Read Kpelle Kɔleŋtiɛŋ Maa-ŋuŋ 3 Bible Online

Kɔleŋtiɛŋ Maa-ŋuŋ 3 - Kpelle bible

Kɔleŋtiɛŋ Maa-ŋuŋ 3

¹Kɛ́lɛ, ŋánûa, fa pɔ̂ri lônoi kápɔ yɛ̂ɛ ǹûai M̀ɔlêŋ káa díkponôi, kɛ́lɛ, ŋa lônoi kápɔ yɛ̂ɛ ǹûai díkaa díkpîŋ-tua-pere-nyɔŋ sui, yɛ̂ɛ kɔatara-ŋa ƃe díkaa Kôrai kponôi.

²Ŋa káŋakɔŋ a niŋa-ŋíni-ya, mii-sɛŋ kpanaŋ fei. Kpɛ́ni fêi, káfe kɛ́ ni a kákpɛtɛɛ mɛni ma, káfe nîi máŋ kákpîŋ kpɛtɛ ni mɛni ma.

³Kpɛ́ni fêi, kákaa nîi kákpîŋ-tua-pere-nyɔŋ su. Kpɛ́ni fêi, tãi tólo káa la kásama da laa-saai, káfe kákpîŋ tua-pere-nyɔŋ pôlu, kakɛ tua a nuu-kpune tua-pere?

⁴Kpɛ́ni fêi, à kɛ̀ núu tɔnɔ a mò, ǹyɛɛ, “Ŋ́gaa a Pɔ̂ɔ pɔ́ɔ,” da kpɛni ǹyɛɛ, “Ŋ́gaa a Apolo pɔ́ɔ,” gɛ̀ ní káfe nɔ́ a núu-kpune-ŋa?

⁵Gbɛ̂ɛ ŋaŋ ƃa Apolo? Gbɛ̂ɛ ƃa Pɔ̂ɔ? Díkaa nɔ́ a yée-mu-ƃela nyíi-ŋai kálaa-la sɔlɔ ƃô dísârai, yɛ̂ɛ berei Kúnuu-namui e tíi tɛɛ la dípɔ tɛi-tɛi.

⁶Ŋá sí-sɛŋ sì. Apolo e yá pù ma. Kɛ́lɛ, Ɣâla ƃe gɛ̀ e ƃɔlɔ.

⁷Mɛni ma, ǹúui a sí-sɛŋ sii, kpaa máŋ, ǹúui a yá pù mai, ve a sɛŋ da, fɛ̂ɛ nɔ́ Ɣâla nyíi a gɛ̀ e ƃɔlɔ̂i.

⁸Ǹúui a zí-sɛŋ sii, da ǹúui a yá pù mai dípɔrîɛi, da dífela-fei sɔlɔ ƃô yɛ̂ɛ berei dítii-ŋai káa lai.

⁹Kpɛ́ni fêi, kúkaa a Ɣâla ŋɔtii-kɛ-ƃela gîe ma; kákaa a Ɣâla ŋɔkpâlaŋ, ká ƃò a ŋɔpɛ́rɛ.

¹⁰Yɛ̂ɛ berei m̀ɛlɛ-seei káa la nyíi Ɣâla e dɛ̀ɛ ḿbɔ yɛ̂ɛ pɛrɛ-tɔɔ-nuu tareɛ̂i, ŋá bɛ́rɛi pìlaŋ, núu da kpɛni káa dɔɔ̂i. Tɔɔ núu kélee e mɛi káa a berei a bɛ́rɛi tɔɔ̂i lai.

¹¹Kpɛ́ni fêi, núu da fa pɔ̂ri pɛ́rɛ pîlanii é tɛ́ɛ nyíi ma Zîsɛ Kôrai e bìlaŋ.

¹²À kɛ̀ ǹyaŋ núu da à bɛ́rɛ pîlaŋɔɔi ŋí tɔ̀ɔ a gôo, káne, kɔni sɔ̃ɔ kpanaŋɔɔ, wúru, láa, kpaa máŋ mɔlɔŋ-kpaŋ

¹³da pâi núu kélee ŋɔtíi kɔ́lɔnîi; kpɛ́ni fêi, maa-ɣelei ti díi-ŋai da pâi lɛ̂i, kpɛ́ni fêi, da pâi lɛ̂i a ŋɔŋ, ǹyaŋ ŋɔŋ a pâi díi-ŋai kɔɔ̂nii núu tɛi-tɛi-ŋai dí gɛ̀i.

¹⁴À kɛ̀ bɛ́rɛ pîlaŋɔɔi ŋí núu kélee à dɔ̀ɔ à lɛ̀ɛ naa, maa-nuui a pâi fela-fei sɔlɔ ƃôi.

¹⁵À kɛ̀ núu da ŋɔtíi à kèreŋ, maa-nuui ŋɔpɛ́rɛ-tɔɔ-sãai da pâi lánîi, berei máŋ ǹyaa kpîŋ a pâi ƃálôi lai, kɛ́lɛ, a pâi kɛ̂i nɔ́ yɛ̂ɛ núu a tɛɛ ŋɔŋ su.

¹⁶Káfe gɔ́lɔŋ kákaa a Ɣâla ŋɔpɛ́rɛ Ɣâla Ŋɔmɔ̂leŋ kɛ́ ƃò kákponôi?

¹⁷À kɛ̀ núu da à Ɣâla ŋɔpɛ́rɛi su kàra, Ɣâla a pâi zu karâi. Kpɛ́ni fêi, Ɣâla ŋɔpɛ́rɛi maa waâi, ǹyaŋ maa-pɛrɛi ti ƃe kákaa la.

¹⁸Núu da fe gbîŋ pɛ̀lɛ. À kɛ̀ núu da káa kásama gáa gíli ŋá a gɛ́ɛ dáreɛ̂i ŋ̀éniɛi ŋí su, tɔɔ maa-nuui é kɛ́ a ƃoo-nuu a gɛ́ɛ é táre.

¹⁹Kpɛ́ni fêi, ŋ̀éniɛi ŋí su-tarei káa a ƃoo Ɣâla ŋɛi. Kpɛ́ni fêi, bɔ̃yɛɛ̂i, “Ɣâla a dáre-ƃelai sôŋ díwôya-perei ma,”

²⁰bɔ̃yɛɛ̂i ŋɔ́nɔ, “Kúnuu-namui e gɔ́lɔŋ a gɛ́ɛ dáre-ƃelai díkili-ŋa-siai káa nɔ́ kpɛni-kpɛni.”

²¹Mɛni ma núu da fe yoŋka tèe a núu-kpune. Kpɛ́ni fêi, sɛŋ kélee káa a kápɔɔ,

²²à ǹɛɛ ma kpîŋ é kɛ́ a Pɔ̂ɔ, kpaa máŋ Apolo, kpaa máŋ Sífa, kpaa máŋ ŋ̀éniɛi, kpaa máŋ fulu-laa, kpaa máŋ saa, kpaa máŋ tãi ŋí su, kpaa máŋ tãi pâi pâi, gélee káa a kápɔɔ;

²³ǹyaŋ kákaa a Kôrai pɔ́ɔ; Kôrai ǹyaŋ kɛ́ ƃo a Ɣâla pɔ́ɔ.