Read Kpelle Lomaŋ 10 Bible Online

Lomaŋ 10 - Kpelle bible

Lomaŋ 10

¹Ŋánûa, ńii su mɛnii da Ŋáɣâla-fɛliɛɛi nyíi gáa dímɛni mai, nya ƃa a gɛ́ɛ dí ƃálo.

²Ŋa dímaa sêre-faa kɛ̀ a gɛ́ɛ Ɣâla maa-mɛni káa díkoi kpɔ́ a gbanaŋɔɔ, kɛ́lɛ, dífa târe maa-mɛni su.

³Kpɛ́ni fêi, díkɛɛ dífa târe dɔ̃yâ-laai mɛni su nyíi a kûla Ɣâla yêei, díkɛ díkpîŋ tɔ̃yâ laa-la kɔ́ɔ pìlaŋ, dífe díyee seêni Ɣâla ŋɔtɔ̃yâ laa-lai mu.

⁴Kpɛ́ni fêi, Kôrai káa a dɔ̂ŋ kpɛɛ ŋá a gɛ́ɛ diai kélee laa-la káa díyêei dí dítoli a tɔ̃yâ-ƃela.

⁵Mose a kɔlɔ pɔ̃yɛ a gɛ́ɛ ǹúui nyíi a dɔ̃yâ-laai maa kɔri nyíi a kûla dɔ̂ŋ sui maa-nuui a pâi fulu-laa sɔlɔ ƃôi.

⁶Kɛ́lɛ, dɔ̃yâ-laai nyíi a kûla laa-la sui, a mò, ǹyɛɛ, “Ífe mò ílii su, ‘Gbɛ̂ɛ ƃé pâi tɛ̂i Ɣâla-taa?’ (Zu-kulâi ƃa, é pá a Kôrai ǹɔii ma ƃɛ)

⁷kpaa máŋ, ‘Gbɛ̂ɛ ƃé pâi pîlanii ǹóa kôyai su?’ ” (zu-kulai ƃa, é Kôrai kula saa yêei).

⁸Kɛ́lɛ, dɔ̃yâ-laai nyíi kula laa-la sui, a kɛ̂ le? A mò, ǹyɛɛ, “Ŋ̀óoi káa íkɔlɛ, gɛ ƃo íla da ílii su” (zu-kulai ƃa naa-la-wooi nyíi kwa maa-Ɣâla-woo ƃoi);

⁹kpɛ́ni fêi, à kɛ̀ yà mò íla a gɛ́ɛ Zîsɛ káa a Kúnuu-namui, í laa la ílii su a gɛ́ɛ Ɣâla e mu siɣe saa yêei, gɛ̀ ní ya pâi ƃálôi.

¹⁰Kpɛ́ni fêi, laa-la káa núu líi su, à kɛ̀ ti gɛ̀ ní da maa-nuui ti tòli a tɔ̃yâ-nuu, ǹyaŋ à maa-mɛni kùla ǹá à mò, gɛ̀ ní a ƃálo.

¹¹Ŋ̀âla-kɔlɔi a mò, nyɛɛ, “Ǹúui kélee a lâa lai ve pâi ŋumɛ̂i.”

¹²Kpɛ́ni fêi, Zûu-ŋai da Gurii-ŋai díŋa fe kɔlɛ ni. Nuu-namu tɔnɔi káa a núu kélee Namu, ǹyaŋ e ŋɔtɔɔ-laai tɛɛ diai kélee pɔ da ǹáa tolii.

¹³Kpɛ́ni fêi, “ǹúui kélee a Kúnuu-namui láa tòlii, a pâi ƃálôi.”

¹⁴Kɛ́lɛ, núu-kpune a pɔ̂ri Kúnuu-namui láa tólîi leŋ nyíi dífe niî láa ni lai? Ǹyaŋ da pɔ̂ri lâai leŋ a Kúnuu-namui nyíi dífe niî maa-mɛni mɛni níi? Da maa-mɛni mɛ̀ni leŋ Ɣâla-woo ƃo-nuu ŋɛi pôlu?

¹⁵Ǹyaŋ nûa da Ɣâla-woo ƃò leŋ, à kɛ̀ dífe dítɛɛ ni? Yɛ̂ɛ berei bɔ̃yɛɛ̂i lai, “Diai da Duŋ Lɛ́lɛɛi taa-taai dítuɛ ponoɔ̂i!”

¹⁶Kɛ́lɛ, diai dí Duŋ Lɛ́lɛɛi mɛ̀ni díkelee dífe díyee see ni mu; kpɛ́ni fêi, Azaya e mò ǹyɛɛ, “Kúnuu-namui, gbɛ̂ɛ ƃe làa a mɛnii e mɛ̀ni kúlai?”

¹⁷Mɛni ma laa-la a pâ a mɛnii núu a mɛ̀nii, ǹyaŋ mɛnii núu a mɛ̀nii, Kôrai maa-tuŋ lɛ́lɛɛi ƃa pâ la.

¹⁸Kɛ́lɛ, ŋa mare-kɛɛ kɛ̂i, dífe mɛni ni? Tɔ̃yâ ma, dí mɛ̀ni; kpɛ́ni fêi, “Ŋ̀âla-woo ƃo-ƃelai wóo a seri ǹɔii gwaa kélee, díwoo a seri ǹɔii kóyaŋ ma.”

¹⁹Ŋa ŋɔ́nɔ mare-kɛɛ kɛ̂i, Eezuɛ-ŋai dífe táre ni zu? Maa-ŋuŋ Mose a mò, ǹyɛɛ, “Ŋa pâi kákɛ̂i ka tólo kula diai dîa dífe a lɔii-ŋuŋ su-ƃelai; ŋa pâi kákɛ̂i kálii é ŋwána ǹɔii-ŋuŋ ƃoɔɔ-ŋai dîa.”

²⁰Nàa pôlu ma, Azaya a mò a lii-kpele-pere, ǹyɛɛi, “Diai dífe ŋ́gɔri níi, da ŋ́gaa; ŋa ńɛ diai dîa dífe ḿaa-mare-kɛɛ kɛ́ níi.”

²¹Kɛ́lɛ, a mò e pîlaŋ Eezuɛ-ŋai dîa, ǹyɛɛi, “Ŋa ńyee sã́a a ɣele kélee diai mɛni ma dífa woo-mɛni kɛ̀i da sia-ƃela.”