Read Kpelle Zɔ̂ŋ 5 Bible Online

Zɔ̂ŋ 5 - Kpelle bible

Zɔ̂ŋ 5

¹Nyiŋi pôlu ma e kɛ̀ a Zûu-ŋai díkuui. Zîsɛ e tɛ̀ Zerusâlɛŋ. 5

²Póa tɔnɔ káa Zerusâlɛŋ m̀ála-koraŋ kɔlɛ. Náa ƃa Bɛsaida, Ibulu wooi su, nyii kêre lɔ́ɔlu e kɛ̀ ma.

³Núu kɔ̃liŋɔɔ támaa dí kɛ̀ laa ni dímu, ŋɛi-pu-bela, kɔɔ-pu-ƃela, da mɛ̃lɛ-mɛ̃lɛŋ-ƃela, [díkɛ maa-kpɛŋ kɛ̀ a gɛɛ ǹyái e tumo.

⁴Kpɛ́ni fêi, Kúnuu-namui Ŋɔɣâla-taa-kelai a kâa lì a tãi da bóai ti su e ǹyái tumo. Núu nyii kélee a kâa pìlaŋ zu a maa-ŋuŋ ǹyái túmoɔ pôlu mai, a ƃàlo gɔlɔ-felai nyii kélee yêei kɛ̀ mài.]

⁵Núu tɔnɔ e kɛ̀ naa a gɛ́ kɔ́lɛ̂i a kóraŋ buu saaƃa kao lɔ́ɔlu mɛi saaƃa.

⁶Tãi Zîsɛ e gàa la e gɔ̀lɔŋ a gɛɛ a kɛ́ naa a tãi su kôya, e mò ma, ǹyɛɛi, “Ya ŋ̀wɛ̂lii í ƃálo?”

⁷Gɔlɔ-fela-nuui e ŋ̀óo su tòo, ǹyɛɛ ma, “Nalôŋ, núu da kélee fe ńyêei a gɛɛ e ḿbili bóai su tãi ǹyái a tûmo lai. Ǹyaŋ tãi ŋa kɛ̂ liî la naai, núu da kpɛ́ni a pìlaŋ ńduɛ.”

⁸Zîsɛ è mò mà, ǹyɛɛi, “Ímu siɣe í ígarai síɣe í lí.”

⁹Nalôŋ è ƃàlo kpɔ́ nɔ́ tí a maa félaa é ŋɔgarai siɣe e sia. Maa-ɣelei ti e kɛ̀ a Vii-tɔɔ-ɣelei.

¹⁰Nya ƃe Zûu-ŋai dí mò nalôŋ ma nyii kɛ̀ a máloɔi, dîyɛɛ ma, “Gáa a Vii-tɔɔ-ɣelei. Ve dɔ̂ŋ lá-woo ma a gɛɛ í sía a ígarai.”

¹¹Kɛ́lɛ, e díwoo su tòo, ǹyɛɛi, “Nalôŋ ḿalôi e mò mâ, ǹyɛɛi, ‘Ígarai síɣe í li.’ ”

¹²Dí m̀are kɛ̀, dîyɛɛi, “Gbɛ̂ɛ ƃa nalôŋ ti mò yâ, ‘Ígarai síɣe í lí’?”

¹³Nalôŋ ǹyaŋ dí malôi, ve kɛ́ ni a ǹúui kɔ́lɔŋɔɔ. Kpɛ́ni fêi, Zîsɛ ǹyaŋ e kùla dísama, kpɛ́ni fêi, kpɔŋ kɛ́tɛ e kɛ̀ naa.

¹⁴Nàa pôlu ma Zîsɛ e gàa Ŋ̀âla-pɛrɛ Kɛ́tɛi mu. E mò ma, ǹyɛɛi, “Gáa, ya nâa ƃálo! Ífe ŋɔ́nɔ sɔnyɔ̂ŋ kɛ̀, mɛni nyɔ́mɔɔ fe lâa ŋɔ́nɔ íkɛ la.”

¹⁵Nalôŋ e lì e mo Zûu-ŋai dîa, a gɛɛ Zîsɛ ƃa ǹúui m̀alôi.

¹⁶Mɛnii ŋi ƃe Zûu-ŋai dí Zîsɛ kpɔ̀ara la. Kpɛ́ni fêi, e nyiŋi kɛ̀ a Vii-tɔɔ-ɣelei.

¹⁷Kɛ́lɛ, Zîsɛ e zu tòo, ǹyɛɛi, “Ńâŋ káa niî tíi kɛ̂i, ńyãa máŋ ŋ́gaa tíi kɛ̂i.”

¹⁸Nyiŋi maa-mɛni ƃe Zûu-ŋai dí pere kɔ̀ri kpɔ́ a gbanaŋɔɔ a gɛɛ dí bàa. Kpɛ́ni fêi, ve Vii-tɔɔ-ɣelei ŋɔtɔ̂ŋ kara ni nɔ. Kɛ́lɛ, e Ɣâla tòli a Ǹâŋ, nyíti ŋɔkɛ su gɛ gbîŋ tɛ Ɣâla ŋ̀ɛi.

¹⁹Zîsɛ e mò dîa, ǹyɛɛi, “Tɔ̃yâ kpîŋ, ŋá m̀ó kâa, Nòŋ-nuui fa mɛni da kélee kɛ̀ a gbɔɔ̂i-woo, fɛ̂ɛ, nyii nɔ a Nàŋ-nuui kàa gɛ́ gɛ̀i, kpɛ́ni fêi, mɛni nyii kélee a gɛ̀i, nyíti ƃe Ǹóŋ ǹyaa máŋ a gɛ̀.

²⁰Kpɛ́ni fêi, Nàŋ-nuui e Nòŋ-nuui wɛ́li ni, gɛ mɛni kélee lɛ ma ǹyaa kpîŋ a gɛ̀i. Mɛni kpaya-kpaya támaa tɛɛ nyiŋi ma a pâi ǹɛ̂i ma, a gɛɛ kála e kpala kâa.

²¹Kpɛ́ni fêi, berei nɔ Nàŋ-nuui a núu mu sîɣe la saa yêei, e fulu-laa tɛɛ dípɔi, berei nɔ ƃe Nòŋ-nuui ǹyaŋ a fulu-laa tɛ̀ɛ nyii kélee pɔ a ŋ̀wɛlii.

²²Nàŋ-nuui fa núu da ŋɔmɛni ŋá tèe. Kɛ́lɛ, a mɛni-ŋa-teɛɛi kélee tɛ́ɛ Nòŋ-nuui pɔ,

²³a gɛɛ ǹúui kélee dí ƃâa kɛ́ Nòŋ-nuui ma yɛ̂ɛ berei nɔ da ƃâa kɛ̀ la Nàŋ-nuui ma. Ǹúui nyii va ƃâa kɛ̀ Nòŋ-nuui ma, va ƃâa kɛ̀ Nàŋ-nuui ma nyii dɛ̀ɛi.

²⁴Tɔ̃yâ kpîŋ, ŋá m̀ó kâa, ǹúui a ŋ́oo mɛ̀ni é láa a ǹúui ńdɛ̀ɛi, wɔlɔ-wɔlɔ fulu-laa káa ǹyêei. Va pâ mɛni-ŋa-teɛɛi su, kɛ́lɛ, a kula saa-yeei e li fulu-laa su.

²⁵“Tɔ̃yâ kpîŋ, ŋá m̀ó kâa, tãi a pâi, gáa nâa ƃɛ, tãi zaa-ƃelai da pâi Ɣâla Ǹóŋ wóo mɛnîi, diai kélee ǹyaŋ pâi mɛnîi, da pâi kɛ̂i ɣele ma.

²⁶Kpɛ́ni fêi, berei nɔ fulu-laa káa la Nàŋ-nuui kpîŋ yêei, ǹyaa ƃe a Nòŋ-nuui kɛ́ a gɛɛ fulu-laa e kɛ́ gbîŋ yêei.

²⁷A wala-wala tɛ́ɛ bɔ a gɛɛ e mɛni ŋa tée. Kpɛ́ni fêi, ǹyaa ƃe gáa a núu-kpune Ǹóŋ.

²⁸Nyiŋi fe kùla a kâa. Kpɛ́ni fêi, tãi káa pâi, tãi núu kélee gáa molôŋ sui da pâi ŋ̀óo mɛnîi

²⁹dí kúla, nyii-ŋai da mɛni lɛ́lɛɛ kɛ̂i, da pâi dímu siɣêi fulu-laa su, nyii-ŋai da mɛni nyɔ́mɔɔ kɛ̂i, dí dímu siɣe mɛni-ŋa-teɛɛi su.

³⁰“Fa mɛni da kélee kɛ̀ a ŋ́gbɔɔi-wala-wala. Berei ŋa mɛ̀ni lai, berei nɔ́ ƃe ŋa mɛni ŋá tèe la, ǹyaŋ ŋámɛni-ŋa-teɛɛi sã́âi, kpɛ́ni fêi, fa ŋ́gbɔɔi-nia-mɛnii kɛ́, fɛ̂ɛ nyii ńdɛ̀ɛi ǹîa-mɛni.

³¹Ŋà ŋ́gbîŋ maa-sere-faa kɛ̀, ŋásêre-wooi fe a tɔ̃yâ.

³²Núu da kpɛni káa naa nyii a ḿaa-sere-faa kɛ̀, ǹyaŋ ŋá gɔ́lɔŋ a gɛɛ zêre-faai a gɛ̂i ḿaa-mɛni mai gáa a tɔ̃yâ.

³³Ká núu tɛ̀ɛ Zɔ̂ŋ pɔ naa, ǹyaŋ a dɔ̃yâ-sere-faai kɛ́.

³⁴Ve nɔ a gɛɛ ḿaa-sere-faai é kúla núu-kpune yêei, kɛ́lɛ, ŋa nyiŋi ƃò nɔ a gɛɛ ká ƃálo.

³⁵È kɛ̀ a laŋpoi nyii kɛ̀ lênii gɛ folo. Ǹyaŋ ká fàa a gɛɛ ka ŋɔkwaa-ponoɔi wɛli-kula a guro.

³⁶Kɛ́lɛ, zêre-wooi gáa ńyêei, dɛɛ̂i Zɔ̂ŋ ŋɔi ma, kpɛ́ni fêi, díi-ŋai nyii Nàŋ-nuui e dɛ̀ɛ ḿbɔ a gɛɛ ŋá gɛ́i, díi-ŋai ŋi kpîŋ nɔ nyii ŋa gɛ́i, díkaa a ŋásêre a gɛɛ Nàŋ-nuui ƃe ńdɛ̀ɛ.

³⁷Nàŋ-nuui ǹyaŋ ńdɛ̀ɛi, ǹyaa kpîŋ a ḿaa-sere-faa kɛ́. Káfe tá wɔ́lɔ ŋ̀óo mɛni ni. Káfe tá wɔ́lɔ gbɛtɛ-pere kaa ni.

³⁸Ŋ̀óoi ǹyaŋ fe kákponôi. Kpɛ́ni fêi, káfe laa ni a ǹúui a dɛɛi.

³⁹Ka Ŋ̀âla-kɔlɔi su kɔ̀ri. Kpɛ́ni fêi, ka gàa kâa, nàa ƃe wɔlɔ-wɔlɔ fulu-laa káa naa, ǹyaŋ ǹyaa ƃe a ḿaa-sere-faa kɛ̀,

⁴⁰kɛ́lɛ, káfa fàa a gɛɛ ka pa ḿbɔ a gɛɛ ka fulu-laa sɔlɔ ƃo.

⁴¹Fa ńyee sèe núu-kpune ŋɔƃâa-kɛ-maai mu.

⁴²Kɛ́lɛ, ŋá gɔlɔŋ a gɛɛ Ɣâla ŋɔwɛli-kɛ-maai fe kákponôi.

⁴³Ŋa pá Ńâŋ láai su, ǹyaŋ káfe káyee seêi mu, kɛ́lɛ, núu da à pà gbɔɔi láai su, ǹyaa ƃe ka pâi káyee seêi mù.

⁴⁴Ka pɔ̂ri leŋ lâai la, káai ka káyee sèe kákîe-ni díƃâa-kɛ-maai mu? Káfa ǹyaŋ mâa-kɛ-maai kɔri nyii a kùla Ŋ̀âla tɔnɔi yêei.

⁴⁵Káfe kákili ŋá sia a gɛɛ ŋa pâi môi a kálaa Nàŋ-nuui ma; Mose ƃe a mò a kálaa nyii kákili káa mai.

⁴⁶Kâi làa a Mose, kâi pâi lâai a ńyãa. Kpɛ́ni fêi, e ḿaa-mɛni pɔ̃yɛ.

⁴⁷Kɛ́lɛ, à kɛ̀ káfa làa a ŋɔkɔlɔ-pɔ̃yɛɛi, ka pâi lâai leŋ a ŋ́oo?”