Read Kpelle Zɔ̂ŋ 11 Bible Online

Zɔ̂ŋ 11 - Kpelle bible

Zɔ̂ŋ 11

¹Nalôŋ tɔnɔ e kɛ̀ kɔ́lɛ̂i. Da kɛ̂ ma Lâzara, Bɛtɛni taai su, Mere da ǹêɣe Maatɛ díkɛ̂i.

²Gáa a Mere nyii wúlɔ kúŋ nɛ̃ɛ pù Kúnuu-namui ma é gɔ́ɔ maa kɔɔ a ŋ̀uŋ-leɣa, nyii zaaƃɔlɔ Lâzara e kɛ̀ kɔ́lɛ̂i.

³Nya ƃe ŋɔsaaƃɔlɔ-ŋai dí núu tɛ̀ɛ bɔ naa, dîyɛɛ ma, “Kúnuu-namui, ǹúui nyii í ŋ̀wɛ̂li níi, gáa kɔ́lɛ̂i.”

⁴Kɛ́lɛ, tãi Zîsɛ e mɛ̀ni lai, e mò, ǹyɛɛi, “Gɔlɔ-felai ŋi fe saa mɛni ma; gáa Ɣâla ŋɔfólo-laai mɛni ma, a gɛɛ Ɣâla Ǹóŋ ŋɔfólo-laai é tɛ́ zarâi.”

⁵E kɛ̀ ti, Zîsɛ e kɛ̀ a Maatɛ wɛ́liɛɛ da ǹîa Mere, da Lâzara.

⁶Nya ƃe tãi e m̀ɛni la a gɛɛ Lâzara e kɛ̀ kɔ́lɛ̂i, e gɛ̀ a ɣele-kuu feerɛ ƃɛi e kɛ̀ naai.

⁷Nyiŋi pôlu ma e mò ŋɔpôlu-ƃelai dîa, ǹyɛɛi, “Kwaa li ŋɔ́nɔ Zuda.”

⁸Ŋɔpôlu-ƃelai dí mò mà, dîyɛɛi, “Kaamɔ̂ɔ, Zûu-ŋai dí kɛ̀ íkɔrîi a gɛɛ dí ísɔɔ, nya ƃe ŋɔ́nɔ íkaa liî naai?”

⁹Zîsɛ e zu tòo, nyɛɛi, “Kɛrɛ̂e, aƃa puu kao feerɛ ƃe gáa ɣele tɔnɔ sui? A kɛ̀ núu da à sìa a voloi, ve pâi gɔ́ɔ tuâi. Kpɛ́ni fêi, a ǹɔii ŋi ŋɔkwaa-ponoɔi kâai.

¹⁰Kɛ́lɛ, à kɛ̀ núu da à sìa a gbínii, a gɔ́ɔ tùa. Kpɛ́ni fêi, gwaa-ponoɔi fe gbonôi.”

¹¹E mò ti, naa pôlu ma e mò dîa, ǹyɛɛi, “Kúwɛli-nuui Lâzara a nyiî. Kɛ́lɛ, ŋa liî a gɛɛ ŋa ŋ̀ɛi la ƃo.”

¹²Ŋɔpôlu-ƃelai dí mò ma, dîyɛɛi, “Kúnuu-namui, à kɛ̀ gáa nyiî, a pâi ƃálôi.”

¹³Ǹyaŋ Zîsɛ e kɛ̀ lônoi é pîlaŋ ŋɔsaa mɛni ma. Kɛ́lɛ, dí kɛ̀ gáâi yɛ̂ɛ a lônoi é pîlaŋ nyii kpîŋ ma.

¹⁴Nya ƃe Zîsɛ e mò dîa a zu-ponoɔ, ǹyɛɛi, “Lâzara aâ saa.

¹⁵Kámaa-mɛni ma, ńii nɛɛ̂i a gɛɛ fe kɛ́ ni naa, a gɛɛ ká láa la. Kɛ́lɛ, kwaa li bɔ naa.”

¹⁶Tama, nyii da kɛ̂ ma Ǹyuâi, e mò m̀arâa-polu-ƃelai dîa, ǹyɛɛi, “Kúa máŋ kwaa li a gɛɛ kwa dîa-ni ku saa.”

¹⁷Tãi Zîsɛ e pà lai, e gàa Lâzara a nâa gɛ́ molôŋ su a ɣele náaŋ.

¹⁸Bɛtɛni e kɛ̀ Zerusâlɛŋ kɔlɛ, yɛ̂ɛ aƃa tɔnɔ-sia.

¹⁹Zûu-ŋai dámaa dí pà Mere da Maatɛ pɔ a gɛɛ dí díŋa-kpɛ́ dísaaƃɔlɔ mɛni ma.

²⁰Tãi Maatɛ e mɛ̀ni a gɛɛ Zîsɛ a kɛ̀ pâi, e lì duɛ, Mere ǹyaŋ e kɛ̀ see ni bɛ́rɛi mu.

²¹Maatɛ e mò Zîsɛ ma, ǹyɛɛi, “Kúnuu-namui, eêi kɛ̀ iî kɛ̀ ƃɛ, ńzaaƃɔlɔ fei saa.

²²Loníi ma kpîŋ ŋá gɔ́lɔŋ a gɛɛ nyii kélee ya vɛ́li Ɣâla mai, Ɣâla a pâi dɛɛ̂i ípɔ.”

²³Zîsɛ e mò mà, ǹyɛɛi, “Ísaaƃɔlɔ a pâi mu siɣêi ŋɔ́nɔ.”

²⁴Maatɛ e mò mà, ǹyɛɛi, “Ŋá gɔ́lɔŋ a gɛɛ a pâi mu siɣêi ŋɔ́nɔ mu-siɣe saa-yeei su a ŋelei gbɛɛ ŋái.”

²⁵Zîsɛ e mò ma, ǹyɛɛi, “Ńyãa ƃa mu-siɣe saa-yeei da vulu-laai; ǹúui nyii a làa a ńyãai, berei máŋ zaâi lai, kɛ́lɛ, a pâi kɛ̂i a vulu.

²⁶Ǹyaŋ ǹúui nyii kélee gáa ɣele mai, nyii a làa a ńyãai, ve pâi wɔ́lɔ saâi. Ya nyiŋi síɣe a tɔ̃yâ?”

²⁷E mò ma, ǹyɛɛi, “Ooei, Kúnuu-namui; ŋa láa la a gɛɛ yá ƃa Kôrai, Ɣâla Ǹóŋ, nyii gáa pâi ǹɔii sui.”

²⁸Tãi e kpɛ̀ɛ a nyiŋi ƃoɔi, e lì e ǹîa-nɛnii Mere toli. E mò a ŋóo maa yeŋɔɔ, ǹyɛɛi, “Gaamɔ̂ɔi káa ƃɛ, ǹyaŋ a ítolîi.”

²⁹Tãi e mɛ̀ni e mu sìɣe a maa felaa e li bɔ.

³⁰Zîsɛ ǹyaŋ fe niî kɛ̀ pá ni daai su. Kɛ́lɛ, e kɛ̀ niî ƃɛi Maatɛ e gàa naai.

³¹Tãi Zûu-ŋai kɛ̀ Mere kɔlɛ bɛ́rɛi mui, dí kɛ̀ ŋá kpɛ̂i, dí gàa Mere e mu siɣe a maa felaa e li ŋini ŋái, dí pîlaŋ bôlu. Kpɛ́ni fêi, dí kɛ̀ gáâi a gɛɛ Mere a liî molôŋ la wɔ́lɔ̂i naa.

³²Nya ƃe tãi Mere e pà ƃɛi Zîsɛ e kɛ̀ naai, e gàa e too gɔ́ɔ mu, e m̀o ma, ǹyɛɛi, “Kúnuu-namui, eêi kɛ̀ iî kɛ̀ ƃɛ ńzaaƃɔlɔ fei saa.”

³³Tãi Zîsɛ e gàa, gɛ wɔlɔi da Zûu-ŋai nyii pîlaŋ bôlui dí kɛ̀ wɔ́lɔ̂i, malôŋ e tòo ma a ŋánaa ŋɔmɔ̂leŋ su;

³⁴e m̀o ma, ǹyɛɛi, “Mi ƃe ká ǹaa naai?” Dí mò ma, dîyɛɛi, “Kúnuu-namui, pá í gáa.”

³⁵Zîsɛ e wɔ̀lɔ.

³⁶Nya ƃe Zûu-ŋai dí mò, dîyɛɛi, “Ka gáa berei e ŋ̀wɛli ni lai!”

³⁷Kɛ́lɛ, da-ni dí mò, dîyɛɛi, “Ǹúui nyii a ŋɛi-pu-nuu ŋɛi lá ƃoi, vei pɔ̂ri nalôŋ ŋi kɛ̂i ve saa?”

³⁸E kɛ̀ ti malôŋ támaa ŋɔ́nɔ tòo Zîsɛ ma e pa molôŋ lá; e kɛ̀ a loa, fɛ̃yɛ-ƃela laa mɛi.

³⁹Zîsɛ e mò dîa, ǹyɛɛi, “Ka vɛ̃ɛ-ƃelai siɣe naa.” Maatɛ nyii gáa a zaa-nuui zaaƃɔlɔi, e mò ma, ǹyɛɛi, “Kúnuu-namui, tãi ŋi su gúŋ káa mà. Kpɛ́ni fêi, a saa a ɣele-kuu náaŋ.”

⁴⁰Zîsɛ e mò ma, ǹyɛɛi, “Kɛrɛ̂e, ŋá mò yâ, a gɛɛ yà làa la ya pâi Ɣâla ŋɔfólo-laai kâai?”

⁴¹Nya ƃe dí vɛ̃ɛ-ƃelai kùla naa. Zîsɛ e ŋ̀ɛi tɛ̀ ɣelêi, e m̀o, ǹyɛɛi, “Ńâŋ, ŋa ísɛɣɛ̂i fé a gɛɛ ya ŋ́oo mɛ́ni.

⁴²Ŋá gɔ́lɔŋ a gɛɛ ya ŋ́oo mɛ̀ni nɔ a tãi kélee. Kɛ́lɛ, ŋa nyiŋi ƃôi nɔ ǹûai ŋi mɛni ma díkaa tɔɔ ni ŋ́gɔlɛi, a gɛɛ dí láa la a gɛɛ yá ƃe ńdɛ̀ɛ.”

⁴³Tãi e nyiŋi ƃòi, e làɣi a ŋ̀óo su kɛ́tɛ, ǹyɛɛi, “Lâzara, kula.”

⁴⁴Zaa-nuui e kùla ǹyée da gɔ́ɔ lá ɣiriɛ a seɣe, ŋ̀uŋ ma ɣiriɛ a seɣe. Zîsɛ e mò dîa, ǹyɛɛi, “Ka vúloŋ, ká ƃó mà é lí.”

⁴⁵Zûu-ŋai dámaa diai pà da Mere-ni dí mɛnii káa e gɛ̀i, dí làa la.

⁴⁶Kɛ́lɛ, díta-ni dí lì Faresii-ŋai pɔ. Dí mò dîa mɛnii Zîsɛ a gɛ́i.

⁴⁷Nya ƃe zâla láa soŋ-ƃela kpaya-kpayai da Faresii-ŋai dí koyâŋ tòo dí m̀o, díyɛɛi, “Le ƃe kwa pɔ̂ri gɛ̂i? Kpɛ́ni fêi, nalôŋ ŋi a ŋɛi-kɛ-maa támaa kɛ̂i.

⁴⁸A kɛ̀ kwà nɛ̀ɛ naa é lí nɔ ti, ǹúui kélee a pâi lâai la, gɛ̀ ní Lomaŋ-ŋai da pâi pâi dí kúkɛ̂i maa waai su kara da kúnûai.”

⁴⁹Kɛ́lɛ, dítɔnɔ ta, da kɛ̂ ma Kêafɛ, nyii kɛ̀ a zâla láa soŋ-nuu kɛ́tɛi a maa-koraŋ ti, e mò dîa, ǹyɛɛi, “Káfe mɛni da kélee kɔlɔŋ;

⁵⁰káfe tárêi zu a gɛɛ ǹɛ́lɛɛ̂i kámɛni ma a gɛɛ núu tɔnɔ é sáa ǹûai mɛni ma, a gɛɛ ǹyaŋ ǹɔii kélee ŋuŋ lá fe píli.”

⁵¹Ve nyiŋi ƃo ni gbɔɔ̂i-yee ma. Kɛ́lɛ, gɛɛ a zâla láa zoŋ-nuu kɛ́tɛi a maa-goraŋ ti, e mɛnii ƃò nyii pâi kɛ̂i a gɛɛ Zîsɛ a pâi saâi ǹɔii mɛni ma,

⁵²ǹyaŋ ǹɔii mɛni ma tɔnɔ nɔ fêi. Kɛ́lɛ, é Ɣâla ŋɔnîa-pɛlɛɛi kélee ŋá-tɛ́ gîe-ma tɔnɔɔ, diai dí táa-taa.

⁵³É síɣe maa-foloi ti ma dí lì koyâŋ su a gɛɛ da pɔ̂ri gɛ́i leŋ dí bàa.

⁵⁴E kɛ̀ ti, Zîsɛ fe ŋɔ́nɔ sia ni a maa ponoɔ dísama. Kɛ́lɛ, e síɣe naa e li ǹɔii su vɛ̃ɛ-kpâlaŋ kɔlɛ daai su da kɛ̂ ma Ifiraŋ; naa ƃe e kɛ̀ naa da ŋɔpôlu-ƃelai.

⁵⁵Ǹyaŋ Zûu-ŋai Dítɛɛ-mɛi-kuui e kɛ̀ lɛɣɛ̂i. Núu támaa dí kùla ǹɔii su. Dí lí Zerusâlɛŋ Dɛɛ-mɛi tuɛ a gɛɛ dí díkpîŋ maa waa.

⁵⁶Dí kɛ̀ Zîsɛ kɔ́rîi díkɛ mo díkîe-ni dîa Ŋ̀âla-pɛrɛ Kɛ́tɛi mu, dîyɛɛi, “Le ƃe gáa íkili ŋá? A gɛɛ ve pâi pâi gúui su?”

⁵⁷Ǹyaŋ zâla láa soŋ-ƃela kpaya-kpayai da Faresii-ŋai da nâa díwoo tɛ́ɛ a gɛɛ, à kɛ̀ núu da e ƃɛi kɔ́lɔŋ gáa naai, é dílɛɛ naa dí gɔ́lɔŋ a gɛɛ dí zoŋ.