Read Kpelle Zia-ƃelai Kɛ́-mɛni-ŋai 8 Bible Online

Zia-ƃelai Kɛ́-mɛni-ŋai 8 - Kpelle bible

Zia-ƃelai Kɛ́-mɛni-ŋai 8

¹Sɔ̂ɔ è fàa ma a gɛ́ɛ dí bàa. M̀aa ɣelei tí, dí pɛ̀lɛ Zerusâlɛŋ Kôrai-toli-kpɔŋ kpɔaraa ma kpɔ́ a ŋ̀ánaa. Zu-ƃelai kélee dí taa-taa dí kula dílɔii su dí lí Zuda da Sameria lɔii su, zia-ƃelai nɔ́ ƃé dífe taa-taa ni.

²Ɣâla mɛni kɛ́-ƃela da-ŋa dí lì Tiƃiŋ loôi, dí wɔ́lɔ kpɔ́ mɛi a ǹɛ́lɛɛ.

³Kɛ́lɛ, Sɔ̂ɔ è pɛ̀lɛ Kôrai-toli-kpɔŋ ma a ŋ̀wana-lɔ̂ɔ, gɛ́ lɔ̀ bɛ́rɛ-ŋai kélee mu, gɛ́ zinâai da nɛyaai soŋ, gɛ́ dípili kpini-pɛrɛ mu.

⁴Ǹyaŋ diai taa-taai, dí kɛ̀ liî a Ɣâla-woo ƃo kwaa kélee ma.

⁵Fele è yèŋ Sameria taai su é Kôrai maa mɛni ƃó naa-ƃelai dîa.

⁶Ǹûai kɛ́ɛ da Fele wóo mɛ̀ni da ŋ̀ɛi-kɛ-maa-ŋai káa é kɛ̀ gɛ̂i, díkelee dí díwoli tɔ̀ɔ mà.

⁷Nyînaŋ nyɔ́mɔ-ŋa dí kɛ̀ kulâi núu támaa kponôi, díkɛ wɔ̀lɔ a díwoo su kɛ́tɛ. È mɛ̃lɛ-mɛ̃lɛŋ-ƃela da kɔɔ-pu-ƃela támaa ƃàlo.

⁸Lii-nɛ̃ɛ kɛ́tɛ è kɛ̀ daai tí su.

⁹Kɛ́lɛ, nalôŋ tɔnɔ è kɛ̀ naa ǹáa ƃé kɛ̀ a Samaŋ. È kɛ̀ a póniŋ kɛ́-nuu daai ŋí su. È Sameria-ƃelai láa kpàla dîa, gɛ́ m̀o dîa a gɛ́ɛ é kɛ́ a núu kɛ́tɛ.

¹⁰Diai kélee kɛ̀ daa-leei sui, ǹúu kpaya-kpaya da bɛlɛ-pɛlɛɛi, dí díwoli tɔ̀ɔ ma, díkɛ m̀o, dîyɛɛi, “Ǹalôŋ ŋí káa kpɔ́ a Ɣâla ŋɔwála-walai ti da dòli a ‘Ŋ̀wála-wala Kɛ́tɛi.’ ”

¹¹Dí díwoli tɔ̀ɔ ma, kpɛ́ni fêi, è dílaa kpàla dîa a ŋɔpóniŋ su kôyaa kɛ́ɛi.

¹²Kɛ́lɛ, dí làa a Duŋ Lɛ́lɛɛi Fele è mò gɛ́ pîlaŋ Ŋ̀âla-taa kaloŋ-laai ma da Zîsɛ Kôrai láai. Dí ǹɛyâai da zinâai batâi kɛ̀.

¹³Samaŋ máŋ ǹyaa kpîŋ è làa la. Batâi sɔlɔ ƃóɔɔ m̀ii, è pìlaŋ Fele pôlu, gɛ́ ŋ̀ɛi-kɛ-maa-ŋai kàa kɛ̀ kɛ̂i da mɛni kpaya-kpaya. Ǹá è kpàla ma.

¹⁴Zia-ƃelai kɛ́ɛ Zerusâlɛŋ da mɛ̀ni a gɛ́ɛ Sameria-ƃelai da díyee sée Ɣâla ŋɔwóoi mui, dí Pitɛ tɛ̀ɛ naa da Zɔ̂ŋ.

¹⁵Dí pà dí Ɣâla fɛli dímɛni ma a gɛ́ɛ dí M̀ɔlêŋ Maa Waai sɔlɔ ƃó

¹⁶kpɛ́ni fêi, vé niî kɛ̀ pá ní dípɔ, kɛ́lɛ, dí kɛ̀ nɔ́ a díbatâi kɛ́ɛ Kúnuu-namui Zîsɛ láai su.

¹⁷Nya ƃe Pitɛ da Zɔ̂ŋ dí díyee pɛ̀lɛ dîa dí M̀ɔlêŋ Maa Waai sɔlɔ ƃó.

¹⁸Samaŋ kɛ́ɛ a gáa a gɛ́ɛ M̀ɔlêŋ è pà ǹûai pɔ́ zia-ƃelai yée pɛ́lɛɛ dîa sârai, è pà a sɛŋ-kao tɛ̀ɛ Pitɛ pɔ́ da Zɔ̂ŋ,

¹⁹ǹyɛɛ dîai, “Ka ŋ̀wála-walai ŋí tɛ́ɛ ḿbɔ máŋ a gɛ́ɛ ǹúui kélee ŋà ǹyée pɛ̀lɛ mài, é M̀ɔlêŋ Maa Waai sɔlɔ ƃó.”

²⁰Nya ƃe Pitɛ è mò mà, ǹyɛɛi, “Ka ísɛŋ-kaoi ka saa, kpɛ́ni fêi, í kɛ̀ gâai yɛ̂ɛ ya pɔ̂ri Ɣâla ŋɔsama-sɛŋ yâi a sɛŋ-kao!

²¹M̀ɛnii ŋí íwɔ̂ fé zu, kpɛ́ni fêi, ífe sã́a ní Ɣâla ŋɛ́i.

²²M̀ɛni ma ílii pene ímɛni nyɔ́mɔɔi ŋí mɛni ma í Ɣâla fɛli. Ɣele da a pâi ísu-mɛni lɛɛ̂i,

²³kpɛ́ni fêi, ŋa gáa a gɛ́ɛ ílii ŋwânai kpɔ́ yɛ̂ɛ gbɛ̃ɛ-kpɛ̃ɛ, íɣiriɛɛ a sɔnyɔ̂ŋ.”

²⁴Samaŋ ǹyɛɛ diai, “Ka Kúnuu-namui fɛli ḿɛni ma a gɛ́ɛ mɛni-ŋai ŋí ka m̀ôi, dɔnɔ kpîŋ fè kɛ̀ a ńyãa.”

²⁵Dí kpɛ̀ɛ a zêre-faai kɛ́ɛ da Duŋ Lɛ́lɛɛi ƃóɔɔ sârai, dí lì pôlu Zerusâlɛŋ. Díkɛɛ liî, dí kɛ̀ Ɣâla-woo ƃôi Sameria taa-ŋai dámaa su.

²⁶Ɣâla-taa-kela tɔnɔ è lòno Fele pɔ́, ǹyɛɛ mài, “Ímu siɣe í lí séɣai-pere, berei ma a sîɣe Zerusâlɛŋ gɛ́ lì Gezai.” Berei ŋí lâai fɛ̃ɛ-kpalaŋ su.

²⁷Nya ƃe m̀u-siɣe é lí. Itiopia naloŋ tɔnɔ, nyíi kɛ̀ a duɛ-saai, è kɛ̀ pâi Zerusâlɛŋ Ɣâla fɛli mɛni ma. Ǹalôŋ ŋí è kɛ̀ a gɔmɛnɛ-nuu kɛ́tɛ Kɛŋdɛsi yée mu, è ƃo ŋɔ́nɔ a ŋɔsɛŋ-kao láâi-kɛ-nuu. Kɛŋdɛsi è kɛ̀ a kâloŋ-nɛni Itiopia-ƃelai mɛi.

²⁸Ǹalôŋ ŋí kɛ́ɛ lenêi pôlui è kɛ̀ seêni ŋɔkéleŋ su, gɛ́ Ɣâla ŋɔlóno-kɛ-nuui Azaya Kɔlɔi lòno.

²⁹M̀ɔlêŋ è mò Fele ma, ǹyɛɛ, “Lí bɔ́ naa géleŋ su.”

³⁰Fele è kîrɛ sìɣe é lí géleŋ ma é ǹalôŋ wóo mɛni, gɛ́ Ɣâla ŋɔlóno-kɛ-nuui Azaya Kɔlɔi lòno, Ǹyɛɛ mài, “Íkaa tárêi gɔlɔi lono-woo su?”

³¹Ǹaloŋ ǹyɛɛ mài, “Ŋa pɔ̂ri tárêi léŋ zu, à kɛ̀ núu à wàla ńdeniŋ tɔ́ɔ?” È mò Fele ma a gɛ́ɛ é tɛ́ géleŋ su é sée gɔlɛ.

³²Gɔlɔi m̀ɛ́i è kɛ̀ naa lônoi ŋ̀óo ká kɛ̀ ŋí: “Dí lì la yɛ̂ɛ ƃála bàa mɛni ma, yɛ̂ɛ ƃála-loŋ ƃé m̀ɛi saâi díkɛ ǹéɣa tèe ma. Kɛ́lɛ vé lóno ní.

³³Ŋɔmaa-yeŋ-perei su, dí woya kɛ̀ la ŋɔmɛni-ŋa-teɛɛi su. Kɛ́lɛ, gbɛ̂ɛ ƃa pɔ̂ri mɛni da ƃôi e pîlaŋ ŋɔsuui mai? Kpɛ́ni fêi, dí ŋɔfúlu-laai kula ǹyêei ǹɔii ma.”

³⁴Nya ƃe ǹalôŋ e Fele wóo su too, ǹyɛɛi, “Ŋa íkpera fêi, gbɛ̂ɛ ƃe Ɣâla ŋɔlóno-kɛ-nuui ŋí a lônoi gɛ pîlaŋ mai? Ńyãa kpîŋ ƃe kpaa núu da kpɛni?”

³⁵Nya ƃe Fele e pɛ̀lɛ Duŋ Lɛ́lɛɛi lɛ̂i mà gɛ pîlaŋ Zîsɛ ma. E Duŋ Lɛ́lɛɛi kɔ́ɔ pîlaŋ a ŋ̀óo-ŋai ǹalôŋ kpîŋ è kɛ̀ ǹónôi.

³⁶Díkɛɛ liî, dí kùla yá da ma. Nya ƃe ǹalôŋ e mò, ǹyɛɛ, “Ƃɛ káa. Yá ká ŋí! Le ƃa pɔ̂ri ŋábatâi-mɛnii kperâi?” [

³⁷Fele e mò, ǹyɛɛi, “À kɛ̀ ílaâi la a ílii kélee ya pɔ̂ri batâi sɔlɔ ƃôi.” Ǹalôŋ e ŋ̀óo su tòo, ǹyɛɛi, “Ńaâi la a gɛ́ɛ Zîsɛ Kôrai káa a Ɣâla Ǹóŋ.”]

³⁸È mò a gɛ́ɛ géleŋ é kpéra. Nya ƃe dífeerɛ, Fele da ǹalôŋ, dí yèŋ ǹyái su, Fele è ŋɔbatâi kɛ̀.

³⁹Díkulaa ǹyái sui, Kúnuu-namui ŋɔmɔ̂leŋ è Fele sìɣe. Ǹalôŋ fé gáa ní ŋɔ́nɔ. È lì kpɔ́ a líi-nɛ̃ɛ.

⁴⁰Kɛ́lɛ, dí Fele kàa Azotɔ. Gɛ́ɛ tɛɛ̂i, è Ɣâla-woo ƃò daa-lee-ŋai kélee su, é lɛ́ɛ la zu é seri Sɛsɛria.