Read Kpelle Zɔ̂ŋ 20 Bible Online

Zɔ̂ŋ 20 - Kpelle bible

Zɔ̂ŋ 20

¹Ŋ̀ele-kûui duɛ-tuɛi ma nɔɔkuui su, Mere Madalini è pà m̀olôŋ lá a ɣele-wâla pɛ-pɛ, tãi kpíni è kɛ̀ a bɛlɛɛ niî lai, è gàa a gɛɛ da vɛ̃ɛ-ƃelai kúla m̀olôŋ lá.

²Nya ƃe è lì a kîrɛ Samaŋ Pitɛ pɔ́ da ŋɔpôlu-nuui gbéli nyii Zîsɛ è ŋ̀wɛ́li níi, é mó dîa, ǹyɛɛi, “Daâ Kúnuu-namui kúla m̀olôŋ su, ǹyaŋ kúfe ƃɛ́i kɔ́lɔŋ dí ǹaa naai.”

³Nya ƃe Pitɛ da m̀arâŋ dí kùla dí lí m̀olôŋ lá.

⁴Dífeerɛŋɔɔ dí lì a kîrɛ. Kɛ́lɛ Pitɛ m̀arâŋ è ǹɛɛ é seri m̀olôŋ lá tuɛ.

⁵È maa pɛ̂lɛ é nàa káa, é zeɣe kôlei káa laai ni naa. Kɛ́lɛ, vé lɔ́ ní zu.

⁶È kɛ̀ tí, Samaŋ Pitɛ è pà bôlu é lɔ́ m̀olôŋ su. È zeɣe kôlei kàa laai ni naa,

⁷da zeɣe kpuâi kɛ̀ a ŋ̀iriɛɛ ŋuŋ mai, vé kɛ́ ní laai ni zeɣe kôlei kɔlɛ. Kɛ́lɛ è kɛ̀ a gbíniŋɔɔ ǹáa a ŋɔpere tee.

⁸È kɛ̀ tí, bôlu-nuui gbélii nyii lì m̀olôŋ lá tuɛi, ǹyaa máŋ è lɔ̀ zu, é nàa káa, é láa la.

⁹Kɛ́lɛ dífe niî kɛ̀ táre ní Ŋ̀âla-kɔlɔi wóo su, a gɛɛ fɛ̂ɛ é mu siɣe saa yêei.

¹⁰Nya ƃe ŋɔpôlu-ƃelai dí lì pôlu dípɔ naa.

¹¹Kɛ́lɛ Mere è lɛ̀ɛ tɔɔ̂ni naa gɛ́ wɔ̀lɔ m̀olôŋ lá, gɛɛ wɔ̂lɔi, è maa pɛ̂lɛ é m̀olôŋ su káa.

¹²È Ɣâla-taa-kêla feerɛ kàa seɣe kôle su seêni ƃɛ́i dí Zîsɛ pomai lâa naai, dɔnɔ kɛ́ ƃò ŋuŋ tûɛ, dɔnɔ kɛ́ ƃò gwara.

¹³Dí m̀arê kɛ̀, dîyɛɛ ma, “Nɛnîi, le ƃe kɛ̀ ya wɔ́lɔ̂i?” E mò dîa, ǹyɛɛi, “Kpɛ́ni fêi, da Ŋánuu-namui síɣe, ǹyaŋ fe ƃɛi kɔ́lɔŋ dí ǹaa naai.”

¹⁴E nyiŋi ƃò nɔ e tinaŋ e Zîsɛ kaa tɔɔ ni. Kɛ́lɛ, ve kɛ́ ni a gɔ́lɔŋɔɔ a gɛɛ e kɛ̀ a Zîsɛ.

¹⁵Zîsɛ e m̀arê kɛ̀, ǹyɛɛ ma, “Nɛnîi, le ƃe kɛ̀ ya wɔ́lɔ̂i? Gbɛ̂ɛ ƃe ya gɔ́rii?” È kɛ̀ gaâi yɛ̂ɛ zûai mɛi káa-nuui, nya ƃe è mò ma, ǹyɛɛi, “Nalôŋ, à kɛ̀ yá ƃe zìɣei, m̀ó ḿâ ƃɛi í ǹaa naai. Gɛ̀ ní ŋa pâi liî naa ŋa ziɣe.”

¹⁶Zîsɛ e mò ma, ǹyɛɛi, “Mere.” E tìnaŋ e m̀o Zîsɛ ma Ibulu-wooi su, ǹyɛɛi, “Laƃônii!” (nyii zu-kulâi ƃa Kaamɔ̂ɔ).

¹⁷Zîsɛ e mò ma, ǹyɛɛi, “Ífe ńzòŋ, kpɛ́ni fêi, fe niî tɛ́ ni Nàŋ-nuui pɔ; kɛ́lɛ, li ńêɣe-ni pɔ í m̀ó dîa a gɛɛ ŋa tɛ̂i Ńâŋ pɔ naa da Kánâŋ, Ŋáɣâlai pɔ naa da Káɣâlai.”

¹⁸Mere Madalini e lì e m̀o Zîsɛ ŋɔpôlu-ƃelai dîa, ǹyɛɛ dîa, “Ŋaâ Kúnuu-namui káa”; e mò dîa ŋɔ́nɔ a gɛɛ ǹyaa ƃe mɛni-ŋai ŋi ƃò mà.

¹⁹Ŋ̀ele-kûui ti ma ɣele-wulii nɔɔkuui ŋɔɣele-kuui duɛ-tuɛi ma, bɛ́rɛi lá kɛ́ɛ a dɛ́ɛi, ƃɛi ŋɔpôlu-ƃelai dí kɛ̀ naai, dí kɛ́ɛ yáôi Zûu-ŋai dîa maa-mɛni mai, Zîsɛ e lɔ̀ e tɔɔ dísama, e m̀o dîa, ǹyɛɛi, “Lii-see é kɛ́ káyêei.”

²⁰Tãi e nyiŋi ƃò e ǹyée-ŋa lɛ̀ dîa da bɛ̂rɛ ma. E kɛ̀ ti, ŋɔpôlu-ƃelai líi e nɛ̀ɛ a dámaa tãi dí Dínuu-namui kàai.

²¹Zîsɛ e ŋɔ́nɔ mò dîa, ǹyɛɛi, “Lii-see é kɛ́ káyêei. Berei la Nâŋ-nuui e ńdɛ̀ɛ lai, bere nɔ ƃe ŋa kátɛɛ̂i la.”

²²Ǹyaŋ tãi e nyiŋi ƃòi, e nɛ̃wo pù dîa e m̀o dîa, ǹyɛɛi, “Ka M̀ɔlêŋ Maa Waai maa sɔlɔ ƃó.

²³À kɛ̀ kà núu da kélee ŋɔsɔnyɔ̂ŋ su-mɛni lɛ̀ɛ, dísɔnyɔ̂ŋ su-mɛni lɛɛ̂i; à kɛ̀ kà núu da kélee ŋɔsɔnyɔ̂ŋ lɛ̀ɛ ma, dísɔnyɔ̂ŋ a pâi kɛ̂i nɔ dîa.”

²⁴Nya ƃe Tama, núu puu kao feerɛi dɔnɔ, nyii da dòli a Ǹyuâi, ve kɛ́ ni dísama tãi Zîsɛ e pà lai.

²⁵Nya ƃe bôlu-ƃelai gbeli-ŋai dí mò ma, dîyɛɛi, “Kwâa Kúnuu-namui káa.” Kɛ́lɛ, e mò dîa, “Fɛ̂ɛ ŋá nerêi pɔ́ɔ káa ǹyée ŋá, ŋá ńyee kpua pîlaŋ bɔ́ɔ su, ŋá ńyee pîlaŋ bɛ̂rɛ ma, à wàla kɛ́ ti, fe pâi lâai la.”

²⁶Ɣele-kuu lɔ́ɔlu mɛi saaƃa e tɛ̀ɛ, ŋɔpôlu-ƃelai dí kɛ̀ bɛ́rɛi mu ŋɔ́nɔ. Tama ǹyaŋ e kɛ̀ dísama. Gbôŋ lá e kɛ̀ a dɛ́ɛ, kɛ́lɛ, Zîsɛ e pà e tɔɔ dísama e m̀o dîa, ǹyɛɛi, “Lii-see é kɛ́ káyêei.”

²⁷Nya ƃe e mò Tama ma, ǹyɛɛi, “Pá í íyee kpua pîlaŋ ƃɛ í ńyee ŋá káa; í íyee síɣe í bîlaŋ ḿbɛ̂rɛi; ífe kɛ́ a ǹúui laa-la fe ǹyêei. Kɛ́lɛ, laa-la é kɛ́ íyeêi.”

²⁸Tama e ŋ̀óo su tòo, ǹyɛɛi, “Ŋánuu-namui da Ŋáɣâlai!”

²⁹Zîsɛ e m̀arê kɛ̀, ǹyɛɛ ma, “Ya nâa láa la, kpɛ́ni fêi, ya ŋ́gaa? Lûwa káa diai dîa dífe niî ŋ́gaa ni, kɛ́lɛ, ǹyaŋ da láa la.”

³⁰Nya ƃe Zîsɛ e ŋɛi-kɛ-maa da kpɛni támaa kɛ̀ ŋɔpôlu-ƃelai sama, nyii ve pɔ̃yɛ ni gɔlɔi ŋi sui;

³¹kɛ́lɛ, nyiŋi-ŋai ŋi pɔ̃yɛɛ̂i a gɛɛ ká láa la a gɛɛ Zîsɛ ƃe gáa a Kôrai, Ɣâla Ǹóŋ, a gɛɛ ǹyaŋ kà làa la, fulu-laa é kɛ́ káyêei láai su.