Read Kpelle Lomaŋ 9 Bible Online

Lomaŋ 9 - Kpelle bible

Lomaŋ 9

¹Ŋ́gaa dɔ̃yâi ƃôi yɛ̂ɛ Kôrai-nuu, fe lɛ́ɛ kɛ̂i; ŋákili-ŋa-siai a m̀aa sêre-faa kɛ̀ a M̀ɔlêŋ Maa Waai ŋɔwála-walai,

²a gɛ́ɛ malôŋ támaa toɔɔ̂i mâ, lii-soli kɛ́ ƃo ńii su nyíi ve pâi wɔ́lɔ kperâi.

³Kpɛ́ni fêi, eêi pɔ̂ri kɛ̂i a sɛŋ a gɛ́ɛ ńyãa kpîŋ dí tɔ̂ŋ pu mâ dí ŋ́gula Kôrai ma ŋánûai díƃalo-laai mɛni ma, nyíi-ŋai díkaa a ŋásii.

⁴Díkaa a Eezuɛ-ŋa, dia ƃe Ɣâla ŋɔlóŋ-laai káa a dípɔɔ, da ŋɔfólo-laai, ŋɔkpanaŋ-woo-ŋai, dɔ̂ŋ tɛ̂ɛi, da Ɣâla-fɛli-pere, da gono-tee woo-ŋai;

⁵dia ƃe nàŋ-ƃela pɔlɔ-ŋai díkaa a dínâŋ-ni, ǹyaŋ Kôrai é kúla dísîi su yɛ̂ɛ berei díkaa-pere káa lai. Gáa a Ɣâla nyíi gáa sɛŋ kélee mɛi. Lûwa é kɛ́ mà wɔlɔ-wɔlɔ da wɔlɔ-wɔlɔ. É kɛ́ ti.

⁶Kɛ́lɛ, Ɣâla ŋɔwooi fe niî fɛɣɛ ni. Kpɛ́ni fêi, ve nɔ́ a sɛŋ a gɛ́ɛ diai kélee da kúla Eezuɛ-suui sui, díkaa a Eezuɛ-ŋa kpîŋ.

⁷Núu kélee fe nɔ́ a Eberaɣɛ̃ɛ ǹônii, berei máŋ díkaa la a ŋɔsuui su-ƃelai; kɛ́lɛ, bɔ̃yɛɛ̂i, “Da pâi kásuui láa seêi Aise sârai.”

⁸Nyíŋi su-kulai fa a gɛ́ɛ à kɛ̀ da núu maa sɔlɔ ƃo a núu-kpune maa sɔlɔ ƃo-pere, gáa a Ɣâla ǹóŋ, kɛ́lɛ, fɛ̂ɛ da núu maa sɔlɔ ƃo gono-tee-wooi mu, gɛ̀ ní gáa a Eberaɣɛ̃ɛ ŋɔsuui su-nuu kpîŋ.

⁹Kpɛ́ni fêi, mɛnii gono-tee-wooi e mòi nya ká ŋí, “Góraŋ ti ŋɔtãi kɛ́ɛ ŋí ŋa pâi pâi pôlu, gɛ̀ ní lóŋ-surɔŋ a pâi kɛ̂i Seera yêei.”

¹⁰Ǹyaŋ gélee fe ti. Kpɛ́ni fêi, Lubɛkɛ máŋ è kɛ̀ naa tãi è kɛ̀ pâi ŋɔnîa-pɛlɛɛi maa sɔlɔ ƃôi la nyíi-ŋai da Aise dí dímaa sɔlɔ ƃo, nyíi kɛ̀ a kúnâŋ pɔlɔi.

¹¹Berei máŋ dífe niî kɛ̀ nîa-pɛlɛɛi maa sɔlɔ ƃo ni lai, ǹyaŋ nîa-pɛlɛɛi kpîŋ dífe niî kɛ̀ mɛni lɛ́lɛɛ kpaa máŋ mɛni nyɔ́mɔɔ kɛ́ níi, Kúnuu-namui e mo Lubɛkɛ ma, “Nìa-nuui a pâi tíi kɛ̂i ǹeɣe-nuui mi.” Ɣâla a pâi kɛ̂i nɔ́ niî núu lɛ̂i yɛ̂ɛ berei a ŋ̀wɛ̂lii lai. Ve pâi dílɛ̂i díkɛ-mɛni ma, kɛ́lɛ, a pâi dílɛ̂i nɔ́, kpɛ́ni fêi, a dítoli.

¹³Yɛ̂ɛ berei bɔ̃yɛɛ̂i lai, “Ŋa Zeeka wɛ́li ni, kɛ́lɛ, ŋa Isɔɔ kpɔara.”

¹⁴Le ƃe ŋaŋ kwa pâi m̀ôi? Ɣâla fa tɔ̃yâ kɛ̀? Ve ti a dɔnɔ kpîŋ!

¹⁵Kpɛ́ni fêi, a m̀ôi Mose ma, ǹyɛɛi, “Ŋa pâi diai ma-lôŋ kâai ŋa dímalôŋ kàai. Ŋa pâi diai malôŋ seêi ŋa dímalôŋ sèei.”

¹⁶Mɛni ma ve a núu-kpune nia-mɛni da ŋɔtíi a gɛ́ɛ Ɣâla é ǹɛ́ mɛni ma, kɛ́lɛ, gáa a Ɣâla ŋɔmaloŋ-kaai.

¹⁷Kpɛ́ni fêi, Ŋ̀âla-kɔlɔi a mò Feelo ma, ǹyɛɛ, “Ŋa ísiɣe zu sapoi ŋí kpîŋ ma a gɛ́ɛ ŋáwala-walai é lɛ́ íkponôi, a gɛ́ɛ ǹáa e taa-taa ǹɔii gwaa kélee.”

¹⁸Mɛni ma a diai malôŋ kàa a ŋ̀wɛli e dímalôŋ káai, gɛ diai líi kpanaŋ a ŋ̀wɛli é dílii kpanaŋ.

¹⁹Gɛ̀ ní ya pâi m̀ôi mâ, nyɛɛi, “Le-mɛni ƃe ŋaŋ gáa niî núu sɔŋ kɔ́rîi lai? Gbɛ̂ɛ ƃa pɔ̂ri gberâi mɛnii ma a ŋ̀wɛli e gɛ́i?”

²⁰Kɛ́lɛ, gbɛ̂ɛ ƃa yá, yai íkaa a núu-kpunei, a gɛ́ɛ í Ɣâla wóo su too pôlu? Sɛŋ da gbɛ̀tɛi a kɛ̂ gbɛtɛ-nuu ma, “Ya ŋ́gbɛtɛ ŋí lé mɛni ma?”

²¹Wala-wala káa leɣi-tɔɔ-nuu yêei ŋɔleɣi-pɔrɔi mɛi, a gɛ́ɛ e da tɔɔ a ǹɛ́lɛɛ e da tɔɔ gɔ kpaaŋ tee mɛni ma a neɣi-pɔrɔ tɔnɔi ti, Kɛrɛ̂e?

²²A kɛ̀ ti ŋaŋ gɛ̀ ní le? À kɛ̀ Ɣâla è kɛ̀ ŋ̀wɛ̂lii a gɛ́ɛ e ŋɔlii-ŋwana kɛ́tɛi lɛ da ŋɔwála-walai, gɛ̀ ní e ǹía kpèle kpɔ́ a dámaa diai yêei gɛ̀ a gɛ́ɛ ǹíi e ŋwanai, nyíi-ŋai kɛ̀ nɔ́ su-kara mɛni mai.

²³E gɛ̀ a gɛ́ɛ e nɛ berei ŋɔfólo-laai kɛ́tɛ̂i la diai mɛni ma e dímalôŋ kàai. E díkpɛtɛ naa-tuɛ folo-laa mɛni ma.

²⁴Nyíti su-kulâi ƃa kúa máŋ a kútoli. Kúfe kula ni nɔ́ Zûu-ŋai sama, kɛ́lɛ, kúta-ni dí kula Zɛ̃tai-ŋai sama.

²⁵Mɛni ma e mò Osia ŋɔkɔlɔi su kpɔ́ a tɔ̃yâ, ǹyɛɛi, “Diai dífe kɛ́ ni a ŋánûai, ŋa pâi dítolîi a ‘ŋánûa.’ Ǹúui ve kɛ́ ni a ŋáwɛli-kɛ-maa-nuu a maa-ŋuŋ, ŋa pâi dólîi a ‘ŋáwɛli-kɛ-maa-nuu.’ ”

²⁶“Ǹyaŋ gwaa tɔnɔi ti ma ƃɛi dí mò naa dîa, dîyɛɛi, ‘Káfe a ŋánûai,’ da pâi dítolîi naa a ‘vulu-laa-Ɣalai ǹônii.’ ”

²⁷Azaya e laɣi a ŋ̀óo su kɛ́tɛ e pîlaŋ Eezuɛ-ŋai dîa, ǹyɛɛi, “Berei máŋ Eezuɛ lonii támaâi la yɛ̂ɛ yúo ŋɔnɛ̃yai díkpulu-loŋ nɔ́ ƃe pâi ƃálôi;

²⁸kpɛ́ni fêi, Kúnuu-namui a pâi ŋɔmɛni-ŋa-teɛɛi tɛɛ̂i ǹɔii su a ŋɔwála-walai a maa félaa.”

²⁹Yɛ̂ɛ berei Azaya e mò la naa-tuɛ ǹyɛɛi, “Eêi kɛ̀ nuu-kélee-Namui fe nîa-pɛlɛɛ lɛɛ ni kúyêei, gɛ̀ ní, mɛnii kɛ̀ a Sodɔŋ, eêi kɛ̀ a kúa, ku ŋɔnɔ kɛ́ yɛ̂ɛ Gomora.”

³⁰Gɛ̀ ní lé ŋaŋ ƃe kwa pâi m̀ôi? Kwa pâi m̀ôi a gɛ́ɛ Zɛ̃tai-ŋai nyíi-ŋai dífe pîlaŋ ni dɔ̃yâ-laai pôlui, da zɔlɔ ƃó. Zu-kulâi ƃa tɔ̃yâ laa-la nyíi a kûla la laa-la sui;

³¹kɛ́lɛ, Eezuɛ-ŋai nyíi-ŋai pîlaŋ dɔ̃yâ-laai pôlu nyíi a kûla dɔ̂ŋ sui, dífe pɔ̂ri ni maa-tɔŋ ti ŋ̀aa-see kɛ̂i.

³²Le-mɛni ma? Kpɛ́ni fêi, dífe pîlaŋ ni bôlu laa-la sârai, kɛ́lɛ, è kɛ̀ nɔ́ yɛ̂ɛ à kûla tíi kɛ́ɛ su. Dí díkɔɔ tùa gɔɔ-tua-kɔnii ma,

³³yɛ̂ɛ berei bɔ̃yɛɛ̂i lai, “Ka gáa, ŋa kɔni lâai Zãiyɔŋ su nyíi pâi núu-kpune kɛ̂i é gɔ́ɔ tuai, gɔnii nyíi pâi díkɛ̂i dí tóoi; ǹyaŋ ǹúui a lâa lai ve pâi ŋumɛ̂i.”