Read Kpelle Felepiɛŋ 1 Bible Online

Felepiɛŋ 1 - Kpelle bible

Felepiɛŋ 1

¹Ńyãa Pɔ̂ɔ kwa Temete kúkaa a Zîsɛ Kôrai yée-mu-ƃela, Felepâ-Ɣala-ƃelai kélee da nàa Kôrai-toli-kpɔŋ ŋɔtíi-mɛi-ƃelai é pɛ́lɛ nàa dìkɛŋ-ŋai dîa nyíi-ŋai díkaa Zîsɛ Kôrai kponôi:

²Ƃɛlɛ-sêe da lii-sêe dí kɛ́ káyêei e kúla Kúnâŋ Ɣâla yêei da Kúnuu-namui Zîsɛ Kôrai.

³Tãi kámaa-mɛni a tôo la ŋ́gili ŋái, ŋa sɛɣɛi-fei tɛ̀ɛ Ŋáɣâlai pɔ.

⁴Tãi kélee ŋà Ɣâla fɛ̀li la kákelee kámɛni mai, ŋa vɛ̀li a lii-nɛ̃ɛ.

⁵Ŋa Ŋáɣâlai sɛɣɛi fè kákpɔŋ-maai mɛni ma Duŋ Lɛ́lɛɛi su é síɣe tãi ma ka zɔlɔ ƃo lai é tóo tãi ŋí ma.

⁶Ńaâi kpɔ́ la a gɛ́ɛ ǹúui tíi lɛ́lɛɛ kɔ́ɔ pîlaŋ kákponôi a pâi ǹáa kulâi a Zîsɛ Kôrai pa-tãi.

⁷Ǹɛ́lɛɛ̂i kámaa-mɛni kíli é tóo ŋá kákelee, kpɛ́ni fêi, kákaa ńii su, kwa ka-ni ku ƃo a m̀ɛlɛ-seei sɔlɔ ƃo-ƃela, ŋ́gɛɛ máŋ kpini-pɛrɛ mui, da ńdɔɔ Duŋ Lɛ́lɛɛi mɛni ma e pɛlɛ ŋɔtɔ̃yâi mai.

⁸Ɣâla káa a ŋásêre a berei ŋa kákelee káwɛ̂lii la a Zîsɛ Kôrai ŋɔwɛli kɛ́-maai.

⁹Ŋa Ɣâla fɛlîi a gɛ́ɛ káwɛli-kɛ-maai e ƃɔlɔ a zu kɛtɛ mɛni-kɔlɔŋɔɔ su da mɛni-ŋa-kaa,

¹⁰a gɛ́ɛ ka pɔ̂ri mɛni lɛ́lɛɛ lɛ̂i, a gɛ́ɛ ŋɔ́nɔ kákɛ a kámaa waa kásɔŋ fe kɛ́ káa Kôrai ŋɔɣelei mɛni ma.

¹¹Kálaa fɛɛ̂i a tɔ̃yâ laa-la ŋɔƃa nyíi pa Zîsɛ Kôrai sârai Ɣâla ŋɔfólo-laai da ŋɔlaa-maa-tɛi mɛni ma.

¹²Ŋánûa, ŋa ŋ̀wɛ̂lii ká gɔ́lɔŋ a gɛ́ɛ mɛni-ŋai kɛ̀ a ńyãai dí kɛ̀ a gɛ́ɛ Duŋ Lɛ́lɛɛi e li tuɛ-pere.

¹³Gɔmɛnɛi ŋuŋ-tuɛ ǹɔii maa kpɛ́-ƃelai kélee da ǹúu kpeli-ŋai dí kɛ̀ a gɔlɔ-ŋɔɔ a gɛ́ɛ gbini-pɛrɛi ŋá zìɣei, ŋá zìɣe Kôrai mɛni ma.

¹⁴Ŋánûai dama-ɣele da nâa láa a Kúnuu-namui ŋákpini-pɛrɛ siɣeɛ̂i sârai, dílii a kpele kpɔ́ a dámaa a gɛ́ɛ dífe yao a Ɣâla ŋɔwóoi ƃoɔ.

¹⁵Núu da-ni da Kôrai maa-mɛni ƃo a tólo da ŋɔ̃lɛ, kɛ́lɛ, núu kpeli-ŋai da mò a lii-lɛlɛ.

¹⁶Ǹyaŋ maa-ƃelai ŋí da gɛ̀ é kúla wɛli-kɛ-maa su. Dí gɔ́lɔŋ dí ḿbu ƃɛ a gɛ́ɛ ŋa Duŋ Lɛ́lɛɛi maa kɔ̃́ɔ.

¹⁷Kɛ́lɛ, ǹúui duɛ-tuɛ-ŋai dí Kôrai maa-mɛni ƃo é kúla ŋɔ̃lɛ kɛ́ɛ su, ve kula ni dílii su. Kɛ́lɛ, dí kɛ̀ gâai a gɛ́ɛ dí kɛ̀ ńii sólîi tãi ŋá kɛ̀ la gbini-pɛrɛ mui.

¹⁸Le ƃe ŋaŋ? Gáa nɔ́ a sɛŋ a gɛ́ɛ pere-sii kélee su, à nɛ̀ɛ ma kpîŋ é kɛ́ a wôya-pere kpaa máŋ tɔ̃yâ-pere, Kôrai maa-mɛni ƃóɔi; ǹyaŋ ńii lâai maa-mɛni ma.

¹⁹Tɔ̃yâ ma, ńii a pâi nɛɛ̂i nɔ́ wɔlɔ. Kpɛ́ni fêi, ŋa gɔ́lɔŋ a gɛ́ɛ Káɣâla-fɛliɛ su da Zîsɛ Kôrai Ŋɔmɔ̂leŋ ŋɔkpɔŋ-maai, nyíŋi a pâi kɛ̂i a ŋáƃalo-laa,

²⁰yɛ̂ɛ berei ŋátɔ̃yâ-maa-kpɛŋ káa la da gili-kɛ-zui gáa ǹyêei a gɛ́ɛ fe pâi ŋumɛ̂i mɛni kélee ma, kɛ́lɛ, lii-kpele támaa a pâi nâa kɛ̂i ńyêei, yɛ̂ɛ berei e wɔ́lɔ kɛ̀ la ńyêei, a gɛ́ɛ ŋa pâi ƃaa kɛ́-maa tɛɛ̂i Kôrai pɔ, à nɛ̀ɛ ma máŋ ŋá kɛ́ a ḿvulu kpaa máŋ ŋá sáa.

²¹Kpɛ́ni fêi, ŋákili-ŋa-siai su, kɛ-ɣeniɛ su-kulai ƃa Kôrai, saa kɛ́ ƃo a mɛni lɛ́lɛɛ máŋ é tɛ́ɛ nyíti ma.

²²Kɛ́lɛ, à kɛ̀ ŋ́gaa niî nɔ́ ɣele ma, gɛ̀ ní zu-kulai ƃa ŋá pâi nîi ƃâi. É máŋ kɛ́ ti nyíi ŋa pâi ǹɛ̂i, fe gɔ́lɔŋ.

²³Ŋ́gbaaŋɔɔ̂i ŋá ǹɛ́ a gɛ́ɛ ŋá kɛ́ ɣele ma kpaa máŋ ŋá sáa. Ŋa ŋ̀wɛ̂lii ŋá sáa ŋá kɛ́ Kôrai kɔlɛ, kpɛ́ni fêi, nyíti lɛ́lɛɛ̂i kpɔ́ a dámaa.

²⁴Kɛ́lɛ, à kɛ̀ ŋà kɛ̀ ɣele ma, gɛ̀ ní mɛni lɛ́lɛɛ ká ti kámɛni ma.

²⁵Ńaâi kpɔ́ a nyíŋi a ǹɛ́lɛɛ. Ŋá gɔ́lɔŋ a gɛ́ɛ ŋa pâi kɛ̂i ɣele ma ŋá kɛ́ kákelee kákɔlɛ káƃɔlɔ mɛni ma da lii-nɛ̃ɛ kúlaa laa-la su,

²⁶a gɛ́ɛ sâpo támaa é kɛ́ káyêei ka lii-nɛ̃ɛ kula Kôrai kponôi ńzârai, kpɛ́ni fêi, ŋa pâi kápɔ ŋɔ́nɔ.

²⁷Ka ǹɛɛ nɔ́ naa kakɛ-ɣeniɛi kɛ-pere é kɛ́ Kôrai ŋɔtuŋ lɛ́lɛɛi ŋɔperei ma, a gɛ́ɛ a ǹɛɛ ma máŋ ŋá pá a gɛ́ɛ ŋá kákaa kpaa máŋ ŋá kɛ́ ŋ́ɛi pôlu, ŋá mɛni a gɛ́ɛ kákaa tɔ̂ɔni a gbanaŋɔɔ mɔ̂leŋ tɔnɔ su a kili-ŋa-sia tɔnɔ, kakɛ mɛni kâa gîe ma Duŋ Lɛ́lɛɛi maa-laa-lai mɛni ma,

²⁸káfe yao kákpɔara-ƃelai yee-ŋa sɛŋ kélee ma. Ǹyaŋ ŋɛi-kɛ-maa su ponoɔ ká ŋí dísu-karai mɛni ma, kɛ́lɛ, gáa a ŋɛi-kɛ-maa káƃalo-laai mɛni ma, nyíi kula Ɣâla yêei.

²⁹Kpɛ́ni fêi, ǹɛ̂i kâa a gɛ́ɛ Kôrai maa-mɛni ma káfe laa nɔ́ la, kɛ́lɛ, ka mɛni soli káa mɛni ma.

³⁰Kákaa namu tɔnɔi kɔ̂i nyíi ká gàai, ǹyaŋ kákaa nâa mɛnîi a gɛ́ɛ gáa a ŋánamui.