Read Kpelle Kɔleŋtiɛŋ Veerɛi 7 Bible Online

Kɔleŋtiɛŋ Veerɛi 7 - Kpelle bible

Kɔleŋtiɛŋ Veerɛi 7

¹Ŋáwɛli-kɛ-maa-ƃelai, tãi nɔ́ gono-tee-ŋai ŋí káa la kúyêei, kwaa kúkpîŋ maa wáa ku kúla kúkponôi da kúmɔ̂leŋ dísɔnyɔ̂ŋ su, kúkɛ kpɔ́ a kúmaa waa a ǹɛ́lɛɛ Ɣâla ŋɔyao-maai su.

²Ka kálii lá ƃó kûɛ; kúfe niî mɛni nyɔ́mɔɔ kɛ́ ni a núu da, kúfe niî núu da líi sóli ni, kúfe niî núu da mɔ̃lɛ ni.

³Fe nyíŋi ƃôi a gɛ́ɛ ŋá mɛni lɛ́ɛ kâa, kpɛ́ni fêi, ŋá mò a maa-ŋuŋ a gɛ́ɛ kákaa kúlii su a gɛ́ɛ kwa kâa ni ku sáa gîe ma, kwa ka-ni ku kɛ́ ɣele ma gîe ma.

⁴Náâi a káa kpɔ́ a ŋánaa. Ńii nɛɛ̂i kámɛni ma kpɔ́ a ŋánaa. Ńii láa fɛɛ̂i a ŋa-nɛnɛ. Kúmɛni-kpɔ̂lui kélee su, ńii nɛɛ̂i kpɔ́ a ŋánaa.

⁵Kpɛ́ni fêi, tãi máŋ ku pà la Masadoniai, kúkponôi fe vii tɔ̂ɔni, kɛ́lɛ, ku kɛ́ nɔ́ mɛni-kpɔ̂lu su kwaa kélee ma-kwa ǹaa-ƃela ku kɛ̀ laa-saa kɛ̂i, yao kɛ́ ƃo kúkɔlɔ̂i.

⁶Kɛ́lɛ, Ɣâla nyíi a ǹii-soli-ƃelai ŋá nɛ̀nɛi, e kúŋa nɛ̀nɛ a Taitɔ páa.

⁷Taitɔ páa maa-mɛni tɔnɔ nɔ́ fei, kɛ́lɛ, ŋa-nɛnɛi máŋ ká dɛ̀ɛ bɔ́i mɛni ƃe, yɛ̂ɛ berei e mò la kûa berei ká kɛ̀ ŋ̀wɛ̂lii la ká ŋ́gaa, berei ká kɛ̀ wɔ́lɔ̂i la ḿaa-mɛni mai, da berei ká ŋ́wɛli ni lai, a gɛ́ɛ ŋá lii-nɛ̃ɛ kula a zu kɛ́tɛ.

⁸À kɛ̀ máŋ ŋá ká kɛ̀ malôŋ é tóo kâa a ŋákɔlɔi, ńii fa sôli (berei máŋ ńii e sòli la a maa-ŋuŋ), kpɛ́ni fêi, ŋá gàa a gɛ́ɛ gɔlɔi ti e kálii sòli, berei máŋ e kálii sòli nɔ́ la a tãi kpua-loŋ.

⁹Yɛ̂ɛ berei gáa lai, ńii nɛɛ̂i. Ŋálii-nɛ̃ɛi su-kulai fa kálii e sòli, kɛ́lɛ, zu-kulai ƃa kálii-solii a ká kɛ̀ ka kálii pene; kpɛ́ni fêi, berei kálii-solii è kɛ̀ lai, è kɛ̀ a Ɣâla nia-mɛni a gɛ́ɛ káfe mɛni-soli kâa kúsârai.

¹⁰Kpɛ́ni fêi, Ɣâla-nia lii-solii a pâ a lii-pene, nyíi a lî a núu ƃálo-laa sui. Va pâ a núu lii-soli su, kɛ́lɛ, ŋ̀éniɛi ŋí su-lii-solii a pâ a saa.

¹¹Ka gáa, berei Ɣâla-nia lii-solii e ká kɛ̀ la ka mɛni soŋ a gbanaŋɔɔ̂i, berei e ká kɛ̀ la a gɛ́ɛ ká kákpîŋ maa-kɔ̃ɔ̂i, berei e ká kɛ̀ la kálii é ŋwánai, berei e ká kɛ̀ la ká yaôi, berei e ká kɛ̀ la ŋ́wɛli é kákɛ̂i, berei e ká kɛ̀ la ká mɛni kélee kɛ́ a ǹɛ́lɛɛi, da berei e ká kɛ̀ la a gɛ́ɛ ka mɛni ŋa tee a ǹɛ́lɛɛ! Ka kákpîŋ lɛ́ pere-sii kélee su a gɛ́ɛ kásɔŋ fe mɛnii su.

¹²Berei máŋ ŋá kɔlɔ pɔ̃yɛ la kápɔ naai, fe kɔlɔ pɔ̃yɛ ni nɔ́ ǹúui mɛni karai mɛni ma, kpaa máŋ, fe kɔlɔ pɔ̃yɛ ni nɔ́ ǹúui dí ŋɔmɛni karai mɛni ma, kɛ́lɛ, ŋá gɔlɔi pɔ̃̀yɛ a gɛ́ɛ ŋwɛli-kɛ-maai gáa káyêei kúmɛni mai é lɛ́ kâa Ɣâla ŋɛi.

¹³Mɛni ma ŋa-nɛnɛ káa kúyêei. É kúla kúwɔ̂-ŋa-nɛnɛi pôlu, kúlii nɛɛ̂i máŋ a zu kɛ́tɛ Taitɔ ŋɔlii-nɛ̃ɛi mɛni ma, kpɛ́ni fêi, kákelee ka ǹíi láa.

¹⁴Kpɛ́ni fêi, à kɛ̀ ŋà ŋálii-nɛ̃ɛi mɛni ƃò ma nyíi gáa ŋ́gbonôi kámɛni mai, fe ŋumɛ ni; kɛ́lɛ, berei mɛnii kélee ku mò kâai è kɛ̀ la a tɔ̃yâi, bere nɔ́ ƃe kúyoŋkâi ku dèe Taitɔ ŋɛi è kɛ̀ la a tɔ̃yâ.

¹⁵Ǹyaŋ ŋwɛli-kɛ-maai gáa ǹyêei kákelee kámɛni mai, a ƃɔlɔ̂i nɔ́ a tãi kélee. Tãi nɔ́ káwoo-mɛnii maa-mɛni kíli a tôo la ŋ̀ái, da ǹyaoi da gbɛ̃liŋ nyíi ká káyee sèe la mui.

¹⁶Níi nɛɛ̂i, kpɛ́ni fêi, ńaâi kpɔ a káa a ǹɛ́lɛɛ.