Read Kpelle Zasua 15 Bible Online

Zasua 15 - Kpelle bible

Zasua 15

¹Dí Zuda ŋɔsuui su-ƃelai díwɔ̂ lɔii tɛ̂ɛ dípɔ yɛ̂ɛ berei dísuui káa lai. Dílɔii è làa a Mɛditɛrenia Yuoi é yéŋ Ziŋ Fɛ̃ɛ-kpalaŋ kwára Idɔŋ lɔii kɔyâŋ ma.

²Ǹɔii ŋí è làa Ǹyúo Saai kwára,

³é lí Akulaƃiŋ Yee kpaya-kpayai kwára pere, é tɛ́ɛ Ziŋ Fɛ̃ɛ-kpalaŋ su, é lí Kedɛ Bania taa-leei su é láa a Ɛzɔrɔ̃ŋ taa-leei, é tóo Ada taa-leei ma, é tínaŋ é lí Kaka taa-leei su.

⁴Ǹɔii è tɛ̀ɛ Amoŋ taa-leei kɔ̀lɛ, é tóo Ize lɔii ŋɔgoyaŋ perei ma, é seri Mɛditɛrenia Yuoi ma. Nyíŋi ƃé pâi kɛ̂i a kálɔii kwára-pere koyâŋ ma.

⁵Ǹyúo Saai ƃé gáa a vóloi kulâi-pere goyaŋ perei é tóo Zɔdiŋ Ya-leei pîlanii. Ǹɔii ŋûa pere goyaŋ perei è kùla Zɔdiŋ Ya-leei pîlanii é lí Ǹyúo Saai ma pere.

⁶Goyaŋ perei è kùla naa é lí Bɛola, Zɔdiŋ Potoi ŋûa pere. È tɛ̀ɛ naa é lí Boaŋ kɔnii ma. Boaŋ è kɛ̀ a Lubiŋ ǹóŋ.

⁷Goyaŋ perei è lì Dibɛ, é kúla naa é lí Akɔ Potoi su, é lí naa ŋûa pere, é tínaŋ Geega nyíi kɛ̀ Adumiŋ Yeei téniŋ ma botoi kwára perei. È tɛ̀ɛ Ɛsimɛɛ Yai ma é kóyaŋ Ɛroge Yai ma.

⁸Gɛ̀ ní, goyaŋ perei è tɛ̀ɛ é tɛ́ Inɔŋ Potoi kɔ̀lɛ nyíi gáa Zɛbuba-ŋai dílɔii kwára perei. (Ǹɔii ŋí káa máŋ a Zerusâlɛŋ lɔii da.) Ǹɔii ŋɔkoyaŋ perei è tɛ̀ɛ máŋ Inɔŋ Potoi mɛi yeei su vóloi liî-pere, é tɛ́ ǹɔii ŋûa pere Loaƃaiŋ Potoi su.

⁹Gɛ̀ ní, goyaŋ perei è kùla ǹyéei tôŋ su é lí Nɛtoa Yai tôŋ ma, é kúla naa é lí Ɛfɔŋ Yeei ma taa-lee-ŋai su. È kùla naa é tínaŋ é lí Beela taa-leei su. (Beela láa da ƃa Kiria-Zeriŋ.)

¹⁰Goyaŋ perei è tìnaŋ Beela vóloi liî-pere, é lí Siɛ Yeei ma, é tɛ́ɛ naa é lí Zeariŋ Yeei kwára pere, é yéŋ Bɛsimɛɛ taa-leei su, é tɛ́ɛ Tina taa-leei su. (Zeariŋ láa dɔnɔ ƃa Sesalɔŋ.)

¹¹Goyaŋ perei è kùla naa é lí ǹyéei ŋûa Ɛkulɔŋ, gɛ̀ ní é tínaŋ é lí Sikerɔŋ, é tɛ́ɛ naa é lí Beela Yeei ma é tóo Zanea taa-leei su. Gɛ̀ ní goyaŋ perei è pà é kóyaŋ Mɛditɛrenia Yuoi ma,

¹²nyíi kɛ̀ máŋ a vóloi liî-pere goyaŋ perei. Zuda ŋɔsuui su-ƃelai dílɔii ká ŋí yɛ̂ɛ berei dísuui è kɛ̀ lai.

¹³Yâwɛɛ è mò Zasua ma a gɛ́ɛ é Zuda lɔii gbua tɛ́ɛ Zefunɛ ǹóŋ Kelɛ pɔ́ é lɛ́ɛ pâi Iburɔŋ taa-leei tɛɛ̂i bɔ́. Ǹaa láa ƃé kɛ̀ a Aba taa-leei. Aba è kɛ̀ a Ana ǹâŋ.

¹⁴Kelɛ è Ana ŋɔnúu suu saaƃai ŋí kpɛ̀ ǹɔii ma é lɛ́ɛ pâi seêi naa. Dia ƃé kɛ̀ a Sisai, Aimaŋ da Taamai.

¹⁵È kùla naa é lí é kɔ́ tóo Dibɛ-ƃelai dîa. Dibɛ taa-leei ŋí láa maa ŋuŋ ƃé kɛ̀ a Seefɛ.

¹⁶Nya ƃe Kelɛ è mò ǹyɛɛi, “Ǹúui pâi Seefɛ taa-leei su kɔ-kuluƃa yée mɛi ɣâlei é naa seɣei, ŋa pâi ńoŋ nɛnii Asa tɛɛ̂i ƃɔ́ a ŋɔnɛnî.”

¹⁷Nya ƃe Kelɛ ǹéɣe surɔŋ Kena ǹóŋ surɔŋ Onɛɛ è gɔ-kuluƃa-ŋai yée mɛi ɣâle é daai síɣe. Ǹyaŋ Kelɛ è Asa tɛ̀ɛ bɔ́ a ŋɔnɛnî.

¹⁸Asa tɛɛ́ Onɛɛ pɔ́i, Onɛɛ è mò Asa ma a gɛ́ɛ é ǹâŋ Kelɛ marê kɛ́ lɔii kpûa mɛni ma. Nya ƃe è kùla ŋɔwɛlɛ sôoi mɛi é lí ǹâŋ pɔ́ naa. Ǹâŋ kɛ́ɛ a gáai, è m̀arê kɛ̀ ǹyɛɛ mai, “Lé ƃé ya ŋ̀wɛ̂lii?”

¹⁹Ǹyɛɛ m̀ai, “Ŋa ŋ̀wɛ̂lii í mɛni lɛ́lɛɛ da kɛ́ ḿî. Yaâ vɛ̃ɛ-kpâlaŋ ma lɔii tɛ́ɛ ḿbɔ. M̀ɛni ma ya tôŋ ma lɔii tɛɛ ḿbɔ.” Nya ƃe Kelɛ è ǹɔii ŋûa pere da gwára pere ya toŋ ma lɔii tɛ̂ɛ bɔ́.

²⁰Ǹɔii ká ŋí dí dɛ̀ɛ Zuda ŋɔsuui su-ƃelai pɔ́ yɛ̂ɛ berei dísuui káa lai.

²¹Zuda lɔii kwára pere taa-lee-ŋai kɛ̀ Idɔŋ lɔii ŋɔkoyaŋ perei mai dîa ƃa: Kazii, Iidɛ, Zagu,

²²Kina, Dimona, Adada,

²³Kedɛ, Azɔ, Iinaŋ,

²⁴Zifi, Telɛŋ, Bɛalo,

²⁵Azoadata, Kɛrio-erɔŋ (nyíi da dòli máŋ a Azɔi),

²⁶Ama, Sima, Molada,

²⁷Azagada, Ɛmɔŋ, Bɛpele,

²⁸Asasua, Bɛɛsiba, Biziotia,

²⁹Beela, Iiŋ, Ɛzeŋ,

³⁰Ɛtola, Kesi, Oma,

³¹Zikila, Mamaŋna, Saŋsaŋna,

³²Lebao, Siliŋ, Aiŋ da Limɔŋ. Gélee káa a taa-lêe buu feerɛ káo lɔ́ɔlu mɛi náaŋ é pɛ́lɛ dí kɔlɛ ma kpanaŋ-ŋai dîa.

³³Daa lêe-ŋai dítîŋ sui, dîa ƃa Ɛsitao, Zora, Asina,

³⁴Zanoa, Iganiŋ, Tapua, Inaŋ,

³⁵Zamu, Adulaŋ, Soko, Azeka,

³⁶Sa-araiŋ, Aditaiŋ, Gedera da Gederotiaŋ. Díkelee dí kɛ̀ a taa-lêe puu káo náaŋ da ǹaa kɔlɛ ma taa pɛlɛɛ-ŋai.

³⁷Dítîŋ lɔii su taa lee-ŋai ƃé kɛ̀ máŋ a Zenaŋ, Adasa, Mida-gaa,

³⁸Dileaŋ, Mepɛ, Zotɛɛ,

³⁹Laki, Boka, Ɛkulɔŋ,

⁴⁰Kabɔŋ, Lamaŋ, Ketile,

⁴¹Gedero, Bɛ-dagɔŋ, Neema da Makeda. Díkelee dí kɛ̀ a taa-lêe puu káo lɔ́ɔlu mɛi da é pɛ́lɛ ǹaa kɔlɛ ma kpanaŋ-ŋai dîa.

⁴²Dítîŋ su taa-lee-ŋai ƃé kɛ̀ máŋ a Lina, Ɛtɛ, Eesaŋ,

⁴³Ifita, Asina, Neezi,

⁴⁴Keila, Aizi da Marisa. Díkelee díkɛ̀ taa-lêe lɔ́ɔlu mɛi náaŋ é pɛ́lɛ ǹaa kɔlɛ ma kpanaŋ-ŋai dîa.

⁴⁵Ɛkulɔŋ taa-leei da daa-ŋai é pɛ́lɛ ǹaa kɔlɛ ma kpanaŋ-ŋai dîa díkɛ̀ máŋ Zuda lɔii su.

⁴⁶Daa-ŋai ŋí da ǹaa kɔlɛ ma kpanaŋ-ŋai é síɣe Ɛkulɔŋ é lí Mɛditɛrenia Yuoi é tóo Asɔdɔ kɔlɛ ma, díkɛ̀ Zuda lɔii su.

⁴⁷Asɔdɔ taa-leei, naa kɔlɛ ma taa pɛlɛɛi da gbanâŋ-ŋai díkɛ̀ ǹɔii ŋí su. Geza taa-leei da ŋɔkpanâŋ-ŋai é seri Ize lɔii ŋɔgoyaŋ perei ma da Mɛditɛrenia Yuoi ma da naa kɔlɛ ma kpanaŋ-ŋai díkɛ̀ ǹɔii ŋí su máŋ.

⁴⁸Zuda Yee lɔii su taa-leei-ŋai ƃa Saami, Zatii, Soko,

⁴⁹Dana, Kiria-siafa (zu-kulâi máŋ ƃa Dibɛ),

⁵⁰Ana, Ɛsitimo, Eeniŋ,

⁵¹Gosɛŋ, Olɔŋ da Gilo. Díkelee díkɛ̀ a taa-lêe puu káo tɔnɔ da díkpanâŋ-ŋai.

⁵²Zuda Yee lɔii su taa-lee-ŋai da-ŋa ƃa Arebi, Duma, Esãŋ,

⁵³Zaniŋ, Bɛ-tapua, Afɛ,

⁵⁴Uŋta, Kiria Aba (nyíi da dòli máŋ a Iburɔŋ) da Ziɔɔ. Díkelee díkɛ̀ a taa-lêe lɔ́ɔlu mɛi náaŋ da díkpanâŋ-ŋai.

⁵⁵Zuda Yee lɔii su taa-lee-ŋai da-ŋa máŋ ƃa Meeɔŋ, Kamɛɛ, Zifi, Zuta,

⁵⁶Zariɛɛ, Zɔde-aŋ, Zanoa,

⁵⁷Kãiŋ, Geƃia da Tina. Díkelee díkɛ̀ a taa-lêe puu da díkpanâŋ-ŋai.

⁵⁸Zuda Yee lɔii su taa-lee-ŋai da-ŋa ká ŋí: Aau, Bɛ-zɔɔ, Gedɔ,

⁵⁹Meara, Bɛ-anɔ da Ɛɛtekɔ̃ŋ. Díkelee díkɛ a taa-lêe lɔ́ɔlu mɛi-da da díkpanâŋ-ŋai.

⁶⁰Zuda Yee lɔii su taa-lee-ŋai da-ŋa ŋɔ́nɔ ƃa Kiria-baa (zu-kulâi ƃa Kiria-Zeriŋ) da Laba é pɛ́lɛ ma díkpanâŋ-ŋai dîa.

⁶¹Vɛ̃ɛ-kpâlaŋ su taa-lee-ŋai ká ŋí: Bɛ-araba, Midiŋ, Sekaka,

⁶²Nisãŋ, Gbolo taa-leei da Ɛŋgidi é pɛ́lɛ taa-lêe lɔ́ɔlu mɛi-da ma da díkpanâŋ-ŋai.

⁶³Kɛ́lɛ Zuda-ŋai dífe pɔri ní Zabuza-ŋai kpɛ̂i kɛ̀ Zerusâlɛŋ. Da dîa-ni díkaa naa é too sâa foloi ŋí ma.