Read Kpelle Zɔ̂ŋ 17 Bible Online

Zɔ̂ŋ 17 - Kpelle bible

Zɔ̂ŋ 17

¹Tãi Zîsɛ e ŋ̀óo-ŋai ŋi ƃòi, e ŋ̀ɛ́i tɛ̀ ŋelei su e m̀o, ǹyɛɛi, “Ńâŋ, tãi a seri; Íloŋ ŋɔfólo-laai maa tɛ́, ǹyaŋ é ífolo-laai maa tɛ́,

²berei ǹyaŋ ya nâa wala-wala tɛɛ bɔ lúu kélee mɛi, a gɛɛ e wɔlɔ-wɔlɔ fulu-laa tɛɛ diai kélee pɔ ya dɛɛ bɔi.

³Ǹyaŋ wɔlɔ-wɔlɔ fulu-laa ká ŋi a gɛɛ dí íkɔlɔŋ a Dɔ̃yâ-Ɣala tɔnɔi, ka Zîsɛ Kôrai nyii ya dɛɛi.

⁴Ŋá ifolo-laai maa tɛ̀ ǹɔii su, díi kpɛɛ su nyii í dɛ̀ɛ ḿbɔ a gɛɛ ŋa gɛ́i;

⁵Ńâŋ, tãi ŋi su, ŋáfolo-laai maa tɛ́ íkpîŋ ŋɛi, volo-laai nyii kɛ̀ ńyêei, íkɔlɛ ǹɔii é lɛ́ɛ pâi kpɛtɛ̂i.

⁶“Ŋa ílaâi lɛ́ zinâai dîa nyii í díkùla ǹɔii su í dítɛɛ ḿbɔi. Dí kɛ̀ a ípɔɔ, í dítɛ̀ɛ ḿbɔ, ǹyaŋ da íwooi mɛi káa.

⁷Da nâa gɔ́lɔŋ a gɛɛ sɛŋ kélee ya dɛɛ ḿbɔi e kùla íyee ŋá;

⁸kpɛ́ni fêi, ŋa ŋ̀óo-ŋai tɛ́ɛ dípɔ nyii í dɛ̀ɛ ḿbɔi, ǹyaŋ da díyee see dímu, da gɔ́lɔŋ a tɔ̃yâ a gɛɛ ŋá kùla íyeêi; da ŋɔ́nɔ láa la a gɛɛ yá ƃe ńdɛ̀ɛ.

⁹Ŋa ífɛlîi dímɛni ma; fe ífɛlîi ǹɔii mɛni ma, kɛ́lɛ, diai mɛni ma ya dítɛɛ ḿbɔi, kpɛ́ni fêi, díkaa a ípɔɔ;

¹⁰ḿbɔɔ kélee káa a ípɔɔ, ípɔɔ kɛ́ ƃo a ḿbɔɔ, ǹyaŋ ŋáfolo-laai maa tɛ́ɛ̂i díkponôi.

¹¹Ḿve ŋɔ́nɔ ǹɔii su. Kɛ́lɛ, díkaa ǹɔii su, ǹyaŋ ŋa pâi ípɔ. Ńâŋ Maa Waai, dímɛi káa ílaâi su, diai ya dítɛɛ ḿbɔi, a gɛɛ dí kɛ́ tɔnɔɔ yɛ̂ɛ berei kúkaa la tɔnɔɔi.

¹²Tãi ŋa kɛ̀ díkɔlɛ, ŋá dímɛi kàa ílaâi su, diai í dítɛ̀ɛ ḿbɔi. Ŋá dímɛi kàa, ǹyaŋ díta fe laŋ ni, fɛ̂ɛ ǹóŋ láŋɔɔi, a gɛɛ Ŋ̀âla-kɔlɔi ŋa-see é kɛ́.

¹³Kɛ́lɛ, ŋa nâa kɛ́ pâi ípɔ. Ŋa ŋ̀óo-ŋai ŋi ƃôi ǹɔii su a gɛɛ ŋálii-nɛɛi láa é fɛ̂ɛ díkponôi.

¹⁴Ŋa íwooi tɛ́ɛ dípɔ; ǹyaŋ ǹɔii a díkpɔara, kpɛ́ni fêi, dífe a ǹɔii su-ƃela, yɛ̂ɛ berei fe la a ǹɔii su-nuu.

¹⁵Fe ífɛlîi a gɛɛ í díkula ǹɔii su. Kɛ́lɛ, a gɛɛ í dímɛi káa dua-pere nyɔŋ-nuui yêei.

¹⁶Dífe a ǹɔii su-ƃela, yɛ̂ɛ berei fe a ǹɔii su-nuu.

¹⁷Dímaa waa dɔ̃yâi su; íwooi káa a tɔ̃yâ.

¹⁸Yɛ̂ɛ berei í ńdɛ̀ɛ la ǹɔii sui, bere nɔ ƃe ŋa dítɛɛ la ǹɔii su.

¹⁹Ŋa ŋ́gbîŋ maa wâa dímɛni ma a gɛɛ dia máŋ dímaa é wáa tɔ̃yâ su.

²⁰“Fe ífɛlîi dia nɔ dímɛni ma. Kɛ́lɛ, nyii-ŋai máŋ mɛni ma diai pâi lâai a ńyãai díwooi su,

²¹a gɛɛ díkelee dí kɛ́ zu tɔnɔɔ; yɛ̂ɛ berei la yá Ńâŋ máŋ íkaa la ŋ́gbonôi, ǹyaŋ ŋ́gɛ ƃò íkponôi, a gɛɛ dia máŋ dí kɛ́ kúkponôi a gɛɛ ǹɔii é láa la a gɛɛ yá ƃe ńdɛ̀ɛ.

²²Volo-laai nyii ya dɛ́ɛ ḿbɔi ŋa dɛɛ dípɔ, a gɛɛ dia máŋ dí kɛ́ tɔnɔɔ yɛ̂ɛ berei la kúkaa la tɔnɔɔi.

²³Ŋ́gɛ ƃò díkponôi, yáŋ íkɛ ƃo ŋ́gbonôi, a gɛɛ dí kɛ́ kpɔ́ tɔnɔɔ, a gɛɛ ǹɔii e gɔlɔŋ ƃia ƃe ńdɛ̀ɛ, ǹyaŋ ya díwɛli yɛ̂ɛ berei í ŋ́wɛ̀li lai.

²⁴Ńâŋ, ŋa ŋ̀wɛ̂lii a gɛɛ dia máŋ nyii-ŋai ya dítɛɛ ḿbɔi dí kɛ́ ŋ́gɔlɛ ƃɛi ŋa naai, a gɛɛ dí ŋáfolo-laai káa nyii ya dɛɛ ḿbɔi íwɛli-laai su ḿaa-mɛni ma ŋ̀éniɛi e lɛɛ pâi kɛ̂i.

²⁵Óo zɔŋ-lɛlɛ-Naŋ, ǹɔii fe niî íkɔlɔŋ ni, kɛ́lɛ, ŋa íkɔlɔŋ; ǹyaŋ nyii-ŋai ŋi dí gɔ́lɔŋ a gɛɛ yá ƃe ńdɛ̀ɛ.

²⁶Ŋá ílaâi lɛ̀ dîa, ŋa pâi ŋɔ́nɔ ǹɛ̂i, a gɛɛ ŋ̀wɛli-kɛ-maai nyii í ŋ́wɛ̀li lai, é kɛ́ díkponôi, ńyãa máŋ ŋá kɛ́ díkponôi.”