Read Kpelle Kɔleŋtiɛŋ Maa-ŋuŋ 2 Bible Online

Kɔleŋtiɛŋ Maa-ŋuŋ 2 - Kpelle bible

Kɔleŋtiɛŋ Maa-ŋuŋ 2

¹Ŋánûa, tãi ŋá pà la kápɔi, fe pá ní kápɔ a gɛ́ɛ ŋa Ɣâla ŋɔsêre-faai kɛ́ káa a wóo kpaya-kpaya da táre-woo.

²Kpɛ́ni fêi, ŋa gbɛ̀tɛ ŋ́gili ŋá a gɛ́ɛ fe mɛni da kɔlɔŋ kásama é kúla Zîsɛ Kôrai pôlu da ŋɔkpamo-mɛnii.

³Ŋá kɛ̀ kásama a fii-kpɛɛ da yao kɛ́tɛ e pɛlɛ kpɛ̃lîŋ ma.

⁴Ńono-woo da mɛnii ŋá kɛ̀ m̀ôi dífe kɛ́ ni nɔ́ a la-nɛ̃ɛ maa-tare-woo-ŋa, kɛ́lɛ, dí kɛ̀ a M̀ɔlêŋ ŋɔmɛni-ŋa-lɛɛ da ŋɔwála-walai,

⁵a gɛ́ɛ kálaa-lai fè kɛ̀ núu-kpune ŋɔtáre ma, kɛ́lɛ, é kɛ́ Ɣâla ŋɔwála-walai su.

⁶É máŋ kɛ́ tí, à kɛ̀ a kúai kúƃɔlɔ̂i M̀ɔlêŋ sui ku-sama, kwa tare-woo-ŋa ƃo, berei máŋ ve la a ŋ̀éniɛi ŋí su tare-woo-ŋa, kpaa máŋ ŋ̀éniɛi ŋí su mɛi-ƃelai dítare-woo-ŋai, nyíi-ŋai gáa a sɛŋ fɛ̂ɛ dí sáai.

⁷Kɛ́lɛ, kwa Ɣâla ŋɔtáre-loo-mɛni-ŋai lɛ̀, nyíi Ɣâla e gbɛ̀tɛ nàa tuɛ ŋ̀éniɛi ŋí kɔ́ɔ e lɛ́ɛ pâi pîlanii kúfolo-laai mɛni mai.

⁸Ŋ̀éniɛi ŋí su nuu mɛi-ƃelai dɔnɔ kpîŋ fe táre ni mɛnii ŋí su. Kpɛ́ni fêi, eêi kɛ̀ dîi táre zu, dîi fei Kúfolo-laa-nuu-namui kpamôi wúru su-tíyeŋɔɔ ma.

⁹Kpɛ́ni fêi, yɛ̂ɛ berei bɔ̃yɛɛ̂i lai, “Mɛnii nuu ŋɛi fe niî gáa ni, kpaa máŋ núu wóli fe niî mɛni ni, kpaa máŋ ve niî lɔ ni núu líi su, mɛnii Ɣâla a gbɛtɛ diai dí ŋ̀wɛ́li ni dímɛni mai,”

¹⁰Ɣâla a gélee lɛ́ kûa M̀ɔlêŋ sârai. Kpɛ́ni fêi, M̀ɔlêŋ a sɛŋ kélee kɔ̀ri é tóo máŋ Ɣâla ŋɔtárei kpóŋ seêi ma.

¹¹Kpɛ́ni fêi, gbɛ̂ɛ ƃe m̀arâŋ-nuu ŋɔkili-ŋa-siai kɔ́lɔŋ é kúla maa-nuui ti kpîŋ ŋɔmɔ̂leŋ pôlu nyíi gáa gbonôi? Bere nɔ́ ƃe máŋ núu fa târe la Ɣâla ŋɔkili-ŋa-siai su fɛ̂ɛ Ɣâla Ŋɔmɔ̂leŋ.

¹²Kúfe niî ŋ̀éniɛi ŋí su tua-perei sɔlɔ ƃo ni, kɛ́lɛ, kwa M̀ɔlêŋ sɔlɔ ƃo nyíi kùla Ɣâla yêei a gɛ́ɛ ku táre zama-sɛŋ maa-mɛnii su Ɣâla e dɛ̀ɛ kúpɔi.

¹³Kúfa nyíŋi lɛ̀ wóo-ŋa su nyíi núu-kpune ŋɔtárei e nɛ̀ kûai, kɛ́lɛ, kwa nɛ̀ wóo-ŋa su M̀ɔlêŋ e nɛ̀ kûai, ku Ɣâla ŋɔtɔ̃yâ-ŋai ŋá lɛ́ diai dîa M̀ɔlêŋ káa díkponôi.

¹⁴Núu-kpune tua-perei a gɛ̀ va Ɣâla Ŋɔmɔ̂leŋ ŋɔsama-sãai sɔlɔ ƃo, kpɛ́ni fêi, díkaa nɔ́ ŋ̀ɛi a ƃoo-sãa, va târe dímaa-mɛni su, kpɛ́ni fêi, núu a târe dímaa-mɛni su M̀ɔlêŋ sârai.

¹⁵Ǹúui M̀ɔlêŋ káa gbonôi, a mɛni kélee ŋá tèe, kɛ́lɛ, núu fa ŋɔmɛni ŋá tèe.

¹⁶“Kpɛ́ni fêi, gbɛ̂ɛ ƃe Kúnuu-namui kíli ŋá mɛni kɔ́lɔŋ a gɛ́ɛ e mɛni lɛ́ mà?” Kɛ́lɛ, Kôrai ŋɔkili-ŋa-siai káa kúyêei.