Read Kpelle Kɔleŋtiɛŋ Veerɛi 8 Bible Online

Kɔleŋtiɛŋ Veerɛi 8 - Kpelle bible

Kɔleŋtiɛŋ Veerɛi 8

¹Ŋánûa, kwa ŋ̀wɛ̂lii ka Ɣâla ŋɔƃɛlɛ-sêei kɔlɔŋ nyíi ǹɛ́ɛ̂i Masadonia Kôrai-toli-kpɔŋ-ŋai su.

²Kpɛ́ni fêi, tãi dí kɛ̀ la mɛni-kpɔ̂lu su-kɔɔŋ kɛ́tɛi sui, dí kɛ̀ a dílii nɛ̃ɛ a zu kɛ́tɛ díkôloɔ a dámaa, ǹyaŋ nyíŋi e díkɛ̀ dí kpɔŋ-maa támaa kɛ́.

³Kpɛ́ni fêi, dí díyee ŋá-sɛŋ kélee tɛ̀ɛ a kpɔŋ-maa, yɛ̂ɛ berei máŋ ŋa pɔ̂ri m̀aa sêre-faa kɛ̂i lai, dífulu-laai su-sɛŋ nyíi kɛ̀ díyêei dí dámaa tɛ́ɛ, é kúla dílii su.

⁴Dí kúkperâi fè kpɔ́ a gbanaŋɔɔ a gɛ́ɛ da pɔ̂ri kɛ̂i a Ŋ̀âla-ƃelai díkpɔŋ-maa-ƃela da

⁵dí kpɔŋ-maai dí gɛ̀ nyíi kúkili fe kɛ́ ni mai, kpɛ́ni fêi, maa-ŋuŋ dí díkpîŋ tɛ̀ɛ Kúnuu-namui pɔ, dí díkpîŋ tɛɛ kúpɔ Ɣâla ŋɔnîa-mɛnii su.

⁶Yɛ̂ɛ berei gáa lai, ku Taitɔ lia-woo ƃò a gɛ́ɛ berei a ŋɔtíi lɛ́lɛɛi kɔ́ɔ pîlaŋ lai, é ǹáa kúla máŋ kásama.

⁷Yɛ̂ɛ berei ka mɛni kélee kɛ̀ la a ǹɛ́lɛɛ-kálaa-lai su, kálono-woo su, kátarei su, ka mɛni soŋɔɔ a gbanaŋɔɔ su, da káwɛli-kɛ-maai su nyíi gáa káyêei kúmɛni mai-ka gáa a gɛ́ɛ ká Ɣâla ŋɔtíi lɛ́lɛɛi ŋí kɛ́ máŋ a ǹɛ́lɛɛ.

⁸Fe nyíŋi ƃôi a gɛ́ɛ é kɛ́ a tɔ̂ŋ, kɛ́lɛ, ŋa m̀ôi a gɛ́ɛ ŋá káwɛli-kɛ-maai kɔɔ̂ŋ berei ma ǹúu kpeli-ŋa da mɛni sôŋ la a gbanaŋɔɔ̂i.

⁹Kpɛ́ni fêi, ka Kúnuu-namui Kôrai ŋɔƃɛlɛ-sêei kɔ́lɔŋ a gɛ́ɛ berei máŋ è kɛ̀ a dɔɔ lai, é máŋ kɛ́ ti è kɛ̀ a kôlo-nuu kámɛni ma a gɛ́ɛ ŋɔkôlo-laai sârai ká kɛ́ a tɔɔ-ƃela.

¹⁰Ǹyaŋ ŋa lia-woo ƃôi mɛnii ŋí su, ǹɛ́lɛɛi kámɛni ma nâa a gɛ́ɛ mɛnii ká gɔ́ɔ pìlaŋ góraŋ ti su ká kɛ́ ŋ̀wɛli a gɛ́ɛ ka gɛ́i, ka ǹáa kúla

¹¹a gɛ́ɛ berei ká kɛ̀ ŋ̀wɛ̂lii ká gɛ́ lai, ká ǹáa kúla ti nyíi gáa káyêei.

¹²Kpɛ́ni fêi, à kɛ̀ sama-sɛŋ tɛɛ a kúla núu líi su, gɛ̀ ní, zɛŋ núu a gùla sama-sɛŋ tɛɛ sui, gáa nɔ́ yɛ̂ɛ zɛŋ gáa ǹúui ti yêei, kɛ́lɛ, va kɛ̂ yɛ̂ɛ zɛŋ ve ǹyêei.

¹³Zu-kulai fa a gɛ́ɛ nuu-kpeli-ŋai dí sama-sɛŋ-loŋ tɛɛ, káaŋ ká gɛ́tɛ tɛ́ɛ,

¹⁴kɛ́lɛ, a gɛ́ɛ mɛni e pɔ̂ri a gîe, zɛŋ da ŋ̀wɛ̂lii, kásama-sɛŋ kɛ́tɛi gáa tãi ŋí sui é gɛ dîɛ, a gɛ́ɛ tínaa tuɛ-pere dia-máŋ dísama-sɛŋ kɛ́tɛi é mɛnii kɛ́ kâa ka ŋ̀wɛ̂lii, a gɛ́ɛ mɛnii e pɔ̂ri a gîe.

¹⁵Yɛ̂ɛ berei bɔ̃yɛɛ̂i lai, “Ǹúui ŋá tɛ̀ ma a dámaai, ŋɔi da fe lɛɛ ni pôlu, kɛ́lɛ, ǹúui ŋá tɛ̀ ma a guro-têi, da wɛ́li fe lɛɛ ni ma.”

¹⁶Kɛ́lɛ, sɛɣɛi-fei é tɛ́ɛ Ɣâla pɔ nyíi kámaa-kpaaŋ pu Taitɔ líi sui.

¹⁷Kpɛ́ni fêi, ve ǹyée see ni nɔ́ kúkpera-fe-wooi mu, kɛ́lɛ, gɛ́ɛ ǹyaa kpîŋ gɛ-wɛli káa mai, a pâi kápɔ a gbɔɔ̂i-woo.

¹⁸Kwa kúƃarâŋ tɛɛ̂i da ǹyaa dí pá, nyíi da ǹáa maa tɛ̀ Kôrai-toli-kpɔŋ kélee su ŋɔtuŋ lɛ́lɛɛi ƃó mɛni ma;

¹⁹nyíŋi tɔnɔ nɔ́ fei, kɛ́lɛ, Kôrai-toli-kpɔŋ-ŋai da ǹɛ́ a gɛ́ɛ kwa dîa-ni ku sia díi lɛ́lɛɛi ŋí kɛ́ mɛni ma nyíi kúkaa siâi la Kúnuu-namui ŋɔfólo-laai mɛni ma a gɛ́ɛ ŋɔnɔ ku kúsɔŋ-lɛ́lɛi lɛi.

²⁰Kwa gbɛ̀tɛ kúkili ŋá a gɛ́ɛ núu da kélee fe kúsɔŋ siɣe zama-sɛŋ kɛ́tɛi ŋí mɛni ma nyíi kúkaa dɛɛ̂i,

²¹kpɛ́ni fêi, kwa ŋ̀wɛ̂lii ku mɛni lɛ́lɛɛ kɛ́, kúfe gɛ̂i nɔ́ Kúnuu-namui ŋɛi mɛni ma, kɛ́lɛ, kwa gɛ̂i máŋ núu-kpune ŋɛi.

²²Kwa dítɛɛ̂i da kúƃarâŋ, nyíi kwa zu kɔɔ̂ŋ a tãi támaa, kwa gáa a gɛ́ɛ a mɛni támaa sóŋ a gbanaŋɔɔ̂i, gáa ŋɔnɔ a ǹúui a mɛni támaa sóŋ a gbanaŋɔɔ é tɛ́ɛ bɔlɔi ma, kpɛ́ni fêi, ǹáâi a káa kpɔ a dámaa.

²³À kɛ̀ a Taitɔ, gáa a ḿarâŋ-nuu, gɛ ƃo a ḿarâŋ-tii-kɛ-nuu kámɛni ma; à kɛ̀ a kúƃarâai, díkaa a Kôrai-toli-kpɔŋ ŋai díkela-ŋa, nyíi gáa a Kôrai ŋɔfólo-laai.

²⁴Mɛni ma ǹyoŋkai ku dèe ǹûai ŋí ŋɛi é pîlaŋ káai da káwɛli-kɛ-maai, ka ǹɛ Kôrai-toli-kpɔŋ ŋai ŋɛi.