Read Kpelle Zɔ̂ŋ 18 Bible Online

Zɔ̂ŋ 18 - Kpelle bible

Zɔ̂ŋ 18

¹Tãi Zîsɛ e ŋ̀óo-ŋai ŋi ƃòi, da ŋɔpôlu-ƃelai dí tɛ̀ɛ Kîdɔŋ gboto-woloi su, ƃɛi kɛ̀ a sûa, nyii da ŋɔpôlu-ƃelai dí lì zu.

²Ǹyaŋ Zudasi nyii kùla bôlui e kɛ̀ máŋ a nàa kɔ́lɔŋɔɔ; kpɛ́ni fêi, nàa ƃe Zîsɛ da ŋɔpôlu-ƃelai da kâa kòyaŋ naa.

³Nya ƃe Zudasi e kɔkuluƃa-ŋa sìɣe, bɛlɛɛ kɔkuluƃa-ŋa da-ni dîa dí kùla zâla láa soŋ-ƃela kpaya-kpayai da Faresii-ŋai yée ŋá. Dí lì zûai su a laŋpo-ŋa da kpáleŋ-leŋ-ŋa, da kɔ́-kɔ-sãa.

⁴Nya ƃe Zîsɛ e gɔ́lɔŋ nyii kélee pâi kɛ̂i lai, e pà dípɔ e m̀o dîa, ǹyɛɛi, “Gbɛ̂ɛ ƃe ka gɔ́rii?”

⁵Dí mò ma, dîyɛɛi, “Nâzarɛ Zisɛi.” Zîsɛ e mò dîa, ǹyɛɛi, “Ńyãa ƃe ǹyaa.” Zudasi nyii kùla bôlui, e kɛ̀ tɔɔ ni díkɔlɛ.

⁶Tãi e mò dîa, ǹyɛɛi, “Ńyãa ƃa ǹyaâi,” dí kùla pôlu dí tóo ǹɔii ma.

⁷E ŋɔ́nɔ dímarê kɛ̀, “Gbɛ̂ɛ ƃe ka gɔ́rii?” Dí mò ma, dîyɛɛi, “Nâzarɛ Zisɛi.”

⁸Zîsɛ e zu tòo, ǹyɛɛi, “Ŋá mò kâa a gɛɛ ńyãa ƃa ǹyaa; à kɛ̀ ka ŋ́gɔrîi, gɛ̀ ní ka ǹûai ŋi lɛ́ɛ naa dí li.”

⁹Nyiŋi ƃe ŋ̀óoi ŋa-see kɛ̀, nyii e mòi, ǹyɛɛi, “Diai ya dítɛɛ ḿbɔi, fe dɔnɔ da laŋ ni.”

¹⁰Nya ƃe Samaŋ Pitɛ, ƃóa-sɔkpɔ e kɛ̀ ǹyêei, e gùla e bili zâla láa soŋ-nuu kɛ́tɛi yée-mu-nuui ma é ǹáa-mii-yee mɛi-wolii tée. Ǹyée-mu-nuui láa ƃe kɛ̀ a Makɔɔ.

¹¹Zîsɛ e mò Pitɛ ma, ǹyɛɛi, “Íƃoai lɔ́ daâi. Ve a sɛŋ a gɛɛ ŋá ŋ́gbele gɔɛi su nyii Ńâŋ a dɛɛ ḿbɔi?”

¹²Nya ƃe ǹɔii maa kpɛ́-ƃelai da dímɛi-nuui bɛlɛɛ Zûu-ŋai díkɔkuluƃa-ŋai dîa dí Zîsɛ sòŋ dí ŋ̀iri.

¹³Maa-ŋuŋ dí lì la Ɛnaa pɔ; kpɛ́ni fêi, e kɛ̀ a Kêafɛ m̀ɔ̂lɔ nyii kɛ̀ a zâla láa soŋ-nuu kɛ́tɛi a góraŋ ti.

¹⁴Kêafɛ ŋi ƃe Zûu-ŋai lia-woo ƃò a gɛɛ e kɛ̀ a ǹɛ́lɛɛ a gɛɛ fɛ̂ɛ núu tɔnɔ é sáa ǹûai mɛni ma. Pitɛ káa zâla láa soŋ-nuu kɛ́tɛi ŋɔgalai su

¹⁵Samaŋ Pitɛ e pìlaŋ Zîsɛ pôlu. Ŋɔpôlu-ƃelai dɔnɔ da e gɛ̀ ti máŋ. Ŋɔpôlu-nuui ŋi ǹyaŋ e kɛ̀ a zâla láa soŋ-nuu kɛ́tɛi kɔlɔŋɔɔ, nya ƃe e lɛ̀ɛ Zîsɛ pôlu dí lí zâla láa soŋ-nuu kɛ́tɛi ŋɔgalai su,

¹⁶Pitɛ e lɛ̀ɛ tɔɔ ni galai lá. Nya ƃe ŋɔpôlu-nuu tɔnɔi ŋi nyii kɛ̀ a zâla láa soŋ-nuu kɛ́tɛi kɔlɔŋɔɔi, e kùla e lono nɛnîi pɔ nyii kɛ̀ gbôŋ mɛi kâai, e lɔ a Pitɛ.

¹⁷Nɛnîi e kɛ̀ gbôŋ mɛi kâai, e mò Pitɛ ma, ǹyɛɛi, “Kɛrɛ̂e, yá máŋ íkaa a nalôŋ ŋi ŋɔpôlu-ƃelai dɔnɔ?” Nyɛɛ ma, “Fe la.”

¹⁸Ǹyée-mu-ƃelai da ǹɔii maa kpɛ́-ƃelai dí tiɣi-ŋɔŋ kpɛ̀tɛ. Kpɛ́ni fêi, kɔ́lɛ e kɛ̀ tɛ̂i a dámaa, díkɛ tɔɔ ni díkɛ díkɔlɛ ƃo; Pitɛ ǹyaa máŋ e kɛ̀ tɔɔ ni naa gɛ gɔ́lɛ ƃo.

¹⁹Nya ƃe zâla láa soŋ-nuu kɛ́tɛi e nâa kɛ́ Zîsɛ marê kɛ̂i e pìlaŋ ŋɔpôlu-ƃelai dîa da Ŋɔɣâla-mɛni-lɛɛi.

²⁰Zîsɛ e ŋ̀óo su tòo, ǹyɛɛ ma, “Ŋa lóno a zu ponoɔ ǹɔii pɔ; ŋ́gaa nɔ wɔ́lɔ Ɣâla-mɛni lɛ̂i Ŋ̀âla-fɛli-kêre-ŋai mu da Ŋ̀âla-pɛrɛ Kɛ́tɛi mu, ƃɛi Zûu-ŋai kélee da kôyaŋ naai; fe tá mɛni da ƃo ni loo-pere su.

²¹Ya ḿarê kɛ̂i le-mɛni ma? Dímarê kɛ́ diai da mɛnii mɛ́ni ŋá mò diai; dí mɛnii kɔ́lɔŋ ŋá mò diai.”

²²Tãi e nyiŋi ƃòi, Gɔkuluƃa-nuui dɔnɔi kɛ̀ tɔɔ ni díkɔlɛi e Zîsɛ lòkwa a ǹyée, e m̀o ma, ǹyɛɛi, “Bere ƃe ya pɔ̂ri zâla láa soŋ-nuu kɛ́tɛi wóo su toôi la?”

²³Zîsɛ e ŋ̀óo su tòo, ǹyɛɛi, “À kɛ̀ ŋa lóno a nyɔ́mɔɔ, gɛ̀ ní mɛni nyɔ́mɔɔ maa-sere-faa kɛ́; kɛ́lɛ, à kɛ̀ ŋa lóno a zã́a, gɛ̀ ní íkaa ńokwâi le-mɛni ma?”

²⁴Nya ƃe Ɛnaa e dɛ̀ɛ a ŋiriɛɛ zâla láa soŋ-nuu kɛ́tɛi Kêafɛ pɔ naa.

²⁵Samaŋ Pitɛ e kɛ̀ tɔɔ ni gɛ gɔ́lɛ ƃo. Nya ƃe dí m̀arê kɛ̀, dîyɛɛi, “Kɛrɛ̂e, ya máŋ íkaa a ŋɔpôlu-ƃelai dɔnɔ?” E ǹá sia tòo, ǹyɛɛi, “Fe la.”

²⁶Zâla láa soŋ-nuu kɛ́tɛi ǹyée-mu-nuui dɔnɔ nyii ŋɔnúu Pitɛ e ŋ̀óli tèe, e m̀arê kɛ̀, ǹyɛɛi, “Kɛrɛ̂e, ŋá íkàa zûai su ka ǹyaa?”

²⁷Pitɛ e ŋɔ́nɔ ǹá sia tòo; e kɛ̀ nɔ ti, tɛ́ɛ-sîrɛ e ŋ̀óo pìli.

²⁸Nya ƃe dí kùla a Zîsɛ Kêafɛ ŋɔgalai su dí li la mɛni-saa ƃó-pɛrɛi lá. È kɛ̀ a ɣele-waa pɛ-pɛ. Dia kpîŋ dífe lɔ ni mɛni-saa ƃo-pɛrɛi mu, a gɛɛ dífe láa dítia kara la, a gɛɛ dí dɛɛ-mɛi mii.

²⁹Nya ƃe Pâle e lì dípɔ. E dímarê kɛ̀, ǹyɛɛi, “Le ƃe nalôŋ ŋi e gɛ̀?”

³⁰Dí ŋ̀óo su tòo, dîyɛɛ ma, “Eêi kɛ̀ nalôŋ ŋí fe a mɛni nyɔ́mɔɔ kɛ́-nuu kúfei pâi la ípɔ.”

³¹Pâle e mò dîa, ǹyɛɛi, “Ka lí la ká ŋɔmɛnii ŋá tée kútɔ̂ŋ su káa kpîŋ.” Zûu-ŋai dí mò ma, dîyɛɛi, “Ve dɔ̂ŋ wóo ma a gɛɛ ku núu da paa.”

³²Nyiŋi e kɛ̀ a gɛɛ ŋ̀óoi ŋa-see e kɛ́ nyii Zîsɛ e mò a gɛɛ e zaai lɛ a pâi gɛ̂i.

³³Pâle e lì pôlu ŋɔ́nɔ mɛni-saa ƃo-pɛrɛi mu e Zîsɛ toli, e m̀arê kɛ̀, ǹyɛɛ ma, “Yá ƃa Zûu-ŋai Díkâloŋ?”

³⁴Zîsɛ e m̀arê kɛ̀, ǹyɛɛ ma, “Íkaa nyiŋi ƃôi íkpɔɔi-yee ma, kpaa nûa da kpɛni dí mò yâ é pîlaŋ mâ?”

³⁵Pâle e zu tòo, ǹyɛɛ ma, “Ya ŋ́gaâi a Zûu-nuu? Íkpɔɔi-nuai da zâla láa soŋ-ƃela kpaya-kpayai da pá a yá ḿbɔ. Le ƃe ya gɛ́?”

³⁶Zîsɛ e zu tòo, ǹyɛɛ ma, “Ŋákâloŋ-laai fe kula ni ǹɔii ŋi su; eêi kɛ̀ ŋákâloŋ-laai eêi kɛ̀ a ǹɔii ŋi ŋɔɔ, ńyee-mu-ƃelai díi pɔ̂ri kɔi, a gɛɛ dífe pà a ńyãa Zûu-ŋai pɔ; kɛ́lɛ, ŋákâloŋ-laai fe kula ni ǹɔii su.”

³⁷Pâle e m̀arê kɛ̀, ǹyɛɛi, “Gɛ̀ ní kâloŋ ƃa yá, Kɛrɛ̂e?” Zîsɛ e zu tòo, ǹyɛɛi, “Ya mò a gɛɛ ŋ́gaa a kâloŋ. Nyiŋi mɛni ƃe dí ńzɔlɔ ƃô la, nyiŋi mɛni ƃe ǹyaŋ ŋa bá kɛ̀ ǹɔii su, a gɛɛ ŋá dɔ̃yâi maa-sere-faa kɛ́. Núu nyii kélee gáa dɔ̃yâi mai a ŋ́oo mɛni.”

³⁸Pâle e mò ma ǹyɛɛi, “Le ƃa dɔ̃yâi?” Tãi e nyiŋi ƃòi, e lì ŋɔ́nɔ Zûu-ŋai pɔ, e m̀o dîa, ǹyɛɛi, “Fe mɛni nyɔ́mɔɔ kélee da kâai gbonôi.

³⁹Kɛ́lɛ, ǹyaŋ kɛ-mɛni-pɔlɔ káa káyêei a gɛɛ ŋa tee núu tɔnɔ ma dɛɛ-mɛi su. Gɛ̀ ní ka pâi ǹɛɛ̂i naa ŋá tée Zûu-ŋai Díkâloŋ ma kámɛni ma?”

⁴⁰Dí ŋɔ́nɔ làɣi, dîyɛɛ ma, “Nalôŋ ŋi fêi. Kɛ́lɛ, tée Barâƃa ma!” Barâƃa ǹyaŋ e kɛ̀ a ŋúma-nuu.