Read Kpelle Kɔleŋtiɛŋ Veerɛi 12 Bible Online

Kɔleŋtiɛŋ Veerɛi 12 - Kpelle bible

Kɔleŋtiɛŋ Veerɛi 12

¹Fɛ̂ɛ ŋa yoŋka tée, berei máŋ fe pâi sɛŋ da kulâi la zui, kɛ́lɛ, ŋa pâi lônoi é pîlaŋ zee-woo-ŋai dîa da mɛni-ŋai Kúnuu-namui e nɛ̀ ḿâi.

²Ŋa núu tɔnɔ kɔ́lɔŋ Kôrai kponôi nyíi tɛ Ɣâla-taa kóraŋ puu kao náaŋ pôlu mái, fé gɔ́lɔŋ à kɛ̀ gbono ƃé kɛ̀ la kpaa máŋ ŋɔmɔ̂leŋ, Ɣâla ƃe gɔ́lɔŋ.

³Ǹyaŋ ŋá gɔ́lɔŋ a gɛ́ɛ nalôŋ ŋí e tɛ̀ Paredai fe gɔ́lɔŋ à kɛ̀ gbono ƃé kɛ̀ la kpaa máŋ ŋɔmɔ̂leŋ, Ɣâla ƃe gɔ́lɔŋ

⁴nalôŋ ŋí e mɛni-ŋa mɛni nyíi-ŋai va ƃôi, ǹyaŋ núu da fe naa a pɔ̂ri môi.

⁵Ŋa pâi yoŋka teêi nalôŋ ŋí mɛni ma, kɛ́lɛ, fe pâi yoŋka teêi ńyãa kpîŋ mɛni ma, fɛ̂ɛ ŋáfii-kpɛɛ-ŋai.

⁶Ŋà kɛ̀ ŋ̀wɛ̂lii ŋá yoŋka tée, fe pâi ƃoo kɛ̂i, kpɛ́ni fêi, ŋa pâi dɔ̃yâi ƃôi. Kɛ́lɛ, ŋa pâi kperâi ma a gɛ́ɛ núu da fe gíli ŋá sìa a gɛ́ɛ ŋ́gɛtɛ̂i é tɛ́ɛ berei ma a ŋ́gaâi la da mɛni-ŋai a mɛnîi ǹái.

⁷A gɛɛ ńii fe nɛ̀ɛ é tɛ́ɛ gɛ̂i ma mɛni kpaya-kpayai mɛni ma nyíi Kúnuu-namui e nɛ̀ ḿâi, e mɛni-soli tɛ̀ɛ ŋ́gbonôi mɛni ma. Sêtɔŋ ŋɔkélai ƃe fũa-fũa tɔ̀ɔ mâ a gɛ́ɛ ńii fe nɛ̀ɛ é tɛ́ɛ gɛ̂i ma.

⁸Ŋa Kúnuu-namui kpera fe la kɛ́ saaƃa mɛnii ŋí mɛni ma a gɛ́ɛ mɛnîi kpîŋ é síɣe ḿbôlu;

⁹kɛ́lɛ, e mò mâ, ǹyɛɛi, “Ŋáƃɛlɛ-sêei támaâi ímɛni ma, kpɛ́ni fêi, ŋáwala-walai maa waâi fii-kpɛɛ su.” Mɛni ma lii-nɛ̃ɛ kɛ́tɛ su ŋa pâi yoŋka teêi ŋáfii-kpɛɛ-ŋai su a gɛ́ɛ Kôrai ŋɔwála-walai é kɛ́ ḿɛi.

¹⁰Gɛ̀ ní Kôrai maa-mɛni ma, ńii lâai fii-kpɛɛ su, ƃaa-kula-maa su, mɛni-kpɔ̂lu su, kpɔara su, da mɛni-soli su; kpɛ́ni fêi, ŋà kɛ̀ a ḿvii kpɛɛ, gɛ̀ ní ńzu gbanaŋɔɔ̂i.

¹¹Ŋá ŋ́gbîŋ kùla a ƃoo-nuu! Kɛ́lɛ, káa ƃe ŋ́gɛ ŋá gɛ́ ti, kpɛ́ni fêi, káa ƃêi pɔ̂ri ńɛ̂i. Kpɛ́ni fêi, fe a núu-doo-mu pere-sii kélee su zia-ƃelai ŋí sama nyíi-ŋai da díkpîŋ kɛ́tɛ̂i, berei máŋ ŋ́gaa la nɔ́ kpɛni-kpɛni.

¹²Tɔ̃yâ-sia-nuu maa-ŋɛi-kɛ-maa-ŋai dí kɛ̀ kásama a lii-kpele-sii kélee. Dí kɛ̀ a ŋɛi-kɛ-maa-ŋa da mɛni kpaya-kpaya, é pɛ́lɛ tíi kpaya-kpaya dîa.

¹³Le-mɛni lɛ́lɛɛ ƃe Kôrai-toli-kpɔŋ kpeli-ŋai da zɔlɔ ƃô é tɛ́ɛ kâa, mɛni tɔnɔi nɔ́ ŋá gɛ̀i, ǹyaa ƃa fe kɛ́ ni ŋ̀wɛ̂lii a gɛ́ɛ ŋa kákpaaŋ? Mɛni nyɔ́mɔɔ ká ŋí ŋá gɛ̀, ka ńzu mɛni lɛɛ!

¹⁴Ka gáa, ŋa nâa ŋ́gbîŋ kpɛtɛ a tãi zaaƃa-ɣelei ŋá pá kápɔ. Ǹyaŋ fe pâi kákpaanîi, kpɛ́ni fêi, zɛŋ gáa káyêei fe gɔ́rii, kɛ́lɛ, ŋa káa kpîŋ kákɔ̂ri; kpɛ́ni fêi, m̀aa fe nɛ̃ɛ ni nîa-pɛlɛɛ dí sɛŋ lâai kɛ́ díkaa-ƃelai mɛni ma, kɛ́lɛ, díkaa-ƃelai da sɛŋ lâai kɛ̀ dímɛni ma.

¹⁵Ŋa pâi ńyee ŋá-sɛŋ kélee kɔlɛɛ̂i a lii-nɛ̃ɛ ŋá ŋ́gbîŋ kɔlɛ kámɔ̂leŋ mɛni ma. À kɛ̀ wɛli-kɛ-maa támaa káa ńyêei kámɛni ma, wɛli-kɛ-maa-loŋ a pâi kɛ̂i káyêei ḿɛni ma?

¹⁶Kɛ́lɛ, gɛɛ ńyãa kpîŋ fe kákpaaŋ ni, ka mò káa ŋa káfili a woya.

¹⁷Ŋá sɛŋ da kùla káyêei ǹûai ŋa dítɛ̀ɛ kápɔ naai dɔnɔ kpîŋ sârai?

¹⁸Ŋa Taitɔ lia-woo ƃò a gɛ́ɛ é lí, ŋá dɛɛ da ḿarâŋ. Taitɔ e sɛŋ da kùla káyêei? Kúfe tua ni a bere-sii tɔnɔi? Kúfe bere-sii tɔnɔi siɣe ni?

¹⁹Ká kɛ̀ kákili ŋa siâi a tãi kélee a gɛ́ɛ kú kɛ̀ ku-kpîŋ maa kɔ̃ɔ̂i káŋɛi? Ŋáwɛli-kɛ-maa-ƃelai, kú kɛ̀ lônoi Kôrai kponôi Ɣâla ŋɛi, ǹyaŋ nyíŋi kélee káa nɔ́ káƃɔlɔ mɛni ma.

²⁰Kpɛ́ni fêi, ŋ́gaa yáôi a gɛ́ɛ tãi da ŋà pà fa kákàa yɛ̂ɛ berei ŋa ŋ̀wɛ̂lii lai, káa máŋ káfa ŋ́gaa yɛ̂ɛ berei ka ŋ̀wɛ̂lii lai; tãi da laa-saa a pâi kɛ̂i kásama, tólo, lii-ŋwana, ŋɛi-kpala, laa-kara, laa-ƃo, lii-kɛtɛ, da woo-taa-taa.

²¹Ŋ́gaa yáôi a gɛ́ɛ ŋà pà ŋɔ́nɔ Ŋáɣâlai a pâi ḿaa yenîi káŋɛi. Ǹyaŋ tãi da fɛ̂ɛ ŋá wɔ́lɔ diai da sɔnyɔ̂ŋ kɛ́ a maa-ŋuŋ dámaa mɛni ma, nyíi-ŋai dífe niî dípôlu tɔ̂ɔni mɛni-maa-liƃiɛ-ŋa dia, wulu-wulu kɛ́ɛ, da wolii-kpɔlɔ, nyíi-ŋai da m̀aa kɔ́rii.