Read Kpelle Zia-ƃelai Kɛ́-mɛni-ŋai 15 Bible Online

Zia-ƃelai Kɛ́-mɛni-ŋai 15 - Kpelle bible

Zia-ƃelai Kɛ́-mɛni-ŋai 15

¹Sinâa da-ŋa dí kùla Zuda dí pá Ɛŋtiɔ dí sɛŋ lɛ́ díƃarâai dîa. Dí mò dîa dîyɛɛ, “Fɛ̂ɛ dí kákpɛtɛ yɛ̂ɛ Mose ŋɔtɔ̂ŋ lá-wooi ma. À wàla kɛ́ tí, káfe pâi ƃâloi.”

²Laa-sâa kɛ́tɛ è tòo Pɔ̂ɔ, Banaba da ǹûai ŋí loai. Nya ƃe dí gbɛ̀tɛ a gɛ́ɛ Pɔ̂ɔ, Banaba da ǹúui da-ni dí lí Zerusâlɛŋ dí m̀ɛnii ŋí pú naa zia-ƃelai da ǹúu pɔlɔ-ŋai ŋɛ́i.

³Dítɛɛ naa Kôrai-toli-kpɔŋ mii, dí tɛ̀ɛ a Fonisia da Sameria pere. Dí pà a koraŋ-ƃo a gɛ́ɛ Zɛ̃tai-ŋai da dílii maa fáleŋ. Nyíŋi è díƃarâai líi nɛ̃ɛ kpɔ́ a ŋ̀ánaa.

⁴Dí páa Zerusâlɛŋ, Kôrai-toli-kpɔŋ, zia-ƃelai da ǹúu pɔlɔ-ŋai dí díyee sèe dímu. Pɔ̂ɔ-ni dí m̀ɛnii kélee ƃò dîa nyíi Ɣâla è gɛ̀ a dîɛi.

⁵Kɛ́lɛ, Faresii-ŋai díkpului su díta-ni laa-la è kɛ̀ díyêei. Nya ƃe dí sìɣe dí tɔ́ɔ, dîyɛɛ, “Fɛ̂ɛ kɛ̀ dí Zɛ̃tai-ŋai kpɛtɛ dí m̀ó dîa a gɛ́ɛ dí Mose ŋɔtɔ̂ŋ mɛi káa.”

⁶Zia-ƃelai da ǹúu pɔlɔ-ŋai dí díŋa tɛ̀ díkîe ma a gɛ́ɛ dí m̀ɛnii ŋí su káa.

⁷Díkɛɛ sîa támaa toôi, Pitɛ è sìɣe é tɔ́ɔ ǹyɛɛ dîai, “Sinâa da ŋánûa, ka gɔ́lɔŋ a gɛ́ɛ kóraŋ támaa tɛ̂ɛi pôlu ma, Ɣâla a wɔ́lɔ ńɛ kásama a gɛ́ɛ Zɛ̃tai-ŋai dí Duŋ Lɛ́lɛɛi mɛni ńa dí láa la.

⁸Ǹyaŋ Ɣâla nyíi núu-kpune líi su kɔ́lɔŋ a ǹɛ kpɔ́ a zu ponoɔɔ a gɛ́ɛ gáa tí, è M̀ɔlêŋ Maa Waai tɛ̀ɛ dípɔ yɛ̂ɛ nɔ́ berei è dɛ̀ɛ la kúpɔi.

⁹Vé kúloai láa ní kwa dîa-ni. È dílii maa waa a laa-la.

¹⁰M̀ɛni ma, lé mɛni ƃé ka Ɣâla su kɔɔ̂nii la, kákɛ tĩa wuyɛ tɛɛ Zia-ƃelai pɔ́ nyíi kúnâŋ pɔlɔ-ŋai dífe wɔ́lɔ pɔ̂ri ní ziɣêi, kpaa máŋ kúa kpîŋ?

¹¹Kɛ́lɛ, kúlâai la kwa pâi ƃâloi nɔ́ yɛ̂ɛ dia Kúnuu-namui Zîsɛ ŋɔƃɛlɛ-sêei sârai.”

¹²Gɛ́ɛ tí, gbɔŋ su-ƃelai kélee dí dímɛi sâa. Dí díwoli tɔ̀ɔ Banaba da Pɔ̂ɔ dîa nyíi-ŋai kɛ̀ ŋɛi kɛ́-maa-ŋai da mɛni kpaya-kpaya maa mɛni ƃôi dîa Ɣâla è gɛ̀ dísârai Zɛ̃tai-ŋai sámai.

¹³Tãi dí kpɛ̀ɛ la a lónoɔɔi, Zĩi è lòno ǹyaa máŋ, ǹyɛɛi, “Sinâa da ŋánûa, ka káwoli tɔ́ɔ ŋ́oo ma.

¹⁴Samaŋ a ǹɛ berei Ɣâla è lì la Zɛ̃tai-ŋai pɔ́ a maa-ŋuŋ a gɛ́ɛ é nûa kula dísama ǹáai mɛni mai.

¹⁵Ǹyaŋ Ɣâla ŋɔlóno kɛ́-ƃelai da fáa ŋ̀óo-ŋai ŋí ma, yɛ̂ɛ berei dí Ŋ̀âla-kɔlɔi a mò lai,

¹⁶‘Nyíŋi pôlu ma ŋa pâi lenêi pôlu ŋá pâi ŋɔ́nɔ Deeƃé ŋɔkâloŋ-laai mu-siɣêi pôlu. Ŋɔpɛ́rɛi pui ŋá pâi dɔɔ̂i pôlu a gbanaŋɔɔ

¹⁷Ŋa pâi gɛ̂i tí a gɛ́ɛ ǹûai kpeli-ŋai dí Kúnuu-namui dí pá ḿbɔ, da Zɛ̃tai-ŋai kélee ŋa dítoli a gɛ́ɛ díkɛ a ŋánûai.

¹⁸Kúnuu-namui ƃé mò, nyíi a mɛni-ŋai ŋí kélee lɛ̀ é síɣe gɔ́ɔ pîlanii.’

¹⁹Ŋákili-ŋa-siai ƃa kúfe fũa-fũa tɔ̀ɔ Zɛ̃tai-ŋai dîa, nyíi-ŋai da pá Ɣâla pɔ́-naa perei.

²⁰Kɛ́lɛ, fɛ̂ɛ kú kɔlɔ pɔ̃yɛ dîɛ a gɛ́ɛ dífe díyee pù mɛni kélee su nyíi ɣâla da kpɛni-ŋa da garai, dífe tela díyee pu wulu-wulu kɛ́ɛ su. Dífe fɛnɛ-sɛŋ da zua da mìi nyíi dí gáo ɣàlei kpaa máŋ dí sua da ŋãa mii.

²¹M̀aa-ŋuŋ su nûa dí kɛ̀ Mose yêei daa-lee-ŋai kélee su, díkɛ ŋɔtɔ̂ŋ lòno Ŋ̀âla-fɛli kêre-ŋai mu a Vii-tɔɔ-ɣelei kélee díkɛ Ɣâla ŋɔwóoi ƃò daa-ŋai su.”

²²Nya ƃe zia-ƃelai, ǹúu pɔlɔ-ŋai da Kôrai-toli-kpɔŋ su-ƃelai dí gbɛ̀tɛ a gɛ́ɛ dí nûa kula dísama dí dítɛɛ Ɛŋtiɔ a gɛ́ɛ da Pɔ̂ɔ-ni da Banaba dí lí. Dí Zudasi tɛ̀ɛ, nyíi da kâa dòli a Basabai da Salɛ. Ƃâa kɛ́-maa támaa è kɛ̀ nûa yêei zia-ƃela feerɛi ŋí mɛni ma. Dí kɔlɔ tɛ̀ɛ dípɔ a gɛ́ɛ dí lí la.

²³Dí dítɛ̀ɛ a gɔlɔi ŋí: “Zia-ƃelai da ǹúu pɔlɔ-ŋai dí fáa díƃarâai dîa kpɔ́ a dámaa nyíi-ŋai díkaa a Zɛ̃tai-ŋai Ɛŋtiɔ, Siria da Sɛlisia.

²⁴Kú mɛ̀ni a gɛ́ɛ núu da-ni dí kùla kúsama dí pá dí fũa-fũa tɔ́ɔ kâa a wóo-ŋa nyíi-ŋai kákili ŋá kɛ̀ wulu-wului. Kúfe m̀ó ní tí dîa.

²⁵È kɛ̀ a ǹɛ́lɛɛ kúmɛni ma a gɛ́ɛ kú kúŋa tɛ́ gîe ma kú nûa lɛ́ kúsama kú dítɛɛ kápɔ naa a gɛ́ɛ da kúwɛli kɛ́-maa-ƃelai Banaba da Pɔ̂ɔ-ni dí lí.

²⁶Pɔ̂ɔ da Banaba dí dílɛ̂wo sèe a sɛ́ɣɛ Kúnuu-namui Zîsɛ Kôrai mɛni ma.

²⁷M̀ɛni ma kwa Zudasi da Salɛ tɛɛ̂i nyíi-ŋai pâi mɛni tɔnɔi ƃôi kâa máŋ a díla-wooi.

²⁸Ǹɛ́lɛɛi kɛ̀ M̀ɔlêŋ Maa Waai mɛni ma da kûa a gɛ́ɛ kúfe kpîri wuyɛɛ sèe káŋûa é tɛ́ɛ mɛni lɛ́lɛɛ-ŋai ŋí dîa.

²⁹Káfe káyee pu sɛŋ kélee mɛni su nyíi da gùla a sâla ɣâla da kpɛni-ŋa diai. Káfe fɛnɛ-sɛŋ kɔ̃liŋɔɔ da zua da mii, káfe tela ŋãa da mii, káfe wulu-wulu kɛ̀. À kɛ̀ kà káyee kùla nyíŋi kélee su, ka pâi mɛni lɛ́lɛɛ kɛ̂i. Kásɛɣɛ.”

³⁰Dí gela-ŋai tɛ̀ɛ dí lì Ɛŋtiɔ dí Kôrai-ƃelai ŋá tɛ́ díkîe ma dí gɔlɔi tɛ́ɛ dípɔ.

³¹Gɔlɔi lónoɔɔ dîɛi, dílii è nɛ̃ɛ vɔrɔ-fɔlɔ wóo-ŋai ŋí mɛni ma dí gàa gɔlɔi sui.

³²Zudasi da Salɛ dí kɛ̀ a Ɣâla ŋɔlóno kɛ́-ƃelai. Dia máŋ dí dífɔlɔ-woo ƃo ǹûai dîa dí dília-woo ƃó díkponôi é kpanaŋ.

³³Zudasi da Salɛ kɛ́ɛ da tûa naa a guroi díƃarâai dí dítɛ̀ɛ pôlu lii-see su diai dítɛɛi dípɔ naa. [

³⁴Kɛ́lɛ, Salɛ è kɛ̀ gâai a gɛ́ɛ è kɛ̀ a ǹɛ́lɛɛ a gɛ́ɛ é lɛ́ɛ naa.]

³⁵Kɛ́lɛ, Pɔ̂ɔ da Banaba dí lɛ̀ɛ Ɛŋtiɔ, díkɛ sɛŋ lɛ̀, díkɛ Kúnuu-namui ŋɔwóoi ƃo da núu da kpɛ́ni-ŋa máŋ.

³⁶Ɣele kûu da-ŋa pôlu ma Pɔ̂ɔ è mò Banaba ma, ǹyɛɛ, “Kú lí ŋɔ́nɔ kú kúƃarâai naa káa daa-lee-ŋai kélee su, ƃɛ́i kwa wɔ́lɔ Kúnuu-namui ŋɔwóoi ƃo naai, kú m̀ɛnii káa da gɛ̂i.”

³⁷Banaba è kɛ̀ ŋ̀wɛ̂lii é Zɔ̂ŋ siɣe nyíi da kâa dòli a Mâki a gɛ́ɛ da dîa-ni dí lí.

³⁸Kɛ́lɛ, Pɔ̂ɔ è gíli ŋa sìa a gɛ́ɛ vé lɛ́lɛ ní dí lí a ǹúui nyíi sìɣe dípôlu Paŋfîlia, vé ŋ̀wɛli ní da dîa-ni dí lí a gɛ́ɛ dí díi kɛ́.

³⁹M̀ɛnii ŋí è kùla kpɔ́ a laa-sâa kɛ́tɛ díloai. Nya ƃe dí díŋaa kɔ̀lɛ. Banaba è Mâki sìɣe da ǹyaa dí yá ŋá-keleŋ siɣe dí lí Sapɔrɔ.

⁴⁰Kɛ́lɛ Pɔ̂ɔ è Salɛ sìɣe da ǹyaa dí lí yɛ̂ɛ berei zia-ƃelai dí m̀o la ma Kúnuu-namui ŋɔƃɛlɛ-seei sârai.

⁴¹È tɛ̀ɛ Siria pere é lí Sɛlisia, gɛ́ Kôrai tóli-kpɔŋ-ŋai su-ƃelai líi kùla a gɛ́ɛ dí tɔ́ɔ a gbanaŋɔɔ dílaa-lai su.