Read Kpelle Kɔleŋtiɛŋ Veerɛi 1 Bible Online

Kɔleŋtiɛŋ Veerɛi 1 - Kpelle bible

Kɔleŋtiɛŋ Veerɛi 1

¹Ńyãa Pɔ̂ɔ, ŋ́gaa a Zîsɛ Kôrai ŋɔsia-nuu yɛ̂ɛ berei Ɣâla ŋɔnîa-mɛnii káa lai, kwa Temete nyíi gáa a ku ƃarâŋ-nuui, Ɣâla-toli-kpɔŋ gáa Kɔleŋ da Ŋ̀âla-ƃelai kélee díkaa Ɛkeya-lɔii kwaa kélee:

²Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai.

³Lûwa é kɛ́ Kúnuu-namui Zîsɛ Kôrai Ǹâŋ Ɣâla ma nyíi gáa a maloŋ-kaa-Naŋ da ŋa-nɛnɛ-Ɣalai

⁴nyíi a kúŋa nɛ̀nɛ kúmɛni-kpɔ̂lui kélee su a gɛ́ɛ kúa máŋ pɔ̂ri é kɛ́ kûɛ ku diai ŋá nɛnɛ díkaa mɛni-kpɔ̂lu sui, a ŋa-nɛnɛi nyíi Ɣâla a kúa kpîŋ kúŋa nɛ̀nɛ lai.

⁵Kpɛ́ni fêi, à kɛ̀ ku Kôrai ŋɔmɛni-solii dámaa sɔlɔ ƃô, bere nɔ́ ƃe ǹyaŋ kwa pâi ŋa-nɛnɛ támaa sɔlɔ ƃôi la máŋ Kôrai sârai.

⁶À kɛ̀ kwà mɛni-kpɔ̂lu sɔlɔ ƃô, gɛ̀ ní gáa káŋaa nɛnɛ mɛni ma da káƃalo-laai. A kɛ̀ kwà ŋa-nɛnɛ sɔlɔ ƃô, gɛ̀ ní gáa káŋa-nɛnɛ mɛni ma nyíi ká zɔlɔ ƃô tãi ká tɔ̀ɔ la a lii-kpele-pere mɛni-soli tɔnɔi su nyíi ku zɔlɔ ƃôi.

⁷Gili-kɛ-zui gáa kúyêei kámɛni mai, va tumo; kpɛ́ni fêi, ku gɔ́lɔŋ berei ká kúmɛni-solii da sɔlɔ ƃô lai, ka pâi máŋ kúŋa-nɛnɛi da sɔlɔ ƃôi.

⁸Kpɛ́ni fêi, ŋánûa, kúfe ŋ̀wɛ̂lii a gɛ́ɛ kákɛ a káƃoɔɔ mɛni-kpɔ̂lui ku zɔlɔ ƃô Eesiai m̀ɛni ma; kpɛ́ni fêi, mɛni-kpɔ̂lui è kɛ̀ kpɔ́ a ŋwiɛɛ kûa a dámaa nyíi kúfa pɔ̂ri mui, ǹyaŋ kúlɛ̂woi kpîŋ maa-lii-sɛlɛŋ è kɛ̀ kûa.

⁹Tɔ̃yâ ma, è kɛ̀ kúkili ŋá a gɛ́ɛ da kúsaa-mɛni ƃó kúa; kɛ́lɛ, nyíti e kúkɛ̀ a gɛ́ɛ kúfe kúkili làa kúa kpîŋ kûa, kɛ́lɛ, ku kúkili láa Ɣâla ma nyíi a núu mu siɣe saa yêei;

¹⁰e kúkùla zaa-woloi ti lá, ǹyaŋ a pâi ŋɔ́nɔ kúkula-yeei kɛ̂i; kwa kúkili pu ma a gɛ́ɛ a pâi ŋɔ́nɔ kúkula-yeei kɛ̂i.

¹¹Fɛ́ɛ ka kpɔŋ kûa máŋ a Ɣâla fɛliɛ a gɛ́ɛ núu támaa dí sɛɣɛi-fei tɛɛ kúmɛni ma m̀ɛlɛ-seei Ɣâla e dɛ̀ɛ kúpɔ Kúɣâla fɛliɛ támaai mɛni mai, mɛni ma.

¹²Kpɛ́ni fêi, kúyoŋka téɛɛ ká ŋí, kúkili-ŋa-siai m̀aa sêre-faai ƃa a gɛ́ɛ kwa tûa lɛ́lɛɛ kɛ́ ŋ̀éniɛi su a Ɣâla ŋɔmaa-waa-laai da ŋɔtɔ̃yâ laa-lai. Kútûa lɛ́lɛɛi dámaa káa kápɔ-pere. Kúfe gɛ̀ ní a ǹɔii ŋí su-tarei, kɛ́lɛ, ku gɛ a Ɣâla ŋɔƃɛlɛ-sêei.

¹³Kpɛ́ni fêi, mɛnii nɔ́ ka pɔ̂ri ǹónôi ka táre zui nya ƃe kwa bɔ̃̀yɛ kápɔ naa; gáa ŋ́gili ŋá ka pâi tárêi gélee su a ǹɛ́lɛɛ,

¹⁴yɛ̂ɛ berei ka táre la zu a gɛ́ɛ kálii é kɛ́ a nɛ̃ɛ kúmɛni ma Zîsɛ Kôrai ŋɔɣelei ma, yɛ̂ɛ berei kúlii a pâi kɛ̂i la a nɛ̃ɛ kámɛni mai.

¹⁵Ŋá kɛ̀ ŋ́wɛ̂lii ŋa pa kápɔ a maa-ŋuŋ a gɛ́ɛ ká lii-laa sɔlɔ ƃó gîei feerɛ, kpɛ́ni fêi, ŋá kɛ̀ a ǹáa a mɛnii ŋá mòi.

¹⁶Ŋá kɛ̀ ŋ̀wɛ̂lii ŋa kɛ́ liî Masadonia, ŋá tɛ́ɛ a kápɔ naa-pere ŋa kánaa káa ŋá kúla naa ŋá pá ŋɔ́nɔ pôlu kápɔ a gɛ́ɛ ká ńdɛɛ Zuda.

¹⁷Ŋá kɛ̀ tíi támaa kɛ̂i tãi ŋá kɛ̀ ŋ̀wɛ̂lii ŋa nyíŋi kɛ́ lai? Ŋa ŋámɛni kpɛtɛɛi kɛ̀ yɛ̂ɛ ŋ̀éniɛi ŋí su-nuu, nyíi gbɛtɛɛ̂i nɔ́ a gɛ́ɛ é kɛ́ Ooei, Kpa, a maa félaai?

¹⁸Yɛ̂ɛ berei Ɣâla sã́âi la kpɔ́ a tɔ̃yâi, kúwooi fe niî kɛ́ ni a Ooei, Kpa.

¹⁹Kpɛ́ni fêi, Zîsɛ Kôrai Ɣâla Ǹóŋ nyíi kwa maa-mɛni ƃò kásamâi, kwa Seveenɔ da Temete, ve niî kɛ́ ni a Ooei, Kpa; Ooei nɔ́ ƃe a tãi kélee gbonôi.

²⁰Kpɛ́ni fêi, Ooei káa Ɣâla ŋɔkono-tee-ŋai kélee ma gbonôi. Mɛni ƃe kwa É kɛ́ ti ƃò la zarâi Ɣâla ŋɔfólo-laai mɛni ma.

²¹Kɛ́lɛ, Ɣâla ƃe kwa yá kúkɛ̀ ku tɔ́ɔ a gbanaŋɔɔ Kôrai kponôi, ǹyaŋ a kúmaa waa ŋɔtíi mɛni ma.

²²A ŋɔŋɛi-kɛ-maai kɛ́ kûa. A Ŋɔmɔ̂leŋ tɛ́ɛ kúpɔ kúlii-ŋai su yɛ̂ɛ kono-tee-woo.

²³Kɛ́lɛ, ŋa Ɣâla marê kɛ̂i a gɛ́ɛ é kɛ́ a ŋáserêi-sapoi fe pá ní la Kɔleŋ, ǹyaa ƃa fe kɛ́ ni ŋ̀wɛ̂lii ŋa kálii sɛlɛŋ.

²⁴Zu-kulai fa wála-wala e kɛ́ kálaa-lai mɛi; kwa káa-ni kwa tíi kɛ̀ kálii-nɛ̃ɛi mɛni ma, kpɛ́ni fêi, kákaa tɔ̂ɔni a gbanaŋɔɔ kálaa-lai su.