Read Kpelle Zia-ƃelai Kɛ́-mɛni-ŋai 21 Bible Online

Zia-ƃelai Kɛ́-mɛni-ŋai 21 - Kpelle bible

Zia-ƃelai Kɛ́-mɛni-ŋai 21

¹Kú kúfɛ̀li dîa, kú píli yá ŋá-keleŋ su kú berei siɣe a zã́a kú pá Kôo. Bôlu ma ɣelei kú pà Lôo. Kú kùla naa kú lí Patara da Maira.

²Kú kéleŋ da kpɛ́ni kàa gɛ́ lì Fonisia, kú píli zu kú lí.

³Kú lɛ̀ɣɛ nɔ́ Sapɔrɔ ma, kú nàa lɛ̀ɛ kɔɔ-yee mɛi-pere kú lí Siria kú pîlaŋ Taya, kpɛ́ni fêi, è kɛ̀ a sɛŋ a gɛ́ɛ dí géleŋ su-sãai lɛ́ɛ naa.

⁴Kú Zîsɛ ŋɔpôlu-ƃelai kɔ̀ri naa kú díkaa. Kwa dîa-ni ku ɣele kûu lɔ́ɔlu mɛi feerɛ kɛ̀ naa. M̀ɔlêŋ sârai dí mò Pɔ̂ɔ ma a gɛ́ɛ vé lì Zerusâlɛŋ.

⁵Kúɣele kûu lɔ́ɔlu mɛi feerɛi kpɛɛ ŋá-ɣelei, kú kùla naa kú nâa kúsiai kúla. Zîsɛ ŋɔpôlu-ƃelai kélee, dínɛyâai da dínîa-pɛlɛɛi dí pà kútɔɔ̂i perei é lɛ́ɛ la zu kú kúla daai ma. Kú pɛ̀lɛ kúŋume ŋá zîŋ ma ku Ɣâla fɛli, kú kúfɛli kúkîe-ni dîa.

⁶Nya ƃe kú tɛ̀ géleŋ su, díaŋ dí lí pôlu dípɔ naa.

⁷Kú kúlaa Tayai, kú pìlaŋ Tolemai. Kú kula tí kúƃarâai dîa, kwa dîa-ni kú ɣele kûu tɔnɔ kɛ́ naa.

⁸Bôlu ma ɣele ƃɔ́ɔi kú kùla naa ku lí Sɛsɛria. Kú lɔ̀ Duŋ Lɛ́lɛɛi ƃó-nuui Fele ŋɔpɛ́rɛi mu, nyíi kɛ̀ a ǹúu lɔ́ɔlu mɛi feerɛi dɔnɔi. Kwa dîa-ni kú kɛ̀ naa.

⁹Ńônii-nɛyaai náaŋ dí kɛ̀ mà. Dífe niî kɛ̀ surɔ̂ŋ kula ní. Dí kɛ̀ a Ɣâla ŋɔlóno kɛ́-ƃela.

¹⁰Kúkɛɛ naa a ŋ̀ele kûu-ŋai tí, Ɣâla ŋɔlóno kɛ́-nuu tɔnɔ è kùla Zuda é pá, ǹáa ƃé kɛ̀ a Agabɔ.

¹¹È pà kúpɔ, è Pɔ̂ɔ ŋɔseɣe mu ɣiri-ɣɛlii síɣe é gbɔɔ̂i kɔɔi ɣiri la da ǹyée, ǹyɛɛi, “M̀ɔlêŋ Maa Waai ƃé mò, ǹyɛɛi, ‘Bere ƃé Zûu-ŋai díkaa Zerusâlɛŋ da pâi nalôŋ ɣirîi la nyíi bɔ́ɔ ƃa zeɣe mu-ɣiri ɣɛlii ŋí. Da pâi dɛɛ̂i Zɛ̃tai-ŋai pɔ́.’ ”

¹²M̀ɛni-ŋai ŋí mɛniɛɛ kûɛ kwa diai kɛ̀ naai, kú Pɔ̂ɔ kpera fê a gɛ́ɛ vé li Zerusâlɛŋ.

¹³Kɛ́lɛ Pɔ̂ɔ è kúwoo su too, ǹyɛɛi, “Lé ƃé kákaa wɔ̂lɔi kákɛ ńii solii? Ŋ́gbîŋ fé kpɛtɛ ní nɔ́ a gɛ́ɛ dí ŋíri, kɛ́lɛ, ŋ́gbîŋ kpɛtɛ̂ɛi a gɛ́ɛ máŋ ŋá sáa Zerusâlɛŋ Kúnuu-namui Zîsɛ láai mɛni ma.”

¹⁴Gɛ́ɛ vé fáa ní kúwoo mai, kú tèe ma, kûɛi, “Tɔɔ Kúnuu-namui ŋɔnîa mɛnii é kɛ́.”

¹⁵Nyíŋi pôlu ma kú kúsãâi kpɛ̀tɛ kú lí Zerusâlɛŋ.

¹⁶Kwa Zîsɛ ŋɔpôlu-ƃelai, nyíi-ŋai kɛ̀ Sɛsɛriai da-ni kú lì. Dí lì a kúa Nesɔŋ ŋɔpɛ́rɛi lá a gɛ́ɛ kú nyíi naa. Nesɔŋ è kɛ̀ a Sapɔrɔ-nuu, gɛ́ ƃò a Zîsɛ ŋɔpôlu-ƃelai maa-ŋuŋ dɔnɔ.

¹⁷Kúpaa Zerusâlɛŋ, kúƃarâai dí díyee sèe kúmu a lii-nɛ̃ɛ.

¹⁸Bôlu ma ɣelei kwa Pɔ̂ɔ-ni kú lì Zĩi pɔ-naa. Ǹúu pɔlɔ-ŋai kélee dí kɛ̀ naa.

¹⁹Pɔ̂ɔ è ǹá tì dîa, m̀ɛni-ŋai ƃò tɔnɔ-tɔnɔ Ɣâla è gɛ̀ Zɛ̃tai-ŋai sáma ǹyaa Pɔ̂ɔ ŋɔtíi sârai.

²⁰M̀ɛni-ŋai ŋí mɛniɛɛ dîɛi, dí Ɣâla láa maa tɛ̀ ŋɔfólo-laai mɛni ma dîyɛɛ Pɔ̂ɔ mai, “Kúƃarâŋ, gáa berei Zûu-ŋai nyíi-ŋai laa-la káa díyêei dítâmaai la díkelee da dɔ̂ŋ soŋ a gbanaŋɔɔ.

²¹Da ímaa mɛni ƃó dîa a gɛ́ɛ íkaa sɛŋ lɛ̂i Zûu-ŋai kélee dîa nyíi-ŋai díkaa Zɛ̃tai-ŋai sámai, a gɛ́ɛ dí dípôlu tɔɔ Mose ma, íkɛ mò dîa a gɛ́ɛ dífe dílônii-sinaâi kpɛ̀tɛ, dí ƃó ŋɔ́nɔ dítûa-pere pɔlɔ-ŋai dîa.

²²Lé ŋaŋ ƃa pɔ̂ri gɛ̂i? Tɔ̃yâ ma da pâi mɛnîi a gɛ́ɛ ya pá.

²³M̀ɛni ma m̀ɛnii kwa mò yâi, gɛ́. Kpakolo náaŋ káa ƃɛ́ nyíi-ŋai díkaa kono-tee-woo tɔnɔ mui.

²⁴Ǹûai ŋí síɣe ka dîa-ni ka kákpîŋ maa wáa, í dímaa-sɛŋ kɔlɛ a gɛ́ɛ dí díŋuŋ ƃo, a gɛ́ɛ ǹûai kélee dí gɔ́lɔŋ mɛni-ŋai dí mò dîa e pîlaŋ yâi gáa nɔ́ kpɛni-kpɛni. Kɛ́lɛ, yá kpîŋ íkaa siâi dɔ̂ŋ lá-woo ma íkɛ mɛi kâa.

²⁵Kɛ́lɛ, à kɛ̀ a Zɛ̃tai-ŋai nyíi-ŋai laa-la káa díyêei, kwa kɔlɔ tɛ́ɛ dípɔ naa kúmɛni ŋá-teɛɛi pôlu ma a gɛ́ɛ dífe díyee pu sɛŋ kélee mɛni su nyíi da gula a sâla ɣâla da kpɛni-ŋa diai, da sua-ŋãa, da sua nyíi ŋãa káa zui. Dífe tela díyee pìli wulu-wulu kɛ́ mɛni da su.”

²⁶Bôlu ma ɣelei, Pɔ̂ɔ è ǹúu náaŋ ŋí síɣe da dîa-ni dí díkpîŋ maa waa. Dí lì Ŋ̀âla-pɛrɛ kɛ́tɛi mu dí m̀o dîa ɣele kûu ɣɛɛlu ƃé da pâi ziɣêi íkpîŋ maa waa mɛnii ŋí é lɛ́ɛ pâi kpɛɛ̂i da zâlai da pâi gulâi dímɛni ma tɔnɔ-tɔnɔi.

²⁷Ŋ̀ele kûu lɔ́ɔlu mɛi feerɛi kɛ́ɛ pâi kɛ̀ kpɛɛ̂i, Zûu-ŋai kùla Eesia kpiniŋ su dí Pɔ̂ɔ kàa Ŋ̀âla-pɛrɛ kɛ́tɛi mu. Nya ƃe dí ǹûai kélee líi mu siɣe dí Pɔ̂ɔ soŋ.

²⁸Dí kɛ̀ lâɣii, dîyɛɛi, “Eezuɛ-ƃela, ka kpɔŋ kûa! Ǹalôŋ ká ŋí a sɛŋ lɛ́ nûa dîa kwaa kélee a gɛ́ɛ dí kúnûai kpɔara da dɔ̂ŋ, é pɛ́lɛ ƃɛ́ ma. Nyíŋi pôlu ma, a pá a Gurii-ŋa máŋ Ŋ̀âla-pɛrɛ kɛ́tɛi ŋí mu a gwaa ma maa waai ŋí naa kara.”

²⁹Dí nyíŋi ƃò, kpɛ́ni fêi, dí Ɛfesɛ nuui Turofimɔ kàa da Pɔ̂ɔ dí kɛ́ ƃo daa kɛ́tɛi su. Dí kɛ̀ gâai Pɔ̂ɔ ƃé pà la Ŋ̀âla-pɛrɛ kɛ́tɛi mu.

³⁰Daai su-ƃelai kélee dí kɛ̀ wúlee, dí kîrɛ siɣe gîe ma dí Pɔ̂ɔ soŋ dí ŋ̀ála dí gula Ŋ̀âla-pɛrɛ kɛ́tɛi mu. Dí gbôŋ lá tɛ̀ kpɔ́ a maa félaa.

³¹Díkɛɛ kɔ̂i a gɛ́ɛ dí baai, worɛ̂-woo è sèri ǹɔii maa kpɛ́-ƃela mɛi-nuu kɛ́tɛi ma a gɛ́ɛ Zerusâlɛŋ gwaa kélee è kɛ̀ wúlee.

³²È lɔii maa kpɛ́-ƃelai mɛi-nuui è ǹyée mu-ƃelai da-ŋa sìɣe da dímɛi-ƃela dí lí naa a kîrɛ. Gɔkuluƃa-ŋai Tãi dí ǹɔii maa kpɛ́-ƃelai ŋí kàa la da dímɛi-nuu kɛ́tɛi, ǹûai dí nâa kpera Pɔ̂ɔ lókwaa ma.

³³Gɔkuluƃa-ŋai mɛi-nuu kɛ́tɛi è pà é zoŋ é m̀ó a gɛ́ɛ dí yɔlɔ feerɛ pu ma. È kɛ̀ ŋ̀wɛ̂lii é gɔ́lɔŋ ǹúui Pɔ̂ɔ è kɛ̀ lai da m̀ɛnii è gɛ̀i.

³⁴Gbɔŋ su-ƃelai da-ni dí lòno a da kpɛ́ni, gbéli-ŋai dí lóno a da kpɛni. Gɛ́ɛ vé m̀ɛnii ŋí ŋá káa ní, kpɛ́ni fêi, ǹyóo-yooi è kɛ̀ a gɛ́tɛi, è gɛ̀ a gɛ́ɛ dí lí a Pɔ̂ɔ ǹɔii maa kpɛ́-ƃelai dítaai su.

³⁵Díseriɛɛ a Pɔ̂ɔ bɛ́rɛi lái, ǹɔii maa kpɛ́-ƃelai dí dímu sìɣe a gɛ́ɛ dí lɔ́ la, kpɛ́ni fêi, ǹyóo-yooi kɛ̀ gbɔŋ sui è kɛ̀ a zu kɛ́tɛ.

³⁶Gbɔŋ su-ƃelai dí pìlaŋ bôlu díkɛ làɣi, dîyɛɛi, “Ka bàa!”

³⁷Díkɛɛ pâi lɔ̂i a Pɔ̂ɔ bɛ́rɛi mui, è mò ǹɔii maa kpɛ́-ƃelai mɛi-nuu kɛ́tɛi ma, ǹyɛɛi, “Ŋa pɔ̂ri lônoi ípɔ?” Ǹyɛɛ mài, “Ya Gurii-woo ƃo?

³⁸Gɛ̀ ní Ize-nuui fa ya, nyíi núu paa-ƃela kɛ̀ dí kɔ́ gɔmɛnɛi pɔ́i, é lí a ǹúu paa-ƃelai ŋɔwála náaŋ vɛ̃ɛ-kpâlaŋ sui?”

³⁹Pɔ̂ɔ ǹyɛɛ mài, “Ŋ́gaa a Zûu-nuu. Ŋa kùla Taasɔ taa-lee kɛ́tɛi su, Sɛlisia lɔii su. Ŋa íkpera fêi a gɛ́ɛ í ǹɛɛ naa ŋá lóno ǹûai pɔ́.”

⁴⁰Gɔkuluƃa-ŋai mɛi-nuu kɛ́tɛi kɛ́ɛ a fáa Pɔ̂ɔ wóo mai, Pɔ̂ɔ è tɔ̀ɔ bɛ́rɛi lá é ǹyée sã́a gbɔŋ mɛi a gɛ́ɛ dí dímɛi sáa. Gbɔŋ su-ƃelai kɛ́ɛ da dímɛi saai, è lòno dípɔ Ibulu-wooi su ǹyɛɛ dîai,