Read Kpelle Zia-ƃelai Kɛ́-mɛni-ŋai 2 Bible Online

Zia-ƃelai Kɛ́-mɛni-ŋai 2 - Kpelle bible

Zia-ƃelai Kɛ́-mɛni-ŋai 2

¹Pɛŋtekɔ ɣelei seriɛɛi, ǹaa-la-ƃelai kélee díkɛ̀ a díŋaa tɛ́ɛ gîe ma kwaa tɔnɔ ma.

²Díkɛɛ naai, dí sɛŋ da tíŋ mɛ̀ni ŋ̀elei su a maa félaa kpɔ́ yɛ̂ɛ fãa kɛ́tɛ, díŋ é bɛ́rɛi lá fɛ́ɛ dí kɛ̀ seêni mui.

³Dí sɛŋ da kàa yɛ̂ɛ nɛ́ŋ, m̀óloŋɔɔ ŋɔŋ ma, é sée díŋûa tɛi-tɛi.

⁴È kɛ̀ tí díkelee dílaa è fɛ̀ɛ a M̀ɔlêŋ Maa Waai. Gɛ́ɛ tí dí pɛ̀lɛ lônoi a sii-woo da kpɛ́ni-ŋa, yɛ̂ɛ berei M̀ɔlêŋ è m̀aa wála-wala tɛ̀ɛ la dípɔi.

⁵Zûu-ŋa díkɛ̀ dí kɛ̀ Zerusâlɛŋ, nyíi-ŋai kɛ̀ a Ɣala mɛni-ŋa kɛ́-ƃela kùla ŋ̀éniɛi gwaa kéleei.

⁶Díkɛɛ da zɛŋ tí mɛnii, dí díŋaa tɛ̀ ma kpɔŋ su kɛ́tɛ. Díkelee dípɛlɛ è pù, kpɛ́ni fêi, dí ǹaa-la-ƃelai kàa da kɛ̀ lônoi díkɛ mɛ̀ni díkpîŋ sii-woo-ŋai su.

⁷Dí díkili ŋá sìa laa-kpala maa pere su, dîyɛɛi, “Kɛrɛ̂e, diai kélee ǹônoi kɛ̂i díkaa a Galalii-ƃela?

⁸À kɛ̀ tí, lé ƃe ŋaŋ kúkelee kwa díwoo mɛnîi kúkpîŋ sii wóo-ŋai su?

⁹Kúta-ŋa kú kùla Pâtia, Midia, Ilaŋ, Mɛsopotemia, Zuda, Kapadôsia, Pɔŋtɔ da Eesia,

¹⁰kúta-ŋa kú kúla Fagia, Paŋfîlia, Ize da Lebia lɔii kpuai gáa Sailini kɔlɛ mai. Kúta-ŋa kú kùla Luŋ.

¹¹Zûu-ŋai da Zɛ̃tai-ŋai da dílii pene Zudasi ɣala mɛni kɛ́-ƃelai pɔ́ naa pere. Kúta-ŋa kúkaa a Kulîi da Arebia-ŋa. Kɛ́lɛ kúkelee kwa díla-woo-ŋai mɛnîi kúsîi wóo-ŋai su díkɛ lòno é pílaŋ Ɣâla ŋɔtíi kpaya-kpayai dîa.”

¹²Díkelee díla è kpàla dîa díkili ŋá é tɛ̀i díkɛ m̀o díkîe-ni dîa, dîyɛɛi, “Nyíŋi su-kulai ƃa le?”

¹³Kɛ́lɛ, núu da-ŋa dí ɣɛ́lɛ maa kùla díkponôi, dîyɛɛi, “Dílaa fɛ̂ɛi a ŋwã̂ai nina.”

¹⁴Kɛ́lɛ, Pitɛ è kɛ̀ tɔ̂ɔni da Zîsɛ ŋɔpôlu-ƃelai buu kao tɔnɔi é ŋ̀óo tɛ̀ ɣelêi é mó dîa, ǹyɛɛi, “Zûu sinaa da káai kákaa Zerusâlɛŋ, tɔɔ nyíŋi é kɛ́ a kákɔlɔŋ mɛni, ká káwoli tɔɔ ŋ́oo ma.

¹⁵Ŋwã̂ai fé ǹûai ŋí kɛ̂i yɛ̂ɛ berei gáa la kákili ŋái, kpɛ́ni fêi, a kɛ́ nɔ́ a fólo-nɛnɛŋ.

¹⁶Kɛ́lɛ, nyíŋi ƃé Ɣâla ŋɔlóno kɛ́-nuui Zooɛ è mò, ǹyɛɛi,

¹⁷‘Ɣâla a mò, ǹyɛɛi, “Ŋ̀ele-ŋai gbɛɛ ŋái ŋa pâi Ŋámɔ̂leŋ pûi núu kélee kponôi. Kálonii-sinaâi da kálonii-nɛyaai da pâi mɛni ƃôi naa tuɛ. Zĩ̂a a pâi tɛɛ̂i a kányaŋkpa-ŋai, kásiɛ-pɔlɔ-ŋai dí see ƃó.

¹⁸Ŋa pâi máŋ Ŋámɔ̂leŋ pûi ńyee mu-ƃelai, sinaa da nɛyâa kponôi a ŋ̀ele-ŋai ti, ǹyaŋ da pâi mɛni ƃôi naa tuɛ.

¹⁹Ŋa pâi mɛni kpaya-kpaya lɛ̂i ŋ̀elei su, da ŋɛi-kɛ-maa-ŋa ǹɔii ma, ŋãa, ŋɔŋ da luru su kpiniɛɛ.

²⁰Vóloi a pâi penêi a kpíni, ŋ̀áloŋ é pene a ŋãa, Kúnuu-namui ŋɔɣelei é lɛ́ɛ pâi, nyíi gáa a ɣele kɛ́tɛ maa ponoɔɔ̂i.

²¹A pâi kɛ̂i a sɛŋ a gɛ́ɛ ǹúui pâi Kúnuu-namui láa tôlii a pâi ƃálôi.” ’

²²“Eezuɛ sinaa, ka ŋ́oo ŋí mɛni: Nâzarɛ Zisɛi nyíi gáa a ǹúui Ɣâla è nɛ̀ kâa a tíi kpaya-kpaya da mɛni kpaya-kpaya é pɛ́lɛ ŋɛi kɛ́-maa-ŋa nyíi Ɣâla a gɛ̀ zarâi kásamâi, yɛ̂ɛ berei káa kpîŋ ka gɔ́lɔŋ lai.

²³Dí gɔ̀lɛ yɛ̂ɛ berei Ɣâla è gbɛtɛ la gíli ŋái, ka gɛ ŋ̀wana-lɔɔ-ƃela dí gbamo wúru su-tíyeŋɔɔ ma dí bàa,

²⁴Ɣâla è m̀u sìɣe saa yêei, kpɛ́ni fêi, saa fa pɔ̂ri kɛ̀ zonîi.

²⁵Mɛni ma Deeƃé è lòno e pîlaŋ ma, ǹyɛɛi, ‘Ŋá Ŋánuu-namui kâa ŋ́ɛi tuɛ a tãi kélee, kpɛ́ni fêi, gáa ńaa mii-yee mɛi-pere a gɛ́ɛ fé tumo.

²⁶M̀ɛni ma ńii è kɛ̀ a nɛ̃ɛ, ńɛŋ kɛ́ ŋɔ́nɔ lii-nɛ̃ɛ kùla. Nyíŋi pôlu ma máŋ ŋ́gbono a pâi kɛ̂i kili-kɛ-maa kpanaŋ su.

²⁷Kpɛ́ni fêi, ífe pâi ŋámɔ̂leŋ lɛɛ̂i Saa-taa, kpaa máŋ, í Ímaa-waa-nuui lɛ́ɛ naa zu é kara.

²⁸Ya ŋ̀éniɛi ŋɔperei lɛ́ ḿâ. Íkɛ-naai a pâi ńaa fɛ̂ɛi a lii-nɛ̃ɛ.’

²⁹“Ŋánûa, ŋa pɔ̂ri lônoi kápɔ a ŋ́gili kélee é pîlaŋ ǹúu-suu túɛ-nuui Deeƃé ma a gɛ́ɛ è sàa dí nòo. M̀olôŋ káa nɔ́ fîle ní kásama sâa.

³⁰M̀ɛni ma gɛ́ɛ a Ɣâla ŋɔlóno kɛ́-nuui, gɛ́ ƃò a gɔ́lɔŋɔɔ a gɛ́ɛ Ɣâla a góno tée ǹyêei kpɔ́ a gbanaŋɔɔ a gɛ́ɛ a pâi ŋɔsuui su-nuu dɔnɔ seêi ŋɔkâloŋ see-sɛŋ ŋái,

³¹è gàa nàa túɛ é lóno é pîlaŋ la Kôrai ŋɔmu-siɣe saa yeei ma, a gɛ́ɛ dífe ǹɛɛ ní Saa-taa, kpaa máŋ gbono su é kara.

³²Zisɛi ŋí Ɣâla è m̀u sìɣe saa yêei, ǹyaŋ kúkelee kúkaa a maa sêre-ŋa.

³³Zîsɛ è tɛ̀ ɣâla-taa a gɛ́ɛ é sée Ɣâla láa mii-yee mɛi, ǹyaŋ è M̀ɔlêŋ Maa Waai sɔlɔ ƃó yɛ̂ɛ berei Ǹâŋ è góno tèe la ǹyêei. Ǹyaa ƃa M̀ɔlêŋ Maa Waai tɛ̀ɛ kúpɔ. M̀ɛni ƃé kwa kwaa kâai la kúkɛ mɛni mɛ̂ni.

³⁴Deeƃé fé tɛ́ ní Ɣâla-taa, kɛ́lɛ, ǹyaa kpîŋ è mò, ǹyɛɛi, ‘Nuu-namui è mò Ŋánuu-namui ma, “See ƃɛ́ ńaa mii-yee mɛi-pere

³⁵é lɛ́ɛ la zu ŋa íkpɔara-ƃelai pú íkɔɔ mu.” ’

³⁶“M̀ɛni ma tɔɔ Eezuɛ lɔii gwaa kélee é gɔ́lɔŋ a tɔ̃yâ a gɛ́ɛ Zisɛi ŋí ka gbàmo ŋ̀úru su-tíyeŋɔɔ̂i mai, Ɣâla a gɛ́ a Nuu-namu da Kôrai.”

³⁷Nyíŋí mɛniɛɛ dîɛi, è dílii soŋ dí mo Pitɛ ma da zia-ƃelai gbéli-ŋai, dîyɛɛi, “Kúnûa, lé ƃé kwa pâi gɛ̂i?”

³⁸Nya ƃe Pitɛ è mò, ǹyɛɛ, “Kákelee ka kálii pene dí kábatâi kɛ́ Zîsɛ Kôrai láai su kásu-mɛni é lɛ́ɛ kásɔnyɔ̂ŋ-ŋai mɛni ma. Gɛ̀ ní ka pâi M̀ɔlêŋ Maa Waai sɔlɔ ƃôi nyíi gáa a ƃɛlɛ-sêe.

³⁹Ɣâla ŋɔkono-teei káa kámɛni ma, kálônii da diai dîa kwaa kôya mai, nyíi-ŋai Kúnuu-namui Ɣâla a pâi dítôlii.”

⁴⁰È lòno dípɔ a wóo da kpɛ́ni támaa. È sêre-faa kɛ̀ kpɔ́ díŋɛi é dímaa tɛ́, ǹyɛɛ diai, “Ka kákpîŋ ƃálo ká kúla ŋ̀ulu-ƃelai ŋí yêei.”

⁴¹Núu támaa dí díyee sèe ŋɔwóoi mu dí díbatâi kɛ̀. M̀aa ɣele tɔnɔi tí núu kɛ́ɛ yɛ̂ɛ núu wála saaƃa ƃé dí tòo ǹaa-la-ƃelai dîa.

⁴²Dí dítãi dámaa pù sɛŋ maa kɔ́riɛɛ su zia-ƃelai yée mu. Da dia-ni díkɛ̀ díkîe ma dí ɣala fɛli gîe ma díkɛ dílaa mii gîe ma.

⁴³Yao è pà núu kélee pɔ́. Mɛni kpaya-kpaya támaa da ŋɛi kɛ́-maa-ŋa dí kɛ̀ zia-ƃelai sârai.

⁴⁴Ǹaa-laa-ƃelai kélee dí kɛ̀ díkîe ma, díkɔ̃liŋ kélee kɛ́ ƃo a díkîe-ni pɔ́ɔ.

⁴⁵Dí dílɔii-ŋai kɔ̀lɛ da díyee ŋá-sãai, dí zɔ̃ɔ ŋáa kɔ́lɛ diai dîa kɛ̀ kpɔŋ mâa wɛ̂lii.

⁴⁶Ǹaa-la-ƃelai díkɛ̀ liî Ŋ̀âla-pɛrɛ kɛ́tɛi mu gîe ma. Dímii-sãai kélee è kɛ̀ nɔ́ gîe ma. Da kâa dílaa mii gêi ma a lii-nɛ̃ɛ da lii-lɛlɛ.

⁴⁷Dí Ɣâla láa ma tɛ̀, ƃaa kɛ́-maa kɛ́ ƃo núu kélee yêei dímɛni ma. Diai kélee ƃálo-laa sɔlɔ ƃò Kúnuu-namui yêei, Kúnuu-namu è kɛ̀ díkɔni toôi ǹûai ŋí díwɔ̂i ma a ɣele kélee.