Read Kpelle Zia-ƃelai Kɛ́-mɛni-ŋai 28 Bible Online

Zia-ƃelai Kɛ́-mɛni-ŋai 28 - Kpelle bible

Zia-ƃelai Kɛ́-mɛni-ŋai 28

¹Kútɛɛ dîŋ sui, kú gɔ̀lɔŋ a gɛ́ɛ dîŋ ŋí láa ƃé kɛ̀ a Maata.

²Ǹɔii-ƃelai kɛ̀ naai, dí kúsoŋ kpɔ́ a ǹɛ́lɛɛ. Dí díyee sèe kúkelee kúmu dí ŋɔŋ tóo kúmɛni ma, kpɛ́ni fêi, tuna è nâa kɛ̀ pûi, gɔ́lɛi kɛ́ tela kúkɛ.

³Nya ƃe Pɔ̂ɔ e kɔi sîɣe e bu ŋɔŋ ŋá. Ŋɔŋ kɛ́ɛ a téei, kali è kùla gɔii su e Pɔ̂ɔ soŋ ǹyée ma.

⁴Tãi ǹɔii-ƃelai dí vɛnɛ-sɛŋ ŋí kàa sɛlɛnii Pɔ̂ɔ yée mai, dí mò díkîe-ni loai, dîyɛɛi, “Tɔ̃yâ kpîŋ, nalôŋ ŋí káa a nuu-paa-nuu, nyíi ve pâi ƃálôi mɛni pɔ́ɔ kúlaa sârai, berei máŋ ve lɛɛ ni la ǹyái sui.”

⁵Nya ƃe è galii fàya é dóo ŋɔŋ ŋá, kɛ́lɛ, mɛni ŋánaa fé ǹyaa kpîŋ kɛ́ ni.

⁶Dí kɛ̀ gâai ǹyée a pâi fɛɛ̂i, kpaa máŋ é tóo nɔ́ e sáa a maa félaa; kɛ́lɛ, dí maa kpɛŋ kɛ̀ a tãi su kôya dí gáa a gɛ́ɛ mɛni da kélee fe kɛ́ ni la, nya ƃe dí dílii maa fâleŋ, dîyɛɛ gáa a ɣâla.

⁷Gwaa tɔnɔi ti ma kɔlɛ ma kpâlaŋ-ŋa-dí kɛ̀ naa gɔmɛnɛ-nuu kɛ́tɛ tɔnɔ yêei, nyíi da kàa dòli a Pɔbiliyɔ. Pɔbiliyɔ e ǹyée sèe kúmu, e kúlâi pɛlɛ kpɔ́ wɛli-kɛ-maa-pere su a ɣele kûu saaƃa.

⁸È kɛ̀ a sɛŋ Pɔbiliyɔ ǹâŋ è kɛ̀ kɔ́lɛ̂i. Gɔlɔ è kɛ̀ a vãa ma, ŋãa-kpaŋ kɛ́ ƃo ma. Nya ƃe Pɔ̂ɔ è lì nàa kâai, e Ɣâla fɛli mɛi, e ǹyée pɛlɛ ma e m̀alo.

⁹Tãi nyíŋi è kɛ̀ lai, diai kélee kɔlɔ-fela è kɛ̀ dîa dîŋ ti sui, dí pà Pɔ̂ɔ pɔ máŋ e díƃalo.

¹⁰Dí sama-sɛŋ támaa tɛ̀ɛ kúpɔ; tãi ku kɛ̀ kulâi la naai, dí sɛŋ kélee pu géleŋ su kúmɛni ma, nyíi-ŋai ku kɛ̀ ŋ̀wɛ̂lii.

¹¹Ɣáloŋ saaƃa tɛ̂ɛi, ku ǹyá ŋá-keleŋ siɣe, nyíi kɛ̀ a Alezaŋdura keleŋ, nyíi da kâa dòli a Diyɔkuri. Géleŋ ŋí e tùa seêni dîŋ ŋí su a vãa kɛ́tɛi tɛɛ-tãi.

¹²Ku seriɛ Sirakui, ku gɛ̀ naa a ɣele kûu saaƃa.

¹³Ku siɣeɛ naai, ku kpìlaŋ-kpìlaŋ ku pá Legiuŋ. Ɣele kûu tɔnɔ tɛ̂ɛi pôlu ma seɣai-pere-fãai e nàa kɛ̀ tɛɛ̂i. Bôlu ma-ɣelei ku pà Puteoli.

¹⁴Nàa ƃe ku kúƃarâa kâa naa, dí kúmarê kɛ́ a gɛ́ɛ kwa dîa-ni ku ɣele lɔ́ɔlu mɛi feerɛ kɛ́ naa. E nàa kɛ̀ ti ku Luŋ-perei siɣe.

¹⁵Tãi kúƃarâa kɛ̀ Luŋ dí kúmaa-mɛni mɛni lai, dí pà kúperêi tɔɔ̂i é lɛ́ɛ la zu dí seri Apiiɔ Lɔɔ-kpalaŋ da Ŋɔ̃yâ Laa-pɛrɛ Saaƃa. Díkaa Pɔ̂ɔ mii, e Ɣâla sɛɣɛi fè ǹíi e kpele.

¹⁶Tãi ku seri la Luŋ, dí Pɔ̂ɔ lɛ̀ɛ naa e kɛ́ gbɔɔi-yee ma da gɔkuluƃai kɛ̀ mɛi kâai.

¹⁷E nàa kɛ̀ ti, ɣele kûu saaƃa pôlu ma, Pɔ̂ɔ e Zûu-ŋai dínuu kpaya-kpayai tòli díkîe ma; ǹûai ŋí páa díkîe mai, Pɔ̂ɔ e mò dîa, ǹyɛɛi, “Sinaa da ŋánûa, berei máŋ fe mɛni nyɔ́mɔɔ da kélee kɛ́ ni la a ǹûai, kpaa máŋ kúnâŋ-ni dítûa-pere pɔlɔ-ŋai, dí ŋ́gula Zerusâlɛŋ dí ńdɛɛ Lomaŋ-ŋai pɔ a pelesinɛ.

¹⁸Dí ḿaa kpɛɛ. Dîi pɔ̀ri teêi mâ ŋá lí, kpɛ́ni fêi, dífe mɛni da kélee káa ni ŋá gɛ̀ nyíi ŋa pɔ̂ri saâi mɛni mai.

¹⁹Kɛ́lɛ, Zûu-ŋai kɛ́ɛ dífe faa níi, è kɛ̀ a sɛŋ fɛ̂ɛ ŋa li Gâloŋ Siizɛ pɔ-berei máŋ fe mɛni nyɔ́mɔɔ kélee ƃo ni la a ŋánûai láai.

²⁰Mɛni ma, sapoi ŋá kátòli lai, ǹyaa ƃa, ŋa kákaa kwa kâa-ni ku lóno, kpɛ́ni fêi, Eezuɛ-ŋai díkili-kɛ-zui mɛni ƃe ŋ́iriɛ̂i la a ǹyɔlɔi ŋí.”

²¹Nya ƃe dí mò ma, dîyɛɛi, “Kúfe niî kɔlɔ sɔlɔ ƃo ni é kúla Zuda e pîlaŋ yâ, kpaa máŋ kúƃarâai dí kùla naai, dí mɛni nyɔ́mɔɔ kélee da ƃo kûa e pîlaŋ yâ.

²²Kɛ́lɛ, kwa ŋ̀wɛ̂lii ku íwoo mɛni ku gáa berei íkili-ŋa-siai káa lai. Kpɛ́ni fêi, à kɛ̀ a Kôrai-ƃela-kpului ŋí mɛni, ku gɔ́lɔŋ da mɛni nyɔ́mɔɔ ƃo e pîlaŋ ma kwaa kélee ma.”

²³Nya ƃe dí tãi lɛ̀ mà. Maa-ɣelei seriɛ, núu támaa dí pà bɔ ƃɛi è kɛ̀ naai. É síɣe ɣele-wala ma é tóo ɣele-wulii ma e Ŋ̀âla-taa kaloŋ-laai maa-mɛni ŋá lɛ̀ dîa, é kɔ́ a gɛ́ɛ e díkɛ dí dílii maa faleŋ Zîsɛ mɛni ma e kúla Mose ŋɔtɔ̂ŋ su da Ɣâla ŋɔlóno kɛ́-ƃelai díwooi.

²⁴Nya ƃe ǹúui da-ni dí làa a mɛni-ŋai e mòi, da-ni dífe laa ni la.

²⁵Díkɛɛ díwoo fe laa ni ma díkîe-ni loai, dí li, tãi Pɔ̂ɔ e mɛni tɔnɔi ŋí ƃo la, ǹyɛɛi, “M̀ɔlêŋ Maa Waai e mɛni sã́a ƃo tãi e mò la kúnâŋ-ni pɔlɔ-ŋai dîa Azaya sârai, ǹyɛɛi,

²⁶‘Lí ǹûai ŋí pɔ naa í m̀o dîa, yɛɛi, “Ka pâi mɛni mɛnii kpɔ́, kɛ́lɛ, káfe pâi tárêi zu a dɔnɔ kpîŋ. Ka pâi kwaa kâai kpɔ́, kɛ́lɛ, káfe pâi kwaa maa kpɛɛ̂i a dɔnɔ kpîŋ.

²⁷Kpɛ́ni fêi, ǹûai ŋí dílii-ŋai saâi, díwoli-ŋai fa mɛni mɛ̂ni a ǹɛ́lɛɛ, da díŋɛi lá tɛ́, a gɛ́ɛ dífa lâa kwaa káa la a díŋɛi, kpaa máŋ dí mɛni mɛ́ni a díwoli, kpaa máŋ dí mɛni ŋá káa a dílii, dí tinaŋ ḿbɔ naa-pere a gɛ́ɛ ŋá díƃalo.” ’

²⁸“Mɛni ma é kɛ́ a kákɔlɔŋ mɛni a gɛ́ɛ da Ɣâla ŋɔƃálo-laai ŋí tɛ́ɛ Zɛ̃tai-ŋai pɔ; da pâi díwoli tɔɔ̂i ma.” [

²⁹Tãi e ŋ̀óo-ŋai ŋí ƃò lai, Zûu-ŋai dí lì, díkɛ li a sîa too díkîe-ni loai.]

³⁰Nya ƃe Pɔ̂ɔ e kóraŋ feerɛ lɛ́lɛɛ kɛ̀ naa pɛ́rɛ tɔnɔ mu, nyíi è kɛ̀ vela-fei kɛ̂i. E ǹyée see ǹûai kélee mu da kâa pà bɔi.

³¹È kɛ̀ Ŋ̀âla-taa kâloŋ laai maa-mɛni lɛ̂i, gɛ mɛni-ŋai lɛ nyíi bîlaŋɔɔ Kúnuu-namui Zîsɛ Kôrai ma. E nyíŋi kɛ̀ kpɔ́ pono ŋá, dífe mɛni da kɛ́ ni la.