Read Kpelle Lomaŋ 13 Bible Online

Lomaŋ 13 - Kpelle bible

Lomaŋ 13

¹Tɔɔ núu kélee è gɔmɛnɛ-ƃelai wóo mɛni. Kpɛ́ni fêi, wála-wala kélee fe naa fɛ̂ɛ e kula Ɣâla yêei, ǹyaŋ, gɔmɛnɛ-ƃelai díkaa ɣele mai, Ɣâla ƃe dísee.

²M̀ɛni ma núu à tɔ̀ɔ gɔmɛnɛ-ƃelai la, gɛ̀ ní a tɔɔ máŋ diai lá Ɣâla e dílɛi. Diai da tɔ̀ɔ gɔmɛnɛ-ƃelai lai da pâ a tɔŋ-pu-maa díkpîŋ pɔ.

³Kpɛ́ni fêi, mɛni lɛ́lɛɛ-kɛ-ƃela dífa yâo dítuɛ-ƃelai dîa, fɛ̂ɛ mɛni nyɔ́mɔ-kɛ-ƃela. Ífe ŋ̀wɛ̂lii í yao gɔmɛnɛ-nuu ma? À kɛ̀ ti gɛ̀ ní tûa lɛ́lɛɛ kɛ́, gɛ̀ ní a pâi ílaa maa tɛ̂i,

⁴kpɛ́ni fêi, gáa a Ɣâla yée-mu-nuu a gɛ́ɛ é mɛni lɛ́lɛɛ kɛ́ ímɛni ma. Kɛ́lɛ, à kɛ̀ yà mɛni nyɔ́mɔɔ kɛ̀, gɛ̀ ní yao é kɛ́ íkɔlɔ̂i, kpɛ́ni fêi, va ŋɔƃóa-sɔkpɔ̂i siɣe, kpɛni fêi, gáa a Ɣâla yée-mu-nuu a gɛ́ɛ e Ɣâla ŋɔlii-ŋwanai maa-tɔŋ kpɛ́ sɔnyɔ̂ŋ-ƃela dîa.

⁵M̀ɛni ma fɛ̂ɛ nɔ́ núu é woo-mɛ̂ni kɛ́. Vé nɔ́ a sɛŋ é gɛ́ a gɛ́ɛ Ɣâla fe ǹíi ŋwàna ma, kɛ́lɛ, fɛ̂ɛ é gɛ́ é kúla ŋɔkili-ŋa-siai su.

⁶Sâpo tɔnɔi ti ma káa máŋ ka ŋuŋ-fela-fei kɔlɛ, kpɛ́ni fêi, gɔmɛnɛ-ƃelai díkaa a Ɣâla ŋɔtíi-kɛ́-ƃela a gɛ́ɛ dí díi-ŋai ŋí kɛ́.

⁷Zɛŋ kélee gáa a dípɔɔi, ka dɛɛ dípɔ. Ka ŋuŋ-fela-fei tɛɛ ŋuŋ-fela-fei kula-ƃela pɔ, ka sɛŋ-kao tɛɛ ǹúui pɔ gáa a bɔ́ɔi. Ka ŋumɛ-maa tɛɛ diai pɔ ŋumɛ-maa a lî dípɔi, ka ƃaa kɛ́-maa tɛ́ɛ diai pɔ ƃaa kɛ́-maa a lî dípɔi.

⁸Núu kélee ŋɔkpa fè kɛ̀ kâa, kɛ́lɛ, ka wɛli-kɛ-maa pɛlɛ a kpa kákîe-ni dîa. Kpɛ́ni fêi, ǹúui à gɔlɛ-ma-nuui wɛ̀li a dɔ̂ŋ ŋ̀aa-see kɛ́.

⁹Dɔ̂ŋ-ŋai dîyɛɛi, “Ífe wulu-wulu kɛ̀, Ífe núu paa, Ífe ŋuma kɛ̀, Ífe sɛŋ maa-lii tee.” Dɔ̂ŋ-ŋai ŋí da gbeli-ŋai puɔɔ̂i gîe-ma ŋoo-ŋai ŋí su, “Íkɔlɛ-ma-nuui wɛ́li yɛ̂ɛ yá kpîŋ.”

¹⁰Wɛli-kɛ-maa fa mɛni nyɔ́mɔɔ kɛ̀ a gɔlɛ-ma-nuu; mɛni ma, wɛli-kɛ-maa káa a dɔ̂ŋ ŋ̀aa-see-kɛɛ.

¹¹Nyíŋi pôlu ma ka tãi kɔlɔŋ nâa. Tãi ká nâa a gɛ́ɛ ka káŋɛi lá ƃo kányii su. Kpɛ́ni fêi, kúƃalo-laai lɛɣɛ̂i a kúa é tɛ́ɛ la tãi ma ku làa la a maa-nuŋ;

¹²gbínii a gbâa tɛɛ, ŋele-ƃɔɔi a nâa lɛɣɛ. Mɛni ma kwaa ku gbini-tii píli ku ŋele-ƃɔɔi ŋɔtii-kɛ-sãai siɣe;

¹³kwaa ku sia a tenîŋ-ƃo yɛ̂ɛ núu à kɛ̀ siâi a ɣele-ƃɔ́ɔ, ƃoo-pele kɛ́ɛ fei, da lɔɔ ŋɔnúu kɛ́ɛ, wulu-wulu kɛ́ɛ, wolii-kpɔlɔ, laa-sâa, e pɛlɛ tólo ma.

¹⁴Kɛ́lɛ, ka Kúnuu-namui Zîsɛ Kôrai siɣe kálii su. Káfe kwaa ma lɛ̀ɛ kákponôi mɛni ma a gɛ́ɛ é ǹîa-mɛni kɛ́ naa.