Read Kpelle Zia-ƃelai Kɛ́-mɛni-ŋai 3 Bible Online

Zia-ƃelai Kɛ́-mɛni-ŋai 3 - Kpelle bible

Zia-ƃelai Kɛ́-mɛni-ŋai 3

¹Pitɛ da Zɔ̂ŋ dí kɛ̀ liî Ŋ̀âla-pɛrɛ kɛ́tɛi mu a Ɣâla-fɛli tãi a vólo maa-laai.

²Dí kɛ̀ pâi a nalôŋ tɔnɔ da nyíi kɛ̀ a gɔ́ɔ púɔɔ é síɣe maa sɔlɔ ƃó ɣele mai. Da kâa ǹaa Ŋ̀âla-pɛrɛ kɛ́tɛi ŋɔkóraŋ lá a ɣele kélee, nyíi da dòli a Góraŋ Lá Lɛ́lɛɛi, a gɛ́ɛ é ǹúui kélee fɛli da lɔ̂ Ŋ̀âla-pɛrɛi mui.

³Gɛ́ɛ a Pitɛ da Zɔ̂ŋ káa lɔ̂i Ŋ̀âla-pɛrɛ kɛ́tɛi mui, è dífɛ̀li.

⁴Dí ŋ̀ɛ́i léŋ-lei ma kàa, Pitɛ ǹyɛɛ mài, “Kúkaa.”

⁵Nya ƃe è ŋ̀ɛ́i pìlaŋ dîa, gɛ́ ƃò gíli ŋá a gɛ́ɛ a pâi sɛŋ da sɔlɔ ƃo díyêei.

⁶Kɛ́lɛ, Pitɛ è mò mà ǹyɛɛi, “Sɛŋ-kao kole da gôo da fé ńyêei. Kɛ́lɛ, nyíi gáa ńyêei ŋa pâi dɛɛ̂i ípɔ. Nâzarɛ Zisɛi Kôrai láai su, ímu-siɣe í sía.”

⁷È zòŋ a ǹáa mii-yee é m̀u siɣe. A m̀aa félaa kpɔ́ nɔ́ tí gɔ́ɔ su è kpanaŋ.

⁸È pìli ɣelêi é tɔ́ɔ da dîa-ni dí lɔ́ Ŋ̀âla-pɛrɛ kɛ́tɛi mu, gɛ́ sìa, gɛ́ píli ɣelêi, gɛ́ Ɣâla láa maa tɛ.

⁹Ǹûai kélee dí gàa gɛ́ sìa, gɛ́ Ɣâla láa maa tɛ,

¹⁰dí m̀aa kpɛ̀ɛ è ƃò a ǹúui nyíi kɛ̀ seêni Ŋ̀âla-pɛrɛ kɛ́tɛi Ŋɔkóraŋ Lá Lɛ́lɛɛi lá gɛ́ fɛli kɛ̂i. Díla è kpàla dîa, díkili ŋá é tɛ̀i a m̀ɛnii kɛ̀ lai.

¹¹Ǹalôŋ kɛ́ɛ a ɣìri Pitɛ da Zɔ̂ŋ diai, ǹûai kélee dí lì dípɔ a kîrɛ a kili-ŋa tɛi. Dí lì gâlai ŋá da kɛ̂ ma Saloma ŋɔkâlai.

¹²Pitɛ kɛ́ɛ a nàa kâai, è lòno ǹûai pɔ́, ǹyɛɛi, “Eezuɛ-ƃela kála kpâlai kâa a nyíŋi lé mɛni ma? Kpaa máŋ, ka káŋuŋ maa lâai kûa lé mɛni ma, yɛ̂ɛ ǹyaa ƃé kú gɛ̀ é sía a kúkpɔɔi wála-walai kpaa máŋ a kúkpɔɔi maa-waa-laai?

¹³Eberaɣɛ̃ɛ Ŋɔɣâlai Aise Ŋɔɣâlai, Zeeka Ŋɔɣâlai, da kúnâŋ-ni Díɣâlai ƃé ǹyée mu-nuui Zîsɛ ŋɔfólo-laai maa tɛ̀, nyíi ka dɛ̀ɛ Pâle pɔ́ ka m̀aa sîa too ŋ̀ɛ́i, tãi è gbɛ̀tɛ la a gɛ́ɛ é ŋ̀uŋ ma ƃói.

¹⁴Kɛ́lɛ, ka dɔ̃yâ-nuui da ǹúu sɔŋ lɛ́lɛɛi maa sîa tòo, ka nuu-paa-nuu mare-kɛɛ kɛ́ a gɛ́ɛ dí dɛɛ kápɔ.

¹⁵Ká Vúlu-laa kɔɔ-pîlaŋ nuui pàa Ɣâla é mu siɣe saa yêei. Nyíŋi ƃé kúkaa a m̀aa sêre-ŋa.

¹⁶Ǹyaŋ laa-la sârai Zîsɛ láai su ƃé kponoi kpanaŋ tɛ̀ɛ ǹalôŋ ŋí pɔ́, nyíi ka gàa kákɛ ƃo a gɔlɔŋɔɔ̂i. Ǹaa-lai nyíi gáa Zîsɛ sârai a gɔlɔi-pono lɛ́lɛɛi ŋí tɛ́ɛ ǹalôŋ pɔ́ kákelee káŋɛi.

¹⁷“M̀ɛni ma ŋánûa, ŋá gɔ́lɔŋ a gɛ́ɛ káfe kɛ́ ní a m̀ɛnii kɔ́lɔŋɔɔ ká kɛ̀ gɛ̂i, yɛ̂ɛ berei nɔ́ kánuu kpaya-kpayai dí gɛ̀ lai.

¹⁸Kɛ́lɛ, m̀ɛnii Ɣâla è wɔ́lɔ bù ŋɔlóno kɛ́-ƃelai lá a gɛ́ɛ dí m̀ó nàa tuɛi, a gɛ́ɛ fɛ̀ɛ nɔ́ Ŋɔkôrai é mɛni-soli káai, a ŋ̀aa-see kɛ́ a bere sîi tí.

¹⁹M̀ɛni ma, ka kálii pene ká pá ŋɔ́nɔ pôlu Ɣâla pɔ́, a gɛ́ɛ kásɔnyɔ̂ŋ é kúla kâa Kúnuu-namui é fúlu-laa nina tɛɛ kápɔ.

²⁰Ŋ̀elei tí a pâi pâi, a pâi M̀asâyai tɛɛ̂i nyíi a wɔ́lɔ ǹɛ kámɛni mai.

²¹Fɛ̂ɛ é lɛ́ɛ Ɣâla-taa é lɛ́ɛ la zu m̀ɛnii kélee ŋ̀aa-see é kɛ́ nyíi Ɣâla è gono tèe la ŋɔlóno kɛ́-ƃela maa waa pɔlɔ-ŋai sârai kóraŋ támaa tɛ̂ɛi pôlu mai.

²²Mose è mò, ǹyɛɛ, ‘Kúnuu-namui Ɣâla a pâi lóno kɛ́-nuu tɔnɔ kulâi kánûai sáma kámɛni ma, yɛ̂ɛ ńyaa. Ka pâi káwoli tɔɔ̂i m̀ɛni-ŋai kélee dîa a mò kâai.

²³A pâi kɛ̂i a sɛŋ a gɛ́ɛ ǹúui kélee va ǹóno kɛ́-nuui tí wóo mɛnii, zu a pâi karâi ǹûai sáma.’

²⁴Ɣâla ŋɔlóno kɛ́-ƃelai kélee, é síɣe Samia ma é tóo diai dîa lɛ̀ɛ bôlui, dí lòno é pîlaŋ ŋ̀ele-ŋai ŋí dîa.

²⁵Kákaa a ǹóno kɛ́-ƃelai dílônii da gbanaŋ-wooi, nyíi Ɣâla è gɛ̀ kánâŋ-ni yêei tãi è mò la Eberaɣɛ̃ɛ ma, ǹyɛɛ, ‘Ísuui su-nuu tɔnɔ sârai, lûwa a pâi kɛ̂i ǹɔii su nuu-suui kélee ma.’

²⁶Ɣâla è núu tɔnɔ sìɣe zu a ǹyée mu-nuu è dɛ̀ɛ kápɔ a m̀aa-nuŋ, a gɛ́ɛ é lûwa láa kâa kákelee ka kápôlu tɔɔ kásɔnyɔ̂ŋ-ŋai dîa.”