Read Kpelle Lomaŋ 14 Bible Online

Lomaŋ 14 - Kpelle bible

Lomaŋ 14

¹À kɛ̀ a ǹúui nyíi víi kpɛɛ̂i ŋɔlaa-lai sui, ka káyee see mu, kɛ́lɛ, ka dîa-ni káfe sîa tòo mɛnii ma kálaâi-lai.

²Núu tɔnɔ a gíli ŋá sia a gɛ́ɛ a pɔ̂ri mii-sɛŋ-sii kélee miî, kɛ́lɛ, ǹúui nyíi vii kpɛɛ̂i ŋɔlaa-lai sui a tuma-laa mii nɔ́ da wuru-ƃa.

³Ǹúui a mii-sɛŋ-sii kélee mii ve ŋɛi naɣîŋ ǹúui mɛi va mii-sɛŋ-sii kélee miî, ǹúui ǹyaŋ va mii-sɛŋ-sii kélee mii ve ǹúui ŋɔmɛni ŋá tèe nyíi a mii-sɛŋ-sii kélee mii; kpɛ́ni fêi, Ɣâla a ǹyée see mu.

⁴Gbɛ̂ɛ ƃa yá a gɛ́ɛ í núu da kpɛni yée-mu-nuu ŋɔmɛni ŋá tée? Mɛi-nuui ŋɛi tuɛ ƃe a tɔ̂ɔ naa, kpaa máŋ é tóo. A pâi tɔɔ̂i, kpɛ́ni fêi, pɔ̂ri káa Mɛi-nuui mi é gɛ́ é tɔ́ɔ.

⁵Núu da-ni da díkili ŋá sîa a gɛ́ɛ ɣele kûu da lɛ́lɛɛ̂i é tɛ́ɛ da ma. Da-ni da díkili ŋá sîa a gɛ́ɛ ɣele kûu kélee lɛ́lɛɛ̂i a bɔriɛɛ. Tɔɔ núu kélee e gɔ́lɔŋ kpɔ́ a ǹɛ́lɛɛ díkpîŋ líi su.

⁶Ǹúui a ŋele-kuui dɔnɔ sìɣe a maa waai a gɛ̀ tí a gɛ́ɛ é ƃâa kɛ́ Kúnuu-namui ma. Ǹúui máŋ a mii-sɛŋ sii kélee mìi, a mìi a gɛ́ɛ e ƃâa kɛ́ Kúnuu-namui ma, kpɛ́ni fêi, a Ɣâla sɛɣɛi fe; ǹúui va mii-sɛŋ-sii kélee mìi, a gɛ̀ ti a gɛ́ɛ é ƃâa kɛ́ Kúnuu-namui ma e sɛɣɛi fei tɛɛ Ɣâla pɔ.

⁷Kútɔnɔ kpîŋ fa fulu-laa kɛ̀ gbîŋ mɛni ma. Kútɔnɔ kpîŋ fa tela sàa gbîŋ mɛni ma.

⁸À kɛ̀ kwà kúɣeniɛi kɛ̀, kwa gɛ̀ Kúnuu-namui yêei; à kɛ̀ kwà sàa, kwa sàa Kúnuu-namui yêei; mɛni ma à nɛ̀ɛ ma kpîŋ ku kɛ́ fulu-laa su kpaa máŋ ku sáa, kúkaa a Kúnuu-namui pɔɔ.

⁹Kpɛ́ni fêi, Kôrai e sàa e mu siɣe ŋɔ́nɔ saa yêei a gɛ́ɛ é kɛ́ a saa-ƃela da fulu-ƃela Dínuu-namu.

¹⁰Íkaa íƃarâŋ-nuu ŋɔmɛni ŋá teêi, lé mɛni ma? Kpaa máŋ, íkaa ŋɛi-naɣîŋ-mɛi kɛ̂i a íƃarâŋ-nuu, lé mɛni ma? Kpɛ́ni fêi, kúkelee kwa pâi tɔɔ̂i Ɣâla ŋɔmɛni-ŋa-tee see-sɛŋ ŋɛi tuɛ;

¹¹kpɛ́ni fêi, bɔ̃yɛɛ̂i, “Kúnuu-namui a mò ǹyɛɛ, yɛ̂ɛ berei ŋ́gaa la ɣele ma a tɔ̃yâi, núu kélee a pâi pɛlɛ̂i ŋ́gɔɔ mu, nɛ́ŋ kélee é Ɣâla láa maa tɛ́.”

¹²Mɛni ma kúkelee kwa pâi kúmaa-mɛni ƃôi Ɣâla ma kúa kpîŋ.

¹³Gɛ̀ ní, kúfe ŋɔ́nɔ kúkîe-ni dímɛni ŋá tèe. Kɛ́lɛ, maa nɛ̃ɛ̂i kú gbɛtɛ kúkili ŋá a gɛ́ɛ kúfe wɔ́lɔ kúƃarâŋ-nuu perêi kpàaŋ a su-kɔɔŋ, kpaa máŋ kú gbera.

¹⁴Ŋá gɔ́lɔŋ, ńaa la, Kúnuu-namui Zîsɛ sârai, a gɛ́ɛ sɛŋ da kélee fe naa maa fe waa ni gbîŋ kponôi; kɛ́lɛ, ǹúui à gàa a gɛ́ɛ maa fe waa ni, maa fe waa ni ŋ̀ɛi.

¹⁵À kɛ̀ íƃarâŋ-nuu a ǹíi ŋwàna mìi-sɛŋ mɛni ma ya mìi, gɛ̀ ní, ífe siâi wɛli-kɛ-maa su. Ífe ǹɛɛ naa ílaa mìi-sɛŋ é gɛ́ ǹúui su é kara nyíi Kôrai è sàa mɛni mai.

¹⁶Mɛni ma zɛŋ ǹɛ́lɛɛ̂i kámɛni mai, káfe ǹɛɛ naa núu da e nyɔŋ-mɛni ƃo.

¹⁷Kpɛ́ni fêi, Ɣâla ŋɔkâloŋ-laai su-kulai fa nɔ́ a mìi-sɛŋ da kpele-sɛŋ, kɛ́lɛ, zu-kulai ƃa tɔ̃yâ laa-la, lii-sêe, da lii-nɛ̃ɛ M̀ɔlêŋ Maa Waai su;

¹⁸ǹúui à tíi kɛ̀ Kôrai mi a bere-sii tii, a Ɣâla líi làa, nûa da díyee see mù.

¹⁹Mɛni ma kwaa ku mɛni-ŋai kɛ̂ nyíi-ŋai da pâ a lii-sêe da kpɔŋ-maa kúkîe-ni su kpanaŋ mɛni mai.

²⁰Ífe Ɣâla ŋɔtíi kàra mii-sɛŋ mɛni ma. Sɛŋ kélee maa waâi kpɔ́ a ǹɛ́lɛɛ, kɛ́lɛ, ve lɛlɛ ni a gɛ́ɛ mii-sɛŋ núu a mii é marâa kɛ́ dí tóo la;

²¹ǹɛ́lɛɛ̂i a gɛ́ɛ núu fe sua mii, kpaa máŋ ve ŋwã̂ai kpele, kpaa máŋ e mɛni da kélee kɛ́ nyíi a m̀arâŋ-nuu kɛ̀ é karêŋ, (kpaa máŋ ǹíi é ŋwána, kpaa máŋ víi é kpɛ́ɛ).

²²Naa-laai gáa íyeêi é kɛ́ káloai ka Ɣâla. Ǹúui nyíi mɛni lɛ́lɛɛ kɔlɔŋ kpɔ́ a ǹɛ́lɛɛi, ǹíi nɛɛ̂i.

²³Kɛ́lɛ, ǹúui nyíi laa-la fe ǹyêei à ǹáa mìi, maa-nuui a pâi kɛ̂i yɛ̂ɛ núu ƃe mɛni a lɛɛ ma, kpɛ́ni fêi, va ŋɔtûa-perei kula laa-la su; kpɛ́ni fêi, mɛnii kélee va kula laa-la sui, gáa a sɔnyɔ̂ŋ.