Read Kpelle Lomaŋ 16 Bible Online

Lomaŋ 16 - Kpelle bible

Lomaŋ 16

¹Ŋa kúsaaƃɔlɔ Fiibii lɛ̂i kâa, nyíi gáa a díkɛŋ Sɛŋkulia-Kôrai-toli-kpɔŋ sui,

²a gɛ́ɛ ka káyee see mù Kúnuu-namui kponôi yɛ̂ɛ berei Ɣâla-ƃela da gɛ̀ lai. Ka kpɔŋ-maa tɛɛ bɔ mɛni kélee su a ŋ̀wɛli káyêei. Kpɛ́ni fêi, a kpɔŋ-maa tɛɛ núu támaa pɔ, a kpɔŋ mâa tɛɛ ḿbɔ máŋ.

³Ka kála ti Purisela ma da Akoila, nyíi-ŋai díkaa a ḿarâa-tii kɛ-ƃela Kôrai kponôi,

⁴nyíi-ŋai dílɛ̂wo sèe a sɛɣɛ ŋáfulu-laai mɛni mai. Ńyãa tɔnɔ nɔ́ fa sɛɣɛi-fei tɛ̀ɛ dípɔ, kɛ́lɛ, Zɛ̃tai-ŋai Díkôrai-toli-kpɔŋ-ŋai kélee máŋ da sɛɣɛi-fei tɛ̀ɛ dípɔ.

⁵Ka kála ti máŋ Kôrai-toli-kpɔŋ ma nyíi gáa dípɛrɛi mui. Ka kála ti ŋáwɛli-kɛ-maa-nuui Epɛ̂netɔ ma, nyíi kɛ̀ a ǹúui maa-ŋuŋ e ǹíi pene Eesia Kôrai mɛni mai.

⁶Ka kála ti Mere ma, nyíi tíi kɛ̀ a gbanaŋɔɔ kásamâi.

⁷Ka kála tí Ɛŋdulonikɔ ma da Zûnia, nyíi-ŋai díkaa a ŋánûai. Dí kɛ̀ a ḿarâa pelesinɛ-ŋa. Díkaa a nûa kpaya-kpaya zia-ƃelai sama. Dí kɛ̀ a Kôrai-ƃela ńduɛ.

⁸Ka kála ti Ɛŋpiliâtɔ ma, nyíi gáa a ŋáwɛli-kɛ-maa-nuu Kúnuu-namui kponôi.

⁹Ka kála tí Ɔɔbânɔ ma, nyíi gáa a kúƃarâŋ-tii kɛ-nuu Kôrai kponôi da ŋáwɛli-kɛ-maa-nuui Siteezi.

¹⁰Ka kála tí Apɛ̂lɛ ma, nyíi a gbîŋ lɛ́ Kôrai mɛni mai. Ka kála tí diai dîa díkaa Alisitobulu ŋɔsuui sui.

¹¹Ka kála tí ŋánuui Ɛɛlôdiɔŋ ma. Ka kála tí Naasesɔ ŋɔsuui su-ƃelai dîa, nyíi-ŋai díkaa a Kúnuu-namui pɔɔi.

¹²Ka kála ti Tolaifinɛ ma da Tolaifosa, nyíi-ŋai díkaa a Kúnuu-namui ŋɔtii-kɛ-ƃelai. Ka kála tí kúwɛli-kɛ-maa-nuui Pɛɛsi ma, nyíi tíi kɛ̀ a gbanaŋɔɔ Kúnuu-namui mɛni mai.

¹³Ka kála ti Lûfɔ ma, nyíi gáa kpɔ́ a Kôrai-nuu lɛ́lɛɛi, da ǹee máŋ, nyíi ŋa gáa nɔ́ yɛ̂ɛ ńeei.

¹⁴Ka kála tí Aseŋkutɔ ma, Falegɔŋ, Ɣɛ̂mii, Patoloba, da Ɣɛ̂ma, é pɛ́lɛ kúƃarâai dîa, nyíi-ŋai díkaa díkɔlɛi.

¹⁵Ka kála ti Filologɔ ma, Zûliɔ, Nɛleyɔ da ŋɔsaaƃɔlɔ, da Oliŋpa, é pɛ́lɛ Ŋ̀âla-ƃelai kélee dîa da dîa-ni díkaa naai.

¹⁶Ka kála tí kákîe-ni dîa a la-kpɔ see-maa maa waa. Kôrai-toli-kpɔŋ-ŋai kélee dí fàa kâa.

¹⁷Ŋa kákpera fêi, ŋánûa, a gɛ́ɛ ka kámɛi káa a diai da pâ a ŋa-kɔlɛ-mɛni da mɛni-kpanaŋ nyɔ́mɔɔ-ŋa, nyíi-ŋai dítɔɔ̂i zɛŋ-lɛɛi ma ka zɔlɔ ƃôi; ka yao dîa.

¹⁸Kpɛ́ni fêi, núu kɛɛ-ŋai ti dífa tíi kɛ̀ Kúnuu-namui Kôrai mi, fɛ̂ɛ díkpîŋ nia-mɛni kɛ́ɛ, ǹyaŋ da moo-ƃelai pɛ̀lɛ a wóo lɛ́lɛɛ-ŋa da laa-maa-tɛ-woo-ŋa.

¹⁹Kpɛ́ni fêi, berei máŋ núu kélee dí gɔ́lɔŋ la a gɛ́ɛ woo-mɛni káa káyêei, ǹyaŋ ńii nɛ̃ɛ kámɛni mai, ŋa ŋ̀wɛ̂lii ka kɛ́ a kátareɛ mɛni lɛ́lɛɛ mɛni ma, káfè kɛ̀ a sɔnyɔ̂ŋ-mɛni kɔlɔŋɔɔ;

²⁰gɛ̀ ní, nii-see-Ɣalai a pâi Sêtɔŋ lɔ̂i kákɔɔ mu a maa félaa. Kúnuu-namui Zîsɛ Kôrai ŋɔƃɛlɛ-sêei é kɛ́ kâa.

²¹Marâŋ tii kɛ-nuui Temete è fàa kâa. Lusiyɔ máŋ è fàa kâa da Zesiŋ é pɛlɛ Sɔsipatɔ ma, nyíi-ŋai díkaa a ŋánûai.

²²Ńyãai ŋ́gaa a gɔlɔi ŋí pɔ̃yɛɛ-nuui Tɛ̂tiyɔ, ŋá fáa káa Kúnuu-namui kponôi.

²³Geeyɔ, nyíi ŋ́gaa ŋɔpɛ́rɛi mui, e fáa kâa. Kôrai-toli-kpɔŋ su-ƃelai kélee da koyaŋ ŋɔpɛ́rɛi mu máŋ. Elɛɛtɔ, nyíi gáa a daa-sɛŋ-kaoi láâi-kɛ-nuui, da kúƃarâŋ Kwáatɔ dí fàa kâa. [

²⁴Kúnuu-namui Zîsɛ Kôrai ŋɔƃɛlɛ-sêei é kɛ́ kákelee kâa. É kɛ́ ti.]

²⁵Laa-maa-tɛ é tɛ́ɛ Ɣâla pɔ nyíi pɔ̂ri è kɛ̀ mì a gɛ́ɛ e kasu kpanaŋ yɛ̂ɛ berei ŋátuŋ lɛ́lɛɛi a mò la da berei ŋa Zîsɛ Kôrai maa-mɛni ƃo lai. Ŋorɛ-wooi ká ti nyíi kɛ̀ noo-perei wɔ́lɔ a tãi su kôya,

²⁶kɛ́lɛ, a nâa kula fíeŋ ŋái. Ɣâla ŋɔlóno kɛ́-ƃelai díkɔlɔ pɔ̃yɛɛi a ǹɔii-ŋai kélee kɛ́ da ŋorɛ-wooi ŋí kɔlɔŋ. Ŋwɔlɔ-wɔlɔ-Ɣalai ƃe mò ŋɔlóno kɛ́-ƃelai dîa a gɛ́ɛ dí nyíŋi kɛ́ a gɛ́ɛ ǹɔii-ŋai dí ǹaa-laai maa-mɛ̂ni siɣe a tɔ̃yâ.

²⁷Laa-maa-tɛ̂ é tɛ́ɛ dáre Ɣala tɔnɔi pɔ́ wɔ́lɔ-wɔlɔ da wɔ́lɔ-wɔlɔ Zîsɛ Kôrai sârai! É kɛ́ tí.