Read Kpelle Ifisiɛŋ 6 Bible Online

Ifisiɛŋ 6 - Kpelle bible

Ifisiɛŋ 6

¹Nîa-pɛlɛɛ, ka kákaa-ƃela wóo mɛni Kúnuu-namui kponôi, kpɛ́ni fêi, nyíŋi káa a tɔ̃yâ.

²“Bâa kɛ́ ínâŋ ma da ílee” (dɔ̂ŋ maa-ŋuŋ ká ŋí nyíi gono-tee-wooi káa mai),

³“a gɛ́ɛ í mɛni lɛ́lɛɛ sɔlɔ ƃo, ífulu-laai su é kôya ǹɔii ma ƃɛ.”

⁴Lóŋ-kaa-naŋ-ŋa, káfe kálônii líi ŋwana-mɛni kɛ̀, kɛ́lɛ, ka dítɔɔ Kúnuu-namui ŋɔsɛŋ-lɛɛi su da ŋɔyao-maai.

⁵Luɛ-ŋa, ka diai wóo mɛni díkaa a kámɛi-ƃela ǹɔii ma ƃɛi. Ka yao dîa ka ƃaa kɛ́-maa tɛɛ dípɔ a kálii kélee, yɛ̂ɛ berei ka Kôrai wóo mɛni lai.

⁶Káfe nuu-ŋɛi-woo mɛni kɛ̀ nɔ́ a dia. Káfè kɛ̀ nɔ́ a núu lii-laa-ƃela. Kɛ́lɛ, ka kɛ́ yɛ̂ɛ Kôrai yée-mu-ƃela, ká kɛ́ Ɣâla nia-mɛni kɛ̀ é kúla kálii su.

⁷Ka kátii kɛ́ é kúla kálii su yɛ̂ɛ kà kɛ̀ gɛ̂i Kúnuu-namui mi, kɛ́lɛ, núu-kpune fei.

⁸Kpɛ́ni fêi, ka gɔ́lɔŋ mɛnii kélee núu a gɛ̀i, é kɛ́ ni a luɛ, kpaa máŋ luɛ fei, a pâi maa-mɛni-ŋai ti sɔlɔ ƃôi Kúnuu-namui yêei.

⁹Nuu-mɛi-ƃela, ka mɛni tɔnɔi ti kɛ́ a dia. Káfe dímaa yao. Ka gɔ́lɔŋ a gɛ́ɛ ǹúui gáa a ka dîa-ni kámɛi-nuui káa Ɣâla-taa. Gáa núu kélee mɛni ma.

¹⁰Gbɛɛ ŋái, kákponôi é kpánaŋ Kúnuu-namui kponôi da ŋɔwála-wala-laai ŋɔsu-kpanaŋ.

¹¹Ka Ɣâla ŋɔkɔ-kɔ-sãai kélee tóo káa a gɛ́ɛ pɔ̂ri é kɛ́ kâa ka tɔɔ Dɛ̂ƃele ŋɔwôya-tua-pere-ŋai dîa.

¹²Kpɛ́ni fêi, kúfe kɔ̂i núu-kpune pɔ, kɛ́lɛ, kúkaa kɔ̂i nuu-mɛi-ƃelai pɔ, nyíi-ŋai díkaa a ŋwála-wala-ƃelai. Díkaa a tãi ŋí su-lɔii kpiniɛi su-nuu tuɛ-ƃela nyɔ́mɔɔ-ŋa, dí ƃo a nyînaŋ nyɔ́mɔɔ-ŋa nyînaŋ nyɔ́mɔɔ-ŋai pɔ taai.

¹³Mɛni ma ka Ɣâla ŋɔkɔ-kɔ-sãai kélee tóo kâa, a gɛ́ɛ pɔ̂ri é kɛ́ káa ká tɔ́ɔ ŋele nyɔ́mɔɔi su. Kà kpɛ̀ɛ nyíŋi kélee ma ka tɔ̂ɔ.

¹⁴Mɛni ma kà kpɛ̀ɛ a dɔ̃yâ-bɛtii toɔɔ káleŋei, ká dɔ̃yâ-laa kɔli-kalaŋ pɛ́lɛ kákeŋe lá, ka Duŋ Lɛ́lɛɛi ŋɔlii-sêe kɔɔ-ŋa-kɔlɔi lɔ́ kákɔɔ ŋá kákpîŋ kpɛtɛ mɛ̂ni ma, ká tɔ́ɔ.

¹⁶Nyíŋí kélee pôlu ma, ka laa-laa kɔli-kalaŋ soŋ nyíi ka pɔ̂ri sɔnyɔŋ-nuu ŋɔsɔla-ŋɔŋ kélee paâi lai.

¹⁷Ka m̀alo-lâa-gbaƃɛlɛi síɣe, da M̀ɔlêŋ ŋɔƃóa-sɔkpɔ̂i nyíi gáa a Ɣâla ŋɔwóoi.

¹⁸Ka Ɣâla fɛli M̀ɔlêŋ su a tãi kélee a Ɣâla-fɛli pere-sii kélee mare-kɛɛ-pere su. Ka kámɛi káa fɔlɔ-fɔ̂lɔ su, ka Ɣâla marê kɛ́ Ŋ̀âla-ƃelai kélee mɛ̂ni ma.

¹⁹Ka Ɣâla fɛli máŋ ḿɛni ma a gɛ́ɛ ŋa mɛnii kɔlɔŋ ŋa pâi m̀ôi tãi ŋà ńâ ƃò-la a gɛ́ɛ ŋa Duŋ Lɛ́lɛɛi su loo-mɛnii ƃo a lii-kpelei.

²⁰Ŋ́gaa a Ɣâla pɔɔ-ŋa-nuu Duŋ Lɛ́lɛɛi mɛni ma, ŋ́gɛ ƃo yɔlɔ ŋá. Ka Ɣâla fɛli a gɛ́ɛ ŋà kɛ̀ Duŋ Lɛ́lɛɛi ƃôi, ŋa m̀ó a lii-kpele yɛ̂ɛ berei fɛ̂ɛ ŋa m̀ó lai.

²¹Tekekɔ nyíi gáa a kúƃarâŋ nuu wɛli-kɛ-maa sui, gɛ ƃo a Kúnuu-namui ŋɔtii-kɛ-nuu sãai, a pâi mɛnii kélee ƃôi káa a gɛ́ɛ ká gɔ́lɔŋ berei ŋ́gaa la da mɛnii ŋa gɛ̂i.

²²Ŋá dɛ̀ɛ kápɔ naa mɛnii ŋí ma a gɛ́ɛ ka gɔ́lɔŋ berei kúkaa la, a gɛ́ɛ ŋɔ́nɔ e kálii kpele.

²³Lii-see é kɛ́ ŋánûai dîa da laa-la-wɛli-kɛ-maa é kúla Kúnâŋ Ɣâla yêei da Kúnuu-namui Zîsɛ Kôrai.

²⁴Ƃɛlɛ-sêe é kɛ́ diai kélee dîa dí Kúnuu-namui Zîsɛ Kôrai wɛli ni a wɛli-kɛ-maa nyíi va sâai.