Read Kpelle Dutɛrɔnome 8 Bible Online

Dutɛrɔnome 8 - Kpelle bible

Dutɛrɔnome 8

¹“Ka tãi siɣe ka dɔ̂ŋ-ŋai mɛi káa a gɛɛ ká lɛ́ɛ ǹɔii ma Yâwɛɛ è góno tèe la kánâŋ-ni yêei ka ƃûu ƃó.

²Berei Káɣâlai Yâwɛɛ è káteniŋ tɔ̀ɔ la vɛ̃ɛ-kpâlaŋ su a góraŋ buu náaŋ maa mɛni kíli é lɛ́ɛ káŋa. È gɛ̀ ká kɛ́ a maa yeŋ-ƃela é su-kɔɔŋ tɛɛ kápɔ a gɛɛ é kálii su kɔ́lɔŋ à kɛ̀ ka pâi ŋɔtɔ̂ŋ-ŋai mɛi kâai.

³È gɛ̀ ka kɛ́ a maa yeŋ-ƃela, é gɛ́ puru é kápaa, é káŋaa kɔ́ŋ a mana, nyii káa kpaa máŋ kánâŋ-ni dífe gɔ́lɔŋ. È gɛ̀ tí a gɛɛ ká gɔ́lɔŋ núu-kpune fa ŋɔfúlu-laai kɛ̀ nɔ́ mii-sɛŋ mii mɛni ma, kɛ́lɛ ŋ̀óoi kélee a kula Yâwɛɛ lái.

⁴Káseɣe-ŋai dí kɛ̀ nɔ́ a nina, káta kɔ́ɔ fé fɛ́ɛ-fɛɛ ní góraŋ buu náaŋ yée mu ká kɛ̀ vɛ̃ɛ-kpâlaŋ sui.

⁵Ka gɔ́lɔŋ a gɛɛ berei núu-kpune a ǹóŋ kula-maa kɛ̀ lai, bere ƃé Káɣâlai Yâwɛɛ a kákula maa kɛ̀ la.

⁶Ka Yâwɛɛ ŋɔtɔ̂ŋ-ŋai mɛi káa ká tûa yɛ̂ɛ berei a wɛ̂lii lai, ká ŋume-maa tɛɛ bɔ́.

⁷Kpɛ́ni fêi a pâi a káa lɔii lɛ́lɛɛ ma, ya-tôŋ-ŋa tamâai ǹɔii ŋí ma, póa-ŋa, yá pɛlɛ-pɛlɛɛ da yée-ŋa.

⁸Wîi támaa káa naa, bale, ƃá-kpɔmɔ-ŋa, fîi wuru, pɔmegurane, wúlɔ wuru-ŋa da kɔ̃́iŋ-wulɔ.

⁹Gáa a lɔii ƃɛ́i mii-sɛŋ fa kpɛ̀ɛ naai. Sɛŋ da ƃarâŋ fé pâi toôi kâa naa. Naa kɔni kélee káa a kɔli. Ǹyaŋ ka pâi kɛ̂i ƃara-ŋa kulâi naa ǹyée-ŋai su.

¹⁰Ka pâi kálaa miî, ká péla, ká Yâwɛɛ láa maa tɛ́ nyii ǹɔii lɛ́lɛɛi ŋí tɛ̀ɛ kápɔi.

¹¹“Káfe ǹia Káɣâlai Yâwɛɛ ma. Ka ŋɔtɔ̂ŋ-ŋai mɛi káa ŋa sâa dɛɛ̂i kápɔi.

¹²A wàla kɛ́ tí tãi ka pâi kálaa miî la ká péla, ká pɛ́rɛ lɛ́lɛ-lɛlɛɛ-ŋa tɔɔ,

¹³kátaa-tulɛ-ŋai dí ƃûu ƃó, ká káne da gôo támaa sɔlɔ ƃói,

¹⁴Ka pâi kɛ̂tɛi kákpîŋ ŋɛ́i ká nia Káɣâlai Yâwɛɛ ma nyii kákùla ǹuɛ-laai su Izei.

¹⁵È kɛ̀ kátuɛ vɛ̃ɛ-kpâlaŋ su nyɔmɔɔi tí su. Kali nyɔmɔɔ-ŋa da zɛŋkpɛ-ŋa díkɛ̀ naa. Yá fé kɛ́ ní naa a gɛɛ ká gbele, kɛ́lɛ è yá kùla gɔnii su é dɛ̀ɛ kápɔ ká gbèle.

¹⁶È mana nyii kánûa-pɔlɔ-ŋai dífe kɛ́ ní a gɔlɔŋɔɔi tɛ̀ɛ kápɔ ká mii vɛ̃ɛ-kpâlaŋ su. È su-kɔɔŋ kpanaŋ tɛ̀ɛ ká pɔ a gɛɛ ǹaa a kɛ̀ tí é lûwa láa kâa, é mɛni lɛ́lɛɛ kɛ́ kâa.

¹⁷Ka fé mò a gɛɛ kakpɔɔi wala-walai su ƃé ká tɔɔ-laa da wala-wala laa sɔlɔ ƃô naa.

¹⁸Kɛ́lɛ ka gɔ́lɔŋ a gɛɛ Káɣâlai Yâwɛɛ ƃé ŋ̀wála-walai tɛ̀ɛ kápɔ a gɛɛ kákɛ a tɔɔ-ƃela. È gɛ̀ tí a gɛɛ é ŋɔkono-teei ŋaa-see kɛ́ nyii è vòo la kánâŋ-ni yêei, yɛ̂ɛ berei gáa la sâai.

¹⁹Kà ǹia Káɣâlai Yâwɛɛ ma ká tínaŋ ɣâla da kpɛ́ni-ŋa pɔ́ naa pere ká kɛ́ dífɛ̀li káŋuŋ lá a pâi pilîi.

²⁰Káŋuŋ lá a pâi pilîi yɛ̂ɛ berei Yâwɛɛ è gɛ̀ la a ǹɔii-ŋuŋ da kpɛ́ni-ŋai a tãi kákɛ̀ pâi lai.