Read Kpelle Lomaŋ 4 Bible Online

Lomaŋ 4 - Kpelle bible

Lomaŋ 4

¹Kwa pâi ŋaŋ kɛ̂i lé é pîlaŋ Eberaɣɛ̃ɛ ma nyíi gáa a kúnâŋ pɔlɔ yɛ̂ɛ berei núu-kpune maa sɔlɔ ƃo-pere káa lai?

²Dîi Eberaɣɛ̃ɛ kɛ̀ a tɔ̃yâ-nuu ŋɔtíi sârai, gɛ̀ ní mɛni da eêi pɔ̂ri kɛ̂i naa é yoŋka tée la, kɛ́lɛ, Ɣâla ŋɛ́i fêi.

³Lé ƃé Ŋ̀âla-kɔlɔi a mò? “Eberaɣɛ̃ɛ è làa a Ɣâla, ǹyaŋ Ɣâla e ŋɔlaa-lai siɣe a tɔ̃yâ laa-la.”

⁴Ǹúui a tíi kɛ̀i, va ŋɔfela-fei siɣe a sama-sɛŋ, kɛ́lɛ, a ziɣe a ŋɔtíi vela-fei.

⁵Kɛ́lɛ fa ǹyée sèe núu da mu m̀aa nuui kɛ́ tii mɛni ma. Kɛ́lɛ a ǹyée sèe núu mu ǹaa-lai m̀aa nuui yêei m̀ɛni ma.

⁶Ǹyaŋ bere nɔ́ ƃe gáa la máŋ yɛ̂ɛ berei Deeƃé è mò la Ŋ̀âla-kɔlɔi sui a gɛ́ɛ lûwa káa ǹúui ma nyíi Ɣâla a ziɣe a tɔ̃yâ-nuu é kúla ǹúui ŋɔtíi kɛ́ɛ pôlui:

⁷“Lûwa káa diai dîa Ɣâla a dísu-mɛni lɛ̀ɛ dísɔnyɔ̂ŋ-ŋai mɛni ma é nia maa sɔnyɔ̂ŋ-ŋai kpîŋ mɛni mai!

⁸Lûwa káa ǹúui ma Kúnuu-namui fa ŋɔsɔnyɔ̂ŋ siɣe a zɔŋ.”

⁹Ǹûwai ŋí káa nɔ́ diai mɛni ma díkpɛtɛɛ̂i, kpaa gáa máŋ diai mɛni ma dífe kpɛtɛ níi? Kwa mò a gɛ́ɛ Ɣâla e Eberaɣɛ̃ɛ ŋɔlaa-lai siɣe a tɔ̃yâ laa-la.

¹⁰Ɣâla è ziɣe pere kɛ̀ léŋ a tɔ̃yâ laa-la? E zìɣe dí lɛ́ɛ pâi Eberaɣɛ̃ɛ kpɛtɛ̂i, kpaa dí gbɛ̀tɛ é lɛ́ɛ ziɣêi? Dífe gbɛtɛ ni é lɛ́ɛ ziɣêi, kɛ́lɛ, Ɣâla e ziɣe dí lɛ́ɛ gbɛtɛ̂i.

¹¹È kpɛtɛ laa ŋɛi-kɛ-maa sɔlɔ ƃô yɛ̂ɛ sere-faa a gɛ́ɛ é dɔ̃yâ-laai lɛ́, nyíi kɛ̀ ǹyêei laa-la sârai, gɛ́ɛ dífe niî gbɛtɛ níi. M̀aa sapoi ƃé kɛ̀ a gɛ́ɛ Eberaɣɛ̃ɛ é kɛ́ a diai laa-la káa díyêei dífe kpɛtɛ níi dínâŋ, nyíi-ŋai Ɣâla è dísiɣe a tɔ̃yâ-ƃelai.

¹²Maa-sapoi ƃé kɛ̀ ŋɔ́nɔ a gɛ́ɛ è kɛ̀ a diai díkpɛtɛɛ̂i máŋ dínâŋ, nyíi-ŋai dífe kpɛtɛ ni nɔ́, kɛ́lɛ, laa-la kɛ́ ƃo díyêei yɛ̂ɛ kúnâŋ Eberaɣɛ̃ɛ nyíi laa-la è kɛ̀ ǹyêei dí lɛ́ɛ gbɛtɛ̂i.

¹³Ɣâla ŋɔkono-teei è gɛ̀ Eberaɣɛ̃ɛ yêei da ŋɔsuui su-ƃelai a gɛ́ɛ ǹɔii a pâi kɛ̂i a dípɔɔi, vé pa ní dɔ̂ŋ sârai, kɛ́lɛ, è pà tɔ̃yâ laa-lai sârai.

¹⁴À kɛ̀ dɔ̂ŋ yée-mu-ƃelai ƃé ǹɔii a pâi kɛ̂i a dípɔɔi, gɛ̀ ní laa-la ŋɔtíi fé ma, Ɣâla ŋɔkono-teei kɛ́ ƃo nɔ́ a vólo.

¹⁵Dɔ̂ŋ a pâ a lii-ŋwana, kɛ́lɛ, ƃɛ́i tɔ̂ŋ fé naai tɔ̂ŋ kara mɛni fé naa.

¹⁶M̀ɛni ƃé m̀ɛnii kélee sɛ̂lɛŋɔɔi la laa-la ma a gɛ́ɛ Ɣâla ŋɔkono-teei é kɛ́ a ƃɛlɛ-sêe mɛni kpanaŋɔɔ Eberaɣɛ̃ɛ ŋɔsuui su-ƃelai kélee mɛni ma. Díai dɔ̂ŋ mui dia nɔ́ fêi, kɛ́lɛ, diai Eberaɣɛ̃ɛ ŋɔlaa-lai káa díyêei máŋ, kpɛ́ni fêi, ǹyaa ƃé gáa a kúkelee kúnâŋ,

¹⁷yɛ̂ɛ berei Ŋ̀âla-kɔlɔi a m̀o lai, “Ŋa íkɛ a lɔii támaa su-ƃela dínâŋ.” Eberaɣɛ̃ɛ è kɛ̀ a lɔii támaa su-ƃela dínâŋ Ɣâla ŋɛ́i, nyíi è làa lai, da nyíi a fúlu-laa tɛ̀ɛ saa-ƃela pɔ́, gɛ́ sɛŋ kélee kpɛtɛ nyíi-ŋai dífe kpɛtɛ níi.

¹⁸Ɣâla kɛ́ɛ a gono tée Eberaɣɛ̃ɛ yêei a gɛ́ɛ a pâi kɛ̂i a lɔii-ŋuŋ támaa su-ƃela dínâŋ, Eberaɣɛ̃ɛ è làa la berei máŋ naa kpanaŋɔɔ̂i la núu é láa a gono-tee sii ŋí, yɛ̂ɛ berei Ɣâla è mò la ma ǹyɛɛi, “Ísuui su-ƃelai da pâi támâi yɛ̂ɛ bɛmɛlɛŋ-kao-ŋa díkaa ŋ̀elei sui.”

¹⁹Ŋɔpɔlɔ-pɔlɔ-laai è gbâa kɛ̀ a kóraŋ ŋ̀uŋ tɔnɔ. Kɛ́lɛ ŋɔlaa-lai su è kɛ̀ nɔ́ niî a gbanaŋɔɔ berei máŋ gbonoi fíi è kɛ̀ a gbɛɛ lai. A gɛ́ɛ ŋɔnɛnîi Seera nyíi kɛ̀ a gbomaai a pɔri kɛ̀ nîa-pɛlɛɛ maa sɔlɔ ƃôi maa kili-kɛ-zu è kɛ̀ ǹyêei berei máŋ Seera ǹyaa máŋ è kɛ̀ a bɔlɔɔ lai.

²⁰Ŋɔlaa-lai su fé wɔ́lɔ saa ní Ɣâla ŋɔkono-teei mɛni ma. Kɛ́lɛ, ŋɔlaa-lai è ƃɔ̀lɔ zu é kpanaŋ, gɛ́ Ɣâla láa maa tɛ.

²¹È kɛ̀ a gɔ́lɔŋɔɔ kpɔ́ a ǹɛ́lɛɛ a gɛ́ɛ m̀ɛnii Ɣâla è góno tèe lai, pɔ̂ri káa mì é gɛ́.

²²M̀ɛni ƃé Ɣâla “è ŋɔlaa-lai siɣe la a tɔ̃yâ laa-la.”

²³Kɛ́lɛ, ŋ̀óoi, “e ŋɔlaa-lai siɣe,” fé kɛ́ ní nɔ́ a bɔ̃yɛɛ ǹyaa tɔnɔ mɛni ma,

²⁴kɛ́lɛ, è kɛ̀ a bɔ̃yɛɛ kúmɛni ma máŋ. Ɣâla a pâi kúlaa-lai siɣêi a tɔ̃yâ laa-la, kúai kwa làa a ǹúui Kúnuu-namui Zîsɛ Kôrai mu siɣe saa yêei,

²⁵nyíi dí bàa kútɔ̂ŋ karaai mɛni ma é m̀u siɣe saa yêei a gɛ́ɛ é kúkɛ a tɔ̃yâ-ƃelai.