Read Kpelle Galesiɛŋ 4 Bible Online

Galesiɛŋ 4 - Kpelle bible

Galesiɛŋ 4

¹Ŋa nâa m̀ôi a gɛ́ɛ bɔɔ-sɛŋ mɛi-loŋ, à kɛ̀ a lôloŋ, ve tɛɛ ni yée-mu-nuu ma, berei máŋ la bɔ́ɔ ƃa a díkeleei.

²Kɛ́lɛ, gáa mɛi-kaa-pere su é lɛ́ɛ la zu tãi ǹâŋ e ǹɛ̂i, e seri.

³Bere nɔ́ ƃe kúa máŋ; tãi ku kɛ̀ la a nîa-pɛlɛɛi, ku kɛ̀ la a luɛ-ŋa ŋ̀éniɛi su-ƃelai tûa-perei yée mu.

⁴Kɛ́lɛ, tãi kpîŋ páai, Ɣâla e Ǹóŋ tɛ̀ɛ, nyíi nɛnî e zɔlɔ ƃôi. E pà dɔ̂ŋ yée mu. E pà a gɛ́ɛ e diai maa tée dí kɛ̀ dɔ̂ŋ mui,

⁵a gɛ́ɛ ku lóŋ-laa maa sɔlɔ ƃó.

⁶A gɛɛ ŋɔ́nɔ kákaa a lônii, Ɣâla a Ǹóŋ Ŋɔmɔ̂leŋ tɛ́ɛ kúlii su, gɛ laɣi, ǹyɛɛi, “Aƃa! Ńâŋ!”

⁷Mɛni ma Ɣâla sârai, káfe ŋɔ́nɔ a yée-mu-ƃela, kɛ́lɛ, kákaa a lônii, à kɛ̀ kákaa a lônii, gɛ̀ ní kákaa a pɔɔ-sɛŋ mɛi-ƃela.

⁸Tãi maa-ŋuŋ, tãi káfe kɛ́ ni a Ɣâla kɔ́lɔŋɔɔ lai, ká kɛ̀ a luɛ-ŋa ɣâla-ŋa yée mu nyíi-ŋai dífe kɛ́ ni ɣele mai;

⁹kɛ́lɛ, ka nâa Ɣâla kɔ́lɔŋ, ǹyaŋ mɛnii gbanaŋɔɔ̂i ƃa, Ɣâla a nâa kákɔlɔŋ. Ka pɔ̂ri tínaŋ-pere kɛ̂i leŋ ŋɔ́nɔ ŋ̀éniɛi-su-ƃelai tua-pere fii-kpɛɛ-ŋai dîa nyíi-ŋai díkaa nɔ́ kpɛni-kpɛni, ká kɛ́ ŋ̀wɛli a gɛ́ɛ ká kɛ́ ŋɔ́nɔ a díluɛ-ŋai?

¹⁰Ka ɣele kûu da-ni lâai kɛ̀, ɣáloŋ da-ni, tãi da-ni, da kóraŋ da-ni!

¹¹Ŋ́gaa ŋ́gili ŋá siâi a gɛ́ɛ mɛni-ŋai ŋá tɛ̀ɛ zu kámɛni mai, tãi da, da pâi kɛ̂i nɔ́ kpɛ́ni-kpɛni.

¹²Ŋánûa, ŋa kákpera fêi, ka kɛ́ yɛ̂ɛ ńyãa, kpɛ́ni fêi, ńyãa máŋ ŋa kɛ́ yɛ̂ɛ káa. Káfe mɛni nyɔ́mɔɔ kɛ́ ni a ńyãa;

¹³ka gɔ́lɔŋ a gɛ́ɛ ŋa Duŋ Lɛ́lɛɛi ƃò kápɔ naa fulɔi, kpɛ́ni fêi, kɔlɔ-fela è kɛ̀ ŋ́gbonôi;

¹⁴yɛ̂ɛ berei ŋ́gɛ-perei è kɛ̀ la kâa a kpîri wiɛɛi, káfe lono ni mâ, kpaa máŋ, káfe káŋɛi nàɣîŋ ni ḿɛi, kɛ́lɛ, ka káyee see mû yɛ̂ɛ Ɣâla ŋɔkéla, yɛ̂ɛ ŋɔ́nɔ Zîsɛ Kôrai.

¹⁵Lé ƃa kɛ́ a ǹii-laai kɛ̀ káyêei? Kpɛ́ni fêi, ŋa kámaa sêre-faa kɛ̀ a gɛ́ɛ pere eêi kɛ̀ naa, kâi pɔ̂ri káŋɛi-kao kulâi ká dɛɛ ḿbɔ.

¹⁶Ŋa nâa kɛ́ a kákpɔara-nuu, kpɛ́ni fêi, ŋa dɔ̃yâi ƃó kâai?

¹⁷Da ŋ̀wɛ̂lii ká kɛ́ díƃelai ma-pere, kɛ́lɛ, sâpo lɛ́lɛɛ fe ma; da ŋ̀wɛ̂lii dí kwa ka-ni kúŋa kɔ́lɛ a gɛ́ɛ ká kɛ́ díƃelai ma-pere.

¹⁸Kpɛ́ni fêi, ǹɛ́lɛɛ̂i a gɛ́ɛ núu é kákɛ ká kɛ́ ŋɔƃélai ma-pere sâpo lɛ́lɛɛ mɛni ma, ǹyaŋ ve nɔ́ a sɛŋ fɛ̀ɛ tãi ŋa kɛ̂ la kákɔlɛi.

¹⁹Ŋánîa-pɛlɛɛi, ŋ́gaa ŋɔ́nɔ mɛni-soli su kámɛni ma, é lɛ́ɛ la zu Kôrai é kɛ́ kákponôi a ǹɛ́lɛɛ!

²⁰Ŋâi kɛ̀ kákɔlɛ tãi ŋí su ŋâi ńono-woo ma faleŋ, kpɛ́ni fêi, ŋ́gili puɔɔ̂i kámaa-mɛni ma.

²¹Ka m̀ó mâ, káai ŋ̀wɛ̂lii ká kɛ́ dɔ̂ŋ mui, káfe pâi káwoli tɔɔ̂i dɔ̂ŋ ma?

²²Kpɛ́ni fêi, bɔ̃yɛɛ̂i a gɛ́ɛ Eberaɣɛ̃ɛ e lóŋ-surɔŋ feerɛ maa sɔlɔ ƃô, é dɔnɔ sɔlɔ ƃó luɛ-nɛni ma é gbeli sɔlɔ ƃó nɛnî ŋuŋ-ma-ƃoɔ ma.

²³Kɛ́lɛ, nyíi e zɔlɔ ƃô ǹuɛ-nɛnii mai, e zɔlɔ ƃô nɔ́ a lóŋ maa sɔlɔ ƃó-pere. Kɛ́lɛ, nyíi e zɔlɔ ƃô nɛnî ŋuŋ-ma-ƃoɔi mai, e zɔlɔ ƃô Ɣâla ŋɔkono-teei sârai.

²⁴Mɛni-ŋai ŋí káa nɔ́ yɛ̂ɛ saŋ-woo mɛni ŋá lɛ́ mɛni ma. Ǹɛnî feerɛi ŋí díkaa a gbanaŋ-woo kɛ́ɛ feerɛi. Dɔnɔ è kùla Sana Yeei ma, nyíi ŋɔnîa-pɛlɛɛi díkaa a luɛ-ŋai; maa-nuui ƃa Eega.

²⁵Eega maa-mɛni káa nɔ́ yɛ̂ɛ Sana Yeei nyíi gáa Arebia-lɔii sui; m̀óloŋɔɔ̂i Zerusâlɛŋ ma nyíi gáa sâa naai, kpɛ́ni fêi, gáa luɛ-laai da ŋɔnîa-pɛlɛɛi.

²⁶Kɛ́lɛ, Zerusâlɛŋ nyíi gáa ɣelêi-perei, ŋuŋ ma ƃoɔi, ǹyaŋ gɛ ƃo a kúlee.

²⁷Kpɛ́ni fêi, bɔ̃yɛɛ̂i, “Lii-nɛ̃ɛ kula, yái íkpomâi ífa lóŋ kàai; láɣi a ɣelêi-woo, yái ífe koi-tee-pɛrɛ pôlui; kpɛ́ni fêi, gbóma-nɛnii lonii támaâi é tɛ́ɛ nɛnîi ma surɔ̂ŋ káa ǹyêei.”

²⁸Gɛ̀ ní, ŋánûa, yɛ̂ɛ bere la Aise è kɛ̀ la a kono-tee ŋ̀aa-see kɛ́-loŋ, bere nɔ́ ƃe kúkaa la kúa máŋ.

²⁹Kɛ́lɛ, tãi ti su, ǹúui dí zɔlɔ ƃô a núu-kpune maa sɔlɔ ƃó-perei, e ǹúui kpɔ̀ara nyíi dí zɔlɔ ƃô M̀ɔlêŋ sui. Bere ƃe gáa la sâa máŋ.

³⁰Kɛ́lɛ, le ƃe Ŋ̀âla-kɔlɔi a mòi? “Ǹuɛ-nɛnîi kpɛ́ da ǹóŋ; kpɛ́ni fêi, ǹóŋ da nɛnî ŋuŋ-ma-ƃoɔi ŋɔlóŋ dífe pâi kɛ̂i a bɔɔ-sɛŋ sɔlɔ ƃó-nia-pɛlɛɛ gîe ma.”

³¹Mɛni ma, ŋánûa, kúfe a ǹuɛ-nɛnîi lonii, kɛ́lɛ, kúkaa a ŋuŋ-ma-ƃo-nɛnii lonii.