Read Kpelle Lomaŋ 2 Bible Online

Lomaŋ 2 - Kpelle bible

Lomaŋ 2

¹M̀ɛni ma, yái íkaa a núu-kpunei, káfalo da kélee fé íyeêi núu da kpɛ́ni ŋɔmɛni ŋá tée mɛni ma, a nɛ̃ɛ ma kpîŋ íkɛ a gbɛ̂ɛ. Yà kɛ̀ núu da kpɛni ŋɔmɛnii ŋa teêi íkaa mɛni lɛɛ̂i íkpîŋ yâ, kpɛ́ni fêi, yái íkaa a mɛni ŋá-tee-nuui íkaa mɛni tɔnɔi tí kɛ̂i.

²Kú gɔ́lɔŋ a gɛ́ɛ Ɣâla ŋɔmɛni ŋá-teɛɛi káa a tɔ̃yâ diai mɛni ma da mɛni-ŋai tí kɛ̂i.

³Gáa íkili ŋá, yái a núu-kpunei, a gɛ́ɛ à kɛ̀ diai da m̀ɛni sîi-ŋai tí kɛ̀i yà dímɛnii ŋá tèe, ǹyaŋ íkɛ m̀aa mɛni-ŋai kɛ̀ ya kpîŋ, íŋuŋ ma a pâi kɛ̂i a m̀óɔɔ Ɣâla ŋɔmɛni ŋá-teɛɛi su?

⁴Kpaa máŋ ya íŋɛi naɣîŋ ŋɔsɔŋ lɛ̂lɛ-laa su-kɛ́tɛi mɛi, ŋɔmaloŋ-kaai da ŋɔlii-kpelei ma? Ífe gɔ́lɔŋ a gɛ́ɛ Ɣâla ŋɔsɔŋ lɛ̂lɛi su-kulai ƃa é íkɛ í ílii pene?

⁵Kɛ́lɛ, íwolii kpɔlɔ̂i, ífa ílii pene. M̀ɛni ƃé pâi gɛ̂i ímɛni kula-maai su é kɛ́tɛ a Ɣâla ŋɔtɔ̃yâ mɛni ŋá-tee ɣelei.

⁶A pâi kɛ̂i tí, kpɛ́ni fêi, a pâi núu kélee fela fêi yɛ̂ɛ berei ŋɔtíi káa lai.

⁷Diai da mɛni lɛ́lɛɛ kɛ̀ a lii-kpele díkɛ folo-laa kɔ̀ri, ƃaa kɛ́-maa, da wɔ́lɔ-wɔlɔ fulu-laai, Ɣâla a pâi wɔ́lɔ-wɔlɔ fulu-laa tɛɛ̂i dípɔ.

⁸Kɛ́lɛ, diai da tûa nɔ́ a díkpîŋ nia pere dífa dɔ̃yâi mɛni siɣe a tɔ̃yâ, kɛ́lɛ, díkɛ ŋ̀wana-lɔ̂ɔ mɛni siɣe a tɔ̃yâi, da pâi kɛ̂i Ɣâla a pâi díkula maa kɛ̂i.

⁹Ǹúui kélee a mɛni nyɔ́mɔɔ kɛ̀i, mɛni kpɔ̂lu a pâi kulâi m̀aa nuui ma é mɛni-soli káa, m̀aa-ŋuŋ ƃa Zûu-nuu da Gurii-nuu máŋ.

¹⁰Kɛ́lɛ, folo-laa, ƃaa kɛ́-maa, da lii-sêe káa ǹúui kélee mɛni ma da mɛni lɛ́lɛɛ kɛ̀i, m̀aa-ŋuŋ ƃa Zûu-nuu da Gurii-nuu máŋ,

¹¹kpɛ́ni fêi, Ɣâla káa núu sii kélee mɛni ma.

¹²Diai kélee dífe Ɣâla ŋɔtɔ̂ŋ kɔ́lɔŋ zɔnyɔ̂ŋ da gɛ̂i da pâi gula maa sɔlɔ ƃôi. Díai dɔ̂ŋ kɔ́lɔŋ da pâi díkula maa kɛ̂i dɔ̂ŋ lá-woo ma.

¹³Diai da dɔ̂ŋ mɛni kɛ́lɛ dífa sia a ŋ̀óoi dífe a tɔ̃yâ-ƃela Ɣâla ŋɛi, kɛ́lɛ, Ɣâla a pâi dɔ̂ŋ mɛi káa-ƃelai tólîi a tɔ̃yâ-ƃela.

¹⁴À kɛ̀ Zɛ̃tai-ŋai, nyíi-ŋai dɔ̂ŋ fe díyêei, da sîa dɔ̂ŋ lá-woo ma dínuu-kpune kɔlɔi su, gɛ̀ ní díkaa a tɔ̂ŋ dia kpîŋ mɛni ma, berei máŋ dɔ̂ŋ fé la díyêei.

¹⁵Da nɛ̀ a gɛ́ɛ mɛnii-ŋai dɔ̂ŋ a mòi bɔ̃yɛɛ̂i dílii su. Díkili a sêre-faa kɛ̀ máŋ. Díkili-ŋa-siai a pâi m̀ôi dîa a gɛ́ɛ mɛni da è lɛ̀ɛ dîa, kpaa mɛni da fé lɛ̀ɛ ní dîa

¹⁶a m̀aa ɣelei tí, tãi Ɣâla a núu-kpune ŋɔloo-mɛni ŋá tee la Zîsɛ Kôrai sârai, yɛ̂ɛ berei ŋa Duŋ Lɛ́lɛɛi ƃò lai.

¹⁷Káta ni kákpîŋ tòli a Zûu-nuu-ŋa. Ka lâai a dɔ̂ŋ ma, kákɛ yoŋka tee a gɛ́ɛ ka Ɣâla ni kákaa kákîe ma.

¹⁸Ŋ̀âla-kɔlɔi lónoɔɔ kâa a pâi gɛ̂i ká berei kɔ́lɔŋ Ɣâla a wɛ̂lii a ka tûa la ká tela dɔ̃yâi kɔ́lɔŋ.

¹⁹Ílaâi kpɔ́ la yá ƃa ŋ̀ɛi-puu-ƃelai tuɛ-nuu, í ƃo a kwaa-ponoɔɔ diai kélee mɛni ma kpinîi.

²⁰Tãi nɔ́ táre da tɔ̃yâ káa Ɣâla ŋɔtɔ̂ŋ sui, ílaâi la yâ pɔri sɛŋ lɛ̂i ƃoo-ƃela da núu-tɔɔ-ŋa dîa.

²¹Yâ pɔri sɛŋ lɛ̂i léŋ nûa dîa à kɛ̀ yá kpîŋ ífe wɛ̂lii í sɛŋ maa kɔ́ri? Ya Ɣâla-woo ƃôi nûa a gɛ́ɛ ŋúma fé lɛ́lɛ ní, kɛ́lɛ ya ŋúma kɛ̀?

²²Yái ya mò nûa dîa a gɛ́ɛ wulu-wulu kɛ́ɛ fé lɛ́lɛ níi, ya wulu-wulu kɛ̀? Yái ya ɣâla-pɔɔkɔŋ kpɔ̀arai, ya ɣâla-pɔɔkɔŋ ŋuma ŋâla-pɔɔkɔ̂ŋ kɛ́-pɛrɛ-ŋai mu?

²³Yái ya yoŋka tèe dɔ̂ŋ sui, ya ƃâa kûla Ɣâla ma a dɔ̂ŋ káraa?

²⁴Bɔ̃yɛɛ̂i Ŋ̀âla-kɔlɔi su, “Ka gɛ́ Ɣâla láa a kara Zɛ̃tai-ŋai sáma.”

²⁵Núu kpɛtɛ mɛ̂ni káa a mɛni lɛ́lɛɛ à kɛ̀ yà dɔ̂ŋ mɛi kàa. Kɛ́lɛ, à kɛ̀ yà dɔ̂ŋ kàra, gɛ̀ ní íkaa yɛ̂ɛ ǹúui dífe gbɛtɛ ní.

²⁶M̀ɛni ma, à kɛ̀ ǹúui dífe gbɛtɛ níi, à dɔ̂ŋ ŋɔtɔ̃yâi mɛi kâa, gɛ̀ ní vé yɛ̂ɛ ǹúui dí gbɛ̀tɛi?

²⁷M̀ɛni ma, diai dífe kpɛtɛ ní kɛ́lɛ, díkɛ dɔ̂ŋ mɛi kaai, da pâi kámɛnii ŋá-têei, káai dɔ̂ŋ kɔ́lɔŋ da núu kpɛtɛ mɛni, kɛ́lɛ, káfa m̀ɛi kâai.

²⁸Gbɛ̂ɛ kpîŋ ƃa Zûu-nuu, ǹúui gbɛ́tɛɛ a tɔ̃yâi? Núu fa kɛ̀ a Zûu-nuu gbonoi pere nɔ́, nyíi ŋɔkpɛtɛ mɛnii káa a ɣéne ŋá mɛnii.

²⁹Kɛ́lɛ Zûu-nuu kpîŋ ƃa ǹúui a dɔ̂ŋ mɛi kâai. Nûu kpɛtɛɛ a tɔ̃yâ káa kpɔ́ a núu líi su-pere mɛni vé a mɛnii a kɛ̀ núu kpono mai. Ɣâla ŋɔmɔ̂leŋ ƃa gɛ nyíŋ é kɛ́. M̀ɛni ma, ka laa-maa-tɛ kɔ́ri Ɣâla yêei kɛ́lɛ núu-kpune fêi.