɔnɔ ta su a gɛɛ é ŋɔfúlu-laai maa kɔ̃ɔ.

⁴³Gwaa-ŋai ŋí ma ƃe daa-lêe-ŋai dí kɛ̀ naa: Bezɛ taa-leei nyii kɛ̀ a Lubiŋ ŋɔsuui su-ƃelai dítaa-lêei dɔnɔ vɛ̃ɛ-kpâlaŋ sui. Lemɔ taa-leei nyii kɛ̀ Gilia kpiniŋ sui, nyii gáa a Gâa ŋɔsuui su-ƃelai dítaa-lêei dɔnɔi. Da Golaŋ taa-leei nyii gáa a Manasɛ ŋɔsuui su-ƃelai dítaa-lêei dɔnɔ nyii kɛ̀ Basãŋ kpiniŋ sui.

⁴⁴Dɔ̂ŋ-ŋai ká ŋí Mose è pà la Eezuɛ-ŋai ŋ́ɛi-tuɛi.

⁴⁵È berei lɛ̀ dîa da pɔ̂ri tuâi la a tãi dí kùla Ize lɔii sui.

⁴⁶Dí kɛ̀ Bɛpoɛ Zɔdiŋ tiŋ-tiŋ ŋɔfólo kulâi-pere Amora-ŋai díkâloŋ Siɔŋ ŋɔlɔii su. Siɔŋ è kɛ̀ Ɛsibɔŋ taa-leei su a kâloŋ. Mose da Eezuɛ-ŋai dí wɔ́lɔ ǹyée mɛi ɣàle a tãi dí kùla la Ize lɔii sui.

⁴⁷Dí ŋɔlɔii kùla ǹyêei da Basãŋ kaloŋ Oŋ. Dífeerɛ dí kɛ̀ a Amora-ŋai díkâloŋ Zɔdiŋ Ya-leei vóloi kulâi-pere.

⁴⁸Ǹɔii ŋí è siɣe Aroɛ taai mâ é láa a Ano Ya-leei é tɛ́ yá-ŋua pere é seri Siriɔŋ yeei ma.

⁴⁹È siɣe naa é lí vóloi kulâi-pere Zɔdiŋ Ya-leei mâ, é tɛ́ɛ nâa é lí seɣai-pere é lɛ́ɛ la zu é seri Ǹyúo Saai mâ, Piga yeei kwára-pere.