Read Kpelle Dutɛrɔnome 7 Bible Online

Dutɛrɔnome 7 - Kpelle bible

Dutɛrɔnome 7

¹“Yâwɛɛ é lɛ́ɛ pâi liî a káa gono-tee lɔii ma a pâi ǹɔii-ŋuŋ kpaya-kpaya wála-wala lɔ́ɔlu mɛi feerɛ su-ƃelai ŋí kpɛ̂i káperêi: Ita-ŋai, Gigasa-ŋai, Amora-ŋai, Keena-ŋai, Pɛriza-ŋai, Iva-ŋa da Zɛbusa-ŋai.

²A dítɛɛ kápɔ a gɛɛ ka dísu-kara ka gɛ́ tí. Káfe dísu-mɛni lɛɛ. Ka dîa-ni káfe mɛni da kpɛ̀tɛ káloai.

³Nɛnî kpaa máŋ surɔ̂ŋ kula mɛni da fé kɛ̀ káloai ka dîa-ni. Káfe kálônii nɛyãai da tɛ̀ɛ dílônii sinaai da pɔ́ a nɛnî, káfe tela dílônii nɛyãai da wɛli kɛ̀ kálônii sinaai da mɛni ma.

⁴Ka gɛ̀ tí da pâi gɛ̂i kálônii sinaai líi é pene ɣâla da kpɛ́ni pɔ́ naa pere. Gɛ̀ ní Yâwɛɛ a pâi ǹíi ŋwanâi kâa é kásu-kara.

⁵Mɛni-ŋai ŋí ƃé ká gɛ́ a dîa. Ka díɣâla-teƃele-ŋai wólo, ká díkɔni maa waa-ŋai wólo-wôlo, ká díɣâlai nɛ̀nii Asira fɛli kwaa-ŋai ma wuru-ŋai pɔ́ŋ, ka ŋ̀âla pɔkɔɔŋ-ŋai kéreŋ.

⁶Kákaa a núu maa waa-ŋa Yâwɛɛ mɛni ma. Káa ƃé a kásiɣe zu a gɛɛ ká kɛ́ a ŋɔnuui gbîŋ-ŋa ɣele ma.

⁷“Vé kásiɣe ní kátama mɛni ma kpaa máŋ káa ƃa ǹúu-kpulu loŋ ŋ̀éniɛi su.

⁸Kɛ́lɛ è gɛ̀ tí kpɛ́ni fêi, è káwɛli-ni a gɛɛ ŋɔ́nɔ é gono teei ŋaa-see kɛ́ nyii è gɛ̀ kánâŋ-ni yêei a gɛɛ a pâi díkulâi Ize kaloŋ yêei ǹuɛ-laai su Ize lɔii su.

⁹Ka gɔ́lɔŋ a gɛɛ Káɣâlai Yâwɛɛ káa a Ɣâla. Gáa a kili-kɛ-zu ɣala nyii a ŋɔwɛli-kɛ-maa kono-teei ŋ̀aa-see kɛ̀ núu wála-wala seêi támaa mì nyii-ŋai da ŋ̀wɛli dí kɛ́ ŋɔkono-teei ŋ̀aa-see kɛi.

¹⁰Kɛ́lɛ diai da gbɔarai, a dísu-kara. Vé pâi tãi su-koya siɣêi dísu-kara mɛni ma.

¹¹Mɛni ma, ka tãi siɣe ka dɔ̂ŋ-ŋai mɛi káa ŋa sâa dɛɛ̂i kápɔi.

¹²“À kɛ̀ ka káwoli tɔ̀ɔ dɔ̂ŋ-ŋai dîa ká sía a díwoo, gɛ̀ ní ŋ̀óo mii Káɣâlai Yâwɛɛ da kánâŋ-ni dí gɛ̀i a pâi lɛɛ̂i dɔɔ̂i.

¹³A pâi káwɛ̂li, é lûwa láa kâa, é gɛ́ kásuui su é kɛ́tɛ. A pâi lûwa lâai kálônii dîa, é lûwa láa ǹɔii ma a gɛɛ kási-sãai dí kpɛtɛ ká mii-sãa támaa sɔlɔ ƃó da kpele-sãa, kátaa-tulɛ-ŋai dí ƃûu ƃó ǹɔii ma è dɛ̀ɛ kánûa-pɔlɔ-ŋai pɔ́i.

¹⁴A pâi lûwa támaa lâai kâa é tɛ́ɛ ǹúui gbéli-ŋai dîa. Káta fé pâi wɔ́lɔ kɛ̂i a kpóma-nuu. Kátaa-tulɛ-ŋai da fé pâi kɛ̂i naa nyii ǹóŋ fé pâi kɛ̂i bôlui.

¹⁵A pâi káŋuŋ ma ƃôi kɔlɔ-fela sii kélee yêei. Vé pâi gɔlɔ-fela nyɔ́mɔɔ-ŋai da piliî kâa nyii-ŋai ká gàa Izei, kɛ́lɛ a pâi gɛ̂i tí a kákpɔara-ƃelai.

¹⁶Fɛ̂ɛ ka diai kélee su-kara Káɣâlai Yâwɛɛ a dítɛ̀ɛ kápɔi. Káfe díŋɛi malôŋ kàa, káfe tela díɣâla-ŋai da fɛ̀li. Ka gɛ̀ tí, da pâi kɛ̂i a ƃáre kámɛni ma.

¹⁷“Tãi da ka pâi mòi kâa, ‘Ǹɔii-ŋûŋ-ŋai ŋí su-ƃelai wála-wâlai é tɛ́ɛ kûa. Kwa pâi gɛ̂i léŋ kú díkpɛ?’

¹⁸Kɛ́lɛ káfe yào dîa. M̀ɛnii kíli é lɛ́ɛ káŋa nyii Káɣâlai Yâwɛɛ è gɛ̀ a Ize kaloŋ Ize lɔii sui.

¹⁹Káa kpîŋ ká zu-kɔɔ̂ŋ kpaya-kpaya kàa, ŋ̀ɛi-kɛ-maa-ŋai da zu-gbɛlɛ-gbɛlɛ mɛni-ŋai nyii è gɛ̀ a ŋɔwála-wala yeei a gɛɛ é kákula naai. Káɣâlai, Yâwɛɛ a pâi mɛni sîi tɔnɔi tí kɛ̂i a diai kélee ka yaôi diai.

²⁰Nyíŋi pôlu ma a pâi gbɔ́mɔ-ŋa tɛɛ̂i a gɛɛ dí diai su-kara pâi pûi dí díloo kâai.

²¹Káfe yào dîa, kpɛ́ni fêi, Káɣâlai nyii kásamai, gɛ̂tɛi, maa mili-miliɛɛ.

²²A pâi ǹɔii-ŋûŋ-ŋai tí su-ƃelai kpɛ̂i káperei tɛi-tɛi. Vé pâi gɛ̂i tãi tɔnɔ yée mu. À gɛ̀ tí daa-tulɛ-ŋai da pâi ƃûu ƃôi a maa félaa dí tɔ́ɔ kâa.

²³A pâi dítɛɛ̂i kápɔ é díkili ŋá pú. Díkili ŋá a pâi lɛɛ̂i a búɔɔ é lɛ́ɛ la zu ka díyee mɛi ɣále.

²⁴A pâi díkâloŋ-ŋai tɛɛ̂i kápɔ, ǹyaŋ ka pâi dísu-karai. Núu da fé pâi pɔ̂rii kɔ̂i kápɔ. Ka pâi díkelee dísu-karai.

²⁵Ka pâi díɣâla pɔkɔɔŋ-ŋai kéreni. Káfe díma ƃara-ŋai da gôoi da sìɣe a kápɔɔ. Ka gɛ̀ tí, gɛ̀ ní ka kákpîŋ pûi mɛni-kpɔlu su. Yáawɛ fé ŋwɛ́li ní a mɛni kɛ́ɛ ŋí.

²⁶Káfe pà a ɣâla-pɔkɔɔŋ-ŋa kápɛrɛ-ŋai mu. Náɣaŋ káa dîa. Ka gɛ̀ tí, náɣaŋ a pâi kɛ̂i kâa. Ka díkelee díkereŋ.