Read Kpelle Felepiɛŋ 3 Bible Online

Felepiɛŋ 3 - Kpelle bible

Felepiɛŋ 3

¹Gbɛɛ ŋái, ŋánûa, ka lii-nɛ̃ɛ kula Kúnuu-namui kponôi. Vé ḿâ a mɛni kpanaŋ a gɛ́ɛ ŋa mɛni tɔnɔi pɔ̃yɛ kâa, ǹyaŋ ǹɛ́lɛɛ̂i kámɛni ma.

²Ka kámɛi káa a ŋ̀îla-ŋai. Ka kámɛi káa a díi nyɔ́mɔɔ-kɛ-ƃelai, ka kámɛi káa a diai da dísua tèe-tee diai.

³Kpɛ́ni fêi, kúa ƃe kúkaa a nuu-kpɛtɛ-ƃela a tɔ̃yâ, kúai kwa Ɣâla fɛli mɔ̂leŋ su, kúkɛ lii-nɛ̃ɛ kula Zîsɛ Kôrai kponôi. Kúfa lâa a núu kpono kpɛtɛ-mɛni.

⁴É máŋ kɛ́ ti ńyãa kpîŋ sâpo káa ńyêei máŋ a gɛ́ɛ ŋá láa a núu kpono kpɛtɛ-mɛni. À kɛ̀ sâpo káa núu da kpɛni yêei a gɛ́ɛ é láa a núu kpono kpɛtɛ-mɛni, sâpo támaa káa ńyêei.

⁵Ŋ́gaa a Eezuɛ-nuu, ŋa ƃo a Bɛŋsima ŋɔsuui su-nuu da. Dí ŋ́gbɛ̀tɛ tãi ŋá kɛ̀ la a folo lɔ́ɔlu mɛi saaƃai. Ŋ́gaa a Ibulu-nuu nyíi Ibulu-ŋa dí zɔlɔ ƃoi. À kɛ̀ a dɔ̂ŋ su-pere, ŋ́gaa a Faresii-nuu.

⁶À kɛ̀ a ŋátii kɛ-pere su, ŋá kɛ̀ a Kôrai-toli-kpɔŋ kpɔara-nuu. À kɛ̀ a tɔ̃yâ laa-la yɛ̂ɛ berei dɔ̂ŋ káa lai, ńzɔŋ fe kɛ́ ni má.

⁷Kɛ́lɛ, zɛŋ kélee kɛ̀ ńyêei ŋá gàa nɔ́ kpɛni-kpɛni Kôrai mɛni ma.

⁸Tɔ̃yâ ma ŋá ńyee ŋá-sɛŋ kélee kàa kpɛni-kpɛni, kpɛ́ni fêi, Ŋánuu-namui Zîsɛ Kôrai kɔlɔŋɔɔ mî tɛɛ̂i mɛni kélee ma. Ŋá sɛŋ kélee làŋ m̀aa mɛni ma. Ŋa sɛŋ kélee káa nɔ́ a kala, kpɛ́ni fêi, ŋa ŋ̀wɛ̂lii ŋa Kôrai sɔlɔ ƃo.

⁹Ŋa ŋ̀wɛ̂lii ŋá kɛ́ gbonôi, a gɛ́ɛ ŋ́gbîŋ tɔ̃yâ laa-la fè kɛ̀ ńyêei nyíi kula dɔ̂ŋ sui, kɛ́lɛ, fɛ̂ɛ dɔ̃yâ-laai nyíi gáa Kôrai kponôi laa-la sârai. Gáa a dɔ̃yâ-laai kùla Ɣâla yêei nyíi kùla laa-la sui,

¹⁰a gɛ́ɛ ŋa gɔ́lɔŋ da ŋɔmu-siɣe saa-yeei ŋɔwála-walai, ŋa ŋɔmɛni-soli-kaai da sɔlɔ ƃo, ŋá tela kɛ́ yɛ̂ɛ ǹyaa ŋɔsaai su.

¹¹À kɛ̀ ŋɔ́nɔ pere à kɛ̀ naa, ŋa mu-siɣe saa-yeei sɔlɔ ƃo.

¹²Vé a sɛŋ a gɛ́ɛ ŋa nâa nyíŋi sɔlɔ ƃo, kpaa máŋ da ŋ́gɛ ńaa a fɛ̂ɛ; kɛ́lɛ, ŋa kɔ̂i a gɛ́ɛ ŋá gɛ́ a ḿbɔɔ, kpɛ́ni fêi, Zîsɛ Kôrai a ŋ́gɛ a bɔ́ɔ.

¹³Ŋánûa, fe m̀ôi a gɛ́ɛ ŋa gɛ́ a ḿbɔɔ; kɛ́lɛ, ŋa mɛni tɔnɔ kɛ̂i. Ŋa niâi mɛnii ma gáa ḿbôlu-perei. Ŋa kɔ̂i a gbanaŋɔɔ mɛnii nyíi gáa ńduɛ-perei mɛni ma.

¹⁴Ŋa kɔ̂i a gɛ́ɛ ŋa seri mɛnii ma gáa ŋ́gili ŋái, a gɛ́ɛ ŋa maa pui sɔlɔ ƃo gáa Ŋ̀âla-taa-tolii mɛni ma nyíi Ɣâla a m̀ôi a kua Zîsɛ Kôrai kponôi.

¹⁵Tɔɔ kûai ku seriɛi zui kúkili-ŋa-siai é kɛ́ ŋí; à kɛ̀ kákili-ŋa-siai à kɛ̀ a da kpɛni mɛni kélee su, Ɣâla a pâi kákili-ŋa-sia nyɔ́mɔɔi lɛ̂i kâa máŋ.

¹⁶Tɔɔ nɔ́ zɛŋ nyíi kwa zɔlɔ ƃói, ku maa-tua kɛ́.

¹⁷Ŋánûa, ka kɛ́ a ḿbɔkɔ̂ŋ-ƃela gîe ma ka diai maa kpɛ́ɛ da sîa yɛ̂ɛ berei kwa sîa lai.

¹⁸Kpɛ́ni fêi, núu támaa káa naa ŋa wɔ́lɔ dímaa-mɛni ƃó kâa a tãi tá-maa, ŋ́gaa nâa m̀ôi kâa wɔlɔ-woo su a gɛ́ɛ díkaa a Kôrai ŋɔsaa-wurii kpɔara-ƃela.

¹⁹Díkpɛɛ ŋá ƃa su-kara. Díɣâlai ƃa díkoi, da dínîa kɛ̀ díŋumɛ-mɛni su. Díkili káa ǹɔii-su-sãai dîa.

²⁰Kpɛ́ni fêi, kúlɔii-namu-laai káa Ɣâla-taa, ƃɛi máŋ kwa ƃalo-nuu maa kpɛŋ naai, nyíi gáa a Kúnuu-namui Zîsɛ Kôrai,

²¹nyíi pâi kúkpono maa-yeŋɔɔ-ŋai kɛ̂i a gɛ́ɛ dí kɛ́ yɛ̂ɛ ŋɔfólo-laa-kponoi ŋɔwála-wâlai sârai nyíi a pɔ̂ri kɛ̂ mì a gɛ́ɛ é pá a sɛŋ kélee gbîŋ kpono mai.