Read Kpelle Kɔleŋtiɛŋ Maa-ŋuŋ 10 Bible Online

Kɔleŋtiɛŋ Maa-ŋuŋ 10 - Kpelle bible

Kɔleŋtiɛŋ Maa-ŋuŋ 10

¹Ŋánûa, ŋa ŋ̀wɛ̂lii ka gɔ́lɔŋ a gɛ́ɛ kúnâŋ-ni kélee dí kɛ̀ ŋele-kɔlɔŋ kolei mu, díkelee dí tɛ́ɛ nyúo-loŋ loai.

²Díkelee da Mose-ni dí kɛ̀ zu tɔnɔɔ batâi yée mu, ŋele-kɔlɔŋ-kolei su da nyúo-loŋ.

³Díkelee dí Ŋ̀âla-mii-sɛŋ tɔnɔi mìi.

⁴Díkelee dí Ŋ̀âla-ya tɔnɔi kpèle. Kpɛ́ni fêi, dí díkpele e kúla Ŋ̀âla-kɔnii su, nyíi pìlaŋ dípôlui. Maa-kɔnii ƃé kɛ̀ a Kôrai.

⁵Kɛ́lɛ, Ɣâla líi fe kɛ́ ni a ǹáa dama-ɣele yêei; mɛni ƃe dí sàa la vɛ̃ɛ-kpâlaŋ su.

⁶Mɛni-ŋai ŋí káa nâa a kúmɛni-kɔɔŋ-maa a gɛ́ɛ káfe sɛŋ nyɔ́mɔɔ-ŋa wɛli kɛ̀ yɛ̂ɛ berei dí gɛ̀ lai.

⁷Káfè kɛ̀ a ɣâla-pɔɔkɔŋ fɛli-ƃela yɛ̂ɛ berei da-ni dí gɛ lai; yɛ̂ɛ berei bɔ̃yɛɛ̂i lai, “Ǹûai dí sèe dí dílaa mii dí díkpele dí dímu siɣe a gɛ́ɛ dí pêle kɛ́.”

⁸Kúfe wulu-wulu kɛ̀ yɛ̂ɛ berei ǹúui da-ni dí gɛ̀ lai. Maa-ɣele tɔnɔi ti nuu wála buu feerɛ kao saaƃa ƃe sàa ma.

⁹Kúfe Kúnuu-namui su kɔɔŋ yɛ̂ɛ berei ǹúui da-ni dí gɛ̀ lai. Kali ƃe dípàa.

¹⁰Káfe káŋuŋ su-woo sàa yɛ̂ɛ berei ǹúui da-ni dí gɛ̀ lai. Núu su-kara-nuui e dísu kara.

¹¹Ǹyaŋ mɛni-ŋai ŋí dí kɛ̀ a dia a gɛ́ɛ é kɛ́ a mɛni kɔɔŋ-maa. Kɛ́lɛ, dí dípɔ̃yɛ̂ kútare tɔɔ mɛni ma, kúai ŋ̀éniɛi gbɛɛ-ŋai a pâi kúpɔi.

¹²Mɛni ma ǹúui gáa gíli ŋá a gɛ́ɛ a pɔ̂ri tɔɔ̂i e mɛi káa va lâ too la.

¹³Yee-laa-maa da fe niî pá ní kápɔ nyíi ve niî pá ní núu pɔi. Ɣâla sã́âi, nyíi ve pâi nɛɛ̂i naa yee-laa-maa e pa kápɔ nyíi dɛɛi káwala-walai mai, kɛ́lɛ, tãi yee-laa-maa à pà lai, Ɣâla máŋ a pâi kúkula-perei tɛɛ̂i a gɛ́ɛ pɔ̂ri e kɛ́ káa ka tɔɔ zu.

¹⁴Mɛni ma, ŋáwɛli-kɛ-maa-ƃelai, ka kasu kula ɣâla-pɔɔkɔŋ fɛliɛ ma.

¹⁵Ŋa lônoi táre-ƃela pɔ; mɛnii ŋa m̀ôi, ka ŋá tée káa kpîŋ.

¹⁶Ǹûa-kpele-kɔɛi kwa lûwa làa mai, ve a kɛ-zu-tɔnɔɔ Kôrai ŋãai su? Gbóloi kwa ŋalei, ve a kɛ-zu-tɔnɔɔ Kôrai kpono su?

¹⁷Gbóloi káa tɔnɔɔ berei máŋ Kútamaâi lai, kúkelee kúkaa a kpono tɔnɔ, kpɛ́ni fêi, ku gbólo tɔnɔi ti mii.

¹⁸Ka kákili ŋá sía Eezuɛ tua-pere ma; diai da zâla-sãai mii, dífe zu tɔnɔɔ Díɣâla-mɛni kɛ́ɛ su?

¹⁹Ŋa pɔ̂ri ŋaŋ kɛ̂i le? A gɛɛ mii-sɛŋ da dɛɛ ɣâla-pɔɔkɔŋ-ŋa pɔi mɛni kpanaŋɔɔ̂i? Kpaa máŋ ɣâla-pɔɔkɔŋ mɛni kpanaŋɔɔ̂i?

²⁰Kpao, ŋa m̀ôi a gɛ́ɛ zãâi ɣâla-kpolowa-ŋa da gùla a sâlai, da gùla a sâla nyinaŋ nyɔ́mɔɔ-ŋai dîa, kɛ́lɛ Ɣâla fei. Fe ŋ̀wɛ̂lii a gɛ́ɛ ka nyinaŋ nyɔ́mɔɔ-ŋa ká kɛ́ zu tɔnɔɔ.

²¹Káfa pɔ̂ri kákpelêi Kúnuu-namui ŋɔkpele-kɔɛi su, kákɛ kákpele ŋɔnɔ nyinaŋ nyɔ́mɔɔ-ŋai díkpele-kɔɛi su. Káfa pɔ̂ri Kúnuu-namui ŋɔteƃelei ma-mii-sɛŋ da mii, ká ŋɔnɔ nyinaŋ nyɔ́mɔɔ-ŋai díteƃelei ma-mii-sɛŋ da mii.

²²Kwa kɔ́i a gɛ́ɛ ku Kúnuu-namui kɛ́ e tólo? Kúkpanaŋɔɔ̂i e tɛ́ɛ mà?

²³“Mɛni kélee káa tɔ̂ŋ lá-woo ma,” kɛ́lɛ, mɛni kélee fa kpɔŋ-maa tɛ̀ɛ núu pɔ. “Mɛni kélee káa tɔ̂ŋ lá-woo ma,” kɛ́lɛ, mɛni kélee fa kúƃɔlɔ kúmɔ̂leŋ su.

²⁴Tɔɔ núu da kélee fe mɛni lɛ́lɛɛ kɔ̀ri gbîŋ mɛni ma, kɛ́lɛ, é mɛni lɛ́lɛɛ kɔ̀ri ŋɔkɔlɛ-ma-nuui mɛni ma.

²⁵Sua-sii kélee ka pɔ̂ri ǹyâi nɔ́ɔ-kpalaŋ ŋái, ka ǹyá ka mii kákili-ŋa-siai fe gɛ ka mare-kɛɛ kɛ́.

²⁶Kpɛ́ni fêi! “Ǹɔii káa a Kúnuu-namui pɔ́ɔ da zu-sãa kélee.”

²⁷A kɛ̀ diai laa-la fe díyêei da ƃɛlɛ-toli ƃò a káa a gɛ́ɛ ka dîa-ni ká kálaa mii, ǹyaŋ ka ŋ̀wɛ̂lii ka li, sɛŋ kélee da zee káŋɛi ka mii kákili-ŋa-siai fe kakɛ ká mare-kɛɛ kɛ́.

²⁸Kɛ́lɛ, à kɛ̀ núu da à mò kâa, “Da zuai ti kùla a sâla,” gɛ̀ ní ka kákili ŋá sía e pîlaŋ m̀aa-nuui ti ma nyíi mò kâai, da ŋɔkili-ŋa-siai,

²⁹kákili-ŋa-siai fei-káfe m̀aa-suai ti mii. Kpɛ́ni fêi, lé mɛni ƃe núu da kpɛni ŋɔkili-ŋa-siai a pâi ŋ́gberâi la nia-mɛni-kɛɛ mai?

³⁰À kɛ̀ ŋà sɛɣɛ-fei tɛ̀ɛ Ɣâla pɔ mii-sɛŋ ŋa mii mɛni ma, le ƃe ka ǹáa karâi la mii-sɛŋ mɛni ma nyíi ŋa maa-sɛɣɛi-fei tɛɛ bɔi?

³¹Mɛni ma, kà mii-sɛŋ mìi, kpaa máŋ kà kákpèle, kpaa máŋ mɛni kélee ka gɛ̀i, ka gélee kɛ́ Ɣâla ŋɔfólo-laai mɛni ma.

³²Káfe Zûu-ŋai líi soli, kpaa máŋ Gurii-ŋai, kpaa máŋ Ɣâla-toli-kpɔŋ,

³³yɛ̂ɛ berei ŋa kɔ̂i la a gɛ́ɛ ŋa núu kélee líi láa ŋ́gɛ-mɛni kélee sui, fa mɛni lɛ́lɛɛ kɔ̀ri ŋ́gbîŋ mɛni ma, kɛ́lɛ, ŋa mɛni lɛ́lɛɛ kɔ̀ri núu támaa mɛni ma a gɛ́ɛ núu támaa dí ƃálo.