Read Kpelle Kolasiɛŋ 1 Bible Online

Kolasiɛŋ 1 - Kpelle bible

Kolasiɛŋ 1

¹Ńyãa Pɔ̂ɔ, ńyãai ŋ́gaa a Zîsɛ Kôrai ŋɔsia-nuu yɛ̂ɛ berei Ɣâla ŋɔnîa mɛnii káa lai, kwa Temete nyíi gáa a kúƃarâŋ nuui,

²A liî kúƃarâa Korai-ƃelai díkaa Kolasai, nyíi-ŋai laa-la káa díyêei máŋ Kôrai kponôi dípɔ: Ƃɛlɛ-sêe da lii-sêe dí kɛ́ káyêei e kula Kúnâŋ Ɣâla yeei.

³Kwà kɛ̀ Ɣâla fɛlîi kámɛni ma, kwa Ɣâla sɛɣɛ̂i fe a tãi kélee, nyíi gáa a Kúnuu-namui Zîsɛ Kôrai Ǹâŋ,

⁴kpɛ́ni fêi, kwa kálaa-lai maa-mɛni mɛni Zîsɛ Kôrai kponôi da ŋwɛli-kɛ-maai gáa káyêei Ŋ̀âla-ƃelai kélee mɛni mai.

⁵Kálaa-lai da káwɛli-kɛ-maai da kûla gili-kɛ-zui su nyíi ǹáâi kɛ́ɛ̂i kámɛni ma Ɣâla-taai. Ká gili-kɛ-zui ŋí maa-mɛni mɛ̀ni a maa-ŋuŋ dɔ̃yâ-wooi su, nyíi gáa a Duŋ Lɛ́lɛɛi.

⁶Duŋ Lɛ́lɛɛi a pá kápɔ. Gáa ƃâi ǹɔii su gwaa kélee gɛ ƃɔlɔ. Bere ƃé è kɛ̀ la kásama tãi ká Ɣâla ŋɔƃɛlɛ-sêei maa-mɛni mɛ̀ni la ká táre zu tɔ̃yâ sui,

⁷yɛ̂ɛ berei Ɛpafɔlɛ e nɛ̀ la kâai, nyíi gáa a kúƃarâŋ-wɛli-kɛ́-maa yée-mu-nuui. Gáa a Kôrai ŋɔtii-kɛ-nuu sãa kúpɔɔ ŋá.

⁸A káwɛli-kɛ-maai lɛ́ kûa M̀ɔlêŋ su.

⁹Mɛni ma é síɣe tãi ma ku mɛ̀ni lai, kúfe niî kpera ni Ɣâla fɛlîi kámɛni ma, a gɛ́ɛ kálaa e fɛɛ a ŋɔnîa-mɛnii kɔ́lɔŋ-pere Ɣâla-mɛni ŋɔtáre su da ŋɔmɛni ŋá-kaai,

¹⁰a gɛ́ɛ kútûa-perei é kɛ́ a maa nɛ̃ɛ Kúnuu-namui mɛni ma, ǹíi é láa zu kpɔ́ a ǹɛ́lɛɛ, ká ƃá tíi lɛ́lɛɛ kélee su, ká ƃɔlɔ Ɣâla mɛni kɔlɔŋɔɔ su.

¹¹Kasu é kpánaŋ a wála-wala kélee ŋɔfólo-laai ŋɔwála-walai sârai lii-kpele kélee mɛni ma da mɔ̃lɛ su-koya a lii-nɛ̃ɛ,

¹²ka sɛɣɛi-fei tɛɛ Nàŋ-nuui pɔ nyíi kúkpɛtɛ a gɛ́ɛ ku kɛ́ a Ŋ̀âla-ƃelai dítûa-perei da kɛ-ƃela gwaa-ponoɔi sui.

¹³A kúkula kpini ŋɔwála-walai su a li a kua ŋɔwɛli-kɛ-maa-Loŋ ŋɔkâloŋ-laai su,

¹⁴nyíi kúŋuŋ-ma-ƃoi káa gbonôi, nyíi gáa a kúsɔnyɔ̂ŋ su-mɛni-lɛɛi.

¹⁵Gáa a Ŋ̀âlai nyíi kúfa gâai bɔɔkɔ̂ŋ, gáa a ǹúui maa-ŋuŋ ŋ̀éniɛi su kpɛtɛ-sãai kélee tuɛ;

¹⁶kpɛ́ni fêi, sɛŋ kélee e kpɛtɛ gbonôi, ŋ̀elei su-sãai kélee da ǹɔii ma-sãai kélee, nyíi-ŋai kwa díkâa da nyíi-ŋai kúfa díkaâi, é máŋ kɛ́ a kâloŋ-laa, kpaa nuu-namu-laa, kpaa nuu-mɛi-ƃela, kpaa máŋ wála-wala-ƃela-sɛŋ kélee e kpɛ̀tɛ zarâi, m̀aa-mɛni ma.

¹⁷Gáa sɛŋ kélee tuɛ, sɛŋ kélee kɛ́ gîe-ni sòŋ gbonôi.

¹⁸Gáa a gbonoi ŋuŋ nyíi gáa a Kôrai-toli-kpɔŋ; gáa a gɔɔ-pîlanii, gɛ ƃo a ǹúui maa-ŋuŋ kùla saa yêei, a gɛ́ɛ dɔɔ̂i é kɛ́ a gɛ́tɛ mɛni kélee su.

¹⁹Kpɛ́ni fêi, Ɣâla e ŋ̀wɛli a gɛ́ɛ Ŋɔɣâla-laai kélee é kɛ́ gbonôi.

²⁰Ɣâla a pá pôlu a sɛŋ kélee gbîŋ pɔ Kôrai kponôi, à nɛ̀ɛ ma kpîŋ é kɛ́ ǹɔii ma ƃɛ kpaa máŋ ɣelei-pere. E lii-sêe kɛ̀ a ŋɔŋãai puɔɔ ŋɔsaa-wurii ma.

²¹Káai ká kɛ̀ a ŋɔ̃yâ-ŋa a tãi tɔnɔ, kálii su nyɔ́mɔɔ Ɣâla ma, ká kɛ́ mɛni nyɔ́mɔɔ-ŋa kɛ̀i,

²²a nâa pá a káa pôlu a gbonoi ŋɔsaai sârai, a gɛ́ɛ é kálɛ a maa-waa ƃela da sɔŋ-kpɛɛ-maa-ƃela da ǹûai dímaa-kulai fe diai.

²³Nyíŋi a pɔ̂ri kɛ̂i à kɛ̀ kà lɛ̀ɛ nɔ́ naa-lai su, kálii kɛ́ ƃo tɔnɔɔ ka fɔlɔ-fɔlɔ, káfa kákili kùla Duŋ Lɛ́lɛɛi ŋɔkili-kɛ-zui su nyíi ká mɛ̀nii. Duŋ Lɛ́lɛɛi ŋí e ƃo ŋeniɛi su gwaa kélee, nyíi ńyãa Pɔ̂ɔ ŋá kɛ̀ a maa-tii-kɛ-nuui.

²⁴Ŋa nâa lii-nɛ̃ɛ kulâi ŋámɛni-soli-kaai su kámɛni ma. Ŋ́gaa mɛni-solii ŋí ŋ̀aa-see kɛ̂i a ŋ́gbono. Kôrai e mɛni-solii ŋí lɛ̀ɛ naa mî ŋɔkponoi mɛni ma, ǹyaa ƃa Kôrai-toli-kpɔŋ.

²⁵Ŋá kɛ̀ a Kôrai-toli-kpɔŋ ŋɔtii-kɛ-nuu, yɛ̂ɛ berei Ɣâla e ńɛ̀ la kámɛni ma a gɛ́ɛ ŋá Ɣâla ŋɔwóoi lɛ́ kâa a ǹɛ́lɛɛi,

²⁶nyíi kɛ̀ a loo-mɛni ŋ̀éniɛi-su-ƃelai dia a tãi su kôya, kɛ́lɛ, a nâa lɛ́ Ŋ̀âla-ƃelai diai.

²⁷Ɣâla e gbɛ̀tɛ gíli ŋá a gɛ́ɛ e nɛ berei noo-mɛnii ŋí ŋɔtɔɔ-laai da ŋɔfólo-laai kɛ́tɛ̂i la Zɛ̃tai-ŋai sama, nyíi gáa a Kôrai kákponôi. Ǹyaa ƃa volo-laai maa-kili-kɛ-zui.

²⁸Kwa maa-mɛni ƃò, kúkɛ núu kélee lia-woo ƃo, kúkɛ sɛŋ lɛ̂ núu kélee ma táre kélee su, a gɛ́ɛ ku núu kélee lɛ́ a ǹáa fɛ́ɛ Kôrai kponôi.

²⁹Nyíŋi mɛni ma ŋa tíi kɛ̂i, ŋ́gɛ kɔ kpɔ́ a ŋwála-walai kélee e bu ŋ́gbonôi kpɔ́ a gbanaŋɔɔi.