Read Kpelle Zasua 1 Bible Online

Zasua 1 - Kpelle bible

Zasua 1

¹Yâwɛɛ ŋɔtíi kɛ́ nuui Mose saá pôlu ma, Yâwɛɛ é mò Nuŋ ǹóŋ Zasua ma, nyíi kɛ̀ a Mose ŋɔkpɔŋ mâa nuui, ǹyɛɛ m̀ai,

²“Ŋátii kɛ́ nuui Mose a nâa saa. M̀ɛni ma, ímu síɣe ka Eezuɛ-ŋai ká lí Zɔdiŋ Ya-leei pôlu, ǹɔii ma nyíi ŋa pâi dɛɛ̂i kápɔi.

³Ǹɔii nyíi kélee ka sère m̀ai, ŋa pâi nàa tɛɛ̂i kápɔ yɛ̂ɛ berei ŋá ŋ́gono tèe la Mose yêei.

⁴É síɣe vɛ̃ɛ-kpâlaŋ su é lí Lɛƃanɔŋ lɔii su é seri ŋɔ́nɔ ǹya-lêe kɛ́tɛi ma nyíi da dòli a Yufeletii Ya-leei, ǹɔii kélee gáa Ita lɔii su é seri Mɛditɛrenia Yuoi ma vóloi lîi-perei, a pâi kɛ̂i a kálɔii-kpîniŋ.

⁵Núu da kélee yée fé pâi pɔrîi yâ ífulu-laai su. Ŋa pâi kɛ̂i íkɔlɛ yɛ̂ɛ berei nɔ́ ŋá kɛ̀ la Mose kɔlɛi. Ḿve pâi teêi ípôlu kpaa máŋ ŋá ḿbôlu tɔɔ yâ.

⁶Tɔɔ a gbanaŋɔɔ, í ílii kpele, kpɛ́ni fêi, yá ƃé pâi gɛ̂i ǹúai ŋí dí see ǹɔii ma ŋá ŋ́gono tèe la dínâŋ-ni yêei.

⁷Tɔɔ a gbanaŋɔɔ, í ílii kpéle, í dɔ̂ŋ-ŋai kélee mɛi káa nyíi-ŋai ŋátii kɛ́-nuui Mose è dɛ̀ɛ ípɔi. Ka dɔ̂ŋ-ŋai ŋí mɛi kâa, gɛ̀ ní ɣéniɛ a pâi nɛ̃ɛ̂i yâ.

⁸Ka tíi kɛ́ a dɔ̂ŋ-ŋai Ŋ̀âla-kɔlɔi ŋí sui a kpíni da fólo. Kà gɛ̀ tí, gɛ̀ ní ɣéniɛ a pâi nɛ̃ɛ̂i kâa, ká ƃûu ƃó.

⁹Fé m̀ó ní yâ? Tɔɔ a gbanaŋɔɔ, í ílii kpéle, ífe yao, ílii fé tòo pôlu, kpɛ́ni fêi, ńyãa Yâwɛɛ Íɣâlai, ŋa pâi kɛ̂i ípôlu ƃɛ́i kélee ƃa lî naai.”

¹⁰Nya ƃe Zasua è mò Eezuɛ ŋuŋ túɛ-ƃelai dîa ǹyɛɛi,

¹¹“Ka lí m̀ûui su ká mó ǹûai dîa a gɛ́ɛ dí díkpiri-ŋai kpɛtɛ, kpɛ́ni fêi, fólo saaƃa à tɛ̀ɛ, ka pâi Zɔdiŋ Ya-leei tîyenii ká sée ǹɔii ma Yâwɛɛ ká Ɣâlai a dɛɛ̂i ká pɔi.”

¹²Zasua è mò Lubiŋ, Gâa da Manasɛ ŋɔsuui su-ƃelai kpéli-ŋai dîa ǹyɛɛi,

¹³“Ŋ̀óoi é lɛ́ɛ kákili ŋá nyíi Mose, Yâwɛɛ ŋɔtíi kɛ́-nuui e mò kâai, a gɛ́ɛ Yâwɛɛ Káɣâlai káa kwaa ma kpɛtɛ̂i kámɛni ma. Ǹyaŋ a pâi ǹɔii ŋí tɛɛ̂i kápɔ.

¹⁴Kánɛyâai, kánîa-pɛlɛɛi da kátaa-tûlɛ-ŋai da pâi lɛɛ̂i Zɔdiŋ Ya-leei vóloi-ƃêlai pere. Kɛ́lɛ gɔ́ kɔ́-ƃelai kásamai da pâi Zɔdiŋ Ya-leei tíyenii díƃarâai túɛ a gɛ́ɛ dí kpɔŋ mâa tɛɛ dípɔ

¹⁵é lɛ̀ɛ la zu Yâwɛɛ é ǹɔii tɛ́ɛ kánûai pɔ́ yɛ̂ɛ berei è wɔ́lɔ dɛ̀ɛ la kápɔi. Gɛ̀ ní ká lene pôlu kálɔii ma nyíi Mose Yâwɛɛ ŋɔtíi kɛ́-nuui è dɛ̀ɛ kápɔi.”

¹⁶Lubiŋ, Gâa da Manasɛ ni ŋɔsuui su-ƃelai kpéli-ŋai dí Zasua wóo su tòo dîyɛɛ m̀ai, “Kwa pâi m̀ɛnii kélee kɛ̂i ya mò kûai, ǹyaŋ kwa pâi liî ƃɛ́i kélee ya kútɛ̀ɛ naai.

¹⁷Kwa pâi íwoo mɛnîi yɛ̂ɛ berei kú Mose wóo mɛ̀ni lai. Tɔɔ Yâwɛɛ Íɣâlai é kɛ́ íkɔlɛ yɛ̂ɛ berei máŋ è kɛ̀ la Mose pôlui.

¹⁸Ǹúui nyíi kélee pâi tɔɔ̂i yâ, va íwoo mɛnii, kwa pâi maa nûui paâi. Kɛ́lɛ tɔɔ a gbanaŋɔɔ, ílii kpeléɛ.”