Read Kpelle Tɛsɛlôniɛŋ Maa-ŋuŋ 2 Bible Online

Tɛsɛlôniɛŋ Maa-ŋuŋ 2 - Kpelle bible

Tɛsɛlôniɛŋ Maa-ŋuŋ 2

¹Kpɛ́ni fêi, ŋánûa, káa kpîŋ ka gɔ́lɔŋ a gɛ́ɛ kúnaa-kaa-siai ku gɛ̀ kápɔ naai, ve kɛ́ ni nɔ́ kpɛni-kpɛni;

²kɛ́lɛ, berei máŋ ku mɛni-soli kàa la Felepâi dí ŋumɛ-tua kɛ́ naa a kúai, yɛ̂ɛ berei káa kpîŋ ká gɔ́lɔŋ lai, lii-kpele é kɛ́ kúyêei Kúɣâlai kponôi a gɛ́ɛ ku Ɣâla ŋɔtuŋ lɛ́lɛɛi ƃó kâa, berei máŋ núu támaa dífe kɛ́ ni a dífaa la mai.

³Kpɛ́ni fêi, Kúɣâla-woo-ƃoɔi fe kula ni pɔara-maa su, kpaa máŋ mɛni maa liƃiɛ, kpaa máŋ é kúla wôya su;

⁴kɛ́lɛ, yɛ̂ɛ berei Ɣâla e kúlɛ̀ la a gɛ́ɛ e Duŋ Lɛ́lɛɛi lɛɛ kúyêei, bere nɔ́ ƃe kwa lôno la, kúfa núu-kpune líi làa, kɛ́lɛ, kwa Ɣâla líi làa, nyíi a kúlii-ŋai su kɔ̀ɔŋ.

⁵Ka gɔ́lɔŋ a gɛ́ɛ kúfe niî la-nɛ̃ɛ maa-woo-ŋa ƃo ni, kpaa máŋ sɛŋ-maa-lii-teɛɛ mɛi-pɛlɛ woo-ŋa yɛ̂ɛ berei Ɣâla káa la a maa-serei;

⁶kúfe laa-maa-tɛ kɔri ni núu-kpune yêei, káyêei, kpaa máŋ núu da kpɛni-ŋa, berei máŋ kûi pɔ̂ri tɔɔ̂i la kútɔ̃yâi mɛni ma yɛ̂ɛ Kôrai ŋɔsia-ƃelai.

⁷Kɛ́lɛ, ku kɛ̀ a kúsɔŋ lɛ́lɛɛ kásama yɛ̂ɛ berei nia-pɛlɛɛ mɛi-kaa-nɛni a ŋɔnîa-pɛlɛɛi mɛi kâa lai.

⁸Mɛni ma ku káwɛ̀li kpɔ́ a dámaa, mɛni ƃe kúfe Ɣâla ŋɔtuŋ lɛ́lɛɛi tɛɛ ni la nɔ́ kápɔ, kɛ́lɛ, ku ku-kpîŋ tɛ̀ɛ máŋ kápɔ, kpɛ́ni fêi, ká kɛ̀ a kúwɛli-kɛ-maa-ƃela kpanaŋɔɔ-ŋa.

⁹Kpɛ́ni fêi, ŋánûa, kútii da kúmɔ̃lɛi maa-mɛni káa kákili ŋá; ku tíi kɛ̀ a kpini da folo a gɛ́ɛ tãi ku kɛ̀ Ɣâla ŋɔtuŋ lɛ́lɛɛi ƃôi la kâai, kúfe kátà tɔnɔ kpîŋ kpàaŋ.

¹⁰Kákaa a sere-ŋa, Ɣâla máŋ kɛ́ ƃo a sere a gɛ́ɛ kútûa-perei è kɛ̀ a maa waa tɔ̃yâ-pere su kúsɔŋ fe kua káai a ǹaa-la-ƃelai kásama;

¹¹kpɛ́ni fêi, ka gɔ́lɔŋ berei ku kalia-woo ƃò la tɛi-tɛi, yɛ̂ɛ berei nîa-pɛlɛɛ dínâŋ a dília-woo ƃò lai, ku kálii kpele ku m̀ó kâa

¹²a gɛ́ɛ ka fulu-laa maa-nɛ̃ɛ kɛ́ Ɣâla mɛni ma, nyíi kátòli gbîŋ kaloŋ-laai su da ŋɔfólo-laai.

¹³Kwa Ɣâla sɛɣɛ̂i fe máŋ a tãi kélee nyíŋi mɛni ma a gɛ́ɛ tãi ká Ɣâla ŋɔwóoi sɔlɔ ƃô la nyíi ká mɛ̀ni kúlai, ká káyee sèe mu, káfe káyee see ni mu yɛ̂ɛ núu-kpune ŋɔwóo, kɛ́lɛ, ká káyee sèe mu yɛ̂ɛ berei gáa la a Ɣâla ŋɔwóoi, nyíi tíi kɛ̂i káai a ǹaa-la-ƃelai kákponôi.

¹⁴Kpɛ́ni fêi, ŋánûa, ká kɛ̀ a Ŋ̀âla-toli-kpɔŋ-ŋai díkaa Zudai dípɔɔkɔ̂ŋ-ƃela Zîsɛ Kôrai kponôi; kpɛ́ni fêi, ká mɛni-soli tɔnɔi ti kàa kákpɔɔi-ƃela yêei yɛ̂ɛ berei dí gàa la Zûu-ŋai yêei.

¹⁵Dí Kúnuu-namui Zîsɛ pàa da Ɣâla ŋɔlóno kɛ́-ƃelai, dí kúkpɛ̂. Dífe Ɣâla líi laa ni. Dí tɔɔ núu kélee ma.

¹⁶Dí kúkpera lónoɔ ma Zɛ̃tai-ŋai pɔ a gɛ́ɛ da pâi ƃálôi-mɛni ma Zûu-ŋai dísɔnyɔ̂ŋ káa nɔ́ pûi ma a ɣele kélee. Kɛ́lɛ, Ɣâla ŋɔlii-ŋwanai a pá dípɔ a gbɛɛ ŋái!

¹⁷Kɛ́lɛ, ŋánûa, tãi kúkponôi fe kɛ́ ni la kákɔlɛ a tãi kpua-loŋ, kɛ́lɛ, kúlii fei, kú kɛ̀ káwɛ̂lii a gbanaŋɔɔ a gɛ́ɛ kwa kaa-ni ku kúŋɛi pu gîei;

¹⁸kpɛ́ni fêi, ku kɛ̀ ŋ̀wɛ̂lii a gɛ́ɛ ku pa kápɔ-ńyaa, Pɔ̂ɔ, ŋa gbɛtɛ ŋ́gili ŋá a tãi támaa-kɛ́lɛ, Sêtɔŋ e kúkpera.

¹⁹Kúkili-kɛ-zui ƃa gbɛ̀ɛ, kpaa máŋ kulii-nɛ̃ɛi, kpaa máŋ kúyoŋkâi Kúnuu-namui Zîsɛ ŋɛi tãi a pâ lai? Káa fei?

²⁰Kpɛ́ni fêi, káa ƃa kúfolo-laai da kúlii-nɛɛi.