Read Kpelle Tɛsɛlôniɛŋ Maa-ŋuŋ 4 Bible Online

Tɛsɛlôniɛŋ Maa-ŋuŋ 4 - Kpelle bible

Tɛsɛlôniɛŋ Maa-ŋuŋ 4

¹Gbɛɛ ŋái, ŋánûa, kwa kákpera fei, kúkɛ kalia-woo ƃo Kúnuu-namui Zîsɛ kponôi a gɛ́ɛ, yɛ̂ɛ berei ka káfulu-laai kɛ-pere maa kɔ́ri la kúyêei, da berei ka pɔ̂ri Ɣâla líi lâai lai, berei kákaa tuâi lai, ka gɛ́ ti a gbanaŋɔɔ a tãi kélee.

²Kpɛ́ni fêi, ka berei kɔ́lɔŋ ku kátenîŋ tɔ̀ɔ la Kúnuu-namui Zîsɛ sârai.

³Kpɛ́ni fêi, Ɣâla ŋɔnîa-mɛnii ká ŋí a gɛ́ɛ ka kɛ́ a maa-waa-ƃela a gɛ́ɛ ka kasu kula wulu-wulu-kɛɛ ma,

⁴a gɛ́ɛ núu kélee é berei kɔ́lɔŋ a pɔ̂ri nɛnî kulâi la gbîŋ mɛni ma maa-waa-laa su da ƃaa kɛ́-maai,

⁵ve gula pere-sii nyɔ́mɔɔ su yɛ̂ɛ Ɣâla-kpolowa nyíi ve Ɣâla kɔ́lɔŋ;

⁶a gɛ́ɛ núu da fe mɛni nyɔ́mɔɔ kɛ́ a m̀arâŋ-nuu, kpaa máŋ é wôya kɛ́ la mɛnii ŋí su, kpɛ́ni fêi, Kúnuu-namui kâa a mɛni-pɔɔ-teei kula-nuu mɛni-ŋai ŋí kélee su, yɛ̂ɛ berei ku dòo la kákili ŋá nâa tuɛ a gbanaŋɔɔi.

⁷Ɣâla fe kútoli ni a gɛ́ɛ ku kɛ́ a ǹûai dímaa fe waa ni, kɛ́lɛ, e kútòli a gɛ́ɛ ku kɛ́ a maa-waa-ƃela.

⁸Mɛni ma ǹúui kélee a ŋ̀ɛi naɣîŋ nyíŋi mɛi, va ŋ̀ɛi naɣîŋ núu-kpune mɛi, kɛ́lɛ, a ŋ̀ɛi naɣîŋ Ɣâla mɛi, nyíi Ŋɔmɔ̂leŋ Maa Waai tɛ̀ɛ kápɔi.

⁹Kɛ́lɛ, é pîlaŋ la wɛli-kɛ-maa ma káƃarâai mɛni ma, ve a sɛŋ a gɛ́ɛ núu e kɔlɔ pɔ̃yɛ kâa, kpɛ́ni fêi, Ɣâla a kákîe-ni wɛ́li-pere lɛ́ káa kpîŋ kâa;

¹⁰ǹyaŋ káƃarâai díkaa Masadonia gwaa kéleei, ka díkelee díwɛli ni kpɔ a dámaa. Kɛ́lɛ, ŋánûa, kwa kalia-woo ƃôi a gɛ́ɛ ka díwɛli kpɔ́ a dámaa a tãi kélee.

¹¹Ka kɔ́ kpɔ́ a gbanaŋɔɔ ka káfulu-laai maa yeŋ, ka káŋɛi kɛ́ nɔ́ kákpîŋ mɛni-ŋai dîa, ka tíi kɛ́ a káyee, yɛ̂ɛ berei ku mò la kâai;

¹²a gɛ́ɛ diai dífe a Ɣâla-ƃelai ƃaa kɛ́-maa é kɛ́ káa díŋɛi. Káfe kákili kɛ̀ núu da kélee ma.

¹³Kɛ́lɛ, ŋánûa, kúfa pɔ̂ri kálɛɛ̂i a káƃoɔɔ diai mɛni ma da wɔ́lɔ saai, a gɛ́ɛ káfe wɔlɔ yɛ̂ɛ berei ǹúu kpeli-ŋai da gɛ̀ lai, diai kili-kɛ-zu fe díyêei.

¹⁴Kpɛ́ni fêi, berei laa-la káa la kúyêei a gɛ́ɛ Zîsɛ e sàa e mu siɣe ŋɔ́nɔ saa yêei, bere nɔ́ ƃe máŋ Zîsɛ sârai Ɣâla a pâi pâi la a diai da wɔ́lɔ saai.

¹⁵Mɛni ma kwa nyíŋi ƃôi káa a Kúnuu-namui ŋɔwóoi a gɛ́ɛ kúai kúkaa ɣele mai, kúai pâi lɛɛ̂i ǹɔii ma ƃɛ é lɛ́ɛ la zu Kúnuu-namui é pâi, kúfe a zaa-ƃelai tuɛ-pere-ƃela.

¹⁶Kpɛ́ni fêi, Kúnuu-namui ǹyaa kpîŋ a pâi kulâi ŋ̀elei su a lolo-woo da Ŋ̀âla-taa-kela-ŋai dínuu kɛ́tɛi ŋɔtóli-woo da Ɣâla ŋɔtúrii-woo. Zaa-ƃelai nyíi-ŋai díkaa Kôrai kponôi da pâi dímu siɣêi fulɔi;

¹⁷gɛ̀ ní kúai kúkaa ɣele mai, kúai kwa lɛɛ̂i, Ɣâla a pâi kúsiɣêi kwa dîa-ni é tɛ́ a kúa ŋele-kɔlɔŋ su a gɛ́ɛ kwa Kúnuu-namui-ni ku kúkîe-ni kóyaŋ naa; ǹyaŋ kwa Kúnuu-namui-ni kwa pâi wɔ́lɔ kɛ̂i naa.

¹⁸Mɛni ma ka kákîe-ni ŋá nɛnɛ a ŋ̀óo-ŋai ŋí.