Read Kpelle Zasua 20 Bible Online

Zasua 20 - Kpelle bible

Zasua 20

¹Yâwɛɛ è mò Zasua ma ǹyɛɛi,

²“M̀ó Eezuɛ-ŋai dîa a gɛ́ɛ dí maa kɔ̃̂ɔ taa-lee-ŋai lɛ́ ŋá mɛni ƃò Mose mai.

³À kɛ̀ núu da a m̀arâŋ nuu pàa nyíi vé gíri níi, a pɔri pûi é lí da su. Ǹaa ƃé m̀aa nûui a pâi kpɔŋ mâa sɔlɔ ƃôi naa a gɛ́ɛ nuui è bàai, ŋɔnûai dífe bàa ǹyaa máŋ.

⁴Kɛ́lɛ m̀aa nûui é lɛ́ɛ pâi tɛ̂i daa lêe-ŋai ŋí da su, fɛ̂ɛ é tɔ́ɔ ǹaa siɣãŋ lá é ŋɔmɛnii ŋáa lɛ́ naa ǹúu pɔ̂lɔ-ŋai dîa. À kpɛ̀ɛ a ŋɔmɛnii ŋáa lɛ́ɛ, da tɛ̀ là daai su dí kwaa ma tɛɛ bɔ́ naa gɛ́ ƃò naa.

⁵Ǹyaŋ à kɛ̀ zaa nûui ŋɔnúu da à pà é m̀ó a gɛ́ɛ dí dɛɛ bɔ́, dífe pâi gɛ̂i, kpɛ́ni fêi, vé gíri ní é gɛ́.

⁶A pâi lɛɛ̂i m̀aa kɔ̃ɔ taai kpîŋ su é lɛ́ɛ la zu dí ŋɔmɛnii su káa. Da kpɛ̀ɛ a ŋɔmɛnii su káa, a lɛ̂ɛ naa é lɛ́ɛ la zu zâla láa soŋ-nûu kɛ́tɛi kɛ́ naa a m̀ɛnii kpîŋ kɛ́ tãi é sáa. Zâla láa soŋ-nûui kpîŋ à sàa, gɛ̀ ní da m̀aa nûui ŋuŋ ma ƃò é lí bɔ́ taai.”

⁷Nya ƃe dí taa-lêe saaƃa lɛ̀ a gɛ́ɛ dí kɛ́ ƃò a m̀aa kɔ̃̂ɔ taa-lee-ŋai Zɔdiŋ Ya-leei pôlu vóloi liî-pere. Daa lêe-ŋai ŋí ƃa Kedɛ nyíi kɛ̀ Galalii kpiniŋ su ǹyée lɔii su Nɛfɛtɛli lɔii mai, Sɛkɛŋ nyíi kɛ̀ ǹyée lɔii su Ifiraŋ lɔii mai, da Kiria Aba (nyíi da dòli máŋ a Iburɔŋ) nyíi kɛ̀ ǹyée lɔii su Zuda lɔii mai.

⁸M̀aa kɔ̃̂ɔ taa-lee-ŋai kɛ̀ vóloi kulâi-pere é síɣe Zɛleko pere Zɔdiŋ Ya-leei kɔlɛi ƃé kɛ̀ a: Bizɛ nyíi kɛ̀ vɛ̃ɛ-kpâlaŋ su Lubiŋ lɔii mai, Lemɔ nyíi kɛ̀ Gilia kpiniŋ su Gâa lɔii mai da Golaŋ nyíi kɛ̀ Basãŋ kpiniŋ su Manasɛ lɔii mai.

⁹M̀aa kɔ̃̂ɔ taa-lee-ŋai ká ŋí kɛ̀ Eezuɛ-ŋai mɛni ma da ŋ̀ɔ̃ya-ŋai kɛ̀ dísamai. Dí kɛ̀ naa a gɛ́ɛ núu da a m̀arâŋ nuu pàa nyíi vé gíri níi, a pɔ̂ri pûi é lí da su, a gɛ́ɛ ǹúui tí è bàai, ŋɔnúu da fé bàa ǹyaa máŋ é lɛ́ɛ la zu dí ŋɔmɛnii su káa.