Read Kpelle Zasua 22 Bible Online

Zasua 22 - Kpelle bible

Zasua 22

¹Nya ƃe Zasua è lòno Lubiŋ ŋɔsuui su-ƃelai, Gâa ŋ̀ɔ-ŋai da Manasɛ ŋɔsuui su nuu kpului dɔnɔ pɔ́ naa

²ǹyɛɛ dîai, “Kâa m̀ɛnii kélee kɛ́ Yâwɛɛ yée mu nuui Mose è mò kâai, ka tela ŋ́oo mɛni, ka m̀ɛnii kélee kɛ́ ŋá mò kâai.

³Káfe Káɣâlai Yâwɛɛ wóo pìli ní. Káfe tela ǹia ní káƃarâai Eezuɛ-ŋai dîa.

⁴Káɣâlai Yâwɛɛ a lii-sêe tɛ̀ɛ káƃarâa Eezuɛ-ŋai pɔ́ yɛ̂ɛ berei è góno tèe lai. M̀ɛni ma ka lí pôlu kápɔ-taai ká sée ǹɔii ma Yâwɛɛ ŋɔyée mu nuui Mose è dɛ̀ɛ kápɔ Zɔdiŋ Ya-leei pôlui.

⁵Káfe ǹîa ní Yâwɛɛ ŋɔtɔ̂ŋ-ŋai kélee mɛi káa mɛni ma nyíi ŋɔyée mu-nuui Mose è dɛ̀ɛ kápɔi, a gɛ́ɛ ká Káɣalai Yâwɛɛ wɛ́li, ká ǹîa mɛnii kɛ́, ká kánaŋ m̀a, ká tíi kɛ́ mì a kálii kélee da kámɔ̂leŋ kélee.”

⁶Nya ƃe Zasua è lûwa tòo dîa, é m̀ó dîa a gɛ́ɛ dí lí dípɔ-taai. Nya ƃe dí lì.

⁷Mose ƃé lɔii tɛ̂ɛ Manasɛ ŋɔsuui su nuu-kpului dɔnɔ pɔ́ Basãŋ lɔii kpiniŋ su Zɔdiŋ Ya-leei kɔlɛ vóloi kulâi-pere. Kɛ́lɛ Zasua ƃé lɔii tɛ̂ɛ Manasɛ ŋɔsuui su-ƃelai gbéli-ŋai pɔ́ Zɔdiŋ Ya-leei pôlu vóloi liî-pere. Zasua kɛ́ɛ a ŋ̀óo tée la dîa a gɛ́ɛ dí lí dípɔ-taai, è lûwa tòo dîa.

⁸È mò dîa ǹyɛɛi, “Ka lí kápɔ-taai a dɔɔ sãai ŋí: taa-tûlɛ-ŋa, káne, gôo, ƃara, kɔli da zeɣe-ŋa, ǹyɛɛ dîa ka lí a zãâi ŋí ká da tɛɛ káƃarâai Eezuɛ-ŋai pɔ́.”

⁹Nya ƃe Lubiŋ da Gâa dísuui su-ƃelai da Manasɛ ŋɔsuui su nuu kpului dɔnɔ dí li pôlu dípɔ-taai Gilia. Dí díƃarâa Eezuɛ-ŋai lɛ̀ɛ Silo taa-leei su Keena lɔii ma dí lí Gilia lɔii ma nyíi Mose è ǹaa tɛ̀ɛ dípɔ yɛ̂ɛ berei Yâwɛɛ è mò la dîa Mose sârai.

¹⁰Lubiŋ da Gâa dísuui su-ƃelai da Manasɛ ŋɔsuui su-nuu kpului dɔnɔ kɛ́ɛ da seri Gelilo daai Zɔdiŋ Ya-leei kɔlɛ Keena lɔii mai, dí ɣâla teƃele kɛ́tɛ tɔnɔ tɔ̀ɔ naa ǹyái kɔlɛ.

¹¹Eezuɛ-ŋai kpéli-ŋai kɛ́ɛ da m̀ɛnii ŋí mɛ́nii, dí mò dîyɛɛi, “Ka gáa, Lubiŋ da Gâa dísuui su-ƃelai da Manasɛ ŋɔsuui su nuu kpului dɔnɔ daâ ɣâla-teƃele tɔ̀ɔ kúlɔii ma Zɔdiŋ Ya-leei kɔlɛ.”

¹²Eezuɛ-ŋai kɛ́ɛ da mɛ̀nii, dí díŋaa tɛ̀ ma Silo a gɛ́ɛ dí kɔ́ pɛ́lɛ Lubiŋ, Gâa da Manasɛ-ni dîa.

¹³Nya ƃe Eezuɛ-ŋai dí Elieza ǹóŋ Finea nyíi kɛ̀ a zâla láa-soŋ nuui tɛ̀ɛ Gilia lɔii su, Lubiŋ, Gâa da Manasɛ ŋɔsuui su nuu kpului dɔnɔ pɔ́ naa.

¹⁴Dí Eezuɛ-ŋai láa túɛ-ƃelai buu pîlaŋ Finea ma a gɛ́ɛ da dîa-ni dí lí. Dí ǹûai kùla dínuu sîi-ŋai láa túɛ-ƃelai sáma a tɛ̀ɛ-ŋa.

¹⁵Nya ƃe dí pà Lubiŋ, Gâa da Manasɛ-ŋai pɔ́ naa Gilia lɔii su, dîɛ dîai,

¹⁶“Yâwɛɛ ŋɔnûai dí mò dîyɛɛi, ‘Lé woya mɛni ƃe ŋí ká gɛ̀ a Eezuɛ Ŋɔɣâlai? Ka kápôlu tɔ̀ɔ Yâwɛɛ ma, ka ɣâla teƃele tɔ̀ɔ kákpîŋ mɛni ma lé mɛni ma?

¹⁷Zɔnyɔ̂ŋ kú gɛ̀ a Yâwɛɛ Piyɔɔ taa-leei sui gíli fé lɛ́ɛ ní káŋa? Yâwɛɛ è kúkula maa kɛ̀ a kɔlɔ-fela berei máŋ kúkaa la a ŋɔnûai. Ǹyaŋ kúkaa niî mɔ̃lɛ̂i zɔnyɔ̂ŋ tí mɛni ma.

¹⁸Kákaa ŋɔ́nɔ kápôlu tɔɔ̂i Yâwɛɛ ma? À kɛ̀ ka kápôlu tɔ̀ɔ m̀a, gɛ̀ ní a pâi ǹíi ŋwânai Eezuɛ-ŋai kélee dîa.

¹⁹Kɛ́lɛ à kɛ̀ ká gɔ́lɔŋ a gɛ́ɛ kálɔii maa fé waa ní Yâwɛɛ fɛli mɛni ma, gɛ̀ ní ka pá ƃɛ́i Ŋɔsua kɔ̂lɔ seɣe-pɛrɛi káa naai, ká kwaa ma kpɛtɛ naa m̀ɛni ma. Kɛ́lɛ káfe tɔ̀ɔ m̀a, kpaa máŋ ká tɔ́ɔ kûa, kákɛ ŋɔɣâla-teƃelei lɛ̂ɛ, ká kákpîŋ ŋ̀ɔɔ tɔɔ.

²⁰M̀ɛni nyɔ́mɔɔi Zera ǹóŋ Eekãŋ è gɛ̀i, m̀aa mɛ̂ni kíli fé lɛ̀ɛ ní kákili ŋá? Zãâi dí mò a gɛ́ɛ nùu da fé ziɣei è da sìɣe, ǹyaŋ káai a Eezuɛ-ŋai kélee káfe mɛni sôli káa ní zu? Ǹyaa tɔ̂nɔ fé sàa ní ŋɔsɔyɔ̂ŋ mɛni su.’ ”

²¹Nya ƃe Lubiŋ da Gâa dísuui su-ƃelai da Manasɛ suui su nuu kpului dɔnɔ dí Eezuɛ láa túɛ-ƃelai ŋí wóo su tòo dîɛ dîai,

²²“Ŋ̀wála-wâla kélee Ɣalai ƃa Yâwɛɛ. Ǹyaa kpîŋ è gɔ́lɔŋ, ǹyaŋ tɔɔ Eezuɛ-ŋai kélee dí gɔ́lɔŋ! À kɛ̀ kú m̀ɛnii ŋí kɛ̀ a gɛ́ɛ kú tɔ́ɔ m̀a, gɛ̀ ní ka kúpaa sâa,

²³kpɛ́ni fêi, kwa ɣâla teƃele tɔɔ kúkpiŋ mɛni ma, kpaa máŋ à kɛ̀ kú gɛ̀ tí a gɛ́ɛ kú kéreŋ-sala, mii-sɛŋ-sala, kpaa máŋ lii-sêe sala kula ma, gɛ̀ ní tɔɔ Yâwɛɛ ǹyaa kpîŋ é kúkula maa kɛ́.

²⁴Kú gɛ̀ tí, kpɛ́ni fêi, kúfe ŋ̀wɛ̂lii kánîa-pɛlɛɛi dí tínaa mó kúwɔ̂ nia-pɛlɛɛi dîa dîyɛɛi, ‘Eezuɛ Ŋɔɣâlai Yâwɛɛ fé a kápɔɔ!

²⁵A Zɔdiŋ Ya-leei kɛ́ a goyaŋ perei kwa kâa-ni kúloai, ǹyaŋ káai a Lubiŋ da Gâa nuu suui, Yâwɛɛ fé a Káɣâla.’ Gɛ̀ ní kánîa-pɛlɛɛi da pâi gɛ̂i kúwɔ̂ nia-pɛlɛɛi dí kpéra Yâwɛɛ fɛlîi.

²⁶Mɛni ma kú Ɣâla teƃele tɔ̀ɔ. Kúfe dɔ̀ɔ ní kéreŋ sâla kùla mɛni ma, kpaa máŋ sâla da kpɛ́ni.

²⁷Kɛ́lɛ é kɛ́ a sêre kwa kâa-ni kúloai da kúlônii é ǹɛ́ a gɛ́ɛ Yâwɛɛ káa a Kúɣâla, ǹyaŋ kú tíi kɛ̀ mì, kú kéreŋ sâla, lii-sêe sala da sâla da kpɛ́ni kúla ma. À wàla kɛ́ tí, kánîa-pɛlɛɛi da pâi tínaa m̀ôi kúwɔ̂-ŋai dîa dîyɛɛi, ‘Yâwɛɛ fé a Káɣâla.’

²⁸Kúkili-ŋa siâi ƃé kɛ̀, à kɛ̀ da mò tí kúlônii dîa, diaŋ da pâi m̀ôi dîyɛɛi, ‘Ka gáa, Ŋ̀âla-teƃelei kánâŋ-ni dí wɔ́lɔ gbɛ̀tɛ Yâwɛɛ mɛni mai ká ŋí. Dífe dɔ̀ɔ ní sâla kùla mɛni ma, kɛ́lɛ dí dɔ̀ɔ a gɛ́ɛ é kɛ́ a sêre kúloai kwa káa-ni.’

²⁹É folôŋ kûa a gɛ́ɛ kú tɔ́ɔ Yâwɛɛ ma, kú kúkpɔɔi ɣala-teƃele tɔɔ sâla kula mɛ̂ni ma é tée la Yâwɛɛ ŋɔteƃelei ma tɔɔ̂ni Ŋɔsua kɔ̂lɔ seɣe-pɛrɛi mui!”

³⁰Gɛ́ɛ zâla láa soŋ-nuui Finea da Eezuɛ láa túɛ-ƃelai da Lubiŋ, Gâa da Manasɛ ŋɔsuui su-ƃelai wóo mɛ́nii, dílii è làa.

³¹Zâla láa soŋ-nuui Finea è mò Lubiŋ, Gâa da Manasɛ ŋɔsuui su-ƃelai dîa ǹyɛɛi, “Kwaâ sâa gɔ́lɔŋ a gɛ́ɛ Yâwɛɛ káa kúsama, kpɛ́ni fêi, káfe ŋ̀ôya mɛnii ŋí kɛ́ ní la. Kâa Eezuɛ-ŋai ŋuŋ ma ƃó Yâwɛɛ yêei m̀ɛni kpɔ̂lui ŋí su.”

³²Nya ƃe Finea da Eezuɛ láa túɛ-ƃelai dí kùla Lubiŋ da Gâa ŋɔsuui su-ƃelai pɔ́ naa Gilia dí lí pôlu Keena dí m̀ɛnii kélee su kula Eezuɛ-ŋai dîa.

³³Díkoraŋ ƃói è Eezuɛ-ŋai líi làa. Eezuɛ-ŋai dí Ɣâla láa maa tɛ̀. Dífe ŋɔ́nɔ kɔ́ mɛni da kpɛ̀tɛ ní é pîlaŋ Lubiŋ da Gâa dísuui su-ƃelai dîa.

³⁴Nya ƃe Lubiŋ da Gâa dísuui su-ƃelai dí ŋ̀âla-teƃelei láa sèe a Sêre, dîɛi, “Kwaa ǹáa seêi ŋí, kpɛ́ni fêi, gáa a sêre kwa kâa-ni kúloai a gɛ́ɛ Yâwɛɛ káa a Ɣâla.”