Read Kpelle Zia-ƃelai Kɛ́-mɛni-ŋai 9 Bible Online

Zia-ƃelai Kɛ́-mɛni-ŋai 9 - Kpelle bible

Zia-ƃelai Kɛ́-mɛni-ŋai 9

¹Sɔ̂ɔ è gbɛ̀tɛ ǹíi su a gɛ́ɛ é Kúnuu-namui ŋɔpôlu-ƃelai páa. È lì zâla láa soŋ-nuu kɛ́tɛi pɔ́ naa

²a gɛ́ɛ é kɔlɔ kúla ǹyêei é lí la Dimɛika Ŋ̀âla-fɛli kêre-ŋai mu a gɛ́ɛ à núu da kélee kàa nyíi gáa a ǹúu-kpului, nyíi da kɛ̂ ma Berei, zu-nuu da, à kɛ̀ a nɛnî kpaa máŋ surɔ̂ŋ, é zoŋ é ŋìri é pá la Zerusâlɛŋ.

³Gɛ́ɛ liî, è sèri Dimɛika kɔlɛ ma. Ǹaa kɛ́ɛ tí, màa è pono kpɔ́ a maa félaa a kwaa-ponoɔɔ nyíi kùla ŋ̀elei sui.

⁴È tòo ǹɔii ma é wóo da mɛni, ǹyɛɛ mài, “Sɔ̂ɔ, Sɔ̂ɔ, ya ŋ́gbɔarâi lé mɛni ma?”

⁵Sɔ̂ɔ ǹyɛɛ mài, “Gbɛ̂ɛ ƃa yá, Ŋánuu-namui?” Kúnuu-namui ǹyɛɛ ma, “Ńyãa ƃa Zîsɛ nyíi íkaa gbɔarâi.

⁶Kɛ́lɛ, ímu siɣe í li daai su. Da pâi m̀ɛnii ƃôi yâ ya pâi gɛ̂i.”

⁷Zinâai da dîa-ni dí kɛ̀ liî díla é pili zu dífa pɔ̂ri lônoi. Dí ŋ̀óoi mɛ̀ni, kɛ́lɛ, dífe núu da káa ní.

⁸Sɔ̂ɔ è mù-siɣe ǹɔii ma. Ŋ̀ɛ́i lá ƃóɔɔi, vé sɛŋ da káa ní. Dí zòŋ a ǹyée dí lí la Dimɛika.

⁹È kɛ̀ naa a ɣele kûu saaƃa va kwaa kâa, va mìi-sɛŋ da mìi, va tela yá kpele.

¹⁰Zîsɛ ŋɔpôlu-nuu tɔnɔ è kɛ̀ Dimɛika. Ǹáa ƃé kɛ̀ a Ananaya. Zìa è tɛ̀ɛ la Kúnuu-namui é m̀ó ma zĩ̂ai su, ǹyɛɛi, “Ananaya.” Ananaya ǹyɛɛ, “Ŋ́gaa ƃɛ́, Kúnuu-namui.”

¹¹Kúnuu-namui ǹyɛɛ mài, “Ímu siɣe í lí berei ma nyíi da dòli a Bere Sã́ai í mare-kɛɛ kɛ́ Zudasi ŋɔpɛ́rɛi mu nalôŋ mɛni ma da kɛ̂ ma Sɔ̂ɔ nyíi gáa a Taasɔ-nuui, kpɛ́ni fêi, gáa Ɣâla fɛlîi.

¹²Zĩa è tɛ̀ɛ la é nalôŋ tɔnɔ káa da kɛ̂ ma Ananaya, gɛ́ pà a gɛ́ɛ é ǹyée pɛ́lɛ ma a gɛ́ɛ ŋ̀ɛ́i é fúloŋ é kwaa káa.”

¹³Kɛ́lɛ, Ananaya è ŋ̀óo su tòo, ǹyɛɛi, “Kúnuu-namui, ŋá mɛ̀ni núu támaa lá é pîlaŋ ǹalôŋ ŋí ma, a gɛ́ɛ è mɛni nyɔ́mɔɔ támaa kɛ̀ a Íɣâla-ƃelai Zerusâlɛŋ.

¹⁴È wála-wala kùla zâla láa soŋ-ƃela kpaya-kpayai yêei gbiniŋ ŋí su ƃɛ́ mɛni ma a gɛ́ɛ diai kélee da ílaa tòlii, é dísoŋ é díɣiri.”

¹⁵Kɛ́lɛ, Kúnuu-namui è mò mà, ǹyɛɛ, “Lí, kpɛ́ni fêi, gáa a ǹúui ŋa ǹɛ́ a ŋátii kɛ́-nuui dɔnɔ a gɛ́ɛ é lí a ǹáa Zɛ̃tai-ŋai sáma, gâloŋ-ŋai da Eezuɛ-ƃelai.

¹⁶Ŋa pâi ǹɛ̂i ma berei a pâi mɛni-soli támaa kâai la ńaai mɛni mai.”

¹⁷Nya ƃe Ananaya è lì é lɔ́ bɛ́rɛi mu é ǹyée pɛ́lɛ ma, ǹyɛɛi, “Ḿarâŋ Sɔ̂ɔ, Kúnuu-namui Zîsɛ nyíi kùla íŋɛi berei su íkɛɛ pâi, a ńdɛɛ a gɛ́ɛ íŋɛi é fúloŋ í kwaa káa ílaa é fɛ́ɛ a M̀ɔlêŋ Maa Waai.”

¹⁸A naa maa félaa kpɔ́ nɔ́ sɛŋ da è kùla ŋ̀ɛi é tóo yɛ̂ɛ ŋɛi-wolo-wolôŋ. Nya ƃe ŋ̀ɛ́i lá è ƃò ŋ̀á ma é mu sìɣe dí ŋɔbatâi kɛ́.

¹⁹Mii-sɛŋ miɛɛ mìi, wála-wala è pà bɔ́. Da Zîsɛ ŋɔpôlu-ƃelai dí kɛ̀ Dimɛika a ɣele kûu kpɛ́-kpɛɛ.

²⁰È Zîsɛ maa mɛni ƃò kpɔ́ Ŋ̀âla-fɛli kêre-ŋai mu a maa félaa a gɛ́ɛ gáa a Ɣâla Ǹóŋ.

²¹Kɛ́lɛ, diai kélee ŋ̀óo mɛnii, díla è kpàla dîa, dîyɛɛi, “Kɛrɛ̂e, ǹalôŋ ŋí ƃé diai kélee kpɔ̀ara nyíi-ŋai Zîsɛ láai ŋí tòli Zerusâlɛŋ? È pà ƃɛ́ a gɛ́ɛ é dísoŋ é díɣiri é lí a dia zâla láa soŋ-ƃela kpaya-kpayai pɔ́.”

²²Kɛ́lɛ, Sɔ̂ɔ ŋɔɣâla-woo ƃóɔɔi su è kpànaŋ kpɔ́ a ŋ̀ánaa. Zîsɛ maa mɛni ƃóɔɔ mì a zu kpanaŋɔɔi è ǹɛ Zûu-ŋai dîa kɛ̀ Dimɛikai dîa a gɛ́ɛ Zîsɛ ƃa Kôrai.

²³Ɣele kûu támaa tɛ̂ɛi pôlu ma Zûu-ŋai dí gbɛ̀tɛ a gɛ́ɛ dí bàa.

²⁴Kɛ́lɛ, Sɔ̂ɔ è dímɛni kpɛtɛɛi kɔ̀lɔŋ. Dí kɛ̀ bere-ŋai mɛi kâai daa-leei ḿâ siɣãŋ-ŋai lá a kpini da fólo a gɛ́ɛ da gàa dí bàa.

²⁵Kɛ́lɛ Sɔ̂ɔ pôlu-ƃelai dí gùla nàa ma a kpíni, dí zee kpɔ̂lɔ su dí ǹyeŋ gàlai mɛi kôyai pôlu-pere.

²⁶Sɔ̂ɔ è lì Zerusâlɛŋ a gɛ́ɛ da Zîsɛ ŋɔpôlu-ƃelai díkɛ ƃò kwaa tɔnɔ ma. Kɛ́lɛ, díkelee dí kɛ̀ yaôi ma. Dífe láa ní la a gɛ́ɛ è kɛ̀ a Zîsɛ pôlu-nuu.

²⁷Kɛ́lɛ, Banaba è zìɣe é pá la zia-ƃelai pɔ́. È nɛ̀ dîa berei è Kúnuu-namui kàa la berei mai, berei è lòno la bɔ́i da berei è Ɣâla-woo ƃò la Dimɛika a lii-kpele-pere Zîsɛ láai sui.

²⁸Da dîa-ni dí kɛ̀ Zerusâlɛŋ díkɛ lɔ̀ díkɛ kùla.

²⁹Sɔ̂ɔ è lòno kpɔ́ a lii-kpele pere Kúnuu-namui Zîsɛ láai su, gɛ́ yeli tɔ̀ɔ Zûu-ŋai dîa da kâa Gurii-woo ƃoi díla. Kɛ́lɛ, dí kɛ̀ ŋ̀wɛ̂lii dí bàa.

³⁰Ǹaa-la-ƃelai kɛ́ɛ da m̀ɛnii ŋí kɔ́lɔŋ, dí pà la Sɛsɛria dí dɛɛ Taasɔ.

³¹Kôrai-toli-kpɔŋ-ŋai kɛ̀ Zuda, Galalii da Sameria dí nâa kɛ̀ lii-sêe su. Dí ƃɔlɔ kpɔ́ a zu kɛ́tɛ. Zu-ƃelai dí tàma, kpɛ́ni fêi, ŋumɛ mâa è kɛ̀ díyêei dífulu-laai su Kúnuu-namui mɛni ma da M̀ɔlêŋ Maa Waai.

³²Pitɛ kɛ́ɛ siâi díkelee dímɛi gwaa-ŋai mai, è pà Ŋ̀âla-ƃelai naa kâai kɛ̀ Ledai.

³³È nalôŋ tɔnɔ kàa naa da kɛ̂ ma Eenea. Ǹalôŋ ŋí mɛ̃lɛ-mɛ̃lɛŋ kɔlɔ-fela è kɛ̀ ma a kóraŋ lɔ́ɔlu mɛi saaƃa gɔ́ɔ púɔɔ.

³⁴Pitɛ è mò mà, ǹyɛɛi, “Eenea, Zîsɛ Kôrai a íƃalo. Ímu siɣe í ígbìŋ kpɛtɛ.” È mu sìɣe kpɔ́ a maa félaa.

³⁵Diai kélee kɛ̀ Leda da Sarɔŋ dí gàa dí tínaŋ Kúnuu-namui pɔ́ naa-pere laa-la su.

³⁶Zîsɛ ŋɔpôlu-nuu tɔnɔ è kɛ̀ Zapa nyíi da kâa dòli a Tabitai. Tabita laai ŋí su-kulai ƃa Dɔɔkɔ. Ǹɛnîi ŋí tíi lɛ́lɛ támaa è kɛ̀ gbonôi. È kpɔŋ mâa tɛ̀ɛ núu támaa pɔ́ a tíi kɛ́ɛ su a ǹyée.

³⁷Kɛ́lɛ è kɔ̀lɛ a tãi tɔnɔ da naa kɛ́ɛ tí é sáa. Dí ŋ̀waa dí ǹáa ŋ̀elei su pere loŋpoi su.

³⁸Leda è kɛ̀ a ǹɛɣɛɛ Zapa ma. Zîsɛ ŋɔpôlu-ƃelai dí mɛ̀ni a gɛ́ɛ Pitɛ è pà naa. M̀ɛni ma dí núu feerɛ tɛ̀ɛ Pitɛ pɔ́ naa dí gbera fé, dîyɛɛ mai, “Kpera yɛ̂, pá, ífe tãi siɣe.”

³⁹Nya ƃe Pitɛ è mù-siɣe da dîa-ni dí lí. Dí seriɛɛ naai, dí lì la loŋpoi su è kɛ̀ laai ni naai. Bɔɔ-nɛyâai kélee dí kɛ̀ tɔ̂ɔni gɔlɛ díkɛ wɔ̀lɔ díkɛ zeɣe-ŋai lɛ̀ Dɔɔkɔ è zɔlɔ dîɛ da dîa-ni díkɛɛ naai.

⁴⁰Kɛ́lɛ, Pitɛ è díkelee kpɛ̀ loŋpoi su é pìlaŋ ŋume ŋá é Ɣâla fɛli. È tìnaŋ bomai pɔ́ naa-pere é m̀ó, ǹyɛɛi, “Tabita, ímu siɣe.” Nya ƃe Tabita è ŋ̀ɛ́i lá ƃo. Pitɛ káa mìi, è mu sìɣe é sée.

⁴¹Pitɛ è ǹyée tòo ǹyêei é m̀u sìɣe é dɔɔ é Ŋ̀âla-ƃelai tóli da bɔɔ-nɛyâai é dɛɛ dípɔ.

⁴²Ǹûai kélee dí m̀ɛnii ŋí kɔ̀lɔŋ Zapa. Ǹúui dámaa ɣele dí làa a Kúnuu-namui.

⁴³Pitɛ da nalôŋ tɔnɔ da kâa kɛ̀ ma Samaŋ nyíi kɛ̀ a sua-kɔlɔ paa-nuui, dí kɛ̀ Zapa a ɣele kûu támaa.